Be Enyiɛ Nyɔŋmɔ Tsuishitoo Lɛ Sɛɛ Baatsɛ Kɛyashi?

AAFEE afii 3,000 ni eho nɛɛ, nilelɔ ko ŋma akɛ: “Gbɔmɔ yeɔ enaanyo gbɔmɔ nɔ ni ekɛyeɔ ehe awui.” (Jajelɔ 8:⁠9) Kɛjɛ be mli ni ena nɛkɛ niiashikpamɔ nɛɛ kɛbaa fɛɛ nɛɛ, nibii ehiko kɔkɔɔkɔ. Yɛ yinɔsane be fɛɛ mli lɛ, aŋkroaŋkroi loo kui kɛ ekaa eshɔ̃ nɔyeli hewalɛ kɛtsara nɔ, ni amɛyeɔ adesai krokomɛi anɔ ni amɛshishiuɔ amɛ. Yehowa Nyɔŋmɔ kɛ tsuishitoo edamɔ shihilɛ nɛɛ naa.

Yehowa eto etsui shi yɛ be mli ni nɔyelii kɛ gbɔmɛi akpekpei abɔ wuuɔ ta ni amɛgboiɔ lɛ ni eŋmɛ shika helɛtemɔ mli jalɛsaneyeli ni bɛ kwraa lɛ hu gbɛ. Ŋmɛnɛ, etee nɔ eto etsui shi lolo beni adesai yaa nɔ amɛfiteɔ kɔɔyɔɔ ni atsɛɔ lɛ ozone lɛ ni amɛwoɔ kɔɔyɔɔŋ kɛ ŋshɔ mli muji hu lɛ. Kwɛ bɔ ni ebaadɔ lɛ eha akɛ eeena ni aakpata shikpɔŋ ni baa nii lɛ hiɛ ni aakpata kooi kɛ kooloi ni yɔɔ mli lɛ hu ahiɛ kɛkɛ yakatswaa!

Mɛni Hewɔ ni Nyɔŋmɔ Eto Etsui Shi Nakai?

Niiamlitsɔɔmɔ fioo ko baanyɛ aye abua wɔ ni wɔha sanebimɔ nɛɛ hetoo. Susumɔ bɔ ni nitsulɔ ko sɛɛkpee kɛ nitsumɔ baa daa gbi lɛ baasa nitsumɔ lɛ he aha lɛ he okwɛ. Mɛni esa akɛ nitsumɔtsɛ lɛ afee? Jalɛsaneyeli baabi ni eshwie nakai nitsulɔ lɛ amrɔ nɔŋŋ. Shi ekolɛ ebaakai Biblia mli abɛbua nɛɛ: “Mɔ ni mli fuuu mra lɛ, eyɛ jwɛŋmɔ jogbaŋŋ; shi mɔ ni tsui yɔɔ floflo lɛ, ejieɔ buulufeemɔ kpo.” (Abɛi 14:29) Sɛɛyoomɔ baaha emɛ fioo dani etsu enɛ he nii. Ekolɛ ebaakpɛ eyiŋ akɛ ebaaŋmɛ gbɛ be fioo ko koni akɛtsɔse mɔ kroko ni baaye enajiaŋ lɛ koni enɛ feemɔ akagba nitsumɔ lɛ naa babaoo kɛfata shihilɛ lɛ he.

