Mlifu Mɛni Ni?

“KƐ OTSI oduromɔ keenɔ ni ji mlifu ni Nyɔŋmɔ kɛha bo lɛ naa lɛ, belɛ oogbe bo diɛŋtsɛ ohe.” Kɔkɔ ni sane ko ni ajie kɛjɛ Newsweek wolo tɛtrɛɛ lɛ mli lɛ bɔ nɛ. Eka shi faŋŋ akɛ afii babaoo nɛ ni jwɛŋmɔ he nilelɔi babaoo eha ana jwɛŋmɔ lɛ akɛ mlifu ni ajieee lɛ kpo lɛ baanyɛ ni ekɛ haomɔi tamɔ lá ni faa babaoo yɛ mɔ mli, tsuihela, nɔnyɛɛ, yeyeeyefeemɔ kɛ daatɔɔ aba.

Shi Biblia lɛ ewo ŋaa afii akpei abɔ akɛ: “Ha mlifu sɛɛ afo ni oshɛ mlila ofɔ.” (Lala 37:⁠8) Nɔ ni Biblia lɛ tsɔɔ akɛ ekɛbaa lɛ mli ka shi faŋŋ: “Kaaha omumɔ mli miifu oya, ejaakɛ mlifu lɛ, kwashiai amiinaa eyɔɔ.”​—Jajelɔ 7:⁠9.

Namɔ ja yɛ biɛ, jeŋ nilelɔi lɛ aloo Biblia lɛ? Mɛni ji mlifu diɛŋtsɛ? Ani mlifu ni wɔjieɔ lɛ kpo lɛ hi kɛha wɔ?

Mlifu Ni Ajieɔ Lɛ Kpo Lɛ

“Mlifu” shishitsɔɔmɔ lɛ mli lɛɛ ni akɛtsɔɔ henumɔ loo nifeemɔ ni mli wa ni jɛɔ miishɛɛ ni abɛ kɛ shitee kɛ woo mli baa. Wiemɔi krokomɛi hu yɛ ni tsɔɔ he ni mɔ mli efu kɛyashɛ aloo bɔ ni ajieɔ enɛ kpo ahaa. Bolɔmɔ tsɔɔ mlifu ni mli wa. Hiɛdɔɔ baanyɛ afite nii. Nyaŋemɔ baanyɛ akɔ mlifu he yɛ gbɛ ni ja nɔ. Ni mlila tsɔɔ oweletɔɔ loo toigbalamɔ

Yɛ bei babaoo mli lɛ, mlifu tsɔɔ nɔ ko pɔtɛɛ: Wɔmli efu yɛ nɔ ko he. Shi bɔ ni wɔjieɔ mlifu kpo wɔtsɔɔ aloo gbɛ ni wa nɔ wɔtsuɔ he nii lɛ kɛ sɔrɔtofeemɔ agbo baa.

Shi nɔ ni yɔɔ miishɛɛ lɛ, mɛi ni kɛɛ amɛyɔɔ he nilee lɛ kɛɔ akɛ mlifu ni ajieɔ lɛ kpo lɛ he bɛ sɛɛnamɔ, ni jwɛŋmɔ he nikasemɔ ko ni afee nyɛsɛɛ nɛɛ lɛ tsɔɔ akɛ mɛi pii ni ŋmɛɔ gbɛ ni amɛjieɔ amɛmlifu kpo lɛ naa nɔ̃ yɛ shi ni amɛbaa hewɔ, nɔnyɛɛ baa amɛnɔ, amɛnuɔ he akɛ amɛye fɔ, yɛ hoofeemɔ hewɔ, aloo amɛfeɔ yeyeeye. Agbɛnɛ hu, nɔ ni ekolɛ ebaanyɛ efata mlifu “ni ajieɔ lɛ kpo” lɛ he ji hoo feemɔ, bolɔmɔ, yaafo aloo yii diɛŋtsɛ, ni enɛ kɛ naagbai babaoo moŋ baa fe ni aaana tsabaa aha. Mɔ ni mli efu lɛ mli fuɔ babaoo, ni eyeɔ mɛi krokomɛi ahenumɔi awui.​—Abɛi 30:​33; 1 Mose 49:​6, 7.

