Wɔtsui Shi Ni Wɔɔŋmɛ Yɛ Amanehulu Mli Lɛ He Baanyɛ Aba Sɛɛnamɔ Kɛha Wɔ
“Wɔjɔɔ mɛi ni ŋmɛɔ amɛtsui shi lɛ.”—YAKOBO 5:11.
1, 2. Mɛni tsɔɔ akɛ Yehowa etooo eyiŋ akɛ adesai ana amanehulu?
MƆ KO bɛ ni ejwɛŋmɔŋ kã shi jogbaŋŋ ni baasumɔ akɛ ena amanehulu; nakai nɔŋŋ hu Yehowa Nyɔŋmɔ ni ji wɔ-Bɔlɔ lɛ sumɔɔɔ akɛ adesai ana amanehulu. Wɔbaanyɛ wɔna enɛ kɛji akɛ wɔpɛi e-Wiemɔ ni ajɛ mumɔŋ aŋma lɛ mli ni wɔkadi nɔ ni tee nɔ beni ebɔ klɛŋklɛŋ nuu kɛ yoo lɛ sɛɛ. Klɛŋklɛŋ lɛ, Nyɔŋmɔ bɔ nuu lɛ. “Yehowa Nyɔŋmɔ kɛ shikpɔŋ su shɔ̃ gbɔmɔ, ni emu wala mumɔ ewo egugɔ mli, ni gbɔmɔ tsɔ wala susuma.” (1 Mose 2:7) Adam eye emuu yɛ gbɔmɔtsoŋ kɛ jwɛŋmɔŋ fɛɛ, ni no hewɔ lɛ hela mɔŋ lɛ ni egboŋ.
2 Ni te shihilɛ ni Adam hi mli lɛ hu yɔɔ tɛŋŋ? “Yehowa Nyɔŋmɔ fee trom yɛ Eden yɛ bokagbɛ, ni eŋɔ gbɔmɔ ni eshɔ̃ lɛ eto jɛi. Ni Yehowa Nyɔŋmɔ ha tsei fɛɛ ni kɛ́ akwɛ ni aaaba mɔ tsine ni amɛhi ha yeli hu kwɛ̃ kɛjɛ shikpɔŋ sũ lɛŋ.” (1 Mose 2:8, 9) Hɛɛ, afee shĩa ni miishɛɛ yɔɔ mli aha Adam. Amanehulu ko kwraa bɛ Eden.
3. Mɛɛ gbɛkpamɔi klɛŋklɛŋ adesai enyɔ lɛ ná?
3 Mose Klɛŋklɛŋ Wolo 2:18 lɛ kɛɔ wɔ akɛ: “Yehowa Nyɔŋmɔ kɛɛ: Ehiii akɛ gbɔmɔ lɛ kome hiɔ shi; mafee hefatalɔ ko ni sa lɛ maha lɛ.” Yehowa bɔ yoo ni eye emuu eha Adam akɛ eŋa, ni enɛ ha amɛná gbɛkpamɔ akɛ amɛaahi shi ákɛ weku ni yɔɔ miishɛɛ. (1 Mose 2:21-23) Kɛfata he lɛ, Biblia lɛ kɛɔ wɔ akɛ: “Nyɔŋmɔ jɔɔ amɛ, ni Nyɔŋmɔ kɛɛ amɛ akɛ: Nyɛfɔa ni nyɛyi afáa ni nyɛyia shikpɔŋ lɛ nɔ obɔ.” (1 Mose 1:28) Klɛŋklɛŋ adesai enyɔ lɛ ná hegbɛ ní nɔ bɛ akɛ amɛlɛɛ Eden Paradeiso lɛ mli kɛyashi be ni enɛ baakpele shikpɔŋ muu lɛ fɛɛ nɔ, koni je lɛŋ fɛɛ atsɔ Paradeiso. Ni amɛbaafɔ bii ni baaná miishɛɛ, ni baaye amɛhe kwraa kɛjɛ amanehulu mli. Mɛɛ shishijee ni yɔɔ miishɛɛ po enɛ ji nɛkɛ!—1 Mose 1:31.
