Nyɛyaa Nɔ Nyɛnyiɛa yɛ La kɛ Suɔmɔ Mli
Yohane Klɛŋklɛŋ Wolo lɛ Mli Sane Otii
YEHOWA ji la kɛ suɔmɔ Jɛɛhe. Esa akɛ wɔkwɛ Nyɔŋmɔ gbɛ kɛha mumɔŋ la. (Lala 43:3) Ni suɔmɔ fata emumɔ krɔŋkrɔŋ lɛ yibii lɛ ahe.—Galatabii 5:22, 23.
Awie la, suɔmɔ kɛ saji krokomɛi ahe yɛ bɔfo Yohane klɛŋklɛŋ wolo ni jɛ mumɔŋ, ni eeenyɛ efee akɛ aŋma yɛ Efeso loo emasɛi gbɛ aaafee afi 98 Ŋ.B. lɛ mli. Yiŋtoo titri hewɔ ni eŋma enɛ ji ni ebu Kristofoi lɛ ahe kɛjɛ hemɔkɛyeli kwamɔ he ni eye ebua amɛ ni amɛya nɔ amɛnyiɛ yɛ la lɛ mli. Akɛni wɔ suɔmɔ, hemɔkɛyeli, kɛ emuuyeli mli ni wɔɔhiɛ wɔha anɔkwale lɛ he kaai jwere wɔhiɛ hewɔ lɛ, wolo nɛɛ he susumɔ he baaba sɛɛnamɔ aha wɔ diɛŋtsɛ.
‘Nyiɛmɔ yɛ La lɛ Mli’
Yohane fee lɛ faŋŋ akɛ esa akɛ anɔkwa Kristofoi anyiɛ yɛ mumɔŋ la lɛ mli. (1Yo 1:1–2:29) Ekɛɛ: “Nyɔŋmɔ lɛ la ji lɛ,ni duŋ ko [nɔ fɔŋ, jeŋba gbonyo, nɔ ni jeee anɔkwale, aloo ehe tseee] bɛ emli kwraa.” Akɛni Kristofoi ni akɛ mumɔ efɔ amɛ mu lɛ ‘nyiɛɔ yɛ la lɛ mli’ hewɔ lɛ, amɛkɛ Nyɔŋmɔ, Kristo, kɛ amɛhe ‘miibɔ naanyo.’ Yesu la lɛ hu etsuu amɛhe kɛjɛ eshai ahe.
Kɛji akɛ wɔji Kristofoi ni afɔ amɛ mu ni hiɛ ŋwɛi hiɛnɔkamɔ aloo wɔmiikpa naanɔ wala yɛ shikpɔŋ nɔ gbɛ lɛ, kɛlɛ Yesu afɔleshaa lɛ he baaba sɛɛnamɔ aha wɔ lolo kɛji akɛ wɔsumɔɔ wɔnanemɛi shi jeee je lɛ. Esa akɛ wɔkwa hemɔkɛyeli kwalɔi ni aaana wɔnɔ hewalɛ lɛ hu, tamɔ ‘antikristoi,’ ni kpooo Tsɛ lɛ kɛ Bi lɛ fɛɛ lɛ.Ni nyɛkahaa wɔhiɛ miikpa nɔ akɛ mɛi ni kɛ amɛhe kpɛtɛɔ anɔkwale lɛ he ni amɛfeɔ jalɛ nii lɛ pɛ baana naanɔ wala mli ŋɔɔmɔ.
Nyɔŋmɔ Bii lɛ Jieɔ Suɔmɔ Kpo
Yɛ enɛ sɛɛ lɛ Yohane ha ale mɛi ni ji Nyɔŋmɔ bii lɛ. (3:1–4:21) Nɔ kome ji akɛ, amɛfeɔ nɔ ni ja. Amɛboɔ Yehowa Nyɔŋmɔ kita nɛɛ toi akɛ ‘amɛna hemɔkɛyeli yɛ e-Bi Yesu Kristo gbɛi amli, ni amɛsumɔ amɛhe.’
