Awo Amɛ Nyɔmɔ yɛ Shwamɔ ni Bɛ Amɛhe lɛ Hewɔ

YEHOWA jɔɔ etsuji anɔkwafoi lɛ ni ewoɔ amɛ nyɔmɔ. Ekolɛ ehe baahia ni amɛmɛ kɛyashi be ko dani amɛna bɔ ni Nyɔŋmɔ tsuɔ eyiŋtoi lɛ ahe nii, shi mɛɛ miishɛɛ po amɛnaa nɛkɛ beni amɛnine shɛɔ ejɔɔmɔ nɔ lɛ!

Afee enɛ he mfoniri jogbaŋŋ aaafee afii akpei enyɔ ni eho nɛ yɛ Yuda osɔfo Zakaria kɛ eŋa, Elisabet, ni amɛ fɛɛ amɛjɛ Aaron weku lɛ mli lɛ asane lɛ mli. Nyɔŋmɔ ewo shi akɛ kɛ Israelbii lɛ sɔmɔ lɛ yɛ anɔkwayeli mli lɛ, ekɛ bii baajɔɔ amɛ. Ekɛɛ akɛ bii ji nikeenii. (3 Mose 26:9; Lala 127:3) Shi Zakaria kɛ Elisabet bɛ bi, ni amɛdara yɛ afii amli.—Luka 1:1-7.

Ŋmalɛi lɛ kɛɔ akɛ Zakaria kɛ Elisabet “fɛɛ lɛ, jalɔi ji amɛ yɛ Nyɔŋmɔ hiɛ, ni amɛyeɔ Nuŋtsɔ lɛ kitai kɛ ekpɔi lɛ fɛɛ nɔ ni kpa ko bɛ amɛhe.” (Luka 1:6) Amɛsumɔɔ Nyɔŋmɔ aahu akɛ ewaaa haaa amɛ akɛ amɛaadi jalɛ gbɛi asɛɛ ni amɛye ekitai anɔ.—1 Yohane 5:3.

Jɔɔmɔi ni Akpaaa Gbɛ

Nyɛhaa wɔkuɔ wɔsɛɛ kɛyaa afi 3 D.Ŋ.B. agbiɛnaa be lɛ naagbee mli loo latsaa be lɛ shishijee mli. Herode Kpeteŋkple lɛ miiye nɔ akɛ maŋtsɛ yɛ Yudea. Gbi ko lɛ, osɔfo Zakaria bote Yerusalem sɔlemɔ we lɛ He Krɔŋkrɔŋ lɛ. Esha tsofa-kɛ-ŋma yɛ shika afɔleshaa latɛ lɛ nɔ, beni gbɔmɛi lɛ ebua amɛhe naa kɛmiisɔle yɛ sɔlemɔtsu lɛ sɛɛ. Etamɔ nɔ ni abuɔ enɛ akɛ daa gbi sɔɔmɔ lɛ mli nɔ ni woo yɔɔ mli fe fɛɛ, ni afeɔ enɛ beni akɛ afɔleshaa lɛ eha lɛ sɛɛ. Ekolɛ osɔfo lɛ naa hegbɛ ni tamɔ nɛkɛ shikome pɛ yɛ ewala shihilɛ be mli.

Zakaria naa ekpɛ ehe yɛ nɔ ni enaa lɛ hewɔ. Naa, Yehowa bɔfo damɔ tsofa-kɛ-ŋma afɔleshaa latɛ lɛ ninejurɔ gbɛ! Osɔfo ni eda yɛ afii amli lɛ hao waa ni eshe gbeyei. Shi bɔfo lɛ kɛɛ lɛ akɛ: “Kaashe gbeyei, Zakaria, ejaakɛ abo ofaikpamɔ lɛ toi, ni oŋa Elisabet baafɔ binuu ahao, ni ooowo lɛ gbɛi akɛ Yohane.” Hɛɛ, Yehowa enu Elisabet kɛ Zakaria sɔlemɔi ni jɛ tsuiŋ lɛ.—Luka 1:8-13.

