Namɔ Baanyɛ Ana Hemɔkɛyeli Yɛ Ŋwanejee Yinɔ Nɛɛ Mli?
WƆ Nɔ̃ nɛɛ ji ŋwanejee yinɔ lɛ. Nii ni aheee ayeee ebatsɔ nɔ ni eba nɔ. Aawo wɔ hewalɛ ni wɔbi sane yɛ nɔ fɛɛ nɔ he—kusumii, susumɔi, jeŋba kpakpa, blema tɛi ni afolɔ ashwie shi, shihilɛ mli ni Nyɔŋmɔ po yɔɔ kɛ anɔkwale ni e-Wiemɔ, Biblia lɛ ji.
Mɛi pii ni Biblia lɛ he nɔ ko bibioo pɛ amɛle lɛ jeɔ ŋwane. Amɛ ŋwanejee lɛ damɔɔɔ nɔ ni Biblia lɛ kɛɔ lɛ diɛŋtsɛ nɔ, shi moŋ nɔ ni mɛi komɛi ewie akɛ ekɛɔ. Shi te aaafee tɛŋŋ ni mɔ ko aaaná wolo ko he jwɛŋmɔ kpakpa yɛ be mli ni ekaneko nakai wolo lɛ ni eleee wolo lɛ diɛŋtsɛ hu? Nɔ ni fata he lɛ, namɔ baanyɛ ana hemɔkɛyeli yɛ ŋwanejee yinɔ nɛɛ mli?
Yehowa Odasefoi lɛ ateŋ mɔ kome kɛɛ nuu ko ni eŋa ena Biblia lɛ kasemɔ he miishɛɛ lɛ akɛ: “Eka shi faŋŋ akɛ mikpaaa bo gbɛ akɛ obaahe enɛ oye akɛ ehe miihia nakai akɛni wɔsusu he ŋmlɛtswaa kome ni eho lɛ hewɔ. Shi kɛji akɛ ona ole nɔ ni Biblia lɛ kɛɔ diɛŋtsɛ lɛ, miheɔ miyeɔ akɛ obaahe anɔkwale ni eji lɛ oye tamɔ bɔ ni mi hu mihe miye lɛ. Ewu lɛ kpɛlɛ anɔ akɛ lɛ hu ebaakwɛ sane lɛ mli, ni aje shia Biblia kasemɔ shishi, ni etsɛɛɛ kwraa ni lɛ hu ebɔi mɛi krokomɛi nitsɔɔmɔ. Hɛɛ ena anɔkwale hemɔkɛyeli yɛ ŋwanejee yinɔ nɛɛ mli.
Frenchnyo ni ji nyɛ ko ni kwɛɔ shia ni ekɛ Yehowa Odasefoi eje Biblia lɛ kasemɔ shishi lɛ kɛɛ akɛ: “Mijeɔ ŋwane, mijeɔ ŋwane, mijeɔ ŋwane waa!” Shi kɛlɛ, etee nɔ ekase nii. Beni enilee lɛ yaa hiɛ lɛ, kɛkɛ ni ŋwanejee lɛ laaje, ni etee nɔ etsɔɔ mɛi krokomɛi nibii ni waje ehemɔkɛyeli lɛ fe afii 20 nɛ.
Hemɔkɛyeli baa kɛtsɔɔ anɔkwale nilee ni kɛ anɔkwasaji ni obaadamɔ nɔ oto oyiŋ yɛ gbɛ ni ja nɔ lɛ haa bo lɛ nɔ. Akɛ nɔkwɛmɔ nɔ lɛ, beni Yesu Kristo yɔɔ shikpɔŋ nɔ lɛ, enaakpɛɛ nitsumɔi kɛ tsɔɔmɔi lɛ ahe nilee ye bua gbɔmɛi anɔkwafoi pii, ni “amɛhe egbɛi lɛ nɔ amɛye.”—Yohane 2:23; 8:30.
Nakai nɔŋŋ eji anɔkwale ŋmɛnɛ. Biblia mli anɔkwale lɛ mli ka shi faŋŋ, shi ja okɛ nibii ni ejaaa ni onu yɛ he lɛ ma afa ni bo diɛŋtsɛ lɛ okase nɔ ni wolo ni yɔɔ naakpɛɛ nɛɛ tsɔɔ diɛŋtsɛ.
Akɛ nɔkwɛmɔ nɔ lɛ, Biblia mli gbalɛi lɛ anɔ kwɔlɔ tsɔ fe bɔ ni gbɔmɔ loo gbɔmɛi akuu ko aaanyɛ ato he ŋaa ni amɛkase. Shi kɛlɛ, nɛkɛ gbalɛi ni aŋmala ekomɛi aaafee afii akpei ohai abɔ po kɛtsɔ hiɛ lɛ eba mli pɛpɛɛpɛ bɔ ni ekɛ odaseyeli ni tsɔɔ mɔ yiŋ haa akɛ Biblia lɛ jɛ Nyɔŋmɔ ŋɔɔ lɛlɛŋ, ni ákɛ nibii ni ewo shi yɛ he lɛ baaba mli.
