Etsɛŋ Ni Nɔnaa Fɛɛ Sɛɛ Baafo!

Ekolɛ, obi ohe pɛŋ akɛ, ‘Mɛni hewɔ nɔnaa efa babaoo nɛkɛ?’ Yɛ afii akpei abɔ ni eho lɛ amli lɛ, tai, ohia, osharai, awuiyelii, jalɛsane ni ayeee, hela, kɛ gbele eha adesai aweku lɛ ena nɔ babaoo. Adesai ena nɔ babaoo yɛ afii 100 ni ho lɛ mli fe bei fɛɛ ni eho. Ani enɛɛmɛi fɛɛ sɛɛ baafo gbi ko?

Hetoo ni shɛjeɔ mɔ mii ji akɛ esɛɛ baafo, ni etsɛŋ kwraa! Nyɔŋmɔ Wiemɔ ni ji Biblia lɛ jajeɔ akɛ: “Mɔ fɔŋ lɛ bɛ dɔŋŋ . . . Shi mɛi ni he jɔ lɛ, shikpɔŋ lɛ aaatsɔ̃ amɛnɔ̃, ni amɛmii aaashɛ amɛhe yɛ hejɔlɛ babaoo mli.” Kɛyashi mɛɛ be? “Jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.”—Lala 37:10, 11, 29.

Beni Nyɔŋmɔ ejie awuiyeli kɛ nɔnaa kɛtee sɛɛ lɛ, abaatsake shikpɔŋ lɛ afee lɛ paradeiso. Kɛkɛ lɛ, gbɔmɛi baaná miishɛɛ kɛ gbɔmɔtsoŋ hewalɛ kpakpa kɛya naanɔ. Nyɔŋmɔ Wiemɔ lɛ gba akɛ: “Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ.”—Kpojiemɔ 21:4.

Abaatee mɛi ni egboi lɛ po ashi kɛba wala mli ekoŋŋ yɛ nakai jeŋ hee lɛ mli, koni amɛbaná nakai jɔɔmɔi lɛ amli gbɛfaŋnɔ: “Gbohiiashitee baaba, ni jalɔi kɛ mɛi ni ejaaa fɛɛ baate shi.” (Bɔfoi lɛ Asaji 24:15) No hewɔ ni Yesu Kristo nyɛ́ ekɛɛ eshafeelɔ ko ni tsake etsui ní ná hemɔkɛyeli yɛ emli lɛ akɛ: “Okɛ mi aaahi Paradeiso” lɛ.—Luka 23:43.

Mɛni Kɛ Nɔnaa Ba Jeŋ?

Akɛni Nyɔŋmɔ to eyiŋ koni adesai aná wɔsɛɛ be ni yɔɔ miishɛɛ tamɔ nɛkɛ hewɔ lɛ, mɛni hewɔ eŋmɛ gbɛ ni nɔnaa ba jeŋ? Mɛni hewɔ eŋmɛ gbɛ ni etee nɔ be kakadaŋŋ nɛkɛ?

Beni Nyɔŋmɔ bɔ Adam kɛ Hawa lɛ, E-bɔ amɛ akɛ mɛi ni yɔɔ gbɔmɔtso kɛ jwɛŋmɔ ni eye emuu. Ekɛ amɛ wo paradeiso abɔɔ ko mli, ni eha amɛ nitsumɔ ni baaha amɛná miishɛɛ. Biblia lɛ kɛɔ akɛ: “Nyɔŋmɔ kwɛ nibii fɛɛ ni efee lɛ, ni naa, ehi naakpa.” (1 Mose 1:31) Eji amɛbo Nyɔŋmɔ toi kulɛ, amɛbaafɔ bii ni yeɔ emuu, ni ebaaha jeŋ muu lɛ fɛɛ atsɔ paradeiso, he ni gbɔmɛi baahi shi kɛya naanɔ yɛ toiŋjɔlɛ kɛ miishɛɛ mli yɛ.

