Harmagedon—Ani Ejɛ Nyɔŋmɔ ni Yeɔ Suɔmɔ Iɛ Ŋɔɔ?
MƐNI osusuɔ kɛ ona wiemɔ “Harmagedon?” Kɛha mɛi pii lɛ eji ta ni baate shi yɛ jeŋ hewalɛi ni fe fɛɛ lɛ ateŋ. Ehe ninaa ni mɛi komɛi naa ji naagbee hiɛkpatamɔ—nuklea ta ni baaha shikpɔŋ lɛ atsɔ nɔ ni afite lɛ ni atɔmik lamlu eyi nɔ obɔ ni mɛi fioo ko pɛ eshwɛ yɛ nɔ kɛ́ eko po aaahi shi. Shi, nɔ ni kɛ jwɛŋmɔ ni ahiɛ nɛɛ kpaaa gbee lɛ, jeee nɛkɛ ji bɔ ni Harmagedon ji kwraa.
Wiemɔ “Harmagedon” lɛ jɛ Biblia lɛ mli. Epueɔ yɛ mli shikome pɛ—yɛ Kpojiemɔ wolo lɛ yitso 16. Yɛ be mli ni egba bɔni abuaa “maŋtsɛmɛi ni yɔɔ jeŋ muu lɛ fɛɛ” lɛ anaa kɛyaa “Nyɔŋmɔ Ofe lɛ gbi wulu lɛ nɔ ta” lɛ he lɛ sɛɛ lɛ, gbalɛ lɛ jaje akɛ: “Amɛbua maŋtsɛmɛi lɛ naa kɛtee he ko ni atsɛɔ jɛi yɛ Hebri wiemɔ mli akɛ Harmagedon.”—Kuku 13 kɛyashi 16, The Jerusalem Bible.
“Nyɔŋmɔ Ofe lɛ gbi wulu lɛ nɔ ta lɛ”! Eka shi faŋŋ akɛ, Harmagedon ji Nyɔŋmɔ ta. Eji anɔkwale moŋ akɛ ekɔɔ je lɛŋ maŋtsɛmɛi aloo jeŋmaji lɛ ahe. Shi amɛbaaa akɛ amɛkɛ amɛhe baawo ta, shi moŋ ni amɛbawu amɛshi Nyɔŋmɔ kɛ ŋwɛi tabilɔi ni Maŋtsɛ Yesu Kristo ni ahala lɛ lɛ—ni afee ehe mfoniri akɛ eta okpɔŋɔ yɛŋ nɔ lɛ nyiɛ amɛhiɛ lɛ abawu. Mɛni baajɛ mli aba? Nɔ ni yɔɔ Biblia lɛ mli lɛ kaneɔ akɛ: “Ni mina . . . shikpɔŋ lɛ nɔ maŋtsɛmɛi lɛ kɛ amɛtai ni abua naa lɛ, ni amɛkɛ mɔ ni ta okpɔŋɔ yɛŋ lɛ nɔ kɛ eta lɛ yawu. . . Ni akɛ mɔ ni ta okpɔŋɔ lɛ nɔ lɛ tai ni jɛɔ edaaŋ lɛ gbe amɛ, ni loofɔji fɛɛ tɔrɔ kɛ amɛlooi lɛ.—Kpojiemɔ 19:19-21.
Lashishwiemɔ Ta
Bɔ ni Harmagedon baakpata nii ahiɛ aha kɛ emli gbɔmɛi ni baagboi hewɔ lɛ atsɛɔ lɛ akɛ “shikpɔŋ lɛ nɔ nikpamɔ nii” ní akɛ nikpamɔ kakla ni naa ba baakpa. “Ni bɔfo lɛ shɛ ekakla lɛ efɔ shikpɔŋ lɛ nɔ, ni ebua shikpɔŋ lɛ nɔ wein yibii lɛ anaa, ni ekɛwo Nyɔŋmɔ mlila lɛ weinŋaanɔ kpeteŋkpele lɛ mli. Ni anaanaa weinŋaanɔ Iɛ nɔ yɛ maŋ lɛ ŋmaŋmasha lɛ, ni lá jɛ weinŋaanɔ lɛ mli kɛyashɛ okpɔŋi lɛ adaaŋ nii lɛ ahe, yɛ stadioi akpe kɛ ohai ekpaa jɛkɛmɔ mli.”—Kpojiemɔ 14:15-20.
Hɛɛ, lá baaho babaoo yɛ Nyɔŋmɔ tabilɔi lɛ ahiɛkpatamɔ nitsumɔ lɛ mli. Gbɔmɛi akpekpei 69 ni gboi yɛ jeŋ tai enyɔ lɛ mli lɛ baafee nɔ ni faaa kwraa kɛ akɛto mɛi ni aaagbe amɛ yɛ Nyɔŋmɔ ta ni ji Harmagedon mli lɛ he lɛ. Gbalɔ Yeremia ŋma yɛ amɛhe akɛ: “Ni mɛi ni Yehowa aaagbe yɛ nakai gbi lɛ nɔ lɛ aaakamɔ shi kɛaajɛ shikpɔŋ lɛ naagbee he kome kɛaatee shikpɔŋ lɛ naagbee he kroko lɛ; afeŋ amɛ yara, abuaŋ amɛ naa, ni asaŋ afuŋ amɛ: amɛaatsɔ̃ tumu yɛ shikpɔŋ lɛ nɔ.”—Yeremia 25:30-33.
Gaimlibii ni tsoɔ, la ni baanɛ ashwie shi kɛ adebɔɔ mli hewalɛi krokomɛi ni fataa Nyɔŋmɔ kojomɔ he baa lɛ baaha adesai fɛɛ ni yɔɔ shikpɔŋ lɛ nɔ lɛ ashe gbeyei. Yɛ nɛkɛ yiŋfutumɔ nɛɛ hewɔ lɛ, amɛteŋ mɔ fɛɛ mɔ baatsɔ ehiɛ eha enaanyo, yɛ be mli ni Nyɔŋmɔ blafoi lɛ tswiaa nii ni afi ni mɔ ko eye aloo nuu loo yoo kɔɔɔ he eko lɛ. Ejaakɛ Nyɔŋmɔ fa amɛ ni amɛkajie mɔbɔnalɛ kpo kwraaa “Nyɛtswiaa nii; nyɛhiŋmɛii akanaa mɔbɔ ni nyɛkabaa yi hu! Onukpai kɛ obalahii kɛ obalayei kɛ gbekɛbii kɛ yei lɛ, nyɛgbea amɛ butubutu.”—Ezekiel 9:5, 6; Zakaria 14:12, 13.
Shi te aaafee tɛŋŋ ni enɛ aaabalɛ nakai hu? Te aaafee tɛŋŋ ni Nyɔŋmɔ ni yɔɔ suɔmɔ lɛ kɛ famɔ ni tamɔ nɛkɛ aaaha hu? Aloo eji Nyɔŋmɔ ni nuuu nii ahe, nɔ ko jeee ehe saneko, oweletɔlɔ ni ebɛ bulɛ ko kwraa kɛha ebɔɔ nii ni ji adesai lɛ? Ani Nyɔŋmɔ ni yɔɔ suɔmɔ diɛŋtsɛ kɛ ta ni ji Harmagedon aaaba?