Sanebimɔi ni jɛ Kanelɔi Adɛŋ
◼ Ani eeefee nɔ ni nilee yɔɔ mli akɛ oooha obi kɛ wekumɛi ni ji jeŋ bii ayahi shi akɛni amɛaaha gbekɛ lɛ ana heloonaa nibii hewɔ?
Ŋmalɛi lɛ tsɔɔ akɛ bii akwɛmɔ he hegbɛ kɛ sɔ ni mumɔŋ nibii ni he hiaa hu fata he lɛ ka fɔlɔi anɔ. Eeefee shɔŋŋ nii ni akwɛɛɛ akɛ wu kɛ ŋa ko ni ji Kristofoi aaakpoo gbɛnaa nii ni jɛ Nyɔŋmɔ ŋɔɔ nɛɛ ni amɛbi kɛ wekumɛi ni jeee Kristofoi ayahi shi yɛ heloonaa nibii ahegbɛ ni eeena hewɔ.
Yɛ shikpɔji komɛi anɔ lɛ eji nɔ ko ni afɔɔ feemɔ akɛ mɔ aaaha ebi kɛ wekumɛi ayahi shi be kakadaŋŋ. Fɔlɔi ni yɔɔ akrowai banee ni woloŋ nikasemɔ he nibii faaa tsɔ yɛ jɛmɛ lɛ titri ji mɛi ni feɔ enɛ. Akɛ gbekɛ lɛ yahaa wekumɛi ni yɔɔ maŋ wulu ko mli (aloo eyaa nikasemɔ he ni awɔɔ jɛmɛ) bɔni afee ni gbekɛ lɛ ana woloŋ nikasemɔ kpakpa aloo ena agwaseaŋ shihilɛ ni etee hiɛ. Yɛ bei babaoo mli lɛ akpaa gbekɛ lɛ gbɛ ni etsu shia nii aloo ewo wekumɛi nɛɛ anyɔmɔ yɛ gbɛ ko nɔ yɛ amɛŋɔɔ ni ebahi lɛ hewɔ.
Asusuɔ akɛ nɛkɛ gbɛjianɔtoo nɛɛ kɛ ninamɔ hegbɛ baa, shi enɛ edaaa tamɔ bɔ ni anaa lɛ lɛ. Niiashikpamɔ etsɔɔ yɛ bei pii amli akɛ nibii gbohii jɛɔ mli baa gbekɛ lɛ nɔ kɛ afa lɛ kɛjɛ shihilɛ hei ni ele jogbaŋŋ lɛ amli ni anyɛ enɔ awo wekumɛi ashia ni kɛ efɔlɔi ateŋ jɛkɛ lɛ. Efɔɔ baa akɛ, ni akɛ gbekɛ nɛɛ aaaye tamɔ gbekɛbii krokomɛi ni yɔɔ shia lɛ mli lɛ, abuɔ lɛ tamɔ sɔɔlɔ ko ni ajieɔ niiaŋ yɛ egbɛfaŋ. Taakɛ obaasusu lɛ, nijiaŋwujee kɛ mlifu teɔ shi kɛji akɛ gbekɛ ko nu he ákɛ akɛ lɛ yeee yɛ gbɛ ni ja nɔ. (Okɛto 1 Mose 27:30-41 he.) Henumɔ mli naagbai kɛ miishɛɛ ni enaaa lɛ baagba enikasemɔ naa tsɛ ekolɛ eeya skul kpakpa moŋ. No hewɔ lɛ ani enaa sɛɛ diɛŋtsɛ ko? Fɔlɔi anɔ toigbele hu ji nɔ kroko ni afɔɔ namɔ akɛ ebaa kɛ atse gbekɛ ko kɛjɛ fɔlɔi ni yɔɔ suɔmɔ ni aaatsɔse lɛ daa lɛ ahe lɛ.
Nyɔŋmɔ Wiemɔ lɛ mli ŋaawoo lɛ yeɔ ebuaa ni aku nibii gbohii ni jɛɔ mli baa nɛɛ anaa. Shishijee kwraa lɛ Biblia lɛ biɔ fɔlɔi ni amɛkwɛ amɛ diɛŋtsɛ amɛbii. Shi, Yehowa Nyɔŋmɔ yɔse akɛ shihilɛi komɛi ni wa baate shi ni baabi ni mɛi krokomɛi akwɛ bii lɛ shi jeee fɔlɔi lɛ.a No hewɔ lɛ, ewo etsuji lɛ ŋaa ni amɛye amɛbua awusai aloo mɛi ni amɛfɔlɔi enyɔ lɛ fɛɛ egboi lɛ. (5 Mose 14:28, 29; 16:9-14; 24:17-21; 26:12, 13; Lala 10:14; Yakobo 1:27) Shi nɔ titri ni Ŋmalɛi lɛ maa nɔ mi ji akɛ fɔlɔi akwɛ amɛ diɛŋtsɛ amɛbii lɛ ahelooŋ, mumɔŋ kɛ henumɔŋ hiamɔ nii.—Okɛto 1 Timoteo 5:8 he.