Jeeŋmɔ beebe, yɛ be mli ni Yoshua ni egbɔ lɛ ele Nyɔŋmɔ gbɛ̀i afii babaoo lɛ, ekɛɛ Israelbii lɛ akɛ: “Nyɛle yɛ nyɛtsui mli fɛɛ kɛ nyɛsusuma mli fɛɛ akɛ nibii kpakpai fɛɛ ni Yehowa, nyɛ Nyɔŋmɔ lɛ, wie yɛ nyɛhewɔ lɛ, emli ekome folo ekaaa shi, fɛɛ eba mli ehanyɛ, emli ekome folo ekaaa shi.’—Yoshua 23:14.
Agbɛnɛ anaa sɛɛnamɔ ni yɔɔ Biblia lɛ he lɛ yɛ ekɛ nitsumɔ mli. Kɛ akɛ Biblia mli ŋaawoo tsu nii lɛ, ehaa gbɔmɛi ashihilɛ yaa hiɛ ni etsakeɔ subaŋi. Eyeɔ ebuaa gbɔmɛi ni yɔɔ basabasa ni sumɔɔ béi lɛ ni amɛnaa mlijɔlɛ kɛ henɔyeli. Kɛ mɛi komɛi jeɔ nakai anɔkwasane lɛ he ŋwane lɛ, belɛ esa akɛ amɛkase Biblia lɛ. Hewalɛ ni emli anɔkwale lɛ baanyɛ aná yɛ amɛshihilɛ nɔ lɛ baaha amɛnaa akpɛ amɛhe.—Galatabii 5:19-23; Efesobii 4:20-32.
Ni ooofee mɔ ni oheee nɔ ko oyeee yɛ ŋwanejee yinɔ mli moŋ lɛ, obaanyɛ ona anɔkwale hemɔkɛyeli. Yɛ anɔkwale mli lɛ, Biblia lɛ baanyɛ aye abua bo ni ona hemɔkɛyeli ni ma shi shiŋŋ ni haa wala. Shi mɛɛ gbɛ nɔ oootsɔ ofee enɛ yɛ?
[Akrabatsa ni yɔɔ baafa 4]
Weku lɛ, Yɛ Ŋwanejee Je Ko Mli
Biblia lɛ yɛ babaoo kɛɛmɔ yɛ wekui ahe. Ekɛɔ akɛ esa akɛ edamɔ suɔmɔ nɔ, ni ákɛ ekɔɔ mɛi enyɔ lɛ ni kɛ amɛhe aaakpɛtɛ amɛhe kɛ amɛbii hu lɛ ahe. (Mateo 19:4-6) Yɛ gbɔmɛi ni leee Biblia lɛ aloo amɛnyiɛɛɛ eshishitoo mlai asɛɛ lɛ agbɛfaŋ po lɛ, afii 6,000 ni adesa kɛhi shi lɛ eye sɛɛnamɔ ni yɔɔ weku shihilɛ he lɛ he odase yɛ amɛteŋ.
Shi kɛlɛ, obalaŋtai pii ni kwɛɔ nɔ ni yaa nɔ yɛ adafitswaa woji, woji wuji kɛ televishin nɔ lɛ jeɔ sɛɛnamɔ ni yɔɔ gbalashihilɛ he ŋmɛnɛ lɛ he ŋwane. Mɛi komɛi susuɔ gbalashihilɛ he akɛ etsiɔ mɔ naa tsɔ, ni amɛsusuɔ akɛ ni amɛaaye mɔ kroko anɔkwale yɛ jeŋba kpakpa mli lɛ tsiɔ “heyeli” ni amɛyɔɔ lɛ naa. Akɛni amɛheee blema nɔ̃ lɛ amɛyeee hewɔ lɛ, amɛkpɛlɛɔ jeŋba “hee” ko nɔ—yɛ anɔkwale mli lɛ ejeee nɔ ko nɔ ko fe blema jeŋba shara ni ahã lɛ gbɛi hee. Amɛkɛ gbɔmɛi hiɔ shi kɛkɛ ni amɛtooo gbɛjianɔ akɛ amɛkɛ amɛhe aaahi shi yɛ suɔmɔ, hekɛnɔfɔɔ kɛ ekomefeemɔ mli kɛya naanɔ.
Be hoɔ. Amɛdaraa ni amɛtsɔmɔɔ onukpai. Kɛkɛ lɛ beni anɔkwayeli kɛ sɛɛfimɔ ni he hiaa amɛ lɛ ahe ebahia amɛ waa lɛlɛŋ lɛ, amɛnaa ni ashi amɛ kome, ni amɛtsuii ekumɔ. Nakai be mli pɛ amɛyɔseɔ akɛ mɔ kroko lɛ ni amɛkɛ amɛhe bɔ ehe lɛ kɛ ehe kpɛtɛɛɛ nɔ ko he, ni ebɛ ejwɛŋmɔ mli akɛ ekɛ be, suɔmɔ kɛ hetuu-kɛ-hamɔ ni he hiaa yɛ nɛkɛ be nɛɛ mli diɛŋtsɛ lɛ aaaha.
Nyɔŋmɔ le bɔ ni ebɔ wɔ. Ele nɔ ni hi fe fɛɛ kɛha wɔ. Anyɛŋ ashɛrɛ eshishitoo mlai kpakpai ni kɔɔ jeŋba he lɛ ashwie ni aye he. Anɔkwasane nɛ, ni nɔ ni abaakɛɛ yɛ ŋwanejee je ko mli lɛ kɔɔɔ he eko.