Ekolɛ naanyo henumɔ ni eyɔɔ lɛ hu baanyɛ aha emɛ fioo. Ni kɔkɔ ni eeebɔ nɛkɛ nitsulɔ ‘ni kɛ anyagbafeemɔ tsuɔ nii nɛɛ koni etsake egbɛ lɛ hu? Mɛni hewɔ ekɛ lɛ ewieee ekwɛɛɛ akɛ aleee nɔ, ekolɛ sɛɛ ni ekpeɔ daa gbi lɛ jɛɔ naagba pɔtɛɛ ko ni abaanyɛ atsu he nii aloo ejɛɔ subaŋ gbonyo ko ni enyɛŋ etsake? Eyɛ mli akɛ ekolɛ nitsumɔtsɛ lɛ baakpɛ eyiŋ akɛ ebaato etsui shi moŋ, shi kɛlɛ, otsuishiŋmɛɛ lɛ sɛɛ baafo gbi ko kɛ. Ebaabi ni nitsulɔ lɛ afee tsakemɔi komɛi aloo yɛ naagbee lɛ abaashwie lɛ kwraa. Ni enɛ baasa nitsumɔ lɛ diɛŋtsɛ kɛ nitsulɔi krokomɛi ni yeɔ mlai ni awo lɛ anɔ lɛ ahe yɛ gbɛ kpakpa nɔ.

Yɛ nakai gbɛ nɔ nɔŋŋ lɛ, Yehowa Nyɔŋmɔ toɔ etsui shi yɛ efɔŋfeemɔ ni yaa nɔ nɛɛ fɛɛ sɛɛ bɔni afee ni eha be ni fa ni akɛna naagbai komɛi anaa yɛ jalɛsaneyeli mli. Kɛfata he lɛ, etsuishitoo lɛ haa efɔŋfeelɔi lɛ naa hegbɛ ni amɛkɛaatsake amɛgbɛi koni amɛna naanɔ sɛɛnamɔi. No hewɔ lɛ, Biblia lɛ woɔ wɔ hewalɛ ni wɔmli akafu yɛ Nyɔŋmɔ tsuishitoo lɛ hewɔ. Shi moŋ, ekɛɔ akɛ: “Nyɛbua wɔ-Nuŋtsɔ lɛ tsuishitoo lɛ akɛ yiwalaheremɔ ni.”​—2 Petro 3:⁠15.

Nyɔŋmɔ Tsuishitoo lɛ he Nɔkwɛmɔ Nɔ

Yehowa Nyɔŋmɔ to etsu shi aahu dani Noa gbii lɛ amli Nu Afua kpeteŋkpele lɛ ba. No mli lɛ jeŋ ni yɔɔ yɛ nakai beaŋ lɛ eyi obɔ kɛ yiwalɛ ni amɛfeɔ efɔŋ babaoo diɛŋtsɛ. Wɔkaneɔ akɛ: “Ni Yehowa na akɛ gbɔmɛi anɔfɔŋ feemɔ fa yɛ shikpɔŋ lɛ nɔ, . . . Ni Yehowa kɛɛ: ‘Makpata gbɔmɔ ni mibɔ lɛ hiɛ kɛjɛ shikpɔŋ lɛ nɔ.’” (1 Mose 6:​5, 7) Hɛɛ, Yehowa yɛ nakai naagba ni ji yiwalɛ ni yaa nɔ yɛ nakai beaŋ lɛ he tsabaa kwraa yɛ ejwɛŋmɔ mli: gbɔmɛi fɔji lɛ ahiɛkpatamɔ. Shi etsuuu he nii amrɔ nɔŋŋ. Mɛni hewɔ efeee nakai lɛ?

Ejaakɛ jeee mɔ fɛɛ mɔ ji mɔ fɔŋ. Noa kɛ eweku lɛ ji jalɔi yɛ Nyɔŋmɔ hiɛ. No hewɔ lɛ Yehowa kɛ tsuishitoo mɛ yɛ amɛhewɔ, bɔni afee ni eha nɛkɛ jalɔi fioo nɛɛ ana be ni amɛkɛsaa amɛhe jogbaŋŋ kɛha yiwalaheremɔ. Kɛfata he lɛ, nakai be kakadaŋŋ ni ekɛmɛ lɛ ha Noa na hegbɛ ekɛfee “jalɛ shiɛlɔ,” ni eha nakai gbɔmɛi yiwalɔi lɛ na hegbɛ ni amɛkɛaatsake amɛshihilɛ. Biblia lɛ kɛɔ akɛ: “Nyɔŋmɔ ŋmɛ etsui shi ni emɛ amɛ aahu yɛ Noa gbii lɛ amli, beni afeɔ adeka kpeteŋkpele lɛ, nɔ mli ni ahere mɛi fioo, ni ji mɛi kpaanyɔ lɛ, asusumai ayiwala yɛ kɛtsɔ nu mli lɛ.”​—2 Petro 2:5; 1 Petro 3:⁠20.

