‘Mijamɔ Lɛ Hi Ha Mi!’
ANI okɛ wiemɔi ni tamɔ nɛkɛ eha hetoo pɛŋ yɛ be mli ni Yehowa Odasefoi ateŋ mɔ kome ba oshia lɛ? Ekolɛ okɛ fata he akɛ: ‘Ehi ha mifɔlɔi kɛ mifɔlɔi afɔlɔi. No hewɔ lɛ, mɛni hewɔ esa akɛ magba mihe naa yɛ jamɔ kroko he?’
Eji anɔkwale akɛ wɔfɔlɔi anilee kɛ niiashikpamɔ he baa sɛɛnamɔ babaoo kɛhaa wɔ. Shi ani no ji gbɛ ni nilee yɔɔ mli ni he hiaa akɛ wɔtsɔ nɔ wɔdi jamɔ ko sɛɛ? Eka shi faŋŋ akɛ wɔnyiɛɛɛ wɔfɔlɔi kɛ wɔfɔlɔi afɔlɔi asɛɛ yɛ nɔ fɛɛ nɔ ni amɛfeɔ lɛ mli. Mɛni hewɔ wɔfeee nakai? Ejaakɛ nɔyaa eba yɛ nilee kɛ saneshishinumɔ mli.
Akɛ nɔkwɛmɔ nɔ lɛ, nɔ ni fe afii 40 ni eho nɛ lɛ, amɛhe yeɔ, ni amɛteŋ mɛi pii gboi yɛ helai anaa tsabaa diɛŋtsɛ ni bɛ hewɔ. Shi kɛjɛ 1943 kɛbaa nɛɛ, tsofai komɛi ni atsɛɔ amɛ antibiotics ni gbeɔ muawai ni kɛ helai nɛɛ baa lɛ ehere gbɔmɛi pii ayiwala. Ani wɔkpoɔ akɛ wɔkɛ nɛkɛ antibiotics ni ji tsofai ni gbeɔ muawai ni kɛ helai nɛɛ baa lɛ aaatsu nii akɛni wɔfɔlɔi afɔlɔi leee lɛ hewɔ? Dabi, wɔbaaha wɔjwɛŋmɔŋ aka shi ni wɔŋmɛ nibii heei ni baa lɛ wɔkwɛ. Jwɛŋmɔ yɛ su ni tamɔ nɛkɛ mli kɛ eba jamɔ hu he.
Bɔfo Paulo sane lɛ hu tsɔɔ akɛ jeee be fɛɛ wɔblematsɛmɛi lɛ ajamɔ lɛ feɔ jamɔ ni sa nyɔŋmɔ hiɛ. Dani Paulo aaatsake kɛaaba Kristojamɔ he lɛ, no mli lɛ, ekɛ yiwalɛ baa “nɛkɛ tsɔɔmɔ nɛɛ” nɔ waa, ejaakɛ ekɛɛ “miwa Nyɔŋmɔ asafo lɛ yi babaoo ni mikpataa ehiɛ.” Shi mɛni hewɔ? Ejaakɛ ‘ehiɛ dɔɔ waa yɛ amɛblematsɛmɛi ablemasaji lɛ ahe.’ Bɔ ni ekɛ ehe kpɛtɛ etsutsu jamɔ lɛ he yɛ anɔkwayeli mli lɛ tsĩ lɛ gbɛ koni ekayoo anɔkwale ni kɔɔ Yesu Kristo he lɛ—ekolɛ nɔ ni eyɔɔ mli lɛ esaaa Nyɔŋmɔ hiɛ.—Bɔfoi 9:1, 2; Galatabii 1:13, 14.
Ojamɔ Lɛ—Kɛtsɔ Halamɔ Nɔ Aloo Heniianaa Nɔ
Mɛi pii yɛ ni amɛjamɔ lɛ ji nɔ ni amɛna lɛ trukaa. Mɛni hewɔ? No ji akɛ afɔ bo akɛ Katoliknyo, Protestantnyo, Hindunyo, Taonyo, aloo Budanyo ejaakɛ eji ofɔlɔi ajamɔ. Shi ŋɔɔ lɛ akɛ afɔ bo yɛ maŋ kroko nɔ aloo yɛ weku kroko mli. Ekolɛ benɛ oheɔ jamɔ kroko oyeɔ waa. No hewɔ lɛ, ani shishinumɔ yɛ mli akɛ aaakpɛlɛ nɔ akɛ jamɔ ni afɔ bo awo mli lɛ bafeɔ nɔ ni ji anɔkwale yɛ gbɛ fɛɛ gbɛ nɔ?
Kɛji akɛ afɔ bo awo ojamɔ lɛ mli aloo jeee nakai hu lɛ, obaanu he lolo akɛ ehi kɛha bo. Shi ani anɔkwale jamɔ lɛ ji nɔ ni mɔ kroko lɛ susuɔ aloo esumɔɔ? Ani gbɛtsɔɔmɔ ni anyɛɔ akɛ he fɔɔ nɔ nɛ?
Ekolɛ wɔbaanyɛ wɔkɛ niyenii ato enɛ he. Bi gbekɛ ko ni etsɔɔ bo nɔ ni esumɔɔ—keeki ko ni afolɔ aloo baaibaai komɛi ni ayeɔ ni ahoo awo tsɛnsi mli. Eka shi faŋŋ akɛ abaahala keeki lɛ. Shi ani nɔ ni ehala nɛɛ baafee nɔ ni gbɔmɔtso lɛ baaná he sɛɛ fe fɛɛ? Nakai nɔŋŋ hu kɛ́ jamɔ ko ji nɔ ni osumɔɔ aloo esaa ohiɛ lɛ, no etsɔɔɔ akɛ no ji nɔ ni hi fe fɛɛ kɛha bo yɛ mumɔŋ.—Okɛto Romabii 10:2, 3 he.
Jamɔ jeee sane ko ni mɔ ko susuɔ he yɛ ejwɛŋmɔ mli kɛkɛ. Ekɔɔ jamɔ ni aaaja Nyɔŋmɔ lɛ he, no hewɔ lɛ, esa ni efee nɔ ni saa ehiɛ. No hewɔ lɛ, sanebimɔ ni he hiaa lɛ jeee, Ani mijamɔ lɛ hi kɛhami lo? Shi moŋ, Ani mijamɔ lɛ saa Nyɔŋmɔ hiɛ lɛlɛŋ?