1914 Yinɔ Lɛ​—Mɛni Hewɔ Ehe Hiaa Lɛ?

“Mɛi ni kaneɔ wɔwoji lɛ le akɛ wɔkɛ afii babaoo ekpa Yinɔ nɛɛ gbɛ akɛ eeeba enaagbee kɛ haomɔ be ko ni yɔɔ gbeyei, ni wɔmiikpa gbɛ akɛ ebaafɛ trukaa kɛ hewalɛ kpele ko yɛ October, 1914 sɛɛ nɔŋŋ.”​—Eji The Watch Tower and Herald of Christ’s Presence, May 15, 1911 mli.

KƐJƐ 1879 mli tɔŋŋ ni wolo tɛtrɛɛ ni atsɛɔ lɛ yɛ nakai beaŋ akɛ The Watch Tower and Herald of Christ’s Presence (ni ale ŋmɛnɛ akɛ Buu-Mɔɔ Eetswa Yehowa Maŋtsɛyeli He Adafi) lɛ wie afi 1914 he shii abɔ akɛ afi pɔtɛɛ ko ni akadi lɛ yɛ Biblia gbalɛ mli. Beni afi lɛ bɛŋkɛɔ lɛ, akai mɛi ni kaneɔ wɔwoji lɛ akɛ amɛbaanyɛ amɛkpa “haomɔ be ko ni yɔɔ gbeyei” gbɛ.

Kristofoi, ni kɛ amaniɛbɔɔ nɛɛ damɔ “bei kpawo” lɛ kɛ “Jeŋmaji abe lɛ” ni atsi yɛ Biblia lɛ mli lɛ he shishinumɔ ni amɛyɔɔ lɛ nɔ lɛ, shiɛ nɛkɛ adafitswaa nɛɛ kɛtee he fɛɛ he.a Amɛnu nɛkɛ be nɛɛ shishi akɛ afii 2,520​—ni ejeɔ shishi kɛjɛɔ be mli ni abutu blema David maŋtsɛyeli lɛ yɛ Yerusalem lɛ nɔ ni ebaa naagbee yɛ October 1914.b​—Daniel 4:​16, 17; Luka 21:​24, King James Version.

Yɛ October 2, 1914 lɛ, Charles Taze Russell, ni nakai beaŋ lɛ eji Buu Mɔɔ Biblia kɛ Woji Bibii Asafo lɛ sɛinɔtalɔ lɛ kɛ ekaa jaje akɛ: “Jeŋmaji Abei lɛ eba naagbee; amɛmaŋtsɛmɛi lɛ eye amɛgbii lɛ amɛta.” Kwɛ bɔ ni ewiemɔi lɛ fee anɔkwale ha! Yɛ October 1914 lɛ, nifeemɔ ko ni adesai ahiŋmɛii enaaa ni ehehiamɔ hoso je lɛ ba mli yɛ ŋwɛi. Yesu Kristo, ni ji “David maŋtsɛsɛi lɛ” Gboshiniyelɔ ni baahi shi daa lɛ je enɔyeli akɛ adesai fɛɛ anɔ Maŋtsɛ lɛ shishi.​—Luka 1:​32, 33; Kpojiemɔ 11:⁠15.

‘Shi,’ ekolɛ obaabi akɛ, ‘kɛji Kristo bɔi nɔyeli yɛ 1914 lɛ, mɛni hewɔ shikpɔŋ nɔ shihilɛ fite moŋ kwraa lɛ?’ Ejaakɛ adesai ahenyɛlɔ Satan, ni anaaa lɛ lɛ yɛ shihilɛ mli lolo. Kɛbashi 1914 lɛ, Satan naa hegbɛ eyaa ŋwɛi. Nakai shihilɛ lɛ tsake kɛjɛ be mli ni ato Nyɔŋmɔ Maŋtsɛyeli lɛ ama shi yɛ 1914 lɛ. “Ta te shi yɛ ŋwɛi.” (Kpojiemɔ 12:⁠7) Aye Satan kɛ edaimonioi lɛ anɔ kunim ni ashɛrɛ amɛ ashwie shikpɔŋ lɛ nɔ, ni nibii ni jɛ mli lɛ bafee amanehulu kɛha adesai. Biblia lɛ gba fɔ shi akɛ: “Kpoo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ, ejaakɛ Abonsam lɛ ekpeleke shi kɛba nyɛŋɔɔ, egri naakpa, ni ele akɛ be fioo kɛkɛ eyɔɔ.”​—Kpojiemɔ 12:⁠12.

