Miida Yehowa Shi Yɛ Eyelikɛbuamɔ Ni Sɛɛ Efooo Lɛ He

TAAKƐ SHARON GASKINS GBA

PARADEISO yɛ shikpɔŋ nɔ! Mina mihe ni miiya miiba yɛ jwɛifɔ lɛ nɔ, ni minyiɛ abɛii asɛɛ, ni mikɛ jata bii miihulu kɛ shwɛmɔ. Mina he miishɛɛ waa! Shi miyiŋ feɔ mi enyɔ-nyɔ yɛ he waa diɛŋtsɛ. Kwɛ bɔ ni mihiɛnɔkamɔ lɛ yagbeɔ naa kɛ nijiaŋwujee oya nɔŋŋ!

Ejaakɛ kɛji manyɛ makai jogbaŋŋ lɛ obubuafoi asɛi lɛ ji mihefatalɔ yɛ be fɛɛ mli. Kɛjɛ mifɔmɔ mli tɔ̃ɔ lɛ, aŋsɔ hela ni kumɔɔ mɔ lɛ eha gbekɛbiiashi miishɛɛ ni anaa lɛ mli bibioo fe fɛɛ lɛ po bɔ mi. Gbekɛbii krokomɛi yaa ni amɛbaa kɛ miishɛɛ yɛ shwɛmɔ nii kɛ baisiklei anɔ, shi mi lɛ mikome mita shi, minyɛɛɛ manyiɛ po. No hewɔ lɛ kɛ Awo kɛ mi jɛ hemɔkɛyeli tsalɔ kome ŋɔɔ kɛtee mɔ kroko ŋɔɔ lɛ, wɔkɛ hiamɔ kpaa naakpɛɛ tsamɔ gbɛ. Shi bei pii lɛ, etsiɔ mi yɛ shwiili lɛ mli ni wɔshiɔ jɛmɛ efolo kɛkɛ. Eji nijiaŋwujee kɛha mi lɛlɛŋ, kwɛ tsui-kuumɔ sane ni eji kɛhalɛ hu!

Akɛni wɔmiitao anɔkwa hiɛnɔkamɔ hewɔ lɛ, minyɛ kɛ Yehowa Odasefoi bɔi Biblia lɛ kasemɔ yɛ 1964 shishijee mli. No mli lɛ miye aaafee afii ekpaa kɛ fã.

Wɔna miishɛɛ waa akɛ wɔɔle akɛ paradeiso fɛfɛo ko ehi shikpɔŋ nɛɛ nɔ dã. Shi mɔbɔ sane ji akɛ, klɛŋklɛŋ gbɔmɔ, Adam, laaje nɛkɛ nibii nɛɛ fɛɛ, shi miisumɔ ni mabɛŋkɛ Yehowa Nyɔnmɔ kpaakpa tamɔ bɔ ni he ko ni ena lɛ. Te shihilɛ lɛ aaafee tɛŋŋ kɛji mɔ ko kɛ Nyɔŋmɔ yɛ wekukpaa krɛdɛɛ ko mli? Aloo kɛji oyɛ wala mli beni e-Bi lɛ nyiɛ shikpɔŋ lɛ nɔ? Miyiŋ susumɔi nɛɛ kɛ mi yaa wɔsɛɛ gbii amli beni Paradeiso baaba ekoŋŋ lɛ amli. Nakai migbekɛbiiashi beaŋ tɔ̃ɔ po lɛ, no mli lɛ eyɛ faŋŋ kɛha mi akɛ wɔna anɔkwale lɛ.

Awo kɛ weku lɛ bɔi Yehowa Odasefoi a-Maŋtsɛyeli Asa lɛ nɔ yaa. Amɛkpeei bibii kɛ kpeei wuji lɛ yɛ sɔrɔto kwraa yɛ nɔ ni wɔna yɛ sɔlemɔi lɛ amli lɛ ahe! Gbɔmɛi lɛ kɛ shihilɛ ni amɛyɔɔ mli lɛ sa mihenumɔi ahe waa.

