Yitso Nyɔŋma Kɛ Enyɔ
Nɔ ni Obaptisimɔ lɛ Tsɔɔ
1. Mɛni hewɔ esa akɛ nu mli baptisimɔ afee nɔ ni wɔteŋ mɔ fɛɛ mɔ nyaa he lɛ?
YOHANE BAPTISILƆ lɛ baptisi Yesu, emii lɛ nu yɛ Yordan Faa lɛ mli, yɛ afi 29 Ŋ.B. Yehowa diɛŋtsɛ miikwɛ, ni etsɔɔ akɛ ekpɛlɛ nɔ. (Mateo 3:16, 17) No hewɔ lɛ Yesu to okadi efɔ̃ shi ní ekaselɔi fɛɛ baanyiɛ sɛɛ. Afii etɛ kɛ fã sɛɛ lɛ, Yesu kɛ famɔi nɛɛ ha ekaselɔi lɛ, akɛ: “Aŋɔ hegbɛ fɛɛ aha mi yɛ ŋwɛi kɛ shikpɔŋ nɔ. No hewɔ lɛ nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ [mumɔ, NW] krɔŋkrɔŋ lɛ gbɛi amli.” (Mateo 28:18, 19) Ani ábaptisi bo yɛ nɔ ni Yesu fã yɛ jɛmɛ lɛ kɛ gbeekpamɔ naa? Kɛ jeee nakai lɛ, ani oosaa ohe koni ofee nakai?
2. Mɛɛ sanebimɔi ehe hiaa ni aha hetoo yɛ baptisimɔ he?
2 Baptisimɔ he shishinumɔ ni mli kã shi faŋŋ he miihia yɛ saji nɛɛ eko fɛɛ eko mli, yɛ mɔ fɛɛ mɔ ni sumɔɔ akɛ esɔmɔ Yehowa ni ehi shi yɛ ejalɛ jeŋ hee lɛ mli lɛ gbɛfaŋ. Enɛɛmɛi fata sanebimɔi ni esa akɛ aha hetoo lɛ ahe: Ani Kristofoi abaptisimɔ ŋmɛnɛ lɛ hiɛ shishinumɔ ni tamɔ Yesu baptisimɔ lɛ nɔŋŋ? Ákɛ abaptisi bo yɛ “Tsɛ lɛ kɛ Bi lɛ kɛ [mumɔ, NW] krɔŋkrɔŋ lɛ gbɛi amli” lɛ tsɔɔ mɛni? Mɛni fata nɔ ni Kristofoi anu mli baptisimɔ ni aaahi shi yɛ naa lɛ tsɔɔ lɛ he?
Baptisimɔi ni Yohane Tsu He Nii
3. Yohane baptisimɔ lɛ yɛ kɛha namɛi pɛ?
3 Aaafee nyɔji ekpaa dani Yohane Baptisilɔ lɛ aaabaptisi Yesu lɛ, etee Yudea ŋã lɛ nɔ ni eeshiɛ akɛ: “Nyɛtsakea nyɛtsuii; shi ŋwɛi maŋtsɛyeli lɛ ebɛŋkɛ.” (Mateo 3:1, 2) Gbɔmɛi nu nɔ ni Yohane kɛɛ lɛ, ni amɛkpɛlɛ nɔ. Amɛjaje amɛhe eshai amɛtsɔɔ yɛ faŋŋ mli, amɛtsake amɛtsui yɛ he, ni amɛba Yohane ŋɔɔ koni ebaptisi amɛ yɛ Yordan Faa lɛ mli. Nakai baptisimɔ lɛ yɛ kɛha Yudafoi lɛ pɛ.—Luka 1:13-16; Bɔfoi lɛ Asaji 13:23, 24.