Amanehulu Shishijee
4. Kɛ́ akwɛ yinɔsane mli lɛ, mɛni anaa faŋŋ yɛ adesai ahe?
4 Kɛlɛ, kɛ́ wɔkwɛ shihilɛ mli ni adesai aweku lɛ yɔɔ kɛjɛ yinɔsane mli fɛɛ lɛ, wɔnaa faŋŋ akɛ nɔ ko etɔtɔ waa. Nibii fɔji etee nɔ ni eha adesai aweku lɛ ena amanehulu babaoo. Yɛ afii ohai abɔ ni eho lɛ amli lɛ, hela emɔmɔ Adam kɛ Hawa shwiei fɛɛ, amɛgbɔlɔɔ ni yɛ sɛɛ mli lɛ amɛgboiɔ. Eyɛ faŋŋ akɛ shikpɔŋ lɛ jeee paradeiso ní mli eyi obɔ kɛ gbɔmɛi ni yɔɔ miishɛɛ. Romabii 8:22 lɛ tsɔɔ bɔ ni shihilɛ lɛ ji lɛ mli jogbaŋŋ akɛ: “Bɔɔnii lɛ fɛɛ kɛ wɔ dɔmɔɔ ŋtsɔi ni amɛkɛ wɔ kɔ̃mɔɔ kɛbashi ŋmɛnɛŋmɛnɛ.”
5. Te fee tɛŋŋ ni wɔklɛŋklɛŋ fɔlɔi lɛ ha amanehulu ba adesai aweku lɛ nɔ?
5 Esaaa akɛ ashwaa Yehowa yɛ amanehulu babaoo ni ehi shi be kplaŋŋ lɛ he. (2 Samuel 22:31) Adesai sa shwamɔ yɛ amanehulu babaoo nɛɛ he. “Amɛfite, amɛnifeemɔ nii lɛ yɛ nyaŋemɔ.” (Lala 14:1) Aha wɔklɛŋklɛŋ fɔlɔi lɛ nibii kpakpai fɛɛ ni he baahia amɛ lɛ yɛ shishijee mli. Nɔ̃ pɛ ni ataoɔ kɛjɛɔ amɛdɛŋ koni shihilɛ nɛɛ akã he aya nɔ ji ni amɛya nɔ amɛfee toiboo amɛha Nyɔŋmɔ, shi Adam kɛ Hawa hala akɛ amɛaatse amɛhe kɛjɛ Yehowa he. Akɛni wɔklɛŋklɛŋ fɔlɔi lɛ kpoo Yehowa hewɔ lɛ, amɛyaaa nɔ amɛhiii shi akɛ mɛi ni yeɔ emuu dɔŋŋ. Amɛbaagbɔlɔ kɛyashi amɛbaagboi. Amɛkɛ emuu ni ayeee nɛɛ fɔ́ wɔ.—1 Mose 3:17-19; Romabii 5:12.
6. Mɛɛ gbɛfaŋnɔ Satan ná yɛ bɔ ni fee ní amanehulu je shishi lɛ mli?
6 Mɔ hu ni fata he ni ha amanehului fɛɛ je shishi ji mumɔŋ bɔɔnɔ ni abale lɛ yɛ sɛɛ mli akɛ Satan Abonsam lɛ. Akɛ nihalamɔ mli heyeli duro lɛ. Shi kɛlɛ, ekɛ nihalamɔ mli heyeli nɛɛ tsu nii yɛ gbɛ ni ejaaa nɔ koni ekɛha mɛi ajá lɛ. Kɛlɛ, Yehowa pɛ esa akɛ ajá shi jeee ebɔɔ nii lɛ. Satan ji mɔ ni laka Adam kɛ Hawa koni amɛtse amɛhe kɛjɛ Yehowa he, oookɛɛ nɔ ni nakai feemɔ baaha ‘amɛtsɔmɔ tamɔ Nyɔŋmɔ, ni amɛle ekpakpa kɛ efɔŋ.’—1 Mose 3:5.
