Sanebimɔi Ni Jɛ Kanelɔi Adɛŋ

● Kɛji akɛ gbalashihilɛ mli hefatalɔ ni efɔŋ ko bɛ ehe lɛ kɛ ehefatalɔ gbalafitelɔ lɛ bɔi bɔlɛnamɔ yɛ beni enu egbalafitemɔ lɛ he lɛ sɛɛ lɛ, ani bɔlɛnamɔ ni aje shishi lɛ ji odaseyeli ni tsɔɔ akɛ mɔ ni efeko efɔŋ lɛ kɛ sane lɛ eke ehefatalɔ lɛ?

Bɔlɛnamɔ yɛ gbalashihilɛ lɛ sɛɛ ji nɔ ni adamɔɔ nɔ afiteɔ gbala lɛ, kɛ́ mɔ ni efeko efɔŋ lɛ miisumɔ lɛ nakai; nakai nɔŋŋ hu kɛji akɛ aje bɔlɛnamɔ shishi lɛ, anuɔ shishi ákɛ akɛ esha lɛ eke ni tɔmɔ lɛ bɛ dɔŋŋ. Kɛ́ jeee nakai lɛ nifeemɔ lɛ kɛ eshaifaa lɛ kpaŋ gbee.​—Mat. 19:9; 5:⁠37.

Kɛji akɛ anɔkwale tsuitsakemɔ je kpo yɛ hefatalɔ gbalafitelɔ lɛ he, ni hefatalɔi lɛ fɛɛ kpɛlɛ nɔ akɛ amɛkɛ anɔkwayeli baatsu nii ni amɛkɛsaa naagba ni eba lɛ, belɛ ebaahi jogbaŋŋ akɛ aaajie mɔbɔnalɛ kpo ni akpã eshaifaa mli aha mɔ ni etɔ lɛ. Esa akɛ abɔ mɔdɛŋ ni yɔɔ kɛha mɛi ni amɛbote gbalashihilɛ mli lɛ, fɛɛ ni aaanyɛ ni akɛbaa gbalashihilɛ wekukpaa lɛ yi ni ayoo hu akɛ naagbai komɛi baahi shi ni esa akɛ atsu he nii lolo. No hewɔ lɛ abaanyɛ atsu saji ahe nii, jeee akɛ ni etsɔ jɔɔmɔ kɛba mɛi enyɔ ni yɔɔ gbalashihilɛ mli lɛ kɛ bii lolo ni yɔɔ shia lɛ, shi moŋ ni efee gbalashihilɛ fitelɔ kpeteŋkpele, Satan Abonsam nɔ kunim ni aye.

Yɛ shihilɛi komɛi amli lɛ, eeewa akɛ mɔ ni efeko efɔŋ lɛ aaaná nɔ ni ebaadamɔ nɔ ni eya nɔ etsa gbalashihilɛ lɛ nɔ. Ekolɛ dani gbalafitemɔ lɛ po aaaje kpo lɛ, no mli lɛ gbalashihilɛ mli naagbai ni mli wawai ni kɔɔ Biblia mli shishitoo mlai ni akɛaatsu nii yɛ yitsoyeli kɛ heshibaa he yɛ. Ekolɛ afɔɔɔ wiemɔ aloo aahi naa, ni bulɛ kɛ suɔmɔ ni amɛyɔɔ kɛha amɛhe lɛ eba shi kwraa. Mlijoomɔ kɛ mlifu aloo nibii krokomɛi ebafite gbɛnaanii ni atsuɔ he nii yɛ gbalashihilɛ lɛ mli lɛ. Ani nibii baahi kɛji akɛ akɛ eshai ke ni aje shishi akɛ aaatsu naagbai ni mli wawai nɛɛ ahe nii? Mɔ ni efɔŋ ko bɛ ehe lɛ baanu shishi akɛ eeewa akɛ nibii aaahi ni ebaasumɔ ni ekɛ mɔ ni efite gbala lɛ atse gbala mli, eyɛ mli akɛ enɛ baatsɔɔ gbɛjianɔtoo hee yɛ shihilɛ mli, tamɔ gbalatsemɔ mli naagbai ni akɛaakpe, bɔni ehe baahia akɛ ato gbɛjianɔ ni ana tsu hee, gbekɛbii ni yɔɔ mli lɛ anɔkwɛmɔ kɛ nibii krokomɛi Agbɛnɛ hu nɔ ni esa akɛ mɔ ko aha ahi ejwɛŋmɔ mli ji akɛ Yehowa nyɛ̃ɔ ŋashwiemɔ.​—Mal 2:⁠16.