4. Mɛni hewɔ ehe hiaa waa ni Yudafoi ni hi shi yɛ klɛŋklɛŋ afii oha lɛ mli lɛ atsake amɛtsui lɛ?
4 Tsuitsakemɔ he miihia nakai Yudafoi lɛ waa diɛŋtsɛ. Amɛ blematsɛmɛi lɛ kɛ Yehowa Nyɔŋmɔ bote maŋ kpaŋmɔ—yelikɛfuamɔ ni hiɛdɔɔ yɔɔ mli—ko mli, yɛ afi 1513 D.Ŋ.B., yɛ Sinai Gɔŋ lɛ he. Shi yɛ amɛhe eshai ni anaa faŋŋ lɛ hewɔ lɛ, amɛhiii shi yɛ gbɛnaa nii ni jwere amɛnɔ yɛ nakai kpaŋmɔ lɛ shishi lɛ anaa, no hewɔ lɛ kpaŋmɔ lɛ bu amɛ fɔ. Beni shɛɔ Yesu gbii lɛ amli lɛ, no mli lɛ shihilɛ lɛ mli ewo wu. “Yehowa gbi wulu kpele ni he yɔɔ gbeyei” ní Maleaki gba fɔ̃ shi lɛ ebɛŋkɛ. Nakai “gbi” lɛ ba, beni Roma asraafoi lɛ kpata Yerusalem, esɔlemɔtsu lɛ, kɛ Yudafoi fe akpekpe kome hiɛ yɛ afi 70 Ŋ.B. lɛ. Atsɔ hiɛ atsu Yohane Baptisilɔ lɛ ni yɔɔ ekãa kɛha anɔkwa jamɔ lɛ kɛtsɔ nakai hiɛkpatamɔ lɛ hiɛ koni “esaa maŋ ni efee klalo eto [Yehowa].” Ehe miihia ni amɛtsake ni amɛshwa amɛhe yɛ eshai ni amɛfee amɛshi Mose Mla kpaŋmɔ lɛ he, ni amɛsaa amɛhe ni amɛkpɛlɛ Nyɔŋmɔ Bi, ni ji Yesu, ni Yehowa tsuɔ lɛ kɛbaa amɛŋɔɔ lɛ nɔ.—Maleaki 3:22-24; Luka 1:17; Bɔfoi lɛ Asaji 19:4.
5. (a) Beni Yesu ba koni abaptisi lɛ lɛ, mɛni hewɔ Yohane bi sane yɛ enɛ he lɛ? (b) Yesu baptisimɔ lɛ feɔ mɛni he okadi?
5 Mɔ ni fata mɛi ni ba Yohane ŋɔɔ koni ebaptisi amɛ lɛ ahe ji Yesu diɛŋtsɛ. Shi mɛni hewɔ? Akɛni Yohane le akɛ esha ko bɛ Yesu he hewɔ lɛ, ekɛɛ akɛ: “Mi moŋ ni ehia mi akɛ bo obaptisiɔ mi lɛ, ni bo obaa miŋɔɔ nɛɛ?” Shi Yesu baptisimɔ lɛ baafee nɔ kroko kwraa he okadi. No hewɔ lɛ Yesu ha hetoo akɛ: “Kpɛlɛmɔ kɛkɛ, shi nɛkɛ sa akɛ wɔgbeɔ jalɛ fɛɛ naa.” (Mateo 3:13-15) Akɛni esha bɛ Yesu he hewɔ lɛ, ebaptisimɔ lɛ efeee tsuitsakemɔ kɛmiijɛ esha he okadi; ni asaŋ ehe ehiaaa ni ejɔɔ ehe nɔ eha Nyɔŋmɔ, ejaakɛ eji maŋ ni ejɔɔ ehe nɔ kɛha Yehowa momo lɛ mlinyo. Yɛ no najiaŋ lɛ, ebaptisimɔ beni eye afii 30 lɛ yɛ srɔto kɛha lɛ, ni efeɔ ehe ni ekɛhaa eŋwɛi Tsɛ lɛ akɛ ebaafee E-suɔmɔnaa nii lolo lɛ he okadi.