Nyɔŋmɔ wo fɔlɔi aŋaa yɛ ewiemɔ lɛ he akɛ: “Ni nyɛŋɔ nyɛtsɔɔ nyɛbii, ni nyɛwie he, beni ota oshia kɛ beni onyiɛ gbɛ teŋ kɛ beni oka shi kɛ beni ote shi.” (5 Mose 11:18, 19) Ani fɔlɔi aaanyɛ afee enɛ kɛ amɛjɛ amɛsuɔmɔ mli amɛkɛ amɛbii lɛ eyaha wekumɛi ni ji jeŋ bii lɛ yɛ be kakadaŋŋ mli? Dabi, esa ni fɔlɔi kɛ amɛbii ahi shi ni amɛkɛ jajemɔ kɛ gbɛtsɔɔmɔ aha amɛ daa, kɛ shihilɛ ni suɔmɔ yɔɔ mli ni he hiaa obalaŋtai lɛ. (Efesobii 6:18, 19; Abɛi 6:20) Eyɛ faŋŋ akɛ, atsuŋ Kristofonyo bi ko daa (aloo enaanɔ) hilɛ kɛhamɔ he nii kɛ akɛ lɛ ha akɛ ekɛ wekumɛi jeŋ bii ayahi shi, moŋ fe ni eeena mumɔŋ tsɔsemɔ yɛ lɛ diɛŋtsɛ eshia lɛ. Kristofoi ni yɔɔ je lɛŋ fɛɛ le akɛ obalaŋtai atsɔsemɔ ni amɛsɔmɔ Yehowa yɛ gbɛjianɔtoo nɛɛ mli lɛ ji nitsumɔ ni wa, ni biɔ fɔlɔi anɔkwɛmɔ daa. Yɛ anɔkwale mli lɛ omanye ni akpaa gbɛ lɛ nɔ gboɔ kɛ atse bi ko kɛjɛ Kristofoi ashia yɛ heloonaa nibii ni eeena hewɔ.
Yɛ enɛ mli lɛ susumɔ Yesu, ni alɛ lɛ yɛ Galilea maŋ ni ji Nazaret ni etse ehe lɛ mli lɛ nɔkwɛmɔ nɔ lɛ he. Toiboo ni Yosef kɛ Maria fee kɛha Nyɔŋmɔ hewɔ lɛ, amɛha Yesu hi amɛŋɔɔ yɛ Nazaret, he ni ‘etee hiɛ yɛ nilee kɛ dalɛ kɛ duromɔ mli yɛ Nyɔŋmɔ kɛ gbɔmɛi ahiɛ.’—Luka 2:41-52.
Ŋmɛnɛŋmɛnɛ nibii agbɛjianɔtoo nɛɛ maa omanyeyeli yɛ woloŋ nikasemɔ kɛ shikanamɔ nɔ mi. Anuɔ ni fɔlɔi ni heee yeee lɛ miikɛɛ nibii tamɔ nɛkɛ, ‘Misumɔŋ ni mibi ayatere “kaya.” Eeenyɛ eba akɛ jwɛŋmɔ ni ahiɛ yɛ woloŋ nikasemɔ kɛ heloonaa nibii ahe nɛɛ baanyɛ atsɛŋe ‘fɔlɔi ni ji Kristofoi. Shi fɔlɔi ni kɛ amɛhiɛ fɔɔ Yehowa nilee nɔ lɛ kɛ ‘jwetiri ni amɛaabɔ amɛha amɛhe, ni efee shishitoo kpakpa eha amɛ yɛ be ni baaba lɛ, koni amɛmɔ anɔkwa wala lɛ mli lɛ’ baaye klɛŋklɛŋ gbɛhe.—1 Timoteo 6:9, 19.
[Shishigbɛ niŋmai]
a Shihilɛ ko ni ekaaa ni yɔɔ mɔbɔ ji nɔ ni ba obalayoo fioo ko ni fɔ bi, yɛ ekaa naa ni akɛ lɛ wɔ lɛ hewɔ. Mɛi ahe ni sane lɛ kɔɔ ni ji gbekɛyoo lɛ kɛ efɔlɔi baanyɛ akɔ gbɛ ni sa yɛ saji ni eba lɛ naa, ni gbekɛyoo lɛ gbɔmɔtsoŋ kɛ henumɔŋ shihilɛ hu fata he. Yɛ saji ni tamɔ nɛkɛ mli lɛ akpɛlɛ gbekɛ ni afɔ lɛ nɔ ni aha lɛ Kristofoi asuɔmɔ tsɔsemɔ yɛ gbekɛyoo ni fɔlɛ lɛ weku lɛ mli. Yɛ ekrokomɛi amli lɛ aŋmɛɔ Kristofoi ni ebote gbalashihilɛ mli ni miitao bi alɛ lɛ gbɛ ni amɛŋɔɔ abifao lɛ akɛ amɛbi.
March Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)