Yehowa Pɛ Yɔɔ Hegbɛ akɛ Eyeɔ Nɔ
7. Mɛni nibii ni ejɛ atua ni atse ashi Yehowa lɛ mli eba lɛ tsɔɔ?
7 Nibii fɔji ni ejɛ atuatsemɔ lɛ mli eba lɛ tsɔɔ akɛ Yehowa ni ji Jeŋ Muu Fɛɛ Maŋtsɛ lɛ pɛ ji mɔ ni yɔɔ hegbɛ akɛ eyeɔ nɔ, ni ákɛ enɔyeli lɛ pɛ ja. Afii akpekpei abɔ ni eho lɛ eha ana akɛ Satan ni ji “je nɛŋ lumɔ lɛ” etée nɔyeli ko ni efɔŋfeemɔ, nibii ni ejaaa kɛ awuiyeli yɔɔ mli ni yeko omanye kwraa lɛ shi. (Yohane 12:31) Adesai anɔyelii ní yɔɔ Satan kudɔmɔ shishi ní ehi shi be kplaŋŋ kɛ emli amanehulu babaoo lɛ hu etsɔɔ akɛ adesai bɛ nyɛmɔ ni amɛkɛaaye nɔ yɛ jalɛ naa. (Yeremia 10:23) No hewɔ lɛ, nɔyelii fɛɛ ni adesai baaka akwɛ yɛ Yehowa nɔyeli lɛ sɛɛ lɛ yeŋ omanye. Nibii ni etee nɔ yɛ yinɔsane mli lɛ eha ana faŋŋ akɛ sane nɛɛ ji anɔkwale.
8. Mɛni ji Yehowa yiŋtoo kɛha adesai anɔyelii srɔtoi fɛɛ, ni mɛɛ gbɛ nɔ eeetsɔ etsu nakai yiŋtoo lɛ he nii?
8 Amrɔ nɛɛ ni Yehowa eŋmɛ adesai agbɛ afii akpekpei abɔ koni amɛye nɔ ní eyelikɛbuamɔ bɛ mli nɛɛ, esane ja kɛ́ ekpata nɔyelii srɔtoi nɛɛ fɛɛ ahiɛ kɛjɛ shikpɔŋ lɛ nɔ ni ekɛ lɛ diɛŋtsɛ enɔyeli lɛ ye najiaŋ. Gbalɛ ko ni wieɔ sane nɛɛ he lɛ tsɔɔ mli akɛ: “Nɛkɛ maŋtsɛmɛi nɛɛ [adesai anɔyelii] ayinɔ lɛ Nyɔŋmɔ ní yɔɔ ŋwɛi lɛ aaatee maŋtsɛyeli ko [eŋwɛi nɔyeli ni Kristo yeɔ nɔ lɛ] shi ama shi ni efiteŋ dɔŋŋ kɛaatee naanɔ, . . . eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.” (Daniel 2:44) Daimonioi kɛ adesai anɔyelii lɛ asɛɛ baafo, ni Nyɔŋmɔ ŋwɛi Maŋtsɛyeli lɛ pɛ baahi shi ni eye shikpɔŋ lɛ nɔ. Kristo baafee enɔ Maŋtsɛ, ni adesai anɔkwafoi 144,000 ni ahé amɛ kɛjɛ shikpɔŋ nɔ lɛ baafata ehe kɛye nɔ.—Kpojiemɔ 14:1.
Sɛɛnamɔ Baanyɛ Ajɛ Amanehulu Mli Aba
9, 10. Mɛɛ gbɛ nɔ Yesu ná amanehului ni ena lɛ ahe sɛɛ?
