Sanebimɔ He

● Mɛni esa akɛ akɛkpɛtɛ asafo lɛ adafitswaa tao lɛ nɔ?

Adafitswaa tao ni yɔɔ Maŋtsɛyeli Asa lɛ nɔ lɛ kɛ adafitswaa ni kɔɔ asafo lɛ nitsumɔi ahe haa. Akɛ sane ko akɛkpɛtɛ nɔ ni onukpai asɛinɔtalɔ lɛ leee he eko.

Nibii ni akɛkpɛtɛɔ nɔ daa lɛ ekomɛi ji: Sɔɔmɔ Kpee kɛ Teokrase Sɔɔmɔ Skul lɛ he gbɛjianɔtoo loo nitsumɔi, maŋshiɛmɔi ni ato naa akɛ abaaha, mɔ ni baafee sɛinɔtalɔ kɛ Buu-Mɔɔ kanelɔi agbɛi, he ni asafo Woloŋ Nikasemɔi lɛ yɔɔ, kpokpaa nɔkwɛlɔ lɛ saramɔ ni baa kɛ saji krokomɛi ni kɔɔ he, adafitswaa ni kɔɔ kpee ni baa he, Maŋtsɛyeli Asa lɛ nɔ saamɔ be he gbɛjianɔtoo. Yɛ bei komɛi amli lɛ Asafo lɛ faa onukpai lɛ ni amɛkɛ woji komɛi ni aŋmala mli loo nibii krokomɛi akpɛtɛ nɔ. Kɛ nɔ ko ni yɔɔ sɔrɔto je kpo lɛ, onukpai akuu lɛ baakpɛ amɛyiŋ akɛ esa akɛ akɛkpɛtɛ tao lɛ nɔ lo.

Eyɛ mli akɛ abaanyɛ atswa yookpeemɔ ko he adafi kuku akɛ ebaaba nɔ yɛ Maŋtsɛyeli Asa lɛ nɔ yɛ kpee lɛ ekome shishi moŋ, shi akɛ yookpeemɔ he adafitswaa lɛ kpɛtɛŋ adafitswaa tao lɛ nɔ. Ni asaŋ efeŋ nɔ ni ja gbɛ akɛ akɛ mɔ ko teemɔŋ nifeemɔi ahe adafitswaa aaakpɛtɛ tao lɛ nɔ, ejaakɛ enɛ kɔɔɔ asafo lɛ nitsumɔi ahe.​—Kwɛmɔ Buu-Mɔɔ, October 1, 1984, baafa 19; Wɔ Maŋtsɛyeli Sɔɔmɔ October 1975, baafa 4, kɛ September 1970, baafa 3.

Esa akɛ aha adafitswaa tao lɛ nɔ atse ni efee fɛo. Esa akɛ eda bɔ ni sa koni anyɛ akɛ nibii ni atsi ta lɛ akpɛtɛ nɔ. Esa akɛ ajie nibii ni be eho ni asafo lɛ ele momo lɛ kɛjɛ nɔ amrɔ nɔŋŋ. Kɛ asafoi fe ekome kpeɔ yɛ Asa kome too lɛ nɔŋŋ nɔ lɛ, esa akɛ asafo fɛɛ asafo ana lɛ diɛŋtsɛ etao, ni akadi lɛ faŋŋ. Wɔmiijie yi akɛ sɛinɔtalɔ lɛ loo mɔ ni ebaahala akwɛ tao lɛ nɔ yɛ be kɛ bei amli akɛ nɔ ni akɛkpɛtɛ nɔ lɛ yɛ ehee, amɛsa, ni amɛhe tse lo.