Bɔ ni Atsuɔ Naagbai Ahe Nii Ahãa

Kɛ́ nyɛje nyɛgbãla lɛ shishi lɛ, nyɛkɛ naagbai srɔtoi baakpe. Ekolɛ naagbai nɛɛ baaba akɛni esoro bɔ ni nyɛteŋ mɔ fɛɛ mɔ susuɔ nii ahe ehãa, bɔ ni enuɔ nii ahe ehãa, kɛ bɔ ni etsuɔ saji ahe nii ehãa lɛ hewɔ. Aloo ekolɛ nibii ni jeee nyɛ ejɛ kɛ shihilɛi ni nyɛkpaaa gbɛ ji nɔ ni kɛ naagbai nɛɛ baaba.

Ewaaa akɛ wɔɔku wɔhiɛ wɔshwie naagbai anɔ, shi awoɔ wɔ ŋaa yɛ Biblia lɛ mli akɛ wɔtsu wɔnaagbai ahe nii. (Mateo 5:23, 24) Kɛ́ okɛ Biblia mli shishitoo mlai tsu nii lɛ, obaaná onaagbai lɛ anaa tsabaa ni hi jogbaŋŋ kɛmɔ shi.

1 NYƐSUSUA NAAGBA LƐ HE

NƆ NI BIBLIA LƐ KƐƆ: “Wiemɔ be yɛ.” (Jajelɔ 3:7) Nyɛkwɛa ni nyɛnáa be kɛwiea naagba lɛ he. Hã ohefatalɔ lɛ ale osusumɔ yɛ sane lɛ he kɛ bɔ ni onuɔ he ohãa, ni kaashiu lɛ nɔ ko nɔ. Okɛ ohefatalɔ lɛ “awie anɔkwale” be fɛɛ be. (Efesobii 4:25) Kɛ́ sane lɛ yɛ dɔlɛ waa po lɛ, bɔɔ mɔdɛŋ ni okɛ ohefatalɔ lɛ akataa saji anaa. Naajɔlɛ hetoo hãŋ sane fioo ko ni aasusu he lɛ atsɔ bei.​—Abɛi 15:4; 26:20.

Kɛ́ okɛ ohefatalɔ lɛ kpãaa gbee po lɛ, yaa nɔ owie wiemɔi ni yɔɔ nyam, ni ojie suɔmɔ kɛ bulɛ kpo otsɔɔ lɛ. (Kolosebii 4:6) Nyɛbɔa mɔdɛŋ nyɛtsua naagba lɛ he nii oya nɔŋŋ. Nyɛyaa nɔ nyɛkɛ nyɛhe awiea hu.​—Efesobii 4:26.

NƆ NI OBAANYƐ OFEE:

• Nyɛtoa be ni sa ni nyɛkɛsusu naagba lɛ he

• Kɛ́ ohefatalɔ lɛ miiwie lɛ, kaafolɔ mli. Bo hu ebaashɛ onɔ

2 BO LƐ TOI NI ONU LƐ SHISHI

NƆ NI BIBLIA LƐ KƐƆ: ‘Nyɛsumɔsumɔa nyɛhe. Mɔ fɛɛ mɔ kɛ woo ahã enaanyo tsutsu.’ (Romabii 12:10) Bɔ ni oboɔ sane toi ohãa lɛ he miihia jogbaŋŋ. Bɔɔ mɔdɛŋ ni ‘ona mli’ ohã ohefatalɔ lɛ, ni ‘oba ohe shi’ koni onyɛ onu esusumɔ lɛ shishi. (1 Petro 3:8; Yakobo 1:19) Kaakwa ofee tamɔ nɔ ni oobo lɛ toi. Kɛ́ eeehi lɛ, kpa nɔ ni ofeɔ lɛ dã, ni obo lɛ toi jogbaŋŋ, aloo bi lɛ kɛji ebaanyɛ ehã nyɛsusu sane lɛ he be kroko. Kɛ́ obu owu lɛ loo oŋa lɛ akɛ ohefatalɔ shi jeee ohenyɛlɔ lɛ, ‘omli fuŋ oya.’​—Jajelɔ 7:9.

NƆ NI OBAANYƐ OFEE:

• Kɛ́ nɔ ni ekɛɔ bo lɛ eŋɔɔɔ onaa po lɛ, yaa nɔ obo lɛ toi jogbaŋŋ, ni kaasha ohe okojo lɛ

• Kɔ nɔ ni ekɛɔ bo lɛ sɛɛ. Kadimɔ gbee ni ekɛwieɔ, bɔ ni efee ehiɛ, bɔ ni efɔ̃ɔ eniji, kɛ nibii krokomɛi ni tamɔ nakai

3 NYƐTSUA HE NII

NƆ NI BIBLIA LƐ KƐƆ: “Deŋmegbomɔ fɛɛ lɛ sɛɛnamɔ yɛ mli; shi naabu folo wiemɔ lɛ, ohia kɛkɛ yɔɔ mli.” (Abɛi 14:23) Kɛ́ nyɛna gbɛ kpakpa ni nyɛbaatsɔ nɔ nyɛtsu naagba ko he nii lɛ, no kɛkɛ faaa. Esa akɛ nyɛtsu yiŋ ni nyɛfee ekome kɛkpɛ lɛ he nii. Enɛ baabi ni nyɛgbo he deŋme waa, shi kɛ́ nyɛfee nakai lɛ nyɛbaaná he sɛɛ. (Abɛi 10:4) Kɛ́ nyɛfee ekome kɛtsu nii lɛ, ‘nyɛbaaná nyɛdeŋmegbomɔ lɛ mli nyɔmɔwoo kpakpa.’​—Jajelɔ 4:9.

NƆ NI NYƐBAANYƐ NYƐFEE:

• Nyɛfea ekome kɛkpɛa yiŋ yɛ nibii ni sa ni nyɛteŋ mɔ fɛɛ mɔ baafee kɛtsu nyɛnaagba lɛ he nii lɛ he

• Be kɛ beaŋ lɛ, nyɛkwɛa he ni nyɛtsu naagba lɛ he nii kɛshɛ