9 Ehi jogbaŋŋ akɛ wɔɔpɛi nibii ni ataoɔ kɛjɛɔ mɛi ni baaye nɔ yɛ ŋwɛi Maŋtsɛyeli lɛ mli lɛ adɛŋ lɛ mli wɔkwɛ. Klɛŋklɛŋ lɛ, Kristo Yesu tsɔɔ bɔ ni eji mɔ ni sa jogbaŋŋ kɛha egbɛhe ákɛ Maŋtsɛ lɛ. Ekɛ Yehowa ehi shi afii babaoo ni aleee, ni efeɔ e-Tsɛ lɛ suɔmɔnaa nii, ni eji “[e]ŋaalɔ” hu. (Abɛi 8:22-31) Beni Yehowa to gbɛjianɔ koni Yesu aba shikpɔŋ lɛ nɔ lɛ, Yesu jɛ esuɔmɔ mli ekpɛlɛ gbɛjianɔtoo nɛɛ nɔ. Beni eyɔɔ shikpɔŋ nɔ lɛ, ewie jeŋ muu fɛɛ maŋtsɛ ni Yehowa ji kɛ e-Maŋtsɛyeli lɛ he titri etsɔɔ mɛi. Yesu fee nɔkwɛmɔnɔ ni nɔ bɛ efɔ̃ shi eha wɔ kɛtsɔ ehe shi ni eba kwraa eha jeŋ muu fɛɛ maŋtsɛ nɛɛ nɔ.—Mateo 4:17; 6:9.
10 Awa Yesu yi, ni naagbee lɛ agbe lɛ. Beni etsuɔ esɔɔmɔ nitsumɔ lɛ, ena mɔbɔ shihilɛ ni adesai yɔɔ mli ní ekpele he fɛɛ he lɛ. Ani ená nibii ni ena nɛɛ kɛ amanehului ni lɛ diɛŋtsɛ ena lɛ ahe sɛɛ? Hɛɛ. Hebribii 5:8 lɛ kɛɔ akɛ: “Tsɛ Nyɔŋmɔ bi ji lɛ moŋ, shi kɛlɛ ekase toiboo yɛ amanehului ní ena lɛ amli.” Amanehului ni Yesu na beni eyɔɔ shikpɔŋ nɔ lɛ ha ebatsɔ mɔ ni nuɔ nii ashishi waa ni yɔɔ musuŋtsɔlɛ babaoo. Lɛ diɛŋtsɛ ena bɔ ni adesai aweku lɛ shihilɛ yɔɔ ha. Enɛ baanyɛ aha enu he eha mɛi ni naa amanehulu lɛ, ni ebaanyɛ eha enu enitsumɔ akɛ ekpɔ̃ amɛ lɛ shishi jogbaŋŋ. Kadimɔ bɔ ni bɔfo Paulo wie enɛ he yɛ Hebribii awolo lɛ mli. Eŋma akɛ: “Nibii fɛɛ gbɛfaŋ lɛ esa akɛ etamɔ enyɛmimɛi lɛ, koni etsɔ̃ mɔbɔnalɔ kɛ anɔkwa osɔfonukpa yɛ Nyɔŋmɔ hiɛ, koni ekpa maŋ lɛ yi musu. Ejaakɛ akɛni lɛ diɛŋtsɛ lɛ ena amanehulu ni aka lɛ hewɔ lɛ, enyɛɔ eyeɔ ebuaa mɛi ni akaa amɛ lɛ.” “Wɔsɔfonukpa ni wɔyɔɔ lɛ ejeee mɔ ni nyɛɛɛ anu wɔgbedemɔi lɛ ahe aha wɔ, shi eji mɔ ko ni aka lɛ yɛ nibii fɛɛ gbɛfaŋ tamɔ wɔ ní kɛlɛ esha ko esha ko bɛ ehe. Hewɔ lɛ nyɛhaa wɔkɛ ekãa atsia abɛŋkɛa duromɔ sɛi lɛ, koni wɔnine ashɛ mɔbɔnalɛ nɔ ni wɔná duromɔ ni aaaye abua wɔ yɛ be ni sa mli.”—Hebribii 2:17, 18; 4:14-16; Mateo 9:36; 11:28-30.
