Sanebimɔi Ni Jɛ Kanelɔi Adɛŋ

Ani esa akɛ wɔmu sane naa kɛjɛ Mateo 11:11 akɛ Yesu le momo akɛ Yohane Baptisilɔ lɛ baatsɔ hiɛ agbo dani Yesu baagbo?

Hɛɛ, eka shi faŋŋ akɛ Yesu le akɛ Yohane ehiŋ wala mli koni ebatsɔ Kristofonyo ni afɔ lɛ mu, ejaakɛ Yesu wie akɛ: “Lɛlɛŋ, miikɛɛ nyɛ akɛ, Mɛi ni yei fɔ amɛ lɛ ateŋ mɔ ko eteko shi ni fe Yohane Baptisilɔ lɛ; tsɛbelɛ mɔ ni ji bibioo kwraa yɛ ŋwɛi Maŋtsɛyeli lɛ mli lɛ fe lɛ.”​—Mateo 11:⁠11.

Beni bɔfo Gabriel tswa Yohane fɔmɔ ni baa lɛ he adafi lɛ, egba fɔ shi akɛ Yohane kɛ “Elia mumɔ kɛ ehewalɛ . . . [baa]saa maŋ ni efee klalo eto Nuŋtsɔ lɛ [Yehowa].” Yohane baafee hiɛnyiɛlɔ, ebaasaa gbɔmɛi eha Yehowa Mesia lɛ. Shi nɔ ko nɔ ko bɛ nakai ŋwɛi sanejajemɔ lɛ mli ni tsɔɔ akɛ Yohane diɛŋtsɛ baafee Mesia ni baa lɛ kaselɔ, ni asaŋ nɔ ko bɛ mli ni tsɔɔ nakai yɛ gbalɛ wiemɔ ni Yohane tsɛ, Zakaria, kɛha lɛ mli.​—Luka 1:​17, 67-79.

No hewɔ lɛ, beni ebaptisi Yesu sɛɛ lɛ, Yohane tee nɔ eshiɛ ni ebaptisi, ekɛ ehe kpɛtɛ nitsumɔ ni akɛwo edɛŋ akɛ esaa gbɔmɛi lɛ he. Yohane le kɛtsɔ naakpɛɛ gbɛ ko nɔ akɛ Yesu kɛ mumɔ krɔŋkrɔŋ baptisimɔ baaha, shi Yohane etsɔɔɔ akɛ lɛ diɛŋtsɛ lɛ eeena mumɔ krɔŋkrɔŋ, koni ebaatsɔ Kristofonyo ni afɔ lɛ mu. (Mateo 3:11) Yohane yɔse hu akɛ enɔ baagbɔ, shi Yesu baaya nɔ afa.​—Yohane 3:​22-30.

Beni Yesu wie nɔ ni wɔkane yɛ Mateo 11:11 lɛ, no mli lɛ awo Yohane tsuŋ momo. Yesu ha ale kɛtsɔ hiɛ akɛ gbalɔ ni awo lɛ tsuŋ nɛɛ baa shi fe mɔ ni ji bibioo ni baasɔmɔ yɛ wɔsɛɛ be mli akɛ maŋtsɛ kɛ osɔfo yɛ ŋwɛi lɛ. Ni kɛlɛ, etamɔ nɔ ni Yesu le momo akɛ etsɛŋ ni Yohane baagbo, ebaashi shikpɔŋ nɔ shihilɛ lɛ mli dani abaagbele gbɛ “hee” ni kɛ mɔ yaa ŋwɛi wala mli lɛ naa. (Hebribii 10:​19, 20) Enɛ tsɔɔ akɛ Yohane ehiŋ shi kɛtekeŋ Pentekoste afi 33 Ŋ.B., beni Yesu kaselɔi lɛ amufɔɔ kɛ mumɔ je shishi lɛ. No hewɔ lɛ abaanyɛ aŋɔ Yesu wiemɔ ni yɔɔ Mateo 11:11 lɛ akɛ nɔ ni tsɔɔ akɛ ele akɛ Yohane eyaŋ ŋwɛi.