6. Mɛɛ hiɛdɔɔ Yesu kɛtsu Nyɔŋmɔ suɔmɔnaa nii kɛha lɛ lɛ he nii?
6 Nyɔŋmɔ suɔmɔnaa nii kɛha Yesu Kristo lɛ kɔɔ Maŋtsɛyeli lɛ he nitsumɔ he. (Luka 8:1) Ekɔɔ egbɔmɔtso ni yeɔ emuu ni ekɛbaashã afɔle ákɛ kpɔmɔnɔ, ni ákɛ nɔdaamɔnɔ kɛha kpaŋmɔ hee lɛ hu he. (Mateo 20:28; 26:26-28; Hebribii 10:5-10) Yesu kɛ hiɛdɔɔ susu nɔ ni enu mli baptisimɔ lɛ feɔ he okadi lɛ he waa. Eŋmɛɛɛ gbɛ ni nɔ ko agbala ejwɛŋmɔ kɛya nibii krokomɛi anɔ. Ekɛ ehe kpɛtɛ Nyɔŋmɔ suɔmɔnaa nifeemɔ he gbagbalii, ekɛ Nyɔŋmɔ Maŋtsɛyeli lɛ shiɛmɔ fee enitsumɔ titri kɛyashi eshikpɔŋ nɔ wala lɛ naagbee.—Yohane 4:34.
Nu Mli Baptisimɔ Kɛha Kaselɔi Kristofoi
7. Yɛ nɔ ni kɔɔ baptisimɔ he lɛ, mɛni ji nɔ ni akɛɛ Kristofoi akɛ amɛfee kɛjɛ Pentekoste afi 33 Ŋ.B. kɛbaa?
7 Yohane baptisi Yesu klɛŋklɛŋ kaselɔi lɛ yɛ nu mli, ni etsɔɔ amɛ gbɛ kɛtee Yesu ŋɔɔ akɛ mɛi ni baafee ŋwɛi Maŋtsɛyeli lɛ mli bii. (Yohane 3:25-30) Kaselɔi nɛɛ hu baptisi mɛi krokomɛi yɛ Yesu gbɛtsɔɔmɔ shishi, ni enɛ hu tamɔ Yohane baptisimɔ lɛ nɔŋŋ. (Yohane 4:1, 2) Shi kɛjɛ Pentekoste afi 33 Ŋ.B. kɛbaa lɛ, amɛje shishi akɛ amɛaaha nitsumɔ akɛ amɛbaptisi ‘yɛ Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli’ lɛ aba mli. (Mateo 28:19) Obaana akɛ ehe baaba sɛɛnamɔ kɛha bo waa akɛ ooosusu nɔ ni enɛ tsɔɔ lɛ he ekoŋŋ.
8. Ákɛ abaptisi mɔ ko ‘yɛ Tsɛ lɛ gbɛi amli’ lɛ tsɔɔ mɛni?