11. Mɛɛ gbɛ nɔ niiashikpamɔi ni mɛi ni baatsɔmɔ maŋtsɛmɛi kɛ osɔfoi wɔsɛɛ lɛ ená yɛ shikpɔŋ nɔ lɛ he baaba sɛɛnamɔ aha amɛ ákɛ nɔyelɔi?
11 Abaanyɛ awie nakai nɔŋŋ yɛ mɛi 144,000 ni “ahé” kɛjɛ shikpɔŋ lɛ nɔ koni amɛfata Kristo Yesu he kɛye nɔ yɛ ŋwɛi Maŋtsɛyeli lɛ mli lɛ he. (Kpojiemɔ14:4) Afɔ́ amɛ fɛɛ akɛ adesai yɛ shikpɔŋ lɛ nɔ, amɛdara yɛ jeŋ ni amanehulu eyi mli obɔ lɛ mli, ni amɛ diɛŋtsɛ hu amɛkɛ amanehului kpe. Awa amɛteŋ mɛi babaoo yi, ni agbe amɛteŋ mɛi komɛi po yɛ anɔkwa ni amɛtee nɔ amɛye amɛha Yehowa, kɛ agbɛnɛ hu Yesu sɛɛ ni amɛsumɔɔ akɛ amɛnyiɛ lɛ hewɔ. Shi ‘amɛhiɛ gbooo yɛ amɛ-Nuŋtsɔ lɛ he odaseyeli lɛ he, amɛkɛ sanekpakpa lɛ hiɛ amanehulu mli.’ (2 Timoteo 1:8) Niiashikpamɔi ni amɛná yɛ shikpɔŋ nɔ lɛ haa amɛbafeɔ mɛi ni sa jogbaŋŋ ákɛ amɛjɛ ŋwɛi amɛkojo adesai aweku lɛ. Amɛkase bɔ ni anuɔ nii ahe waa ahaa mɛi, bɔ ni ajieɔ mlihilɛ babaoo kpo atsɔɔ mɛi, ni amɛmiisumɔ ni amɛye amɛbua mɛi.—Kpojiemɔ 5:10; 14:2-5; 20:6.
Miishɛɛ ni Mɛi ni Yɔɔ Shikpɔŋ Nɔ Hiɛnɔkamɔ lɛ Yɔɔ
12, 13. Mɛɛ gbɛ nɔ mɛi ni yɔɔ hiɛnɔkamɔ akɛ amɛbaahi shikpɔŋ nɔ lɛ baanyɛ aná amanehulu he sɛɛ?
12 Ani nɔ̃ kpakpa ko baanyɛ ajɛ amanehului ni mɛi ni yɔɔ hiɛnɔkamɔ akɛ amɛbaahi shi kɛya naanɔ yɛ paradeiso shikpɔŋ ni hela, awerɛho, kɛ gbele ko kwraa bɛ nɔ lɛ kɛkpeɔ lɛ mli aba? Ekã shi faŋŋ akɛ piŋmɔ kɛ haomɔ ni naa wa ni amanehulu kɛbaa lɛ jeee nɔ ko ni asumɔɔ. Shi kɛ́ wɔŋmɛ wɔtsui shi yɛ amanehului nɛɛ amli lɛ, ebaanyɛ eha wɔná sui kpakpai ni baaha wɔná miishɛɛ.
13 Susumɔ nɔ ni Nyɔŋmɔ Wiemɔ ni etsɔ emumɔ lɛ nɔ eha aŋma lɛ kɛɔ yɛ enɛ he lɛ he okwɛ. Ekɛɔ akɛ: “Kɛ́ jalɛ hewɔ nyɛnaa amanehulu tete lɛ, ajɔɔ nyɛ.” “Kɛ́ Kristo gbɛi ahewɔ ajɛɔ nyɛ lɛ, ajɔɔ nyɛ.” (1 Petro 3:14; 4:14) “Ajɔɔ nyɛ, kɛji ajɛ́ nyɛ ni awa nyɛ yi ni amale awie nyɛhe efɔŋ fɛɛ efɔŋ yɛ mihewɔ lɛ. Nyɛnyaa ni nyɛmli afilia nyɛ; shi nyɛnyɔmɔwoo fá yɛ ŋwɛi.” (Mateo 5:11, 12) “Ajɔɔ nuu ni ŋmɛɔ etsui shi yɛ kaa mli lɛ, ejaakɛ, kɛ aka lɛ ni esa lɛ, eeená wala akekere.”—Yakobo 1:12.