Be mli ni Nyɔŋmɔ bɔ Adam kɛ Hawa lɛ, ekɛ naakpɛɛ nikeenii ni ji heyeli lɛ duro amɛ. Abɔɔɔ amɛ tamɔ tsɔji ni ja akudɔ amɛ dani amɛtsiɔ amɛhe. Shi kɛlɛ, kɛ́ amɛbaaya nɔ amɛná miishɛɛ lɛ, no lɛ esa akɛ amɛkɛ heyeli ni amɛyɔɔ lɛ atsu nii yɛ gbɛ ni ja nɔ—ni ji akɛ amɛbo Nyɔŋmɔ mlai lɛ atoi. Nyɔŋmɔ kɛɛ akɛ: “Mi ji Yehowa, o-Nyɔŋmɔ lɛ, mɔ ni tsɔɔo nii ni hi hao, mɔ ni tsɔɔo gbɛ ní onyiɛ nɔ lɛ.” (Yesaia 48:17) Akɛni abɔɔɔ adesai akɛ mɛi ni baanyɛ aye omanye kɛ́ Nyɔŋmɔ kɛ ehe wooo amɛshihilɛ mli hewɔ lɛ, heyeli ni amɛkɛaatsu nii yɛ gbɛ ni ejaaa nɔ lɛ kɛ nɔnaa baaba. Biblia lɛ kɛɔ akɛ: “Gbɔmɔ gbɛ bɛ lɛ diɛŋtsɛ edɛŋ, ni adesa ní nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ.”—Yeremia 10:23.

Dɔlɛ sane ji akɛ, wɔ klɛŋklɛŋ fɔlɔi lɛ nu he akɛ amɛbaanyɛ amɛtse amɛhe kɛjɛ Nyɔŋmɔ he ni amɛya nɔ amɛhi shi yɛ omanyeyeli mli. Shi beni amɛkpoo Nyɔŋmɔ nɔyeli lɛ, ekpa amɛ sɛɛfimɔ, ni amɛyeee emuu dɔŋŋ. No hewɔ lɛ, amɛbɔi gbɔjɔmɔ fiofio ni yɛ naagbee lɛ amɛgbɔlɔ ni amɛgboi. Akɛni amɛshwiei ji wɔ hewɔ lɛ, wɔnine shɛ nakai emuu ni ayeee lɛ kɛ gbele nɔ kɛjɛ amɛdɛŋ.—Romabii 5:12.

Sane Titri lɛ Ji—Mɔ ni Yɔɔ Hegbɛ Akɛ Eyeɔ Nɔ

Mɛni hewɔ Nyɔŋmɔ kpataaa Adam kɛ Hawa hiɛ nɔŋŋ koni eje adesai aweku kroko shishi lɛ? Ejaakɛ átswa Nyɔŋmɔ jeŋ muu fɛɛ maŋtsɛ ni eji, ni ji hegbɛ ni eyɔɔ akɛ eyeɔ nɔ lɛ mpoa. Sanebimɔ lɛ ji akɛ, Namɔ yɔɔ hegbɛ akɛ eyeɔ nɔ, ni namɔ nɔyeli ja? Kɛ́ wɔɔlɛɛ sane lɛ mli lɛ, Ani adesai baanyɛ ahi shi jogbaŋŋ ni Nyɔŋmɔ nɔyeli he ehiaaa amɛ? Akɛni Nyɔŋmɔ ŋmɛ amɛ gbɛ koni amɛhi shi yɛ heyeli mli kwraa yɛ be ni fa bɔ ni sa mli hewɔ lɛ, ekɛtsɔɔ shikome nyɔŋlo kɛji akɛ amɛbaanyɛ amɛhi shi ni enɔyeli lɛ he ehiaaa amɛ. Be ni aha adesai koni amɛkɛka maŋkwramɔŋ, kwasafoŋ, shika helɛtemɔŋ, kɛ jamɔŋ gbɛjianɔtoi srɔtoi fɛɛ amɛkwɛ ni Nyɔŋmɔ gbɛtsɔɔmɔ bɛ mli lɛ fa bɔ ni sa.

Mɛni ejɛ mli kɛba? Adesai ayinɔsane yɛ afii akpei abɔ ni eho lɛ amli lɛ haa wɔnaa akɛ ekɛ nɔnaa babaoo eba. Adesai aweku lɛ ena nɔ̃ ni ehiii fe fɛɛ yɛ afii 100 ni ho lɛ mli. Agbe gbɔmɛi akpekpei abɔ yɛ Jeŋ Ta II lɛ mli. Ágbe gbɔmɛi ni fa fe akpekpei 100 yɛ tai amli. Awuiyeli kɛ basabasafeemɔ efa babaoo. Tsofai ni akɛtsuɔ nii yɛ gbɛ fɔŋ nɔ lɛ miiya nɔ yɛ he fɛɛ he. Bɔlɛnamɔ mli tsɛŋemɔ helai miiya nɔ eegbɛ eeshwã. Gbɔmɛi akpekpei nyɔŋmai abɔ gboiɔ daa afi yɛ hɔmɔ kɛ hela hewɔ. Weku shihilɛ kɛ jeŋba kpakpa miifite yɛ he fɛɛ he. Adesai anɔyeli ko kwraa bɛ ni baanyɛ ekɛ naagbai nɛɛ anaa tsabaa aba. Amɛteŋ ekome po nyɛko ajie gbɔlɛ, hela, kɛ gbele kɛya.