Nɔ Hewɔ ni Nyɔŋmɔ Eto Etsui Shi Bianɛ Lɛ

Ŋmɛnɛ hu, shihilɛ lɛ tamɔ nakai nɔŋŋ. Je lɛŋ oyi obɔ kɛ yiwalɛ. Taakɛ eji yɛ Noa gbii lɛ amli lɛ, Nyɔŋmɔ ekojo je nɛɛ momo, ni, Biblia lɛ kɛɔ akɛ, “akɛ amɛ eto kɛyashi kojomɔ kɛ gbɔmɛi ni kwa Nyɔŋmɔ lɛ ahiɛkpamɔ gbi lɛ nɔ.” (2 Petro 3:⁠7) Kɛji no ba mli lɛ, afiteŋ shikpɔŋ lɛ kɛ ehewɔ kɔɔyɔɔ lɛ mli dɔŋŋ, anyɛŋ mɛi ni egbɔjɔ lɛ anɔ dɔŋŋ, aloo ni akɛ hewalɛ ni ayɔɔ aaatsu nii kɛ hiɛjoomɔ.

Belɛ, mɛni hewɔ mɔ ni Nyɔŋmɔ kpatako mɛi ni ekwa Nyɔŋmɔ lɛ ahiɛ kɛjɛ nakai beaŋ tɔŋŋ lɛ? Ejaakɛ saji komɛi yɛ ni esa akɛ ana naa kɛ saji ni he hiaa ni sa akɛ ato he gbɛjianɔ hu. Lɛlɛŋ, Yehowa miiya hiɛ kɛmiishɛ efɔŋfeemɔ he naagba lɛ he tsabaa ni kɔɔ nibii babaoo ahe, ni ebaahi shi kɛya naanɔ, kɛ adesai ni yɔɔ tsuii ni ja lɛ ayiwalaheremɔ kɛmiijɛ hela kɛ gbele nyɔŋyeli shishi lɛ hu.

Akɛni nɔ ni wɔtsɔɔ nɛɛ yɔɔ ejwɛŋmɔ mli hewɔ lɛ, Yehowa to eyiŋ akɛ ekɛ Yiwalaherelɔ ko ni kɛ kpɔmɔ nɔ aaaha yɛ wɔhe eshai lɛ ahewɔ lɛ baaha. Biblia lɛ wieɔ yɛ ehe akɛ: “Ejaakɛ nɛkɛ Nyɔŋmɔ sumɔɔ je lɛ, akɛ eŋɔ e-Bi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala.” (Yohane 3:16) Ehe afii akpei abɔ ni akɛsaa gbɛ kɛha Yesu koni eba ni ekɛ ewala abasha afɔle yɛ adesai ahewɔ. Yɛ nakai afi lɛ amli fɛɛ lɛ, Nyɔŋmɔ tee nɔ ekɛ suɔmɔ to etsui shi. Shi ani esaaa ni amɛɔ gbɛjianɔtoo ni tamɔ nɛkɛ?

Yesu kɛ kpɔmɔ nɔ lɛ ha yɛ adesai ahewɔ aaafee afii akpei enyɔ ni eho nɛ. Belɛ, mɛni hewɔ ni Nyɔŋmɔ yaa nɔ etoɔ etsui shi lolo lɛ? Yiŋtoo kome ji akɛ, Yesu gbele lɛ kɛ nitsɔɔmɔ he tafaa ko shishijee he okadi ko ha. Esa akɛ adesai ale nɛkɛ gbɛjianɔtoo ni suɔmɔ yɔɔ mli nɛɛ, koni aha amɛ hegbɛ ni amɛkɛkpɛlɛ nɔ aloo amɛkpoo. Enɛ baahe be, shi ebaafee be ni akɛtsu nii yɛ gbɛ kpakpa nɔ. Biblia lɛ kɛɔ akɛ: “Jeee tsɛ Nuŋtsɔ lɛ [Yehowa] haa eshiwoo lɛ sɛɛ tsɛɔ, taakɛ bɔ ni mɛi komɛi buɔ akɛ esɛɛ etsɛ lɛ, shi moŋ etsui shi etoɔ ehaa wɔ, ejaakɛ esumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.”​—2 Petro 3:⁠9.

