Babel Mɔɔ Lɛ

Nu Afua lɛ sɛɛ lɛ, Noa bihii lɛ kɛ amɛŋamɛi lɛ fɔ bii pii. Amɛbii lɛ badara, ni amɛ hu amɛfɔ pii. Be ni amɛyi bɔi famɔ lɛ, amɛteŋ mɛi komɛi fã ni amɛyahi shikpɔŋ lɛ nɔ hei srɔtoi, tamɔ bɔ ni Yehowa ekɛɛ amɛ akɛ amɛfee lɛ pɛpɛɛpɛ.

Shi wekui lɛ ekomɛi booo Yehowa toi. Amɛkɛɛ akɛ: ‘Nyɛhãa wɔfea maŋ wɔhãa wɔhe, ni wɔma mɔɔ ni eyiteŋ ayashi ŋwɛi, koni ale wɔ yɛ je lɛŋ fɛɛ.’

Nɔ ni amɛfee lɛ eŋɔɔɔ Yehowa naa kwraa, no hewɔ lɛ, ole nɔ ni efee? Trukaa lɛ, ehã amɛbɔi wiemɔi srɔtoisrɔtoi wiemɔ. Kɛ́ mɔ nɛ wie lɛ, mɔ nɛ nuuu shishi, ni kɛ́ mɔ nɛ hu wie lɛ, mɔ nɛ nuuu shishi. No hewɔ lɛ, amɛnyɛɛɛ amɛtsa amɛnitsumɔ lɛ nɔ. Awo amɛmaŋ lɛ gbɛ́i akɛ Babel, ni eshishi ji “Futumɔ.” Mɛi lɛ gbɛ amɛshwã ni amɛyahi shikpɔŋ lɛ nɔ hei srɔtoi, ni amɛtee nɔ amɛfee nibii gbohii yɛ hei ni amɛtee lɛ. Shi ani mɛi komɛi fee nɔ ni Yehowa sumɔɔ? Yitso ni nyiɛ sɛɛ lɛ baatsɔɔ wɔ.