Wɔmiihere Nyɛ Atuu Kɛmiiba “Nyɔmɔ Jamɔ Hetuu-Kɛ-Hamɔ” Kpokpaa Wulu Nɔ Kpeei Ashishi
MƐƐ saneyitso ni ŋɔɔ wɔyɔɔ kɛha afi nɛɛ kpokpaa wulu nɔ kpee lɛ nɛkɛ: “Nyɔŋmɔ Jamɔ Hetuu-kɛ-hamɔ”! Ni mɛɛ Nyɔŋmɔ jamɔ hetuu-kɛ-hamɔ mli nɔkwɛmɔ nɔ kpakpa po Yesu Kristo fee kɛha wɔ nɛkɛ! Ebɛ naakpɛɛ mɔ akɛ no hewɔ ni akɛ mumɔ tsirɛ bɔfo Paulo ni eŋma yɛ ehe akɛ: “Yɛ anɔkwale mli lɛ, wɔkpɛlɛɔ nɔ akɛ nɛkɛ Nyɔŋmɔ jamɔ hetuu-kɛ-hamɔ mli teemɔŋ sane lɛ da: ‘Ajie lɛ kpo faŋŋ yɛ heloo mli, abu lɛ jalɔ yɛ mumɔŋ, ejie ehe kpo etsɔɔ bɔfoi, ashiɛ lɛ yɛ jeŋmaji lɛ ateŋ, ahe lɛ aye yɛ je lɛŋ, aŋɔ lɛ kɛtee ŋwɛi yɛ anunyam mli.’”—1 Timoteo 3: 16, New World Translation.
Wɔ kpokpaa wulu nɔ kpee lɛ baawaje wɔ koni wɔtsɔmɔ gbɔmɛi ni diɔ Nyɔŋmɔ jamɔ mli hetuu-kɛ-hamɔ diɛŋtsɛ sɛɛ, taakɛ Yesu fee lɛ. No hewɔ lɛ, klɛŋklɛŋ kwraa lɛ, wɔmiisumɔ ni wɔkwɛ jogbaŋŋ koni wɔkaha nɔ ko nɔ ko kwraa miigba mumɔŋ niyenii nɛɛ ni wɔɔye lɛ naa. No hewɔ lɛ, nyɛhaa wɔtaraa wɔsɛii amli Sohaa leebi yɛ 10:20 koni wɔna lalai ni akɛbaaha lɛ ahe sɛɛ koni wɔna jwɛŋmɔ ni ja ni baaha wiemɔi ahe gbɛjianɔtoo ni nyiɛ sɛɛ lɛ he aba sɛɛnamɔ aha wɔ kɛmɔ shi. Saneyitso ni ahala kɛha klɛŋklɛŋ gbi lɛ ji “ Suɔmɔ ni Akɛhaa Nyɔŋmɔ ni Biɔ He ni Atuɔ Ahaa Ekometoo” ni damɔ 2 Mose 20:5 nɔ. Sɛinɔtalɔ lɛ wiemɔ lɛ sa jogbaŋŋ: “Wɔmiihere Nyɛ Atuu, Nyɛ Nyɔŋmɔ Jamɔ Hetuu-kɛ-hamɔ Gbɔmɛi!” Yɛ klɛŋklɛŋ gbi lɛ nɔ lɛ, wɔbaanu wiemɔi ni tswaa mɔ emaa shi ni tsɔɔ nɔ hewɔ ni Yehowa maa Nyɔŋmɔ jamɔ mli hetuu-kɛ-hamɔ nɔ mi kɛ nɔ hewɔ ni ehe hiaa ni wɔkase Nyɔŋmɔ jamɔ mli hetuu-kɛ-hamɔ mli teemɔŋ sane lɛ. Wɔbaanu saji ni kanyaa mɔ hu ni kɔɔ anɔkwa Nyɔŋmɔ lɛ kɛ bɔ ni e-Wiemɔ lɛ ji krɔŋŋ ha lɛ hu he.
