YITSO 3
Afɔ Mɔ ni Baasaa Gbɛ lɛ Eto Lɛ
AFƆ YOHANE BAPTISILƆ LƐ NI AWO LƐ GBƐ́I
ZAKARIA GBA NƆ NI YOHANE BAATSU WƆSƐƐ
Be ni Elizabet kɛbaafɔ lɛ eshɛ etã. Ewekunyo Maria kɛ lɛ ebahi shi nyɔji etɛ. Agbɛnɛ, be eshɛ ni Maria baashi Elizabet, ní efã gbɛ kakadaŋŋ kɛya eshĩa yɛ Nazaret ni yɔɔ Yudea kooyi lɛ. Yɛ aaafee nyɔji ekpaa mli lɛ, lɛ hu ebaafɔ binuu.
Be ni Maria shi sɛɛ etsɛɛɛ lɛ, Elizabet fɔ. Kwɛ miishɛɛ ni eji akɛ Elizabet fɔ shweshweeshwe, ni lɛ kɛ gbekɛ lɛ fɛɛ yɛ jogbaŋŋ! Be ni Elizabet kɛ ebinuu abifao lɛ tsɔɔ ekutsoŋbii kɛ ewekumɛi lɛ, amɛkɛ lɛ fɛɛ nya.
Mla ni Nyɔŋmɔ kɛhã Israelbii lɛ bi ni kɛ́ afɔ binuu lɛ, afo lɛ ketia yɛ gbi ni ji gbi kpaanyɔ lɛ nɔ, ni awoɔ gbekɛ lɛ gbɛ́i hu yɛ gbi nɛɛ nɔ. (3 Mose 12:2, 3) Mɛi komɛi susu akɛ esa akɛ akɛ abifao lɛ tsɛ gbɛ́i Zakaria lɛ awo lɛ. Shi Elizabet fã enaa ekɛɛ: “Dabida! shi abaatsɛ lɛ Yohane moŋ.” (Luka 1:60) Kaimɔ akɛ bɔfo Gabriel kɛɛ esa akɛ awo abifao nɛɛ Yohane.
Amɛkutsoŋbii kɛ amɛnanemɛi lɛ wie amɛshi akɛ: “Mɔ ko bɛ owekumɛi lɛ ateŋ ni atsɛɔ lɛ nakai.” (Luka 1:61) Kɛkɛ ni amɛkɛ amɛniji fee okadii kɛbi Zakaria gbɛ́i ni ebaasumɔ ni akɛwo ebinuu lɛ. Zakaria bi ni ahã lɛ tao, ni eŋma hetoo lɛ akɛ: “Yohane ji egbɛ́i.”—Luka 1:63.
Amrɔ lɛ, Zakaria bɔi wiemɔ ekoŋŋ yɛ naakpɛɛ gbɛ nɔ. Ekolɛ obaakai akɛ, etɔ mu be ni eheee nɔ ni bɔfo lɛ kɛɛ lɛ akɛ Elizabet baafɔ binuu lɛ eyeee lɛ. No hewɔ lɛ, agbɛnɛ be ni Zakaria bɔi wiemɔ lɛ, ekutsoŋbii lɛ anaa kpɛ amɛhe ni amɛbibii amɛhe akɛ: “Mɛni po gbekɛ bibioo nɛɛ baatsɔ?” (Luka 1:66) Amɛna akɛ Nyɔŋmɔ ni hã awo abifao lɛ gbɛ́i akɛ Yohane lɛ.
Kɛkɛ ni mumɔ krɔŋkrɔŋ yi Zakaria obɔ, ni ewie akɛ: “Ajie Yehowa, Israel Nyɔŋmɔ lɛ yi, ejaakɛ egbala ejwɛŋmɔ kɛba emɛi lɛ anɔ ni ekpɔ̃ amɛ. Ni etee yiwalaheremɔ akolonto shi yɛ etsulɔ David we lɛ ehã wɔ.” (Luka 1:68, 69) “Yiwalaheremɔ akolonto” ni etsĩ tã lɛ ji Nuŋtsɔ Yesu ni kpaako abaafɔ lɛ lɛ. Zakaria kɛɛ mɔ nɛɛ nɔ Nyɔŋmɔ baatsɔ koni “kɛ́ ajie wɔ kɛjɛ henyɛlɔi adɛŋ lɛ, ehã wɔ hegbɛ ni wɔkɛ sɔɔmɔ krɔŋŋ ahã lɛ ní gbeyeishemɔ ko bɛ mli yɛ anɔkwayeli kɛ jalɛ mli yɛ ehiɛ wɔgbii fɛɛ.”—Luka 1:74, 75.
Zakaria gba yɛ lɛ diɛŋtsɛ ebi lɛ he akɛ: “Bo, gbekɛ bibioo nɛɛ, abaatsɛ bo Mɔ ni Nɔ Kwɔ Fe Fɛɛ lɛ gbalɔ, ejaakɛ obaatsɔ Yehowa hiɛ oyasaa egbɛi lɛ oto, koni oŋɔ yiwalaheremɔ he nilee ohã emɛi lɛ kɛtsɔ amɛhe eshaifaa nɔ, yɛ wɔ-Nyɔŋmɔ lɛ musuŋtsɔlɛ lɛ hewɔ. Musuŋtsɔlɛ nɛɛ hewɔ lɛ, jetsɛremɔ ni jɛ ŋwɛi baaba abasara wɔ, koni ehã la akpɛ ahã mɛi ni tara duŋ mli kɛ gbele hɔɔŋ mli lɛ, ni ekudɔ wɔnaji kɛya toiŋjɔlɛ gbɛ lɛ nɔ.” (Luka 1:76-79) Kwɛ bɔ ni nakai gbalɛ lɛ woɔ mɔ hewalɛ hã!
Nɛkɛ be nɛɛ mli lɛ, Maria, mɔ ni ekã shi faŋŋ akɛ eboteko gbalashihilɛ mli lɛ eyashɛ shĩa yɛ Nazaret. Mɛni baaba enɔ kɛ́ mɛi ná le akɛ ehiɛ musu lɛ?