14. Amanehulu baanyɛ aha Yehowa jálɔi aná miishɛɛ yɛ mɛɛ shishinumɔ naa?
14 Ekã shi faŋŋ akɛ jeee amanehulu lɛ diɛŋtsɛ ni ekolɛ wɔkɛkpeɔ lɛ ji nɔ ni haa wɔnáa miishɛɛ. Nɔ ni haa wɔnáa miishɛɛ kɛ tsui ni nyɔɔ mɔ mli lɛ jɛɔ le ni wɔle akɛ wɔmiina amanehulu yɛ Yehowa suɔmɔnaa nii ni wɔfeɔ kɛ Yesu nɔkwɛmɔnɔ lɛ sɛɛ ni wɔnyiɛɔ lɛ hewɔ. Ákɛ nɔkwɛmɔnɔ lɛ, yɛ klɛŋklɛŋ afii 100 lɛ mli lɛ, awo bɔfoi lɛ ateŋ mɛi komɛi atsuŋ ni sɛɛ mli lɛ aye amɛsane yɛ Yudafoi asaneyelihe wulu lɛ, ni abu amɛ fɔ́ yɛ Yesu Kristo he sane ni amɛshiɛɔ lɛ hewɔ. Ayi amɛ, ni sɛɛ mli lɛ aŋmɛɛ amɛhe. Te amɛfee amɛnii amɛha tɛŋŋ? Amaniɛbɔɔ ni Biblia lɛ kɛha lɛ kɛɔ akɛ, “amɛje akuashɔŋ lɛ hiɛ amɛtee kɛ miishɛɛ, akɛ egbɛi lɛ ahewɔ lɛ abu amɛ mɛi ni sa akɛ abɔɔ amɛ ahora.” (Bɔfoi lɛ Asaji 5:17-41) Jeee yi ni ayi amɛ kɛ piŋmɔ ni apiŋ amɛ lɛ hewɔ amɛná miishɛɛ lɛ, shi moŋ amɛmii shɛ amɛhe ejaakɛ amɛnu shishi ákɛ akɛ yiwaa nɛɛ ba amɛnɔ yɛ anɔkwa ni amɛtee nɔ amɛye Yehowa, kɛ Yesu nanemaahei lɛ asɛɛ ni amɛnyiɛ lɛ hewɔ.—Bɔfoi lɛ Asaji 16:25; 2 Korintobii 12:10; 1 Petro 4:13.
