Yesu Shihilɛ kɛ Shiɛmɔ Nitsumɔ

Yesu Gbe Nitsumɔ ni Nyɔŋmɔ Kɛha Lɛ lɛ Fɛɛ Naa

BENI Tatsɛ-kɛ-Maŋtsɛ Yesu Kristo baajie Satan kɛ ejeŋ fɔŋ nɛɛ kɛaatee kwraa lɛ, mɛɛ shihilɛ ni haa anaa miishɛɛ baahi shi nɛkɛ! Yesu toiŋjɔlɛ Afii Akpe Maŋtsɛyeli lɛ eje shishi kɛ̃!

Yɛ Yesu kɛ ehefatalɔi maŋtsɛmɛi lɛ agbɛtsɔɔmɔ shishi lɛ, mɛi ni baafo Harmagedon shweshweeshwe lɛ baasaa nibii ni efite ni nakai jalɛ ta lɛ eshi yɛ sɛɛ lɛ fɛɛ. Ekolɛ, mɛi ni baana yiwalaheremɔ yɛ shikpɔŋ nɔ lɛ hu baafɔ bii yɛ be ko mli, ni amɛbaana nitsumɔ ni yɔɔ miishɛɛ ni ji shikpɔŋ lɛ nɔ saamɔ koni etsɔ abɔɔ fɛfɛo lɛ mli gbɛfaŋnɔ.

Yɛ be ni sa mli Iɛ, Yesu baatee gbɔmɛi akpekpei abɔ ni aleee amɛyibɔ shi kɛjɛ amɛgbohii abui amli koni amɛbana nɛkɛ Paradeiso fɛfɛo nɛɛ mli ŋɔɔmɔ. Ebaafee enɛ yɛ lɛ diɛŋtsɛ eshiwoo wiemɔ lɛ mlibaa mli: “Ejaakɛ ŋmɛlɛtswaa lɛ miiba, nɔ mli ni mɛi fɛɛ ni yɔɔ gbohii abui lɛ amli Iɛ . . . aaaje kpo.”

Mɔ ni baafata mɛi ni Yesu baatee amɛ shi nɛɛ ahe ji tsutsu efɔŋfeelɔ ni gbo yɛ emasɛi yɛ sɛŋmɔtso lɛ nɔ lɛ. Obaakai akɛ Yesu wo lɛ shi akɛ: “Lɛlɛŋ, miikɛɛ bo ŋmɛnɛ akɛ, Okɛ mi aaahi Paradeiso.” (NW) Dabi, aŋɔŋ nakai nuu lɛ kɛyaŋ ŋwɛi ni ekɛ Yesu ayaye maŋtsɛ yɛ jɛmɛ, ni nakai nɔŋŋ hu Yesu ebatsɔŋ gbɔmɔ adesa ekoŋŋ koni ekɛ lɛ abahi Paradeiso shikpɔŋ Iɛ nɔ. Shi moŋ, Yesu kɛ nɛkɛ tsutsu efɔŋfeelɔ nɛɛ baahi shi kɛ shishinumɔ akɛ E-baatee lɛ shi kɛba wala mli yɛ Paradeiso ni ebaakwɛ koni atsu ehiamɔ nii fɛɛ ahe nii, yɛ gbɔmɔtsoŋ kɛ mumɔŋ fɛɛ, taakɛ afee he mfoniri yɛ baafa nɛɛ mli lɛ.

Susumɔ he okwɛ! Yɛ Yesu suɔmɔ nɔkwɛmɔ shishi lɛ, adesai aweku muu lɛ fɛɛ​—mɛi ni baana yiwalaheremɔ yɛ Harmagedon lɛ, amɛshwiei, kɛ mɛi akpekpei akpei abɔ ni atee amɛ shi ni amɛboɔ lɛ toi lɛ​—baaya hiɛ kɛyashɛ adesa emuuyeli mli. Yehowa baatsɔ e-Bi odehe, Yesu Kristo nɔ ekɛ gbɔmɛi adesai ahi shi yɛ mumɔŋ. “Ni,” taakɛ gbee ni Yohane nu yɛ ŋwɛi lɛ kɛɛ Iɛ, “[e]baatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ.” Gbɔmɔ ko bɛ shikpɔŋ nɔ ni baana amanehulu aloo ni hela baamɔ lɛ.