Enɛɛmɛi fɛɛ ji nibii ni esa akɛ mɔ ni tɔ̃ko lɛ asusu he ni eŋmɛ fɛɛ ekwɛ kɛji akɛ ekɛ eshai baake aloo efeŋ nakai. Esa akɛ afee enɛ dani abɔi bɔlɛnamɔ, dani amɛkɛ amɛhe awo hegbɛi mli. Nibii ni abaawie he, naagbai ni abaasusu he, shishinumɔ ni esa akɛ abɔ mɔdɛŋ ni eba hei enyɔ Iɛ fɛɛ, kɛ fai shi ni mɛi enyɔ lɛ fɛɛ baatswa akɛ amɛbaasumɔ ni amɛtsu nii yɛ ekomefeemɔ mli ni amɛkɛná suɔmɔ kɛ bulɛ yɛ gbalashihilɛ mli lɛ ji nibii ni abaanyɛ afee ni no kɔɔɔ eshaifaa he. Shi kɛji akɛ mɔ ni tɔ̃ko lɛ kɛ henumɔ tsu nii kɛyashɛ heni ekɛ hefatalɔ ni efite gbala lɛ aaana bɔlɛ lɛ, belɛ anuɔ shishi akɛ mɔ ni esha ko bɛ ehe lɛ kɛ tɔmɔ lɛ eke kwraa, ni ekɛ nakai anɔkwa ni ehefatalɔ lɛ yeee lɛ tsuŋ nii akɛ nɔ ni ebaadamɔ nɔ ni ekɛna gbala lɛ mlifoo yɛ Ŋmalɛ naa koni no aŋmɛ lɛ gbɛ ni eku sɛɛ ebote gbalashihilɛ mli.

No hewɔ lɛ nɔ ni hefatalɔ ni tɔ̃ko lɛ aaafee ni ekɛ esha ni ekɛ-ke lɛ aaakpa gbee lɛ tsɔɔ akɛ eekase Yehowa yɛ eshaifaa mli, ni ekɛ mɔ,ni etɔ lɛ tsutsu tɔmɔi lɛ efeŋ nɔ ni ebaati mli ewie he yɛ he fɛɛ mli ni ekɛ-kai lɛ nibii ni eho lɛ. (Lala 103:​3, 8-14; Yes. 55:7; Efe. 4:​32; 1 Pet. 4:8;. 1 Yoh. 1:⁠9) Shi kɛ̃lɛ enɛ kɛ gbɛnaa nii fɔɔ mɔ ni akɛ ehe eshai eke lɛ lɛ nɔ koni ehiɛ asɔ enɛ ni ekati nɔtɔmɔ lɛ mli eyafee ekoŋŋ.

Anyɛɔ akpɛlɛɔ nɔ moŋ akɛ yɛ bei komɛi amli lɛ nibii komɛi ni ehiii kwraa ni aleee baa yɛ no sɛɛ ni eji ale kulɛ mɔ ni tɔ̃ko lɛ kɛ eshai lɛ ekeŋ ni ekɛlɛ ejeŋ bɔlɛnamɔ shishi hu. Shi kɛlɛ, ni akɛ enɛ aaafee nɔ ni abaadamɔ nɔ atsake bɔni gbalashihilɛ lɛ yɔɔ lɛ, ákɛ nɛkɛ naagbai nɛɛ aaaba lɛ maa nɔ mi akɛ esa akɛ hefatalɔ ni yeee fɔ lɛ aŋmɛ nibii fɛɛ jogbaŋŋ ni ekaye oyai ni eto eyiŋ yɛ be mli ni esusuɔ kɛji akɛ ekɛ eshai ake aloo ekafee nakai lɛ he lɛ.