15. Mɛɛ gbɛ nɔ wɔtsui shi ni wɔɔŋmɛ yɛ amanehulu mli lɛ he baanyɛ aba sɛɛnamɔ kɛha wɔ yɛ wɔsɛɛ?
15 Kɛ́ wɔkɛ jwɛŋmɔ ni ja damɔ shitee-kɛwoo kɛ yiwaa naa lɛ, ebaanyɛ eha wɔná su ni ji tsuishiŋmɛɛ. Enɛ baaye abua wɔ koni wɔnyɛ wɔdamɔ amanehului ni wɔkɛaakpe wɔsɛɛ lɛ anaa. Wɔkaneɔ akɛ: “Minyɛmimɛi, kɛji nyɛgbee kaai srɔtoi pii amli lɛ, nyɛbua lɛ miishɛɛ sɔŋŋ; ejaakɛ nyɛle akɛ nyɛhemɔkɛyeli kaa lɛ tsɛ́ɔ tsuishiŋmɛɛ kɛbaa.” (Yakobo 1:2, 3) Ni Romabii 5:3-5 lɛ hu kɛɔ wɔ akɛ: “Wɔshwãa yɛ amanehului amli hu, ejaakɛ wɔle akɛ amanehulu lɛ tsɛ́ɔ tsuishiŋmɛɛ kɛbaa, ni tsuishiŋmɛɛ lɛ hu tsɛ́ɔ niiashikpamɔ kɛbaa; ni niiashikpamɔ lɛ tsɛ́ɔ nɔhiɛkãmɔ kɛbaa; ni nɔhiɛkãmɔ lɛ wooo mɔ hiɛgbele.” No hewɔ lɛ, kɛ́ amrɔ nɛɛ wɔtee nɔ wɔŋmɛ wɔtsui shi yɛ kaai ni wɔkɛkpeɔ yɛ Kristofoi ashihilɛ gbɛ ni wɔkɔ lɛ hewɔ lɛ mli lɛ, ebaasaa wɔ jogbaŋŋ koni wɔnyɛ wɔdamɔ kaai krokomɛi ni wɔbaanyɛ wɔkɛkpe yɛ jeŋ fɔŋ nɛɛ mli lɛ anaa.
Yehowa Baajɔɔ Mɛi ni Naa Amanehulu Lɛ
16. Mɛni Yehowa baafee aha mɛi ni baatsɔmɔ maŋtsɛmɛi kɛ osɔfoi wɔsɛɛ ni naa amanehulu lɛ koni ekɛjɔɔ amɛ?
16 Kɛ́ heloonaa nibii ni wɔyɔɔ lɛ po ŋmɛɛ wɔ yɛ shitee-kɛwoo loo yiwaa ni akɛbaa wɔnɔ yɛ Kristofoi ashihilɛ gbɛ ni wɔkɔ lɛ hewɔ lɛ, wɔtsui baanyɛ anyɔ wɔmli ejaakɛ wɔle akɛ Yehowa baajɔɔ wɔ babaoo diɛŋtsɛ. Ákɛ nɔkwɛmɔnɔ lɛ, bɔfo Paulo ŋma eyaha mɛi ni yɔɔ hiɛnɔkamɔ akɛ amɛbaaya ŋwɛi lɛ akɛ: “Nyɛnii ni ahà lɛ hu nyɛkɛ miishɛɛ kpɛlɛ, akɛni nyɛle akɛ nyɛyɛ jwetri ni hi fe no aahu ni hiɔ shi daa yɛ ŋwɛi,” ni ji nɔyelɔi yɛ Nyɔŋmɔ Maŋtsɛyeli lɛ mli lɛ hewɔ. (Hebribii 10:34) Ni kwɛ miishɛɛ ni amɛbaaná beni amɛfataa he ni akɛ jɔɔmɔi ni yɔɔ miishɛɛ haa adesai ni yɔɔ shikpɔŋ lɛ nɔ yɛ jeŋ hee lɛ mli yɛ Yehowa kɛ Kristo gbɛtsɔɔmɔ shishi lɛ. Kwɛ bɔ ni bɔfo Paulo wiemɔi ni eŋma eyaha anɔkwa Kristofoi lɛ ji anɔkwale, nɔ ni kɛɔ akɛ: “Misusuɔ akɛ ŋmɛnɛŋmɛnɛ amanehului nɛɛ kɛ anunyam ní wɔsɛɛ abaajie kpo aha wɔ lɛ yeee egbɔ.”—Romabii 8:18.