8 Ákɛ aaabaptisi mɔ ko ‘yɛ Tsɛ lɛ gbɛi amli’ lɛ tsɔɔ mɛni? Etsɔɔ akɛ esa akɛ akpɛlɛ egbɛi, egbɛhe, hegbɛ, yiŋtoo, kɛ emlai anɔ. Susumɔ nɔ ni kɔɔ enɛ he lɛ he. (1) Yɛ egbɛi lɛ he lɛ, Lala 83:19 kɛɔ akɛ: “Bo, ni okome too ogbɛi ji Yehowa lɛ, bo ji mɔ ni kwɔ fe fɛɛ yɛ shikpɔŋ lɛ nɔ fɛɛ!” (2) Yɛ egbɛhe lɛ he lɛ, 2 Maŋtsɛmɛi 19:15 kɛɔ akɛ: “Yehowa . . . , bo okome too ji [anɔkwa] Nyɔŋmɔ.” (3) Yɛ nɔ ni kɔɔ enɔyeli hegbɛ lɛ he lɛ, Kpojiemɔ 4:11 kɛɔ wɔ akɛ: “[Yehowa, NW] bo ji mɔ ni sa akɛ oŋɔ anunyam kɛ agbojee kɛ hewalɛ lɛ, ejaakɛ bo obɔ nii fɛɛ, ni osuɔmɔ naa amɛyɔɔ ni abɔ amɛ.” (4) Esa akɛ wɔkpɛlɛ nɔ hu akɛ Yehowa ji Wala-Halɔ, mɔ ni eto eyiŋ akɛ ebaahere wɔ kɛjɛ esha kɛ gbele dɛŋ, akɛ: “Yehowa dɛŋ yiwalaheremɔ yɔɔ!” (Lala 3:9; 36:10) (5) Ehe miihia ni wɔkpɛlɛ nɔ akɛ Yehowa ji Mla-Halɔ ni Fe Fɛɛ, akɛ: “Yehowa ji wɔ kojolɔ, Yehowa ji wɔ tatsɛ, Yehowa ji wɔ maŋtsɛ.” (Yesaia 33:22) Akɛni ehiɛ gbɛhei nɛɛ fɛɛ hewɔ lɛ, awoɔ wɔ hewalɛ akɛ: “Suɔmɔ [Yehowa, NW], o-Nyɔŋmɔ lɛ, kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ.”—Mateo 22:37.
9. Mɛni baptisimɔ ‘yɛ Bi lɛ gbɛi amli’ lɛ tsɔɔ?
9 Mɛni baptisimɔ ‘yɛ Bi lɛ gbɛi amli’ lɛ tsɔɔ? Etsɔɔ akɛ esa akɛ ayɔse Yesu Kristo gbɛi, gbɛhe, kɛ enɔyeli hegbɛ. Egbɛi Yesu lɛ shishi ji, “Yehowa Ji Yiwalaherelɔ.” Enáa egbɛhe lɛ kɛjɛɔ anɔkwale ni eji akɛ lɛ ji Nyɔŋmɔ Bi koome, Nyɔŋmɔ bɔɔ nii lɛ ateŋ klɛŋklɛŋ mɔ lɛ mli. (Mateo 16:16; Kolosebii 1:15, 16) Yohane 3:16 kɛɔ wɔ yɛ nɛkɛ Bi nɛɛ he akɛ: “Nɛkɛ Nyɔŋmɔ sumɔ je lɛ [ni anyɛɔ akpɔ̃ɔ adesai ni yɔɔ mli lɛ], akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.” Akɛni Yesu gbo akɛ anɔkwafo hewɔ lɛ, Nyɔŋmɔ tée lɛ shi kɛjɛ gbohii ateŋ, ni ekɛ nɔyeli hegbɛ hee ko ha lɛ. Taakɛ bɔfo Paulo tsɔɔ lɛ, Nyɔŋmɔ ‘wó Yesu nɔ gojoo’ yɛ jeŋ muu fɛɛ, ni kɛjɛ Yehowa sɛɛ lɛ, lɛ pɛ eyɔɔ. Ni no hewɔ ni ‘esa akɛ nakutso fɛɛ nakutso akula shi yɛ Yesu gbɛi lɛ amli, ní lilɛi fɛɛ lilɛi agbá mli kpoo ákɛ Yesu Kristo ji Nuŋtsɔ kɛwo Tsɛ Nyɔŋmɔ lɛ hiɛ nyam lɛ.’ (Filipibii 2:9-11) Enɛ tsɔɔ akɛ esa akɛ abo Yesu kitai, ni baa kɛjɛɔ Yehowa diɛŋtsɛ ŋɔɔ lɛ atoi.—Yohane 15:10.