Shihilɛ lɛ baatamɔ nakai nɔŋŋ yɛ be mli ni hɔ-ŋɔɔ ejɛ gbalafitemɔ ni mɔ lɛ kɛba lɛ mli eha lɛ, ni ekolɛ aleee akɛ hɔ́-ŋɔɔ ko eba yɛ be mli ni nuu lɛ kɛ eŋa lɛ naa bɔlɛ ekoŋŋ lɛ. Akɛ hɔ ŋɔɔ baanyɛ aba lɛ ji nɔ ko ni esa akɛ wu lɛ asusu he yɛ be mli ni esusuɔ kɛji akɛ ekɛ sane lɛ baake eŋa lɛ ni eŋɔ lɛ kɛba ekoŋŋ lɛ he lɛ. Nilee tsɔɔ akɛ esa akɛ emɛ kɛyashi be ko, beni afee ni enyɛ ele kɛji akɛ eŋa lɛ eŋɔ nuu kroko bi hɔ́. Kɛji akɛ ekɛ-ke lɛ ni ekɛ lɛ ná bɔlɛ dani eyale enɛ lɛ, belɛ mɛni? No tsɔɔ akɛ etsɔ hiɛ eto eyiŋ akɛ eesumɔ ni ekpɛlɛ bi ni ebaaná nɔ, ni akɛ, kɛji akɛ eŋa lɛ fɔ bi lɛ, ebaakpɛlɛ bi nɛɛ nɔ yɛ eshĩa ni ekwɛ enɔ akɛ lɛ diɛŋtsɛ ebi.

Anuɔ shishi akɛ kɛji akɛ “ajwamaŋbɔɔ” ko je kpo yɛ gbalashihilɛ mli hefatalɔ ni heɔ yeɔ Iɛ gbɛfaŋ lɛ, esa akɛ aha asafo lɛ mli onukpai lɛ ale. (Mat. 19:⁠9) Kɛji akɛ mɔ ni etɔ̃ lɛ efeee enɛ lɛ, no lɛ esa akɛ mɔ ni yeee fɔ lɛ abɔ nɔtɔmɔ ni eba lɛ he amaniɛ beni afee ni aha Yehowa gbɛjianɔtoo lɛ he atse. Kɛji akɛ mɔ ni etɔ̃ lɛ ná anɔkwale tsuitsakemɔ lɛ, abaaha mɔ ni tamɔ nɛkɛ lɛ ahi asafo lɛ mli, ni enɛ ji anɔkwale eyɛ mli akɛ ekolɛ mɔ ni tɔmɔ ko bɛ ehe lɛ basumɔŋ ni ekɛ sane lɛ ake. Kɛji akɛ tsuitsakemɔ ko bɛ lɛ, abaashwie mɔ ni etɔ̃ lɛ kɛjɛ asafo lɛ mli, eyɛ mli akɛ ekolɛ mɔ ni yeee fɔ lɛ baasumɔ ni ekɛ esha lɛ ake lɛ ni eya nɔ ekɛ mɔ ni ashwie lɛ lɛ ahi shi.

Enɛɛmɛi fɛɛ maa nɔ ni akɛ enyɛŋ abu gbalashihilɛ mli gbɛnaa nii sɔrɔtoi lɛ akɛ nɔ ko ni yɔɔ fɛlɛfɛlɛ. “Ajwamaŋbɔɔ” pɛ ji nɔ ni haa mɔ ko gbalashihilɛ mli hefatalɔ lɛ naa nɔ ni ebaadamɔ nɔ yɛ Ŋmalɛ lɛ naa ni etse gbala lɛ mli ni eku sɛɛ ebote gbalashihilɛ mli ekoŋŋ. Shi kɛji akɛ aje bɔlɛnamɔ shishi lɛ, esa akɛ Kristofoi asafo lɛ kɛ ehe akpa gbee taakɛ bɔni esa akɛ mɛi ni ebote gbalashihilɛ mli lɛ hu kɛ amɛhe akpa gbee lɛ, ni amɛbu tsutsu “ajwamaŋbɔɔ,” lɛ akɛ anyɛŋ adamɔ no nɔ ni afite gbala lɛ dɔŋŋ. Mɛi enyɔ lɛ kɛ amɛhiɛ afɔ Yehowa nɔ ni amɛkɛ hiɛdɔɔ atsu nii ni amɛkɛ-tswa suɔmɔ kɛ bulɛ amɛha amɛhe, beni afee ni amɛna miishɛɛ kɛ omanyeyeli yɛ amɛ gbalashihilɛ lɛ mli.

September Daa Gbi Ŋmalɛ