Ŋwɛibɔfo lɛ kɛfata he akɛ: “Ni eeefeeo miishɛɛ kɛ mlifilimɔ, ni mɛi pii aaanya efɔmɔ lɛ he. Ejaakɛ eeetsɔ agbo yɛ Nuŋtsɔ [Yehowa] hiɛ; ni enuŋ wein loo daa ni wa ko, ni mumɔ krɔŋkrɔŋ aaayi emli obɔ kɛaajɛ enyɛ musuŋ beebe.” Yohane baafee Nazirnyo ewala be fɛɛ, ni Nyɔŋmɔ mumɔ krɔŋkrɔŋ eyi lɛ obɔ. Bɔfo lɛ tee nɔ akɛ: “Ni eeekpale Israelbii lɛ ateŋ mɛi pii kɛaaba Nuŋtsɔ [Yehowa], amɛ-Nyɔŋmɔ lɛ, ŋɔɔ. Ni eeetsɔ ehiɛ yɛ Elia mumɔ kɛ hewalɛ mli, ni eyadɔrɔ tsɛmɛi atsuii kɛba bii ahe, kɛ toigbolɔi hu kɛba jalɔi anilee mli, ni esaa maŋ ni efee klalo eto Nuŋtsɔ [Yehowa].”—Luka 1:14-17.

Zakaria bi akɛ: “Mɛni mikɛaale enɛ? Ejaakɛ mi lɛ, nuumo ji mi, ni miŋa hu egbɔ.” Bɔfo lɛ ha hetoo akɛ: Miji Gabriel ni damɔɔ Nyɔŋmɔ hiɛ lɛ, ni atsu mi akɛ mikɛo abawie ni migbao sanekpakpa nɛɛ. Ni naa, oootɔ mu, ni onyɛŋ owie kɛyashi gbi nɔ ni nii nɛɛ aaaba mli, ejaakɛ oheee miwiemɔi lɛ ni baaba mli lɛ yɛ amɛbe mli lɛ oyeee.” Shi beni Zakaria fa kpo kɛjɛ sɔlemɔtsu lɛŋ lɛ, enyɛɛɛ ewie, ni gbɔmɛi lɛ yoo akɛ ena naakpɛɛ nɔ ko. Nɔ ni enyɛɔ efeɔ pɛ ji okadii, enine ni efɔɔ ekɛtsɔɔ esusumɔi. Beni emaŋ sɔɔmɔ lɛ ba naagbee lɛ, eku esɛɛ kɛtee shia.—Luka 1:18-23.

Nii ni kɛ Nyamɔ Baa

Akɛni shiwoo lɛ ba mli anɔkwale hewɔ lɛ, etsɛɛ ni Elisabet na nɔ ni eeedamɔ nɔ emli afili lɛ. Ena musu, ni enɛ jie ahorabɔɔ ni kene-feemɔ kɛbaa lɛ. Ewekunyo Maria hu bɔi nyamɔ, ejaakɛ nakai ŋwɛibɔfo Gabriel lɛ nɔŋŋ kɛɛ lɛ akɛ: “Ni naa, obaana musu ni ooofɔ binuu, ni ooowo lɛ gbɛi akɛ Yesu. Eeetsɔ agbo, ni aaatsɛ lɛ Ŋwɛinyo lɛ bi, ni Nuŋtsɔ [Yehowa] Nyɔŋmɔ aaaŋɔ etsɛ David maŋtsɛsɛi lɛ aha lɛ.” Maria miisumɔ ni akɛ lɛ atsu nii akɛ “Nuŋtsɔ [Yehowa] weyoo.”—Luka 1:24-38.

Maria kɛ oyaiyeli tee Zakaria kɛ Elisabet ŋɔɔ yɛ amɛshia, yɛ he ko ni kã Yuda gɔji lɛ ayiteŋ. Beni abifao lɛ nu Maria ŋamɔ lɛ pɛ kɛkɛ ni etumɔ yɛ Elisabet musuŋ. Akɛni Nyɔŋmɔ mumɔ krɔŋkrɔŋ lɛ yɔɔ enɔ hewɔ lɛ, Elisabet bo kɛ gbee walɛ akɛ: “Ajɔɔo yɛ yei ateŋ, ni ajɔɔ omusuŋ bi lɛ! Ni nɛgbɛ enɛ jɛ baha mi ni mi-Nuŋtsɔ nyɛ baa miŋɔɔ nɛɛ? Shi naa, amrɔ pɛ ni oŋamɔ lɛ gbee lɛ gbɛɛ yɛ mitoiŋ lɛ, abifao lɛ kɛ mlifilimɔ tumɔ yɛ mimusuŋ. Ni ajɔɔo, bo mɔ ni ohe oye akɛ wiemɔi ni ajɛ Nuŋtsɔ [Yehowa] ŋɔɔ abakɛɛo lɛ aaaba mli lɛ.” Maria kɛ mlifilimɔ babaoo here nɔ. Ehi Elisabet masɛi aaafee nyɔji etɛ.—Luka 1:39-56.