10. Mɛni baptisimɔ ‘yɛ mumɔ krɔŋkrɔŋ lɛ gbɛi amli’ lɛ tsɔɔ?
10 Mɛni baptisimɔ ‘yɛ mumɔ krɔŋkrɔŋ lɛ gbɛi amli’ lɛ tsɔɔ? Etsɔɔ akɛ abaakpɛlɛ mumɔ krɔŋkrɔŋ lɛ nitsumɔ kɛ nifeemɔ nɔ. Ni mɛni ji mumɔ krɔŋkrɔŋ lɛ? Eji Yehowa nifeemɔ hewalɛ ni ekɛtsuɔ eyiŋtoi ahe nii kɛgbeɔ naa. Yesu kɛɛ esɛɛnyiɛlɔi lɛ akɛ: “Mabi Tsɛ lɛ, ni eeeha nyɛ hefatalɔ kroko, koni ekɛ nyɛ ahi shi kɛya naanɔ; anɔkwale mumɔ lɛ.” (Yohane 14:16, 17, NW) Mɛni enɛ baaha amɛnyɛ amɛfee? Yesu kɛɛ amɛ ekoŋŋ akɛ: “Kɛ́ [mumɔ, NW] krɔŋkrɔŋ lɛ ná ba nyɛnɔ lɛ, nyɛaaná hewalɛ ni nyɛaatsɔmɔ midasefoi yɛ Yerusalem kɛ Yudea kɛ Samaria fɛɛ, kɛyashi shikpɔŋ lɛ naagbeehei lɛ.” (Bɔfoi lɛ Asaji 1:8) Yehowa hu tsɔ mumɔ krɔŋkrɔŋ lɛ nɔ ekɛ emumɔ kanya Biblia lɛ ŋmaa, akɛ: “Gbalɛ ko bako yɛ gbɔmɔ suɔmɔ naa pɛŋ, shi moŋ [mumɔ, NW] krɔŋkrɔŋ lɛ tsirɛɔ Nyɔŋmɔ gbɔmɛi krɔŋkrɔŋi lɛ ni amɛwieɔ.” (2 Petro 1:21) No hewɔ lɛ, wɔkpɛlɛɔ mumɔ krɔŋkrɔŋ lɛ nitsumɔ nɔ kɛ́ wɔkase Biblia lɛ. Gbɛ kroko ni wɔtsɔɔ nɔ wɔkpɛlɛɔ mumɔ krɔŋkrɔŋ lɛ nɔ ji kɛtsɔ Yehowa ni wɔɔbi lɛ ni eye ebua wɔ ni wɔwo “mumɔ lɛ yibii,” ni ji “suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, hiɛshikamɔ” lɛ nɔ.—Galatabii 5:22, 23.
11. (a) Mɛni baptisimɔ tsɔɔ diɛŋtsɛ yɛ wɔgbii nɛɛ amli? (b) Baptisimɔ tamɔ gbele kɛ shi ni ateeɔ mɔ yɛ mɛɛ gbɛ nɔ?