Nɔyeli he Sane Lɛ

Sane kroko ni he hiaa lɛ hu baabi ni ana be. Ehe miihia ni ana adesai anɔyeli he naagba lɛ hu naa nyɔŋlo. Kɛjɛ shishijee mli lɛ, adesai hi Nyɔŋmɔ yeli shishi. Shi wɔ klɛŋklɛŋ fɔlɔi lɛ tsɔ amɛsɛɛ amɛha enɛ, yɛ Eden trom lɛ mli. Amɛhala akɛ amɛbaaye amɛ diɛŋtsɛ amɛhe nɔ kɛjɛ Nyɔŋmɔ shishi, ni amɛmiitao ni amɛye amɛ diɛŋtsɛ amɛhe nɔ. (1 Mose 3:​1-5) Shi kɛlɛ, eji anɔkwale akɛ, abɔɔɔ gbɔmɔ ni eye lɛ diɛŋtsɛ ehe nɔ. Gbalɔ Yeremia ŋma akɛ: “Yehowa, mile akɛ gbɔmɔ gbɛ bɛ lɛ diɛŋtsɛ edɛŋ, ni adesa ni nyiɛ nɛɛ, bɔ ni eeetsɔ ejaje enaji faamɔi eha lɛ, ebɛ edɛŋ.”​—Yeremia 10:​23; Abɛi 20:⁠24.

Shi yɛ fɛɛ sɛɛ lɛ, kɛjɛ be mli ni atee nɔyeli he sane lɛ shi kɛbaa nɛɛ fɛɛ lɛ, Yehowa kɛ tsuishitoo eha be koni akɛna sane lɛ naa. Lɛlɛŋ, ekɛ mlihilɛ eha afii akpei abɔ eho koni adesai kɛka nɔyeli fɛɛ nɔyeli ni amɛsusuɔ akɛ ehi lɛ amɛkwɛ. Mɛni ejɛ mli eba? Ebafee faŋŋ akɛ adesai anɔyeli ko bɛ ni baanyɛ ajie nɔnyɛɛ, jalɛsaneyeli ni bɛ, aloo nibii krokomɛi ni haaa mɛi ana miishɛɛ lɛ kɛjɛ jɛmɛ.

Lɛlɛŋ, yɛ adesai ayinɔsane nɛɛ hewɔ lɛ, ani mɔ ko baanyɛ ekɛ anɔkwayeli akɛɛ akɛ Nyɔŋmɔ yeee jalɛ sane akɛni ejie eyiŋtoo kpo akɛ ebaajie adesai anɔyelii lɛ fɛɛ kɛjɛ jɛmɛ ni ekɛ lɛ diɛŋtsɛ enɔ ato najiaŋ lɛ hewɔ? Eka shi faŋŋ akɛ dabi! Wɔkɛ miishɛɛ miikpa nɛkɛ Biblia gbalɛ nɛɛ mlibaa gbɛ: “Ni nɛkɛ maŋtsɛmɛi nɛɛ ayinɔ lɛ, Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi ni fiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.”​—Daniel 2:⁠44.

Nakai Maŋtsɛyeli lɛ nɔ ŋwɛi Maŋtsɛ lɛ ji Yesu ni atee lɛ shi lɛ. Esaamɔ kɛha nakai gbɛhe lɛ​—kɛ agbɛnɛ adesai ni baafee ehefatalɔi nɔyelɔi lɛ ahalamɔ​—ehe be saŋŋ. Ni Nyɔŋmɔ eto etsui shi aahu, yɛ nakai be lɛ mli fɛɛ.

