Sanebimɔ He

◼ Mɛɛ gbɛ nɔ esa akɛ atsɔ atsɛ lala ni akɛjeɔ Teokrase Sɔɔmɔ Skul lɛ, Sɔɔmɔ Kpee lɛ, Maŋshiɛmɔ lɛ, kɛ Buu-Mɔɔ Nikasemɔ lɛ shishi lɛ, ni namɔ esa akɛ etsɛ?

Lalai ni akɛjeɔ Teokrase Sɔɔmɔ Skul ni afeɔ otsi fɛɛ otsi lɛ shishi lɛ jeɔ kpo yɛ Teokrase Sɔɔmɔ Skul He Gbɛjianɔtoo wolo ni akɛhɔɔ October Wɔ Maŋtsɛyeli Sɔɔmɔ lɛ mli lɛ mli. Atsɔɔ lalai ni akɛjeɔ Sɔɔmɔ Kpee lɛ shishi otsi fɛɛ otsi kɛ nɔ ni akɛgbeɔ naa lɛ yɛ Wɔ Maŋtsɛyeli Sɔɔmɔ lɛ baafa 2 lɛ. Nakai nɔŋŋ hu atsɔɔ lalai ni akɛjeɔ Buu-Mɔɔ Nikasemɔ lɛ shishi otsi fɛɛ otsi kɛ nɔ ni akɛgbeɔ naa lɛ yɛ Buu-Mɔɔ lɛ eko fɛɛ eko baafa 2 lɛ. Lalai ni akɛha lɛ fata kpee pɔtɛɛ ni ejeɔ kpo yɛ mli lɛ he, no hewɔ lɛ nyɛmi nuu ni baaje kpee lɛ shishi lɛ ji mɔ ni esa akɛ etsɛ lala lɛ shi jeee mɔ ni kwɛ kpee ni tsɔ hiɛ lɛ nɔ lɛ.

Ákɛ nɔkwɛmɔnɔ lɛ, Teokrase Sɔɔmɔ Skul nɔkwɛlɔ lɛ baahere toibolɔi lɛ atuu, ebaatsɛ lala ni akɛbaaje shishi lɛ, ebaakwɛ skul lɛ nɔ, ni no sɛɛ lɛ ebaafɔ̃ klɛŋklɛŋ wielɔ yɛ Sɔɔmɔ Kpee lɛ mli lɛ nine kɛba wiemɔ kpoku lɛ nɔ. Nyɛmi nuu ni baagbele Sɔɔmɔ Kpee lɛ naa lɛ ji mɔ ni esa akɛ etsɛ lala ni akɛbaaje Sɔɔmɔ Kpee lɛ shishi lɛ.

Sɛinɔtalɔ kɛha Maŋshiɛmɔ lɛ baagbele naa yɛ gbɛ ni tamɔ nakai nɔŋŋ nɔ. Ekɛ miishɛɛ baahere mɛi fɛɛ ni eba lɛ atuu, kɛkɛ lɛ no sɛɛ lɛ efɔ̃ amɛ nine koni amɛfata ehe kɛla lala ni wielɔ lɛ etsɔɔ akɛ akɛje shishi lɛ. Sɛinɔtalɔ lɛ (loo ekolɛ nyɛmi nuu ko ni sa ni atsɔ hiɛ aha ele) baasɔle kɛgbele kpee lɛ naa. Sɛinɔtalɔ lɛ baatsɔɔ mɔ ni baaha wiemɔ lɛ kɛkɛ lɛ etsɔɔ maŋshiɛmɔ lɛ saneyitso. Kɛ́ agbe maŋshiɛmɔ lɛ naa lɛ, sɛinɔtalɔ lɛ kɛ wiemɔ kuku baatsɔɔ bɔ ni hiɛ esɔ wiemɔ ni aha lɛ, shi etsiŋ otii ni je kpo yɛ wiemɔ lɛ mli lɛ atã. Ebaatsɔɔ maŋshiɛmɔ ni abaaha wɔsɛɛ otsi lɛ saneyitso, kɛkɛ lɛ no sɛɛ lɛ ekɛɛ mɛi fɛɛ ni eba kpee lɛ koni amɛmɛ kɛha Buu-Mɔɔ Nikasemɔ lɛ. Kɛ́ wielɔ lɛ jɛ asafo kroko mli lɛ, ehe ehiaaa ni sɛinɔtalɔ lɛ abi toibolɔi lɛ kɛji akɛ amɛbaasumɔ ni amɛkɛ amɛsuɔmɔ ŋamɔi amaje asafo kroko lɛ. No sɛɛ lɛ, sɛinɔtalɔ lɛ baafɔ̃ Buu-Mɔɔ Nikasemɔ nɔkwɛlɔ lɛ nine kɛba wiemɔ kpoku lɛ nɔ.

Buu-Mɔɔ Nikasemɔ nɔkwɛlɔ lɛ baatsɛ lala ni akɛbaaje nikasemɔ lɛ shishi lɛ. Ebaakwɛ nikasemɔ lɛ nɔ yɛ gbɛ ni kɛ gbɛtsɔɔmɔi ni aŋmala yɛ he lɛ kpaa gbee lɛ nɔ, ni no sɛɛ lɛ ebaatsɛ naagbee lala lɛ. Bei pii lɛ, Buu-Mɔɔ Nikasemɔ nɔkwɛlɔ lɛ baatsɛ mɔ ni ha maŋshiɛmɔ lɛ koni ebasɔle kɛkpa kpee lɛ.

Kɛ wɔkɛ gbɛtsɔɔmɔi ni akɛha nɛɛ tsu nii lɛ ebaaye ebua koni wɔ fɛɛ wɔfee wɔkpeei lɛ yɛ gbɛ kome nɔ.