Hɔɔ saneyitso lɛ ji “Nyɔŋmɔ Jamɔ Mli Hetuu-kɛ-hamɔ he yɛ Sɛɛnamɔ Babaoo,” ni edamɔ 1 Timoteo 6:6 nɔ. Yɛ leebi mli lɛ wɔbaanu tsɔsemɔ wiemɔi ni kɔɔ nɔ ni ebiɔ koni mɔ ko atiu Nyɔŋmɔ jamɔ hetuu-kɛ-hamɔ sɛɛ. Agbɛnɛ baptisimɔ he wiemɔ kɛha mɛi ni amɛfee klalo akɛ amɛkɛ amɛhe baawo Nyɔŋmɔ jamɔ hetuu-kɛ-hamɔ gbɛ lɛ nɔ lɛ hu yɛ. Yɛ Hɔɔ shwane lɛ wɔbaanu wiemɔi ni tsɔɔ nɔ hewɔ ni ehe hiaa akɛ wɔye “tsulɔ anɔkwafo kɛ nilelɔ” lɛ anɔkwale, kɛkɛ lɛ agbɛnɛ wɔbaakase bɔ ni wɔɔfee wɔjie Nyɔŋmɔ jamɔ mli hetuu-kɛ-hamɔ nitsumɔi akpo yɛ weku kɔkrɔɔ lɛ mli. Yɛ naagbai ni wɔ obalaŋtai lɛ kɛkpeɔ lɛ hewɔ lɛ, abaato wiemɔi krɛdɛɛi ahe gbɛjianɔ aha amɛ.
“Kwa Nɔ Sha Feemɔ ni Okɛ Nyɔŋmɔ Jamɔ Hetuu-kɛ-hamɔ Ahi Shi,” ni ajie kɛjɛ Tito 2:12 lɛ ji Hɔgbaa saneyitso. Leebi lɛ, wɔnine baashɛ famɔi ni bɔɔ wɔ kɔkɔ yɛ “mlakwamɔ gbɔmɔ” lɛ he lɛ nɔ koni wɔkakplaŋŋ kɛmiiya yɛ saji ni kɔɔ niyenii kɛ ninumɔ he, hesaamɔ kɛ hiɛtserɛjiemɔ he. (2 Tesalonikabii 2:3) Nɔ ni baanyiɛ sɛɛ aba ji ŋmɛnɛŋmɛnɛ beaŋ drama ni maa bɔ ni ehe hiaa akɛ wɔɔba wɔhe shi wɔha Nyɔŋmɔ lɛ nɔ mi. Maŋshiɛmɔ lɛ baaba shwane mli ni ekɛ sanekpakpa ni ji akɛ kpɔmɔ ebɛŋkɛ kɛha gbɔmɛi ni diɔ Nyɔŋmɔ jamɔ mli hetuu-kɛhamɔ sɛɛ lɛ baaha. Wɔmumɔŋ niyenii lɛ baaba naagbee kɛ niiahesusumɔ ni tsɔɔ akɛ “Ya ni Wɔɔya Nɔ Wɔkɛ Nyɔŋmɔ Jamɔ Hetuu-kɛ-hamɔ Atsɔse Wɔhe lɛ He Yɛ Sɛɛnamɔ.”
No hewɔ lɛ ba akɛ mɔ ni osaa ohe akɛ obaanyiɛ ŋmalɛi ni wielɔi lɛ baatsɛ yisɛɛ lɛ sɛɛ yɛ o-Biblia lɛ mli, ni okɛ niŋmaa tso aŋmala saji ni he hiaa lɛ oshwie shi yɛ owoji amli. Nibii ni aŋmalaa ashwieɔ shi lɛ yeɔ buaa nɔjwɛŋmɔ koni nɔ ni mɔ lɛ nuɔ lɛ he aba sɛɛnamɔ babaoo aha lɛ. Ni kɛlɛ nyɛkahaa wɔkua wɔhiɛ wɔshwieɔ nɔ akɛ nitsumɔ babaoo he miihia bɔni afee ni kpee ko aya nɔ fɛfɛo ni ákɛ niji pii haa nitsumɔ feɔ flɛflɛ. Kɛ wɔtuu wɔhe wɔha ni wɔye wɔbua lɛ, wɔbaana miishɛɛ babaoo ni jɛɔ nihamɔ mli baa lɛ.—Bɔfoi lɛ Asaji 20:35.
No hewɔ lɛ eba akɛ wɔ Nyɔŋmɔ jamɔ hetuu-kɛ-hamɔ lɛ aaatsirɛ wɔ koni wɔba kpee nɛɛ shishi ni ekanya wɔ ni wɔna he sɛɛ babaoo. Eba akɛ wɔɔshi jɛmɛ akɛ mɛi ni awaje wɔ ni wɔtswa wɔfai shi akɛ wɔshihilɛ baatamɔ mɛi ni diɔ Nyɔŋmɔ jamɔ hetuu-kɛ-hamɔ sɛɛ babaoo kɛmɔɔ shi.