11 Klɛŋklɛŋ bii ni abaptisi amɛ yɛ famɔ ni Yesu kɛha lɛ kɛ gbeekpamɔ naa ji Yudafoi kɛ mɛi ni atsake amɛ kɛba Yudajamɔ mli, kɛjɛ afi 33 Ŋ.B. lɛ shishijee. Yɛ no sɛɛ etsɛɛɛ lɛ, akpã hegbɛ ni akɛaatsɔmɔ kaselɔi Kristofoi lɛ mli aha Samariabii lɛ. Kɛkɛ ni yɛ afi 36 Ŋ.B. lɛ, tsɛmɔ lɛ mli lɛɛ koni Jeŋmajiaŋbii foolɔi lɛ abafata he. Esa akɛ Samariabii kɛ Jeŋmajiaŋbii lɛ diɛŋtsɛ ajɔɔ amɛhe nɔ amɛha Yehowa akɛ amɛbaasɔmɔ lɛ akɛ e-Bi lɛ kaselɔi dani abaptisi amɛ. Enɛ etee nɔ efee nɔ ni Kristofoi anu mli baptisimɔ lɛ tsɔɔ kɛbashi wɔgbii nɛɛ amli. Nu mli kwraa ni akɛ amɛ woɔ lɛ ji okadi ni sa kɛha nɛkɛ mɔ diɛŋtsɛ henɔjɔɔmɔ nɛɛ, ejaakɛ baptisimɔ feɔ fũu he okadi. Baptisimɔ nu lɛ shishi ni akɛ bo woɔ lɛ damɔ shi kɛha otsutsu shihilɛ gbɛ ni ogbo kɛha no. Onɔ ni awoɔ kɛjɛɔ nu lɛ mli lɛ feɔ wala mli ni oba akɛ obaafee Nyɔŋmɔ suɔmɔnaa nii lɛ he okadi. Nɛkɛ “baptisimɔ kome” nɛɛ kɔɔ mɛi fɛɛ ni batsɔmɔɔ anɔkwa Kristofoi lɛ ahe. Amɛbatsɔmɔɔ Yehowa Odasefoi Kristofoi yɛ baptisimɔ mli, sɔɔlɔi ni Nyɔŋmɔ ehala amɛ.—Efesobii 4:5; 2 Korintobii 6:3, 4.
12. Mɛni Kristofoi anu mli baptisimɔ feɔ he okadi, ni yɛ mɛɛ gbɛ nɔ?
12 Baptisimɔ ni tamɔ nɛkɛ lɛ hiɛ yiwalaheremɔ jara ni wa waa yɛ Nyɔŋmɔ hiɛ. Ákɛ nɔkwɛmɔnɔ lɛ, yɛ be mli ni bɔfo Petro etsĩ adeka ni Noa kpɛ, ni abaa lɛ kɛ eweku lɛ yi yɛ mli kɛtsɔ Nu Afua lɛ mli lɛ tã lɛ, eŋma akɛ: “No nɔŋŋ agbɛnɛ ehereɔ wɔ hu wɔyiwala yɛ baptisimɔ ni akɛ no to he okadi lɛ mli, nɔ ni jeee hewolo nɔ muji jiemɔ, shi moŋ eji henilee kpakpa kpaŋmɔ ni akɛ Nyɔŋmɔ kpaŋɔ, kɛtsɔ Yesu Kristo shitee lɛ nɔ.” (1 Petro 3:21, wɔma efã ko nɔ mi.) Adeka lɛ ji odaseyeli ni anaa faŋŋ ni tsɔɔ akɛ Noa kɛ anɔkwayeli etsu nitsumɔ ni Nyɔŋmɔ kɛwo edɛŋ lɛ he nii. Beni egbe adeka lɛ he nitsumɔ naa lɛ, “nu ŋɔ no be lɛŋ je lɛ ni ehiɛ kpata.” (2 Petro 3:6) Shi, “ahere . . . mɛi kpaanyɔ” ni ji Noa kɛ eweku lɛ “asusumai ayiwala . . . kɛtsɔ nu mli.”—1 Petro 3:20.
13. Mɛni mli ahereɔ Kristofonyo lɛ yiwala kɛjɛɔ kɛtsɔ nu mli baptisimɔ nɔ?
13 Ŋmɛnɛ, abaptisiɔ mɛi ni jɔɔ amɛhe nɔ amɛhaa Yehowa, yɛ hemɔkɛyeli ni amɛyɔɔ yɛ Kristo ni atee lɛ shi lɛ mli hewɔ, ni amɛkɛfeɔ nakai henɔjɔɔmɔ lɛ he okadi. Amɛyaa nɔ amɛfeɔ Nyɔŋmɔ suɔmɔnaa nii kɛha wɔgbii nɛɛ, ni ahereɔ amɛ yiwala kɛjɛɔ ŋmɛnɛŋmɛnɛ yiwalɛ jeŋ nɛɛ mli. (Galatabii 1:3, 4) Amɛjeee mɛi ni amɛkɛ ŋmɛnɛŋmɛnɛ yiwalɛ nibii agbɛjianɔtoo lɛ nyiɛ gbɛ kɛmiiya hiɛkpatamɔ mli dɔŋŋ. Áhere amɛyiwala kɛjɛ enɛ mli, ni Nyɔŋmɔ eduro amɛ henilee kpakpa. Bɔfo Yohane maa nɔ mi kɛhaa Nyɔŋmɔ tsuji akɛ: “Je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.”—1 Yohane 2:17.