Na Nyɔŋmɔ Tsuishitoo lɛ He Sɛɛ Bianɛ

Ŋmɛnɛ, gbɔmɛi aŋkroaŋkroi akpekpei abɔ ni jɛ shikpɔji fe 212 nɔ naa Nyɔŋmɔ tsuishitoo lɛ he sɛɛ. Amɛfee ekome yɛ suɔmɔ ni amɛyɔɔ akɛ amɛaabo Nyɔŋmɔ toi ni amɛsɔmɔ yɛ eŋwɛi nɔyeli lɛ hewɔ lɛ mli. Kɛji amɛkpe kutuu yɛ amɛ Maŋtsɛyeli Asai lɛ anɔ lɛ, amɛkaseɔ bɔ ni amɛaafee ni amɛkɛ Biblia shishitoo mlai lɛ atsu nii jogbaŋŋ yɛ amɛshihilɛ mli. Amɛkɛ amɛhe wooo je nɛŋ maŋkwramɔ saji ni kɛ mligbalamɔ baa lɛ amli, eyɛ mli akɛ amɛbaa amɛhe shi amɛhaa adesai anɔyelii lɛ, bei abɔ ni Nyɔŋmɔ kɛ tsuishitoo ŋmɛɔ gbɛ ni amɛhi shi lɛ.​—Mateo 22:​21; Romabii 13:​1-5.

Nɛkɛ ekomefeemɔ ni yɔɔ gbɔmɛi babaoo nɛɛ ateŋ lɛ buɔ Yehowa bem akɛ Mɔ pɛ ni baanyɛ ekɛ gbeekpamɔ aba gbɔmɛi ni jɛɔ amɛ diɛŋtsɛ amɛsuɔmɔ mli amɛkaseɔ bɔ ni amɛaafee amɛsumɔ lɛ, ni amɛsumɔɔ ni amɛsɔmɔ lɛ lɛ ateŋ. Ŋwanejee ko bɛ he akɛ okɛ nɛkɛ gbɔmɛi nɛɛ ekpe da, yɛ be mli ni amɛtsaa nitsumɔ ni Yesu diɛŋtsɛ je shishi, ni ji Nyɔŋmɔ Maŋtsɛyeli lɛ he sanekpakpa lɛ shiɛmɔ lɛ nɔ lɛ. Yesu gba efɔ shi yɛ nitsumɔ nɛɛ naagbee he ni ekɛɛ akɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.”​—Mateo 24:⁠14.

Esɛɛɛ Etsɛŋ Babaoo Dɔŋŋ!

Odaseyeli ni wɔnaa kɛ wɔhiŋmɛi lɛ maa nɔ mi akɛ eshwɛ fioo ni gbɛjianɔ ni Nyɔŋmɔ toɔ ni ejalɛ nɔyeli lɛ abahe shikpɔŋ lɛ nɔyeli kɛya naanɔ lɛ baaye emuu kwraa. Beni etsɔɔ nibii fɔji ni baajɛ adesai anɔyeli ni nine enyɛ shi lɛ mli aba, ni wɔna hu yɛ nɛkɛ afi oha nɛɛ mli lɛ sɛɛ lɛ, Yesu kɛɛ: “Nakai nɔŋŋ hu, beni nyɛaana akɛ nibii nɛɛ etsɔ naa shi lɛ, nyɛnaa nyɛlea akɛ Nyɔŋmɔ maŋtsɛyeli lɛ eshɛ eta.”​—Luka 21:​10, 11, 31.