Beni Yesu Kristo Afii Akpe Nɔyeli lɛ aaaba naagbee Iɛ, shihilɛ lɛ baafee tamɔ bɔ ni Nyɔŋmɔ yiŋtoo ji beni ekɛɛ klɛŋklɛŋ adesai enyɔ, Adam kɛ Hawa, ni amɛfɔ ni amɛyi afa ni amɛyi shikpɔŋ Iɛ nɔ lɛ pɛpɛɛpɛ. Hɛɛ, shikpɔŋ lɛ nɔ baayi obɔ kɛ adesai abii, jalɔi ni eye emuu. Ni nɔ hewɔ ji akɛ, no mli lɛ akɛ Yesu kpɔmɔ afɔleshaa lɛ mli sɛɛnamɔi lɛ etsu mɔ fɛɛ mɔ he nii. Gbele ni baa yɛ Adam esha Iɛ hewɔ lɛ ehiŋ shi dɔŋŋ!

Yɛ nɛkɛ gbɛ nɔ lɛ, Yesu baagbe nitsumɔ ni Yehowa kɛha lɛ ni etsu lɛ fɛɛ naa. No hewɔ lɛ, yɛ afii akpe lɛ naagbee lɛ, ekɛ Maŋtsɛyeli Iɛ kɛ adesai aweku ni eye emuu lɛ fɛɛ baawo e-Tsɛ lɛ dɛŋ. No sɛɛ lɛ Nyɔŋmɔ baafɛne Satan kɛ edaimonioi Iɛ kɛjɛ bu kwɔŋkwɔŋ ni tamɔ gbele shihilɛ ni anyɛɛɛ nɔ ko afee yɛ mli lɛ mli. Kɛha mɛɛ yiŋtoo?

Ojogbaŋŋ, beni afii akpe lɛ baaba naagbee Iɛ, no mli lɛ mɛi ni yɔɔ Paradeiso lɛ ateŋ mɛi pii baafee mɛi ni atee amɛ shi kɛjɛ gbohii ateŋ ni amɛkɛ amɛhemɔkɛyeli lɛ he kaa ekpeko da. Amɛleee Nyɔŋmɔ shiwoi lɛ ahe nɔ ko kwraa dani amɛgboi, ni no hewɔ lɛ amɛtsɔɔɔ hemɔkɛyeli yɛ nakai shiwoi Iɛ amli. Agbɛnɛ yɛ amɛshitee lɛ sɛɛ beni atsɔɔ amɛ Biblia mli anɔkwalei lɛ, ebafee mlɛo kɛha amɛ akɛ amɛaasɔmɔ Nyɔŋmɔ yɛ Paradeiso, ni amɛnaaa shitee-kɛ-woo ko kwraa. Shi kɛ aha Satan hegbɛ koni ebɔ mɔdɛŋ etsi amɛ gbɛ ni amɛkasɔmɔ Nyɔŋmɔ lɛ, ani amɛbaaye anɔkwale yɛ kaa Iɛ mli? No hewɔ lɛ abaafɛne Satan, bɔni afee ni akɛna nɛkɛ sane nɛɛ naa.

Kpojiemɔ ni akɛha Yohane lɛ jieɔ lɛ kpo etsɔɔ akɛ yɛ Yesu Afii Akpe Nɔyeli lɛ naagbee lɛ, Satan baaye omanye yɛ mɔdɛŋ ni ebaabɔ akɛ ebaajie mɛi babaoo ni aleee amɛyifalɛ kɛjɛ Nyɔŋmɔ sɔɔmɔ he lɛ mli. Shi, kɛ agbe naagbee kaa Iɛ naa lɛ, abaakpata Satan, kɛ edaimonioi lɛ, kɛ mɛi fɛɛ ni enyɛ elaka amɛ yɛ omanyeyeli mli lɛ ahiɛ kɛya naanɔ. Shi yɛ gbɛ kroko nɔ lɛ, mɛi ni aka amɛ akwɛ jogbaŋŋ kɛmɔ shi, ni ji anɔkwafoi ni abaabaa amɛyi lɛ baaya nɔ amɛhi shi ni amɛna amɛŋwɛi Tsɛ Iɛ dɛŋ jɔɔmɔi amli ŋɔɔmɔ kɛya naanɔi anaanɔ.

Eyɛ faŋŋ akɛ, Yesu etsu nii, ni ebaaya nɔ etsu nii akɛ mɔ ni he hiaa waa yɛ Nyɔŋmɔ yiŋtoi ni yɔɔ nyam lɛ ahe nitsumɔ mli. Mɛɛ wɔsɛɛ be ni yɔɔ nyam wɔɔnyɛ wɔna mli ŋɔɔmɔ nɛkɛ yɛ nibii fɛɛ ni enyɛ etsu, akɛ Nyɔŋmɔ ŋwɛi Maŋtsɛ kpele lɛ hewɔ! Ni kɛlɛ, wɔnyɛŋ wɔha wɔhiɛ akpa nibii fɛɛ ni etsu beni eji gbɔmɔ Iɛ nɔ.