Kɛji akɛ wobolɔ yɛ mlifu hewɔ lɛ, yɛ bei babaoo mli lɛ, wɔnine shɛɛɛ nɔ ni wɔhiɛ ka nɔ lɛ nɔ ejaakɛ mɔ kroko lɛ hu mli fuɔ ni etoɔ najiaŋ. Akɛ nɔkwɛmɔnɔ lɛ, ŋɔɔ lɛ akɛ yɛ be mli okudɔɔ otsɔne lɛ, tsɔne kudɔlɔ kroko fee nɔ ko ni ekɛwo bo mlifu. Nɔ ofee oto najiaŋ ji akɛ obolɔ ni oha otsɔne lɛ bɔi bɛlɛkpamɔ waa. Omlifu nɛɛ baaha mɔ ni omli efu lɛ lɛ hu ato najiaŋ kɛ mlifu. Yɛ bei komɛi amli lɛ, oshara jɛɔ shihilɛ ni tamɔ nɛkɛ mli baa. Akɛ nɔkwɛmɔ nɔ lɛ, agbe nuu ko yɛ Brooklyn, New York, yɛ be mli ni amɛmiije ŋwane yɛ he ni ebaana ni ekɛ etsɔne ama yɛ gbɛjegbɛ nɔ lɛ he. Biblia lɛ maa naagba lɛ nɔ mi beni ekɛɛ akɛ: “Mlifutsɛ teɔ bei shi, ni mlilatsɛ lɛ etɔmɔ faa.” (Abɛi 29:22) Kwɛ bɔ ni nilee yɔɔ mli akɛ wɔɔbo ŋaawoo nɛɛ toi: “Nyɛkaŋɔa efɔŋ nyɛtoa mɔ ko efɔŋ najiaŋ. . . . Kɛ aaaho lɛ nyɛgbɛfaŋ lɛ, nyɛkɛ gbɔmɛi fɛɛ ahia shi yɛ hejɔlɛ mli.”​—Romabii 12:​17, 18.

No hewɔ lɛ, mlifu kpo ni ajieɔ lɛ yeee ebuaaa wɔ yɛ shihilɛ mli. Shi ani ehi kɛha wɔ yɛ gbɔmɔtsoŋ? Datrɛfoi babaoo emu sane naa akɛ ehiii haaa wɔ. Nikasemɔi ni afee lɛ etsɔɔ akɛ mɛi ni amɛmli etsɛɛɛ fumɔ lɛ naa helai tamɔ lá ni faa babaoo. Amaniɛbɔɔ lɛ ekomɛi tsɔɔ akɛ mlifu kɛ tsitsi mli helai, yitsogbamɔ, lá ni hoɔ yɛ gugɔ mli, hiɛdimɔ, aloo wiemɔ ni anyɛɛɛ awie jogbaŋŋ baa. Shi yɛ gbɛ kroko nɔ lɛ, wala Halɔ lɛ tsɔɔ mli akɛ: “Tsui ni mli jɔ lɛ, gbɔmɔtso lɛ yiwala ni.” (Abɛi 14;30)

Yesu kɛɛ: “Miishɛɛ ji mɛi ni sumɔɔ toiŋjɔlɛ lɛ, shi aaatsɛ amɛ ‘Nyɔŋmɔ bii.”​—Mateo 5: 9, NW.

Nibii Ni Kɛ Mlifu Baa

Nibii ni kɛ mlifu baa lɛ ekomɛi ji bɔ ni awieɔ ashiɔo ahaa, bɔ ni abaao shi ahaa, jɛmɔ, bɔ ni akɛwɔ yeee yɛ gbɛ ni ja na, nijiaŋwujee ni esaaa. Kɛ́ gbɔmɛi amli fu lɛ, belɛ amɛkɛ sane ko miiha kɛ nɔmimaa: “Oowo mimiishɛnamɔ kɛ mishweshweeshwe shihilɛ he gbɛyei! Ooye mihenɔwomɔ awui! Ooshɔ bulɛ ni miyɔɔ kɛha mihe lɛ kɛmiijɛ midɛŋ! Ooshishiumi!”

Yɛ bei komɛi amli lɛ, mɛi komɛi kɛ mlifu tsuɔ nii amɛkɛtaoɔ nɔ kroko. Akɛ nɔkwɛmɔ nɔ Iɛ, Gbalashihilɛ mli hefatalɔi komɛi ni yɔɔ Kalifornia lɛ kɛ amɛhe woɔ mlifu kɛ bolɔmɔ mli be fɛɛ be ni ŋa lɛ aaayasara enaanyo yoo ko. Wu lɛ mlifu lɛ hu teɔ mlifu shi yɛ yoo lɛ mli. Yɛ be mli ni amɛtee kɛha ŋaawoo lɛ, wu lɛ kɛɛ yoo lɛ nɔ ko ni ekɛko mɔ ko da. Kɛ́ eŋa lɛ shi lɛ, yɛ be kukuo po mli lɛ, yɛ emligbɛ lɛ, esheɔ gbeyei akɛ yoo lɛ baashi lɛ kwraa, ejaakɛ etsɛ shi lɛ beni eji gbekɛ bibioo. Beni ŋa lɛ nu nɔ̃ hewɔ ni ewu lɛ mli fuɔ lɛ shishi lɛ​—gbeyɛishemɔ akɛ ebaashi Iɛ lɛ​—eye ebua yoo lɛ ni eŋmɛɛ emli ni fuɔ ewu lɛ he ni eha ena nɔmimaa akɛ esumɔɔ lɛ babaoo.

No hewɔ lɛ, mlifu baanyɛ afee nɔ ko he okadi. Yɛ enɛ mli lɛ kɛ wɔyoo nɔ ni kɛ enɛ baa lɛ, wɔbaanyɛ wɔkase gbɛ ni wɔɔtsɔ nɔ wɔtsu he nii yɛ gbɛ ni ja nɔ.

[Mfoniri ni yɔɔ baafa 4]

Datrɛfoi pii emu sane naa akɛ miifu ni ajieɔ lɛ kpo yeɔ gbɔmɔtso lɛ awui