Etsɛŋ ni Nyɔŋmɔ baajie mɛi fɔji lɛ kɛjɛ shikpɔŋ lɛ nɔ kwraa. Lalatsɛ lɛ wiemɔi lɛ baaba mli bɔ ni ewiemɔ lɛ ji lɛ diɛŋtsɛ: “Ejaakɛ efɔŋfeelɔi lɛ, aaafolɔ amɛ ashwie . . . Eshwɛ fioo kɛkɛ ni mɔ fɔŋ lɛ bɛ dɔŋŋ, ni kɛ okwɛ eshihilɛ he lɛ, ebɛ jɛi.” (Lala 37:​9, 10) Ani obaanyɛ ofee jeŋ ko ni efɔŋfeemɔ bɛ mli lɛ he mfoniri okwɛ? Namɔ baakwɛ adesai ashihilɛ nɔ yɛ nakai beaŋ? Biblia lɛ kɛɔ akɛ: “Naa, maŋtsɛ ko [Kristo Yesu ni akɛ lɛ eta maŋtsɛsɛi nɔ yɛ ŋwɛi lɛ] baaye maŋtsɛ yɛ jalɛ naa, ni lumɛi hu [emɛi anɔkwafoi ni ehala yɛ shikpɔŋ nɔ lɛ], baaye lumɛi yɛ kojomɔ naa. Ni nii ni jalɛ lɛ aaatsu ji hejɔlɛ, ni jalɛ lɛ mli sɛɛnamɔ ji hejɔɔmɔ kɛ toiŋjɔlɛ kɛaatee naanɔ; ni mimaŋ lɛ aaahi shi yɛ hejɔlɛ shia, kɛ shihilɛ he ni yɔɔ shweshweeshwe, kɛ hejɔɔmɔ he ni yɔɔ kpoo.”​—Yesaia 32:​1, 17, 18.

Yɛ nɛkɛ gbɛ nɔ lɛ, Nyɔŋmɔ ŋwɛi nɔyeli lɛ baasaa nibii fɔji ni jɛ adesai efɔŋfeemɔ lɛ mli ba lɛ fɛɛ ni ebaato mɛi ni kɛ amɛhiɛ fɔɔ E-nɔ lɛ ahe gbɛjianɔ ni efee amɛ adesai aweku ni gbeekpaamɔ yɔɔ amɛteŋ. Beni etsɔɔ nɛkɛ gbeekpamɔ nɛɛ mli lɛ, Biblia lɛ kɛɛ akɛ: “Ni klaŋ kɛ gwantɛŋ bi aaahi shi, ni kootsɛ kɛ abotia bi aaabu shi; tsina bi kɛ jata bi kɛ kooloo ni ewo fɔ fɛɛ aaahi hekome, ni gbekɛ bibioo aaakpala amɛ. . . . Amɛfeŋ efɔŋ ni amɛfiteŋ nii yɛ migɔŋ krɔŋkrɔŋ lɛ nɔ fɛɛ; ejaakɛ shikpɔŋ lɛ nɔ aaayi obɔ kɛ Yehowa he nilee lɛ, tamɔ bɔ ni nu ha ŋshɔ shishi lɛ.”​—Yesaia 11:​6-9.

Mɛɛ nii ni yɔɔ nyam jɛɔ Nyɔŋmɔ tsuishitoo lɛ mli baa nɛkɛ! No hewɔ lɛ, yɛ nɔ najiaŋ ni wɔɔwie wɔshi Nyɔŋmɔ akɛ emɛ be babaoo tsɔ lɛ, mɛni hewɔ oŋɔɔɔ hegbɛ ni etsuishitoo lɛ kɛhaa bo lɛ ni oba ohe shi oha e-Maŋtsɛyeli lɛ? Kasemɔ nɔ ni ji etɛi ni efolɔ eshwie shi lɛ kɛjɛ Biblia lɛ mli ni ohi shi yɛ naa pɛpɛɛpɛ. Okɛ mɛi krokomɛi ni kɛ gbeekpamɔ baa amɛhe shi amɛhaa lɛ lɛ abɔ. Ni no lɛ, naanɔ jɔɔmɔi baajɛ Nyɔŋmɔ tsuishitoo lɛ mli kɛbaha bo.