Yesu wie yɛ Ŋ.B klɛŋklɛŋ afii oha lɛ mli akɛ okadi ni akɛ hiŋmɛii baana baakadi ba ni eba akɛ shikpɔŋ lɛ nɔ Maŋtsɛ hee ni anaaa lɛ kɛ hiŋmɛii lɛ. No mli lɛ, abi lɛ akɛ: “Mɛni ji ba ni oba lɛ kɛ nibii agbɛjianɔtoo nɛɛ naagbee lɛ he okadi?” Mɛɛ hetoo eha? “Shi maŋ aaate shi awo maŋ, ni maŋtsɛyeli aaate shi awo maŋtsɛyeli; ni hɔmɔ kɛ tsɛŋemɔ helai kɛ shikpɔŋhosomɔi aaaba hei sɔrɔtoi fɛɛ. Shi enɛɛmɛi fɛɛ lɛ, kɔɔmɔi lɛ abɔimɔ ni.”​—Mateo 24:​3, 7, 8, New World Translation.

Taakɛ bɔ ni ekɛɛ lɛ, nɔ ni fata ta ni fɛ yɛ 1914 lɛ he kɛba ji niyenii hɔmɔ ni mli wa, ejaakɛ akpa nidumɔ kɛ niyenii namɔ he nitsumɔ yɛ nɔ ni fe afii ejwɛ mli. Ni “shikpɔŋhosomɔi [ni] aaaba hei sɔrɔtoi fee” lɛ hu? Yɛ afii nyɔŋma ni nyiɛ 1914 sɛɛ lɛ mli lɛ, shikpɔŋhosomɔi fe nyɔŋma ni kpata nii ahiɛ babaoo lɛ gbe gbɔmɛi fe 350,000. (Kwɛmɔ akrabatsa lɛ.) Lɛlɛŋ, 1914 yinɔ lɛ na “kɔɔmɔi lɛ abɔimɔ” lɛ diɛŋtsɛ. Ni kɛjɛ nakai beaŋ kɛbaa nɛɛ fɛɛ lɛ, kɔɔmɔi lɛ etee nɔ eba aahu kɛtsara nɔ yɛ gbɛi sɔrɔtoi anɔ, tamɔ adebɔɔ mli osharai, hɔmɔ, kɛ tai babaoo fe nine.

Shi yɛ fɛɛ sɛɛ lɛ, Nyɔŋmɔ Maŋtsɛyeli ni ato ama shi yɛ 1914 lɛ he adafitswaa lɛ ji sanekpakpa ejaakɛ nakai Maŋtsɛyeli lɛ baabaa shikpɔŋ lɛ yi kɛjɛ fitemɔ mli. Yɛ mɛɛ gbɛ nɔ? Ebaajie apasa kɛ osato jamɔi, kɛ nɔyelii ni ekpɔtɔ, kɛ hewalɛ fɔŋ ni Satan naa yɛ mɛi anɔ lɛ fɛɛ kɛya. (Daniel 2:​44; Romabii 16:​20; Kpojiemɔ 11:​18; 18:​4-8, 24) Kɛfata he lɛ, ekɛ jeŋ hee ko baaba, nɔ ni “jalɛ hiɔ mli lɛ.”​—2 Petro 3:⁠13.

Yɛ Jeŋ Ta I sɛɛ nɔŋŋ lɛ, Biblia Kaselɔi anɔkwafoi, taakɛ atsɛɔ Yehowa Odasefoi yɛ nakai beaŋ lɛ, bɔi hegbɛ ni amɛyɔɔ, ni kɔɔ ba ni Yesu eba akɛ Maŋtsɛ lɛ he okadi lɛ he lɛ fa kroko yɔsemɔ. Yesu Kristo gba efɔ shi akɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.”​—Mateo 24:⁠14.