Yesu jɛ lɛ diɛŋtsɛ esuɔmɔ mli eba shikpɔŋ Iɛ nɔ ni ebatsɔɔ wɔ nibii ni kɔɔ e-Tsɛ lɛ he. Ni nɔ ni fe enɛ lɛ, ejie Nyɔŋmɔ sui ni hi kɛwula shi lɛ kpo faŋŋ etsɔɔ wɔ. Kɛ wɔsusu eheshibaa kɛ nuufeemɔ, enilee ni mɔ ko kɛ lɛ yeee egbɔ, enyɛmɔ ni yeɔ emuu akɛ tsɔɔlɔ, ehiɛnyiɛmɔ ni gbeyeishemɔ bɛ mli, kɛ emlihilɛ kɛ niiahenumɔ ni suɔmɔ yɔɔ mli lɛ he Iɛ, etsirɛɔ wɔ ni ekanyaa wɔtsuii waa diɛŋtsɛ. Kɛ wɔkai bɔ ni ena amanehulu ni naa wa ni anyɛŋ naa atsɔɔ, beni ekɛ kpɔmɔ nɔ, ni no pɛ nɔ wɔbaatsɔ wɔna wala lɛ haa lɛ, eka shi faŋŋ akɛ wɔtsuii tsirɛɔ wɔ koni wɔna hiɛsɔɔ wɔha lɛ!

Lɛlɛŋ, mɛɛ gbɔmɔ wɔna wɔle nɛkɛ yɛ Yesu shihilɛ he nii ni wɔkase nɛɛ mli! Anaa bɔ ni efe mɔ fɛɛ mɔ Iɛ faŋŋ ni anyɛɛɛ naa atsɔɔ. Enɛ tsirɛɔ wɔ ni wɔwie wiemɔi ni Roma amralo Pontio Pilato wie lɛ nɔŋŋ: “Naa, Gbɔmɔ Lɛ!”

Kɛ wɔkpɛlɛ ekpɔmɔ afɔleshaa ni akɛha Iɛ nɔ lɛ, abaanyɛ awo jatsu ni ji esha kɛ gbele gboshinii ni wɔna kɛjɛ Adam dɛŋ lɛ kɛjɛ wɔnɔ, ni Yesu baanyɛ atsɔ wɔ “Naanɔ Tsɛ.” Jeee Nyɔŋmɔ he nilee pɛ esa akɛ mɛi fɛɛ ni baana naanɔ wala lɛ ana, shi moŋ e-Bi, Yesu Kristo he nilee hu. Wɔhiɛnɔkamɔ ji akɛ kanemɔ ni oookane saji ni aŋmala kɛtsara nɔ ni kɔɔ Yesu shihilɛ kɛ esɔɔmɔ nitsumɔ lɛ he nɛɛ kɛ ekasemɔ hu lɛ baaye ebua bo ni ona nakai nilee ni haa mɔ wala lɛ! 1 Yohane 2:​17; 1:7; Yohane 5:​28, 29; 3:​16; 17:3; 19:5; Luka 23:​43; 1 Mose 1:​28; 1 Korintobii 15:​24-28; Kpojiemɔ 20:​1-3, 6-10; 21:​3, 4; Yesaia 9:⁠6.

◆ Mɛni baafee mɛi ni baafo Harmagedon kɛ amɛbii lɛ ahegbɛ ni yɔɔ miishɛɛ?

◆ Namɛi baafata mɛi ni baafo Harmagedon lɛ kɛ amɛbii lɛ ahe kɛna Paradeiso lɛ mli ŋɔɔmɔ, ni mɛɛ shishinumɔ naa Yesu kɛ amɛ baahi shi yɛ?

◆ Te shihilɛ lɛ aaafee tɛŋŋ yɛ afii akpe Iɛ naagbee, ni mɛni Yesu baafee yɛ nakai be mli?

◆ Mɛni hewɔ abaafɛne Satan kɛjɛ bu kwɔŋkwɔŋ lɛ mli lɛ, ni mɛni baaba Iɛ kɛ mɛi fɛɛ ni baanyiɛ esɛɛ Iɛ anɔ yɛ naagbee?

◆ Mɛɛ gbɛ nɔ Yesu baanyɛ atsɔ wɔ “Naanɔ Tsɛ” yɛ.