Ná Kpeei Kɛha Shiɛmɔyaa lɛ Ahe Sɛɛ Kɛmɔ Shi
1. Kpeei kɛha shiɛmɔyaa yeɔ buaa wɔ yɛ mɛɛ gbɛ nɔ?
1 Kpeei ni atoɔ he gbɛjianɔ jogbaŋŋ kɛha shiɛmɔyaa lɛ woɔ mɔ hewalɛ diɛŋtsɛ, ni atsɔɔ nɔ akɛ gbɛtsɔɔmɔi ni sa haa wɔ dani wɔyaa shiɛmɔ. Kpeei nɛɛ haa wɔnáa hegbɛ wɔkɛ mɛi krokomɛi yaa shiɛmɔ ni wɔyeɔ wɔbuaa wɔhe ni asaŋ mɔ kaseɔ nii kɛjɛɔ enaanyo dɛŋ. (Abɛi 27:17; Jaj. 4:9, 10) Mɛɛ gbɛ nɔ wɔɔtsɔ wɔná kpeei nɛɛ ahe sɛɛ kɛmɔ shi?
2. Mɛɛ saji nɛkɛ mɔ ni baakwɛ kpee lɛ nɔ lɛ baanyɛ ekɛ shiɛlɔi lɛ asusu he?
2 Kpee lɛ Nɔkwɛlɔ: Bei pii lɛ, atsɔɔɔ hiɛ atsɔɔɔ sane pɔtɛɛ ni abaasusu he yɛ kpee kɛha shiɛmɔyaa lɛ mli. No hewɔ lɛ, kɛ́ bo obaakwɛ nɔ lɛ, ebaabi ni osaa ohe jogbaŋŋ. Kaaha efee osu akɛ be fɛɛ be ni abaakpe lɛ, obaaha asusu daa gbi ŋmalɛ lɛ he. Kɛlɛ, kɛ́ ekɔɔ shiɛmɔ nitsumɔ lɛ he tɛ̃ɛ lɛ, no lɛ nyɛbaanyɛ ni nyɛsusu he. Kwɛmɔ gbɛ nɔ ni oootsɔ okɛ yelikɛbuamɔ ni sa aha mɛi ni ebakpe shi kɛha shiɛmɔyaa lɛ. Ákɛ nɔkwɛmɔnɔ lɛ, obaanyɛ okɛ amɛ asusu gbɛ ni aaatsɔ nɔ akɛ wolo ni akɛtsuɔ nii lɛ aha aloo oha afee he nɔkwɛmɔnɔ atsɔɔ amɛ. Obaanyɛ okɛ amɛ asusu sane oti ko ni yɔɔ Reasoning wolo lɛ loo Sɔɔmɔ Skul wolo lɛ mli lɛ he. Obaanyɛ hu ni okɛ amɛ asusu sane ko ni asusu he yɛ Sɔɔmɔ Kpee lɛ mli nyɛsɛɛ nɛɛ lɛ he. Yɛ be krokomɛi amli lɛ, obaanyɛ okɛ amɛ asusu naagbai komɛi ni nyɛbaanyɛ nyɛkɛkpe yɛ nyɛshikpɔŋkuku lɛ mli lɛ ahe. Kɛ́ sɛɛkuu-kɛsaramɔ ayaafee lɛ, no lɛ nyɛbaanyɛ nyɛsusu gbɛ nɔ ni aaatsɔ atee shiatsɛmɛi lɛ amiishɛɛ shi ni akɛ amɛ aje Biblia kasemɔ shishi. Ha sane fɛɛ sane ni nyɛbaasusu he lɛ afee miishɛɛ kɛ nɔ ni woɔ mɔ hewalɛ.
3. Minitii enyiɛ esa akɛ kpee lɛ ahé, ni mɛni esa akɛ atsu he nii yɛ nakai be lɛ mli?
3 Jee kpee lɛ shishi yɛ be naa ekɔɔɔ he eko kɛ́ ole akɛ mɛi komɛi baakpe sɛɛ kɛba. Okɛ hiɛshikamɔ ajara shiɛlɔi lɛ, ni oha mɛi ni bɛ shikpɔŋkuku lɛ eko. Esa akɛ kpee lɛ ahé minitii 10 loo 15 aloo nɔ ni shɛɛɛ nakai kɛ́ enyiɛ asafoŋ kpee sɛɛ. Dani obaamu kpee lɛ naa lɛ, esa akɛ mɔ fɛɛ mɔ ale mɔ ni ekɛyaa shiɛmɔ lɛ kɛ he ni amɛbaatsu nii yɛ. Esa akɛ asɔle kɛmu kpee lɛ naa.
4. Mɛni baaye abua wɔ fɛɛ koni wɔná kpeei kɛha shiɛmɔyaa lɛ ahe sɛɛ?
4 Nyɛbaanyɛ Nyɛye Nyɛbua: Taakɛ eji yɛ asafoŋ kpeei agbɛfaŋ lɛ, kɛ́ wɔshɛ kpeei kɛha shiɛmɔyaa lɛ ashishi yɛ be naa lɛ, wɔkɛ no tsɔɔ bulɛ ni wɔyɔɔ kɛha Yehowa kɛ mɛi ni baaba lɛ. Okɛ ohe awo sane ni abaasusu he lɛ mli. Obaanyɛ oha mɔ ni kwɛɔ kpee lɛ nɔ aha bo mɔ ko kɛya, aloo obaanyɛ otsɔ hiɛ okɛ mɔ ko ato gbɛjianɔ koni kɛ́ nyɛbakpe ni akpa lɛ, ni nyɛya. Kɛ́ obaasumɔ ni otsɔ hiɛ okɛ mɔ ko ato gbɛjianɔ lɛ, no lɛ bɔɔ mɔdɛŋ koni ‘omli alɛɛ’ kɛtsɔ shiɛlɔi srɔtoi ni okɛaaya moŋ fe nɔ ni be fɛɛ be lɛ okɛ onanemɛi ni osumɔɔ amɛsane lɛ pɛ aaaya. (2 Kor. 6:11-13) Kɛ́ agbe kpee lɛ naa lɛ, kaatsake mɔ ni okɛ lɛ eto gbɛjianɔ lɛ, ni asaŋ nyɛshia amrɔ nɔŋŋ kɛyaa shikpɔŋkuku lɛ mli.
5. Mɛni hewɔ afeɔ kpeei kɛha shiɛmɔyaa lɛ?
5 Kpeei kɛha shiɛmɔyaa kɛ asafoŋ kpeei lɛ fɛɛ hiɛ yiŋtoo kome. Atoɔ kpeei nɛɛ ahe gbɛjianɔ bɔni afee ni ‘wɔyɔseyɔsee wɔhe koni wɔhiɛ adɔ suɔmɔ kɛ nitsumɔi kpakpai ahe.’ (Heb. 10:24, 25) Kɛ́ wɔmia wɔhiɛ bɔni afee ni wɔná kpeei nɛɛ ahe sɛɛ lɛ, no lɛ abaaye abua wɔ koni wɔnyɛ wɔtsu wɔshiɛmɔ nitsumɔ lɛ—hɛɛ eji ‘nitsumɔ kpakpa’!