Afɔ Yohane

Yɛ be ni sa mli lɛ, afɔ binuu aha Elisabet kɛ Zakaria ni amɛgbɔlɔ lɛ. Afo abifao lɛ ketia yɛ gbi ni ji kpaanyɔ lɛ nɔ. Wekumɛi miisumɔ ni atsɛ gbekɛ lɛ gbɛi akɛ Zakaria, shi Elisabet kɛɛ: “Dabida, shi awo lɛ Yohane moŋ!” Ani ewu ni etɔ mu lolo lɛ kɛ lɛ kpaa gbee? Eŋma yɛ tao fioo ko nɔ akɛ: “Yohane ji egbɛi.” Amrɔ nɔŋŋ pɛ kɛkɛ ni Zakaria lilɛi fɛne, ni ebɔi wiemɔ, ni ejɔɔ Yehowa.—Luka 1:57-66.

Akɛni mumɔ krɔŋkrɔŋ eyi lɛ obɔ hewɔ lɛ, osɔfo ni mli efili lɛ lɛ gba gbalɛi. Ewieɔ tamɔ nɔ ni atee shiwoo Kpɔlɔ lɛ—‘walaheremɔ akolonto ni yɔɔ David we lɛ’—shi momo yɛ Abraham kpaŋmɔ lɛ ni kɔɔ Seshi ni aaatsɔ enɔ ajɔɔ jeŋmaji fɛɛ lɛ he lɛ kɛ gbeekpamɔ naa. (1 Mose 22:15-18) Akɛ Mesia lɛ hiɛnyiɛlɔ lɛ, Zakaria diɛŋtsɛ binuu ni afɔ lɛ yɛ naakpɛɛ gbɛ nɔ lɛ ‘baatsɔ Yehowa hiɛ ni ekɛ yiwalaheremɔ he nilee ayaha gbɔmɛi lɛ.’ Beni afii lɛ hoɔ lɛ, Yohane tee nɔ eda ni ehe bawa yɛ mumɔ mli.—Luka 1:67-80.

Awo Amɛ Nyɔmɔ Babaoo

Zakaria kɛ Elisabet ji hemɔkɛyeli kɛ tsuishitoo he nɔkwɛmɔ nii kpakpai. Amɛtee nɔ amɛsɔmɔ Yehowa yɛ anɔkwayeli mli eyɛ mli akɛ esa akɛ amɛmɛ Nyɔŋmɔ, ni amɛjɔɔmɔi ni da fe fɛɛ lɛ ba beni amɛdara saŋŋ yɛ afii amli lɛ.

Ni kɛlɛ, mɛɛ jɔɔmɔi Elisabet kɛ Zakaria na mli ŋɔɔmɔ nɛkɛ! Akɛni amɛyɔɔ Nyɔŋmɔ mumɔ lɛ hewalɛ shishi hewɔ lɛ, amɛyi enyɔ lɛ fɛɛ amɛgba. Amɛna hegbɛ akɛ amɛaatsɔmɔ Mesia lɛ hiɛnyiɛlɔ, Yohane Baptisilɔ lɛ, fɔlɔi kɛ tsɔɔlɔi. Agbɛnɛ hu, Nyɔŋmɔ bu amɛ jalɔi. Nakai nɔŋŋ mɛi ni diɔ gbɛ ni tsɔɔ Nyɔŋmɔ gbeyeishemɔ sɛɛ bianɛ lɛ hu baanyɛ ana jalɛ shidaamɔ yɛ Nyɔŋmɔ hiɛ, ni amɛnine baashɛ jɔɔmɔi pii ni ji nyɔmɔwoo nɔ akɛni amɛnyiɛ Yehowa kitai lɛ amli yɛ gbɛ ni kpa ko bɛ amɛhe nɔ lɛ hewɔ.