Wɔ Gbɛnaa Nii ni Wɔɔtsu He Nii
14. Mɛni hewɔ baptisimɔ diɛŋtsɛ jeee nɔ ni maa yiwalaheremɔ nɔ mi lɛ?
14 Ebaafee tɔmɔ akɛ aaamu sane naa akɛ baptisimɔ diɛŋtsɛ ji nɔ ni maa yiwalaheremɔ nɔ mi. Ebafeɔ nɔ ni sɛɛnamɔ yɔɔ he kɛji akɛ mɔ lɛ ejɔɔ ehe nɔ lɛɛlɛŋ eha Yehowa kɛtsɔ Yesu Kristo nɔ, ni yɛ no sɛɛ lɛ efeɔ Nyɔŋmɔ suɔmɔnaa nii, ni eyeɔ anɔkwa kɛyashiɔ naagbee. “Mɔ ni hiɛɔ mli kɛyawulaa shi lɛ, lɛ aaahere eyiwala.”—Mateo 24:13.
15. (a) Mɛni ji Nyɔŋmɔ suɔmɔnaa nii ŋmɛnɛ kɛha Kristofoi ni abaptisi amɛ lɛ? (b) Te esa akɛ Kristofoi akaselɔ feemɔ afee nɔ ni he hiaa yɛ wɔshihilɛi amli aha tɛŋŋ?
15 Nɔ ni fata Nyɔŋmɔ suɔmɔnaa nii kɛha Yesu lɛ he ji bɔ ni ekɛ ewala ákɛ adesa lɛ tsu nii eha. Esa akɛ ekɛ ewala ahã ákɛ afɔleshaa nɔ̃. Yɛ wɔgbɛfaŋ lɛ, esa akɛ wɔkɛ wɔgbɔmɔtsei ahã Nyɔŋmɔ, ni wɔhi shi akɛ mɛi ni kɛ amɛ shihilɛ eshã afɔle kɛtsɔ Nyɔŋmɔ suɔmɔnaa nifeemɔ nɔ. (Romabii 12:1, 2) Eka shi faŋŋ akɛ wɔnyɛŋ wɔfee mɛi ni feɔ Nyɔŋmɔ suɔmɔnaa nii kɛji akɛ, yɛ be kɛ bei amli po lɛ, wɔjeɔ gbɛ wɔbaa wɔjeŋ tamɔ jeŋ ni ebɔle wɔhe kɛkpe lɛ, aloo wɔtswa wɔshihilɛ wɔbɔle pɛsɛmkunya nibii asɛɛdii, yɛ be mli ni wɔkɛ sɔɔmɔ fioo ko pɛ haa Nyɔŋmɔ lɛ. (1 Petro 4:1-3; 1 Yohane 2:15, 16) Beni Yudanyo ko bi Yesu nɔ ni esa akɛ efee koni ená naanɔ wala lɛ, ekpɛlɛ bɔ ni ehe hiaa akɛ aaahi shi yɛ jeŋba hetsemɔ mli lɛ nɔ. Shi etsɔɔ lɛ nɔ ko ni he hiaa waa po fe no: bɔ ni ehe hiaa akɛ atsɔ Kristofonyo kaselɔ, Yesu sɛɛnyiɛlɔ. Esa akɛ no afee nɔ̃ titri yɛ shihilɛ mli. Enyɛŋ efee nɔ ni ji enyɔ ni baa yɛ heloo gbɛfaŋ nibii asɛɛdii sɛɛ.—Mateo 19:16-21.
