Nyɔŋmɔ Wiemɔ Lɛ Hiɛ kã:
Eyɛ Hemɔkɛyeli kɛ Ekaa—Ani Oyɛ Eko?
SIRIA nibalɔi miiŋɔ nɛkɛ Israel gbekɛyoo bibioo nɛɛ nom kɛmiiya. Yɛ naagbee lɛ akɛ lɛ baha Naeman, Siria asraafoi atatsɛnukpa lɛ ŋa. Gbekɛyoo fioo nɛɛ batsɔ tsulɔyoo kɛha Naeman ŋa lɛ yɛ nɛkɛ henyɛlɔi ashikpɔŋ ni kɛ emaŋ Israel teŋ jɛkɛ lɛ nɔ.
Naeman ji nuu kakalɔ ni abuɔ lɛ waa. Shi nɛkɛ tatsɛnukpa nɛɛ miiye kpiti hela, hela ni fiteɔ gbɔmɔtso lɛ fai komɛi. Dani aaamɔ Israel gbekɛyoo bibioo nɛɛ lɛ, no mli lɛ enu naakpɛɛ nibii ni Yehowa Nyɔŋmɔ etsu kɛtsɔ egbalɔ Elisha nɔ, kɛ yoo ko ni ebinuu gbo ni etee lɛ shi lɛ hu he. (2 Maŋtsɛmɛi 4:8-37) Gbekɛyoo nɛɛ tamɔɔɔ mɛi krokomɛi pii ni eshwɛ lɛ, eyɛ naakpɛɛ nibii ni Nyɔŋmɔ tsuɔ lɛ mli hemɔkɛyeli ni yeɔ emuu, ni eyɛ ekãa kɛ amɛhe wiemɔ.
No hewɔ lɛ gbi ko Iɛ, taakɛ obaana lɛ, gbekɛyoo bibioo nɛɛ kɛɛ Naeman ŋa lɛ akɛ: ‘Eji mi-Nuŋtsɔ aaaya Samaria kulɛ, Yehowa gbalɔ ni yɔɔ jɛmɛ lɛ baatsa ekpiti lɛ aha lɛ.’ No hewɔ lɛ be ko lɛ, mɔ ko yabɔ nɔ ni gbekɛyoo bibioo nɛɛ ewie lɛ he amaniɛ etsɔɔ Naeman. Kwɛ bɔ ni Naeman hiɛ baasɔ enɛ aha!
Taakɛ onaa yɛ mfoniri lɛ mli yɛ biɛ lɛ, wɔbaanyɛ wɔsusu bɔ ni Naeman bɛŋkɛ gbekɛyoo bibioo lɛ niebi lɛ no ko tamɔ nɛkɛ lɛ he: ‘Miji Siria asraafoi lɛ fɛɛ onukpa. Shi oyɛ ekãa akɛ ooowo mi hewalɛ koni maya omaŋ lɛ mli, kɛya o-Nyɔŋmɔ lɛ gbalɔ lɛ ŋɔɔ, koni etsa mi kpiti lɛ eha mi. Gbekɛ bibioo, oyɛ hemɔkɛyeli babaoo kɛ ekaa ni pɛsɛmkunya bɛ mli akɛ osheee mimlifu gbeyei akɛ ooojie mlihilɛ ni tamɔ nɛkɛ kpo otsɔɔ mi. Mabi gbɛ kɛje Siria maŋtsɛ lɛ ŋɔɔ koni maya Israel.’—2 Maŋtsɛmɛi 5:1-5.
Ani obaanyɛ ona bo diɛŋtsɛ: ohe yɛ shihilɛ ni tamɔ Israel gbekɛyoo bibioo lɛ nɔ̃ lɛ mli? Ani ole Yehowa mlihilɛ lɛ kɛ bo ni eto eyiŋ akɛ ebaabɔ nibii agbɛjianɔtoo hee ni emli Iɛ gbɔmɛi fɛɛ baana gbɔmɔtsoŋ hewalɛ kpakpa ni amɛhi shi kɛya naanɔ lɛ? (2 Petro 3:13; Kpojiemɔ 21:3, 4) Gbɔmɛi fioo ko pɛ yɔɔ ŋmɛnɛ ni le nɛkɛ saji nɛɛ!
No hewɔ lɛ, akɛ gbekɛ lɛ, obaanyɛ ona bo diɛŋtsɛ ohe yɛ shihilɛ ni tamɔ gbekɛyoo fioo ni afee ehe mfoniri yɛ biɛ lɛ nɔ̃ lɛ mli. Tsɔɔlɔ lɛ kɛ nikaselɔi krokomɛi ni yɔɔ klas lɛ leee Yehowa he nɔ ko. Yɛ shihilɛi ni tamɔ nɛkɛ mli lɛ, kɛ́ oná hegbɛ lɛ, ani obaanyɛ ona hemɔkɛyeli kɛ ekaa ni owie ni okɛye obaa mɛi krokomɛi ni amɛya he ni amɛbaanyɛ amɛna mumɔŋ tsamɔ yɛ?
Shi mɛni ba Naeman nɔ? Ani atsa lɛ? Eji sane kroko ni wɔbaasusu he yɛ sɛɛ mli.