Kɛjɛ shishijee nibii bibii lɛ amli yɛ 1919 kɛbaa nɛɛ, Yehowa Odasefoi etee nɔ amɛshiɛ “sanekpakpa nɛɛ” ni amɛkpaaa. Nɔ ni eje mli eba ji, aabua gbɔmɛi akpekpei abɔ ni jɛ shikpɔji fe 200 nɔ lɛ anaa bianɛ akɛ Nyɔŋmɔ Maŋtsɛyeli lɛ shishi bii. Ni mɛɛ jɔɔmɔi mɛɔ nɛkɛ eshishi bii nɛɛ nɛkɛ! Maŋtsɛyeli lɛ baaha tai, hɔmɔ, awuiyeli, kɛ nɔnyɛɛ fɛɛ sɛɛ afo. Ebaaye hela kɛ gbele tete po nɔ kunim!​—Lala 46:​10; 72:​7, 12-14, 16; Abɛi 2:​21, 22; Kpojiemɔ 21:​3, 4.

Maŋtsɛyeli shiɛmɔ lɛ baatsu eyiŋtoo he nii kɛmɔ shi dani 1914 yinɔ lɛ aho aya. Yesu gba efɔ shi akɛ: “Ejaakɛ no be lɛ mli lɛ amanehulu babaoo aaaba, ni anako nɔ da kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ. Ni kɛ afooo no gbii lɛ enɔ kpitioo lɛ, kulɛ ahereŋ heloo ko heloo ko yiwala; shi mɛi ni ahala lɛ ahewɔ lɛ aaafo no gbii lɛ anɔ kpitioo.”​—Mateo 24:​21, 22.

Kaatɔ̃ nakai tɔmɔ ni yinɔ ni tsɔ 1914 hiɛ lɛ tɔ̃ lɛ nɔŋŋ. Nibii eyaŋ nɔ tamɔ bɔ ni eji amrɔ nɛɛ be fɛɛ be. Tsakemɔi ni yɔɔ naakpɛɛ jwere wɔhiɛ. Shi gbɛkpamɔi ni yɔɔ naakpɛɛ yɛ kɛha mɛi ni feɔ amɛnii yɛ nilee mli lɛ.

No hewɔ lɛ, bo blema gbalɔ lɛ wiemɔi lɛ atoi: “Nyɛtaoa Yehowa sɛɛ gbɛ, nyɛ shikpɔŋ lɛ nɔ heshibalɔi fɛɛ . . . Nyɛtaoa jalɛ sɛɛ gbɛ, nyɛtaoa heshibaa sɛɛ gbɛ. Ekolɛ aaaŋɔ nyɛ atee yɛ Yehowa mlifu gbi lɛ nɔ!” (Zefania 2:⁠3) Mɛɛ gbɛ nɔ wɔɔtsɔ wɔtsu ŋaawoo nɛɛ he nii? Saji ni nyiɛ sɛɛ lɛ baaye abua ni wɔha nakai sanebimɔ lɛ hetoo.

[Shishigbɛ niŋmai]

[Akrabatsa ni yɔɔ baafa 7]

Shikpɔŋhosomɔi yɛ Afii Nyɔŋma ni Nyiɛ Sɛɛ Lɛ Mli

Gbi: He ni Eba: Egbe Mɛi:

January 13, 1915 Avezzano, Italy 32,600

January 21, 1917 Bali, Indonesia 15,000

February 13, 1918 Kwangtung Kpokpaa Nɔ, China 10,000

October 11, 1918 Puerto Rico (anaigbɛ)  116

January 3, 1920 Veracruz, Mexico  648

September 7, 1920 Reggio di Calabria, Italy 1,400

December 16, 1920 Ningsia Kpokpaa Nɔ, China 200,000

March 24, 1923 Szechwan Kpokpaa Nɔ, China 5,000

May 26, 1923 Iran (kooyi-bokagbɛ) 2,200

September 1, 1923 Tokyo-Yokohama, Japan 99,300

Ejɛ tao ni ji “Significant Earthquake of the World” ni afee yɛ Terra Non Firma wolo, ni James M. Gere Haresh C. Shah ŋma lɛ mli.