16. (a) Mɛɛ gbɛnaa nii kã Kristofoi fɛɛ nɔ yɛ Maŋtsɛyeli lɛ he? (b) Taakɛ afee he nɔkwɛmɔnɔ yɛ baafa 116 kɛ 117 lɛ, mɛni ji gbɛ̀i komɛi ni mɔɔ shi ni aaanyɛ atsɔ nɔ atsu Maŋtsɛyeli nitsumɔ lɛ he nii? (d) Wɔtsui muu fɛɛ mli ni wɔjɛɔ wɔkɛnáa odaseyeli nitsumɔ lɛ mli gbɛfaŋnɔ lɛ yeɔ mɛni he odase?
16 Esa akɛ ama nɔ mi ekoŋŋ akɛ, nɔ ni fata Nyɔŋmɔ suɔmɔnaa nii kɛha Yesu lɛ he ji nitsumɔi ni he hiaa yɛ Nyɔŋmɔ Maŋtsɛyeli lɛ he. Afɔ Yesu diɛŋtsɛ mu koni eye Maŋtsɛ. Shi beni eyɔɔ shikpɔŋ nɔ lɛ, ekɛ ekãa ye Maŋtsɛyeli lɛ he odase. Wɔ hu wɔyɛ odaseyeli nitsumɔ ko ni tamɔ nakai nɔŋŋ ni wɔbaatsu, ni wɔyɛ nɔ ni wɔɔdamɔ nɔ wɔjɛ wɔtsui muu fɛɛ mli wɔkɛ wɔhe awo mli. Kɛtsɔ nakai feemɔ nɔ lɛ wɔjieɔ wɔ hiɛsɔɔ kɛha jeŋ muu fɛɛ maŋtsɛ ni Yehowa ji, kɛ suɔmɔ ni wɔyɔɔ kɛha wɔnanemɛi gbɔmɛi lɛ akpo. (Mateo 22:36-40) Wɔtsɔɔ hu akɛ wɔkɛ wɔnanemɛi jálɔi ni yɔɔ jeŋ fɛɛ lɛ efee ekome, amɛ fɛɛ amɛji Maŋtsɛyeli jajelɔi. Wɔ fɛɛ wɔmiiya wɔhiɛ kutuu, yɛ jeŋ muu fɛɛ ekomefeemɔ mli, kɛmiiya naanɔ wala oti ni yɔɔ nakai Maŋtsɛyeli lɛ nɔyelihe ni yɔɔ shikpɔŋ nɔ lɛ he.
Sanegbaa ni Akɛtiɔ Mli
• Mɛni nibii ni jejee amɛhe, kɛ srɔtofeemɔi, yɔɔ Yesu baptisimɔ lɛ kɛ ŋmɛnɛ nu mli baptisimɔ lɛ teŋ?
• Mɛni baptisimɔ yɛ “Tsɛ lɛ kɛ Bi lɛ kɛ [mumɔ, NW] krɔŋkrɔŋ lɛ gbɛi amli” lɛ tsɔɔ?
• Mɛni fata Kristofoi anu mli baptisimɔ he gbɛnaa nii ni wɔɔtsu he nii lɛ he?
[Mfonirii ni yɔɔ baafa 116, 117]
GBƐ̀I KOMƐI NI WƆƆTSƆ NƆ WƆJAJE MAŊTSƐYELI LƐ
Kɛjɛ shia kɛmiiya shia
Kɛha wekumɛi
Kɛha nanemɛi nitsulɔi
Kɛha nanemɛi skulbii
Yɛ gbɛjegbɛi anɔ
Kɛtsɔ mɛi ni yɔɔ wiemɔ lɛ he miishɛɛ lɛ asaramɔ nɔ
Yɛ shia Biblia kasemɔ mli