Mɔ aŋkro ni yɔɔ ‘Nyɔŋmɔ he nilee’ lɛ le Yehowa yiŋtoi kɛ gbɛ ni etsɔɔ nɔ ejieɔ E-suɔmɔ lɛ kpo. Esa akɛ enɛ aye abua mɔ lɛ ni ejie suɔmɔ kpo etsɔɔ. Yɛ anɔkwale mli lɛ, “mɔ ni bɛ suɔmɔ lɛ, eleko Nyɔŋmɔ, ejaakɛ Nyɔŋmɔ lɛ, suɔmɔ ji lɛ.” Ajie ŋwɛi suɔmɔ lɛ kpo beni Nyɔŋmɔ “tsu e-Bi lɛ akɛ ebafee wɔhe eshai lɛ ahe kpatamɔ nɔ” lɛ. Kɛji akɛ Yehowa sumɔɔ wɔ nakai lɛ, belɛ gbɛnaa nii ka wɔnɔ akɛ wɔsumɔ wɔhe. Hɛɛ, esa akɛ mɔ fɛɛ mɔ ni kɛɔ akɛ esumɔɔ Nyɔŋmɔ lɛ hu asumɔ emumɔŋ nyɛmi.
Hemɔkɛyeli ‘Yeɔ Je lɛ Nɔ Kunim’
Suɔmɔ tsirɛɔ Nyɔŋmɔ bii lɛ koni amɛye ekitai lɛ anɔ, shi hemɔkɛyeli nɔ amɛtsɔɔ ‘amɛyeɔ je lɛ nɔ kunim.’ (5:1-21) Hemɔkeyeli ni wɔyɔɔ yɛ Nyɔŋmɔ, e-Wiemɔ lɛ, kɛ e-Bi lɛ mli lɛ yeɔ ebuaa wɔ ni ‘wɔyeɔ je lɛ nɔ kunim kɛtsɔɔ esusumɔi kɛ egbɛi fɔji lɛ ni wɔkpooɔ kɛ Yehowa kitai lɛ ni wɔyeɔ nɔ lɛ nɔ. Nyɔŋmɔ kɛ naanɔ wala he hiɛnɔkamɔ eha ‘je lɛ nɔ kunimyelɔi lɛ, ni eboɔ amɛsɔlemɔi ni kɛ esuɔmɔnaa nii kpaa gbee lɛ toi. Akɛni mɔ fɛɛ mɔ ni “ajɛ Nyɔŋmɔ mli afɔ lɛ lɛ” efeee esha hewɔ lɛ, Satan nyɛɛɛ amɔ gbɔmɔ ni tamɔ nɛkɛ. Shi esa akɛ mɛi ni afɔ amɛ mu lɛ kɛ Yehowa tsuji ni yɔɔ shikpɔŋ nɔ shihilɛ he hiɛnɔkamɔ lɛ akai akɛ ‘jeŋ muu lɛ fɛɛ ka mɔ fɔŋ lɛ hewalɛ mli.’
[Akrabatsa/Mfoniri ni yɔɔ baafa 29]
Eshai Ahe Kpatamɔ Nɔ:
Yesu ji wɔhe eshai lɛ ahe kpatamɔ nɔ [esɛɛnyiɛlɔi ni afɔ amɛ mu lɛ nɔ], shi jeee wɔnɔ lɛ kɛkɛ he, shi moŋ jeŋ muu lɛ fɛɛ nɔ lɛ hu he,” adesai ni eshwɛ lɛ. (1 Yohane 2:2) Egbele lɛ ji “kpatamɔ nɔ” (Hela, hi·la·smosʹ, ni tsɔɔ “nɔ ni atsɔɔ nɔ akpaa fai,” “akpataa”) shi jeee kɛ shishinumɔ akɛ aajɔɔ bɔni Nyɔŋmɔ nuɔ awui ni aye lɛ lɛ he. Shi moŋ Yesu afɔleshaa lɛ kpa fai, loo eha nɔ ni ŋwɛi jalɛsaneyeli ni yeɔ emuu biɔ lɛ tsui nyɔ emli. Yɛ mɛɛ gbɛ nɔ? Kɛtsɔ nɔ ni ja ni sa ni abaadamɔ nɔ akɛ eshai ake lɛ ni akɛha koni “abu Nyɔŋmɔ bem beni ebuɔ gbɔmɔ [ni akɛ esha fɔ lɛ] ni yɔɔ Yesu mli hemɔkeyeli lɛ bem lɛ.” (Romabii 3:23-26; 5:12) Akɛni ekɛ nɔ ni baaha mɔ tsui anyɔ emli kwraa yɛ gbɔmɔ eshai ahe lɛ ha hewɔ lɛ, Yesu afɔleshaa lɛ kɛ kpatamɔ loo duromɔ ha, koni gbɔmɔ atao ni enine ashɛ saamɔ ni aaasaa wekukpaa ni ka ekɛ Yehowa teŋ lɛ nɔ ekoŋŋ. (Efesobii 1:7; Hebribii 2:17) Kwɛ bɔ ni esa okɛ wɔ fɛɛ wɔda shi yɛ enɛ he!