Sanebimɔ He

◼ Mɛɛ saji esa akɛ akɛha yɛ kpee kɛha shiɛmɔyaa lɛ shishi?

Yiŋtoo ni yɔɔ kpee kɛha shiɛmɔyaa lɛ sɛɛ ji ni eye ebua wɔ ni wɔjwɛŋmɔ ahi nitsumɔ ni nyiɛ sɛɛ ni ji—sɔɔmɔ nitsumɔ lɛ nɔ. No hewɔ lɛ, esa akɛ mɔ ni kwɛɔ nɔ lɛ asaa ehe jogbaŋŋ, ni efee klalo akɛ ekɛ nɔ ko ni woɔ mɔ hewalɛ, nɔ ko pɔtɛɛ ni anyɛɔ akɛtsuɔ he nii baaha. Kɛji akɛ daa gbi ŋmalɛ lɛ kɔɔ shiɛmɔ nitsumɔ lɛ he tɛ̃ɛ lɛ, abaanyɛ akane ni asusu he kuku. Shi kɛlɛ, esa akɛ kpee lɛ afee nɔ ni kɔɔ sɔɔmɔ nitsumɔ lɛ he titri, koni eye ebua mɛi fɛɛ ni kɛ amɛhe woɔ odaseyeli nitsumɔ lɛ mli lɛ ní amɛfee mɛi ni amɛsaa amɛhe jogbaŋŋ bɔ ni sa ni amɛaagbe sɔɔmɔ kɛha nakai gbi lɛ naa kwraa.—2 Tim. 4:5.

Abaanyɛ asusu saji otii ni sa ni yɔɔ Wɔ Maŋtsɛyeli Sɔɔmɔ lɛ mli lɛ ahe koni mɔ fɛɛ mɔ ale wolo ni akɛtsuɔ nii lɛ kɛ gbɛ ni abaatsɔ nɔ akɛha. Yɛ Woji Tɛtrɛbii Agbi nɔ lɛ, abaanyɛ afee shiɛmɔ wiemɔ ni ji, “Nɔ ni Esa akɛ Owie yɛ Woji Tɛtrɛbii lɛ Ahe” lɛ mli lɛ he nɔkwɛmɔnɔ. Kɛha tafaai krokomɛi lɛ, abaanyɛ ama hiɛkpamɔ wiemɔi enyɔ loo ekome ni yɔɔ Reasoning wolo lɛ mli ni sa kɛha shikpɔŋkuku lɛ anɔ mi. Abaanyɛ asusu sɔɔmɔ nitsumɔ lɛ fã ko ni he hiaa lɛ he loo afee he nɔkwɛmɔnɔ, tamɔ bɔ ni akɛ Biblia lɛ tsuɔ nii yɛ shinaai anaa, bɔ ni aaafee aku mɔ ni foɔ sanegbaa mli lɛ naa, bɔ ni aaafee aje Biblia kasemɔ shishi, aloo bɔ ni adiɔ mɛi ni tsɔɔ miishɛɛ lɛ asɛɛ.

Esaaa akɛ kpee kɛha shiɛmɔyaa lɛ yeɔ fe minitii 10 kɛmiishɛ 15, ni kui lɛ agbɛjianɔtoo, shikpɔŋkuku kɛhamɔ, kɛ sɔlemɔ fɛɛ fata he. Kɛji akɛ agbɛ mli akɛ aaya lɛ, esa akɛ mɛi ni eba jɛmɛ lɛ fɛɛ ale mɔ ni ekɛ lɛ yaa kɛ he ni ayaatsu nii yɛ, ni esa akɛ amɛshi kɛya shikpɔŋkuku lɛ mli amrɔ nɔŋŋ. Akɛni kpee lɛ sɛɛ etsɛɛɛ hewɔ lɛ, ehe miihia ni mɔ fɛɛ mɔ ashɛ jɛmɛ mra. Kɛji ákɛ akɛ kpee kɛha shiɛmɔyaa tsa asafoŋ nikasemɔ nɔ, tamɔ Buu-Mɔɔ Nikasemɔ lɛ nɔ nɛkɛ lɛ, esa akɛ efee kuku. Ehe ehiaaa ni asusu daa gbi ŋmalɛ lɛ he, ejaakɛ ana Ŋmalɛ mli saji ahe susumɔ ni ŋɔɔ momo.

Esa akɛ atsɔ hiɛ ahala nyɛmimɛi hii ni sa ni abaptisi amɛ ni amɛkwɛ kpee kɛha shiɛmɔyaa lɛ eko fɛɛ eko nɔ. Kɛji akɛ mɔ ko ni tamɔ nakai bɛ ni baanyiɛ hiɛ yɛ gbi pɔtɛɛ ko nɔ lɛ, esa akɛ onukpai lɛ atsɔɔ nyɛmimɛi yei ni abaptisi amɛ ni baanyɛ afee nakai kɛji akɛ hiamɔ ko ni tamɔ nakai te shi. Nyɛmi yoo lɛ baata shi ni eha amɛsusu daa gbi ŋmalɛ lɛ loo saji otii komɛi ni kɔɔ shiɛmɔ nitsumɔ lɛ he lɛ ahe, ni eha ewiemɔ lɛ afee kuku. Ebaahà eyiteŋ yɛ nakai feemɔ mli.

Kpee kɛha shiɛmɔyaa ji hegbɛi ni hi jogbaŋŋ kɛha wɔ koni awo wɔ hewalɛ ni awula wɔ ni wɔkɛ wɔhe awo sɔɔmɔ nitsumɔ lɛ mli. Kɛji akɛ mɔ ni kwɛɔ nɔ lɛ saa ehe jogbaŋŋ lɛ, ehe baaba sɛɛnamɔ diɛŋtsɛ kɛha mɔ fɛɛ mɔ.