17. Mɛni Yehowa baafee aha mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ ní kɛ anɔkwayeli sɔmɔɔ lɛ amrɔ nɛɛ?
17 Nakai nɔŋŋ hu, nɔ fɛɛ nɔ ni ekolɛ mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ baaŋmɛɛ amrɔ nɛɛ loo amɛbaajɛ amɛsuɔmɔ mli amɛkɛshã afɔle yɛ Yehowa sɔɔmɔ hewɔ lɛ shɛɛɛ jɔɔmɔi babaoo ni Yehowa kɛbaaduro amɛ yɛ wɔsɛɛ be lɛ mli. Ebaaha amɛ naanɔ wala ni eye emuu yɛ paradeiso shikpɔŋ nɔ. Yɛ nakai jeŋ hee lɛ mli lɛ, Yehowa “Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ.” (Kpojiemɔ 21:4) Mɛɛ shiwoo ni yɔɔ miishɛɛ po nɛ! Nɔ ko nɔ ko bɛ ni ekolɛ wɔɔjɛ wɔsuɔmɔ mli wɔkɛshã afɔle loo ebaaŋmɛɛ wɔ yɛ Yehowa hewɔ ni baanyɛ ekɛ wala ni yɔɔ miishɛɛ ni baaba ni Yehowa kɛbaaha enɔkwa tsuji ni ŋmɛɔ amɛtsui shi yɛ amanehulu mli lɛ aye egbɔ.
18. Mɛɛ shiwoo ni shɛjeɔ mɔ mii Yehowa kɛhaa wɔ yɛ e-Wiemɔ lɛ mli?
18 Amanehului fɛɛ ni ekolɛ wɔkɛaakpe lɛ nyɛŋ atsi naanɔ wala ni wɔɔná yɛ Nyɔŋmɔ jeŋ hee lɛ mli lɛ naa yɛ gbɛ ko gbɛ ko nɔ. Amanehului fɛɛ asɛɛ baafo kwraa, ni akɛ shihilɛ kpakpai diɛŋtsɛ baato najiaŋ yɛ jeŋ hee lɛ mli. Yesaia 65:17, 18 lɛ kɛɔ wɔ akɛ: “Akaiŋ tsutsu nii lɛ dɔŋŋ, ni asaŋ ebaŋ jwɛŋmɔ mli dɔŋŋ; shi moŋ, nyɛnyaa ní nyɛmli afilia nyɛ kɛyaa naanɔ yɛ nii ní mibɔɔ lɛ ahewɔ.” Enɛ hewɔ lɛ, esa jogbaŋŋ akɛ Yesu nyɛ bi Yakobo jaje akɛ: “Wɔjɔɔ mɛi ni ŋmɛɔ amɛtsui shi lɛ.” (Yakobo 5:11) Hɛɛ, kɛ́ wɔkɛ anɔkwayeli ŋmɛ wɔtsui shi yɛ amanehului ni wɔkɛkpeɔ amrɔ nɛɛ mli lɛ, wɔbaanyɛ wɔná he sɛɛ amrɔ nɛɛ kɛ agbɛnɛ hu wɔsɛɛ.
Te Obaaha Hetoo Oha Tɛŋŋ?
• Te fee tɛŋŋ adesai bɔi amanehulu naa?
• Mɛɛ sɛɛnamɔi amanehulu baanyɛ ekɛbaha mɛi ni baatsɔmɔ shikpɔŋ lɛ nɔyelɔi wɔsɛɛ kɛ mɛi ni baahi shikpɔŋ lɛ nɔ lɛ?
• Mɛni hewɔ wɔbaanyɛ wɔná miishɛɛ amrɔ nɛɛ yɛ amanehulu ni wɔnaa lɛ fɛɛ sɛɛ?
[Mfoniri ni yɔɔ baafa 27]
Wɔklɛŋklɛŋ fɔlɔi lɛ ná gbɛkpamɔ ni yɔɔ miishɛɛ kɛha wɔsɛɛ
[Mfoniri ni yɔɔ baafa 29]
Mɛi ni naa amanehulu ni Yesu na amɛ lɛ saa lɛ koni etsɔ Maŋtsɛ kɛ Osɔfonukpa kpakpa
[Mfoniri ni yɔɔ baafa 31]
Bɔfoi lɛ ‘ná miishɛɛ ejaakɛ abu amɛ akɛ mɛi ni sa akɛ abɔɔ amɛ ahora’ yɛ amɛhemɔkɛyeli lɛ hewɔ