Shihilɛ mli ni adesai yɔɔ lɛ tamɔ bɔ pɛ ni Biblia lɛ gba yɛ wɔbei nɛɛ ahe lɛ. Nyɔŋmɔ Wiemɔ lɛ tsɔɔ akɛ wɔyinɔ nɛɛ ji nibii agbɛjianɔtoo nɛɛ “naagbee gbii,” beni “jaramɔ bei baaba” lɛ. Ni taakɛ bɔ pɛ ni Biblia lɛ kɛɛ lɛ, ‘gbɔmɛi fɔji kɛ shishiulɔi ewo wu yɛ efɔŋ mli.’—2 Timoteo 3:1-5, 13.

Etsɛŋ ni Nɔnaa Sɛɛ Baafo

Odaseyelii lɛ fɛɛ tsɔɔ akɛ wɔmiibɛŋkɛ awerɛho shihilɛ ni eba adesai anɔ yɛ amɛhe ni amɛtse kɛjɛ Nyɔŋmɔ he lɛ hewɔ lɛ naagbee. Ebafee faŋŋ akɛ, kɛ́ adesai to amɛ diɛŋtsɛ amɛnɔyeli, ni amɛtse amɛhe kɛjɛ Nyɔŋmɔ he lɛ, amɛnyɛŋ amɛye omanye kɔkɔɔkɔ. Nyɔŋmɔ nɔyeli lɛ pɛ baanyɛ ekɛ toiŋjɔlɛ, miishɛɛ, gbɔmɔtsoŋ hewalɛnamɔ kpakpa, kɛ naanɔ wala aba. No hewɔ lɛ, etsɛŋ ni efɔŋfeemɔ kɛ nɔnaa gbɛ ni Yehowa eŋmɛ lɛ sɛɛ baafo. Etsɛŋ ni Nyɔŋmɔ kɛ ehe baawo adesai asaji amli, ni ebaakpata nibii agbɛjianɔtoo ni haaa mɔ aná miishɛɛ nɛɛ hiɛ.

Biblia gbalɛ kɛɔ akɛ: “Nɛkɛ maŋtsɛmɛi nɛɛ [adesai anɔyelii ni yɔɔ amrɔ nɛɛ] ayinɔ lɛ Nyɔŋmɔ ní yɔɔ ŋwɛi lɛ aaatee maŋtsɛyeli ko shi ama shi [yɛ ŋwɛi] ni efiteŋ dɔŋŋ . . . eeejwara maŋtsɛyelii [ni yɔɔ ŋmɛnɛŋmɛnɛ] nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.” (Daniel 2:44) Yehowa nɔyeli lɛ bembuu, ni ji hegbɛ ni eyɔɔ akɛ eyeɔ nɔ kɛtsɔ eŋwɛi Maŋtsɛyeli lɛ nɔ lɛ ji tsɔɔmɔ titri ni yɔɔ Biblia lɛ mli. Beni Yesu gbaa gbalɛ ni kɔɔ “naagbee gbii” lɛ ahe lɛ mli fã ko ni he hiaa lɛ, ekɛɛ akɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ní akɛye jeŋmaji lɛ fɛɛ odase; ni no dani naagbee lɛ aaaba.”—Mateo 24:14.

Kɛ́ naagbee lɛ ba lɛ, namɛi ayi baaná wala? Biblia lɛ haa hetoo akɛ: “Mɛi ni ja lɛ aaahi shikpɔŋ lɛ nɔ, ni mɛi ni eye emuu lɛ aaashwɛ yɛ nɔ; shi aaafolɔ mɛi fɔji lɛ kɛaajɛ shikpɔŋ lɛ nɔ.” (Abɛi 2:21, 22) Jalɔi lɛ ji mɛi ni kaseɔ Yehowa suɔmɔnaa nii ni amɛhiɔ shi yɛ naa lɛ. Yesu Kristo kɛɛ akɛ: “Enɛ ji naanɔ wala lɛ, ákɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ.” (Yohane 17:3) Hɛɛ, “je lɛ hoɔ eyaa . . . , shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.”—1 Yohane 2:17.

Biblia shishitsɔɔmɔ ni akɛtsu nii ji Ga Biblia lɛ. He ni NW nyiɛɔ ŋmalɛ ni akɛtsu nii lɛ sɛɛ lɛ, belɛ shishitsɔɔmɔ lɛ jɛ Ŋleshi New World Translation of the Holy Scriptures—With References nɔ̃ lɛ mli.