Klɛŋklɛŋ Amale Lɛ—Namɔ Wie?
HII ENYƆ ko kɛ kar fo gbɛ ko mli yɛ maŋ ko nɔ yɛ Afrika wuoyigbɛ. Gbɛtsɔɔmɔ kanei lɛ su akɛ amɛya, shi polisifonyo ni buɔ gbɛ lɛ fã akɛ amɛwa, ni ebi amɛ akɛ: “Mɛni hewɔ nyɛkɛ tsɔne lɛ tsɔ gbɛ lɛ mli beni kane lɛ su etsuru lɛ?” Hii enyɔ lɛ kɛɛ ebɛ mli. Shi polisifonyo lɛ bi amɛ akɛ: “Ani nyɛmiitsɔɔ akɛ minaaa nii jogbaŋŋ?” Kɛkɛ ni eje shishi ebɔi amɛgbɛi ŋmaa. Tsɔne kudɔlɔ lɛ ha hetoo yɛ kpoofeemɔ mli akɛ: “Mɔ ko yɛ ŋwɛi ni le nɔ ni ofeɔ lɛ.” Kɛkɛ ni polisifonyo lɛ nijiaŋ je wui ni eshi amɛ etee.
Hɛɛ, polisifonyo lɛ miimale. Ani enɛ yɛ naakpɛɛ? Dabida. Amale ehe shi waa diɛŋtsɛ yɛ adesa weku lɛ mli. Taakɛ afɔɔ kɛɛmɔ lɛ: “Wiemɔ amale otsɔɔ gbɔmɛi daa nɛɛ ni amɛbaahe bo amɛye.” Etamɔ nɔ ni maŋkwralɔi pii kɛ wiemɔ nɛɛ kpaa gbee, ni yɛ no hewɔ lɛ, mɛi pii ajwɛŋmɔ kɛɔ amɛ akɛ maŋkwramɔ kɛ amale nyiɛ.
Gbɔmɛi maleɔ yɛ yiŋtooi sɔrɔtoi babaoo ahewɔ. Kristofonyo anɔkwafo ko ni nitsumɔ fite be saŋŋ lɛ ŋma kɛtee jarayeli nitsumɔ ko mli akɛ eetao nitsumɔ. Nitsumɔtsɛ lɛ bɔ lɛ kɔkɔ akɛ: “Kɛ obaanyɛ ohɔɔ minibii lɛ, belɛ, ja onyɛɔ omaleɔ fe mɔ fɛɛ mɔ!” Kristofonyo nɛɛ shi nitsumɔ lɛ.
Nyɔŋmɔ jalɔi ni bɛ Nyɔŋmɔ gbeyeishemɔ su lɛ maleɔ yɛ bei komɛi amli. Ani okaiɔ nɔ ni Yuda jamɔŋ hiɛnyiɛlɔi lɛ fee beni amɛnu akɛ atee Yesu ni jɛ Nazaret mɔ ni amɛsɛŋ lɛ lɛ shi lɛ? Amɛha asraafoi ni buɔ Yesu gbonyobu lɛ he lɛ nyɔɔŋnii koni amɛkɛɛ akɛ: “Nyɔɔŋ, beni wɔwɔ lɛ, no ekaselɔi lɛ ba bajulɛ kɛtee.”—Mateo 28:12-15.
Shi kɛ̃lɛ, etamɔ nɔ ni malemɔ jeee adesa fɔmɔ su. Dr. Lewis Thomas ŋma akɛ. “Taakɛ bɔni minuɔ shishi lɛ, adesa ko nyɛŋ awie amale, kɛji amale bibioo po, ni no nyɛŋ atso tamɔ la ko ni asu yɛ ejwɛŋmɔ mli he ko ni ewo duŋ kpii, enɛ gbɔjɔɔ gbɔmɔtso lɛ faji ehaa amɛhe jɔɔ. No hewɔ lɛ, amale nyɛɔ mɔ nɔ ni ekɔɔɔ he eko akɛ wɔkɛbuɔ wɔhe aloo wɔkɛjoɔ shihilɛ ko naa foi aloo wɔkɛtaoɔ sɛɛnamɔ ko.” (Discover, December 1980) Nɛkɛ gbɔmɔtso mli nibii nɛɛ ji nɔ ni haa amale jeɔ kpo.
Akɛni nɛkɛ amale nyɛɔ mɔ nɔ hewɔ lɛ, mɛɛ gbɛ nɔ etsɔ eje shishi?
Namɔ Wie Klɛŋklɛŋ Amale Lɛ?
Yesu Kristo ha ale klɛŋklɛŋ amalelɔ lɛ akɛ ejeee gbɔmɔ adesa. Ekɛɛ akɛ: “Kɛ [Satan] eemale lɛ, lɛ diɛŋtsɛ enii ahe ewieɔ, ejaakɛ amalelɔ kɛ malemɔtsɛ ji lɛ.” (Yohane 8:44) No hewɔ lɛ, klɛŋklɛŋ amalelɔ lɛ ji Satan Abonsam. Mɛɛ be eje shishi ebɔi malemɔ? Taakɛ bɔni Biblia tsɔɔ lɛ, enɛ ba yɛ adesa weku lɛ yinɔsane shishijee be lɛ mli.
Aŋma enɛ he sane afɔ shi yɛ Biblia wolo ni ji Klɛŋklɛŋ Mose wolo lɛ mli, ni nakai amale lɛ ji wala loo gbele he sane kɛha adesa. Nyɔŋmɔ jie kpo etsɔɔ klɛŋklɛŋ nuu, ni ji Adam akɛ wala sɛɛkɛlɛ ni ebaana lɛ damɔ toiboo nɔ. Eha Adam mla fioo ko akɛ eye nɔ shi kɛ enyɛɛɛ eye nɔ lɛ ‘gbo eeegbo.’ Shi Satan kɛ mlijoomɔ male etsɔɔ amɛ akɛ: “Jeee gboimɔ nyɛaagboi.” Enɛ ji amalei akpeiakpei abɔ ni anu yɛ Shikpɔŋ nɛɛ nɔ lɛ ateŋ klɛŋklɛŋ nɔ.—1 Mose 2:17; 3:4
Ŋmɛnɛ mɛi pii heee nɔ ni aŋma afɔ shi yɛ Biblia lɛ mli nɛɛ amɛyeee. Shi Yesu ni ji nuu anɔkwafo ni fe fee yɛ mɛi ni ehi shi da lɛ ateŋ lɛ ma nɔ ni aŋma yɛ Klɛŋklɛŋ Mose wolo lɛ mli Iɛ nɔ mi akɛ ejeee adesa shi moŋ yinɔsane mli anɔkwale ko.(Mateo 19:4, 5) Eji anɔkwale akɛ nɔ ni ejɛ nakai amale lɛ mli eba lɛ kɛ wɔ yɛ. Ekɛ adesa weku lɛ ewo oshãrã mli.