NIKASEMƆ 2
Rebeka Miisumɔ ni Eha Yehowa Aná Miishɛɛ
Rebeka ji yoo ko ni sumɔɔ Yehowa. Atsɛɔ ewu lɛ akɛ Isak. Lɛ hu esumɔɔ Yehowa. Te fee tɛŋŋ ni Rebeka batsɔ Isak ŋa lɛ? Mɛni efee kɛtsɔɔ akɛ eesumɔ ni eha Yehowa aná miishɛɛ? Ha wɔkase nibii krokomɛi ni kɔɔ ehe.
Atsɛɔ Isak papa Abraham, ni atsɛɔ emami hu Sara. Amɛhi Kanaan shikpɔŋ lɛ nɔ. Mɛi ni yɔɔ Kanaan shikpɔŋ lɛ nɔ lɛ jaaa Yehowa. Shi Abraham miisumɔ ni ebinuu lɛ kɛ yoo ni jaa Yehowa ahi shi. No hewɔ lɛ, etsu etsulɔ lɛ koni eyatao ŋa eha Isak. Eeenyɛ efee akɛ tsulɔ nɛɛ ji Eliezer. Abraham tsu lɛ kɛtee he ko ni ewekumɛi komɛi yɔɔ. Atsɛɔ jɛmɛ Haran.
Rebeka jɛ etsui mli etsu nii waa bɔ ni afee ni ená nu eha yomai lɛ
Abraham tsuji krokomɛi fata Eliezer he kɛtee. Gbɛ lɛ jekɛ waa. Amɛkɛ yomai nyɔŋma ni tere niyenii kɛ nikeenii fã gbɛ lɛ. Te Eliezer baafee tɛŋŋ ele yoo ni esa akɛ ehala eha Isak lɛ? Beni Eliezer kɛ tsuji krokomɛi lɛ yashɛ Haran lɛ, amɛwa yɛ nubu ko he, ejaakɛ Eliezer le akɛ etsɛŋ ni mɛi baaba amɛbayɛ nu. Esɔle eha Yehowa ni ekɛɛ: ‘Kɛ́ mikɛɛ oblayoo ko akɛ eha mi nu manu ni eha mi kɛ miyomai lɛ fɛɛ nu wɔnu lɛ, no dani male akɛ lɛ ji yoo ni ohala oha Isak.’
Kɛkɛ ni oblayoo ni atsɛɔ lɛ Rebeka lɛ ba nubu lɛ he. Biblia lɛ kɛɔ wɔ akɛ ehe yɛ fɛo waa. Beni Eliezer bi lɛ ni eha lɛ nu enu lɛ, eha hetoo akɛ: ‘Maha bo aahu. Ni mayayɛ eko maha oyomai lɛ hu.’ Bo lɛ susumɔ nɔ ni Rebeka fee lɛ he okwɛ! Kɛ́ kumai miiye yomai lɛ amɛnuɔ nu waa, no hewɔ lɛ ebaabi ni eya nubu lɛ he shii abɔ. Kɛ́ okwɛ mfoniri lɛ mli lɛ, ani onaaa akɛ eetsu nii waa?— Bɔ ni Yehowa ha Eliezer sɔlemɔ lɛ hetoo lɛ ha enaa kpɛ ehe.
Eliezer kɛ nibii fɛfɛji babaoo ke Rebeka. Rebeka kɛ Eliezer kɛ tsuji krokomɛi lɛ tee shĩa. Beni amɛshɛ shĩa lɛ, Eliezer kɛɛ Rebeka wekumɛi lɛ nɔ hewɔ ni Abraham tsu lɛ jɛmɛ kɛ bɔ ni Yehowa eha esɔlemɔ lɛ hetoo. Amɛmii shɛ amɛhe akɛ amɛaaha Rebeka aya ni ekɛ Isak ayahi shi.
Rebeka kɛ Eliezer tee Kanaan ni Isak kɛ lɛ hi shi akɛ eŋa
Shi ani osusuɔ akɛ no mli lɛ Rebeka miisumɔ ni ekɛ Isak ayahi shi?— Rebeka le akɛ Yehowa ni tsu Eliezer. No hewɔ lɛ beni ewekumɛi lɛ bi lɛ kɛji ebaasumɔ ni eya Kanaan ni ekɛ Isak ayahi shi lɛ, eha hetoo akɛ: ‘Hɛɛ, maya.’ Oya nɔŋŋ ni ekɛ Eliezer ku sɛɛ kɛtee Kanaan. Beni amɛyashɛ lɛ, Isak kɛ lɛ bote gbalashihilɛ mli.
Akɛni Rebeka fee nɔ ni Yehowa taoɔ ni efee hewɔ lɛ, Yehowa jɔɔ lɛ. Afii babaoo sɛɛ lɛ, ajɛ eweku lɛ mli afɔ Yesu! Kɛ́ ofee onii tamɔ Rebeka ni oha Yehowa ná miishɛɛ lɛ, ebaajɔɔ bo.