Bɔ ni minyɛ aaafee ni ekɛ wɔ aya Maŋtsɛyeli Asa lɛ nɔ lɛ wa waa kɛha lɛ. Gbekɛbii bibii etɛ fata mihe, ni wɔbɛ kar hu. Kɛji eyɛ shika lɛ, wɔwoɔ taxi. Mikaiɔ bɔ ni minyɛ bɔ mɔdɛŋ waa Hɔgbaa ko lɛ jogbaŋŋ diɛŋtsɛ. No mli lɛ taxi kome po ejieee ehiɛ. Kɛkɛ ni, trukaa ni wɔkpaaa gbɛ, ni nuu ko ni hiɛ tsɔne wulu banina wɔ ni ehole wɔ. Hɛɛ, wɔkpe sɛɛ kɛtee kpee lɛ, shi wɔyashɛ jɛmɛ kɛ̃. Kwɛ bɔ ni wɔda Yehowa shi waa yɛ he!

Etsɛɛɛ, kɛkɛ ni wɔsuɔmɔ mumɔŋ nyɛmimɛi hii kɛ yei ni yɔɔ kar lɛ to naa ni amɛbɔi wɔ holemɔ kɛyaa kɛbaa daa otsi. Hewalɛ ni Awo wo wɔ akɛ wɔkafo kpeeiyaa mli kɔkɔɔkɔ, ja ekolɛ wɔbɛ hewalɛ kwraa lɛ ha bɔ ni ehe hiaa ni ‘wɔkakwa wɔhe naabuamɔ kutuu’ lɛ ka mijwɛŋmɔ ni edako kwraa yɛ nakai beaŋ lɛ mli. (Hebribii 10:​24, 25) Akɛni nɔ ni ekaseɔ lɛ tsirɛ lɛ hewɔ lɛ, minyɛ jɔɔ ewala nɔ eha Yehowa ni abaptisi lɛ yɛ 1965 mli.

No mli lɛ mida saŋŋ bɔ ni minyɛɔ minaa kpeei ahe hiɛsɔɔ jogbaŋŋ. No mli lɛ Europabii, mɛidiji, Hispanikbii, ni ji mɛi ni wieɔ Spanish kɛ Portuguebii awiemɔ lɛ fɛɛ efee ekome kɛmiija yɛ Cypress Hills Asafo ni yɔɔ Brooklyn, yɛ New York lɛ mli. Eja jogbaŋŋ kɛha mi akɛ gbɔmɛi ni sheɔ Nyɔŋmɔ gbeyei lɛ aaahi shi yɛ nɛkɛ gbɛ nɔ yɛ anɔkwa nyɛmifeemɔ mli.​—Lala 133:⁠1.

Minyɛ tsɔɔ mi bɔ ni misaa mihe kɛha kpeei. Enɛ jeee naagba ko kwraa yɛ mijwɛŋmɔ gbɛfaŋ, shi eji shihilɛ sɔrɔto ko kwraa, yɛ migbɔmɔtso gbɛfaŋ. Ansɔ hela ni kumɔɔ mɔ lɛ haa nɔ ko bibioo po feemɔ batsɔɔ nitsumɔ wulu. No mli lɛ ewa, ni eka he ewa lolo kɛha mi akɛ mafolɔ liamɔ trɔmɔɔ ni mikɛkadi hetooi yɛ wɔ Biblia kasemɔ he woji lɛ amli. Shi, beni mitee nɔ mifee aahu lɛ, miniiashishi folɔmɔ lɛ bahi saŋŋ.

Mijwɛŋmɔ eyi obɔ kɛ nibii ni miitao mawie. Shi kɛ amɛmiije kpo kɛmiijɛ midaaŋ lɛ, wiemɔi lɛ fɛɛ futuɔ. Ehe miihia ni magbɔjɔ mihe kwraa koni mifai amli akafee kpɛŋŋ. Ehe bahia hu ni mikɛ mijwɛŋmɔ ama wiemɔ fɛɛ wiemɔ tsɛmɔ jogbaŋŋ nɔ bɔ ni manyɛ. Kɛji mihetoo lɛ ejeee kpo jogbaŋŋ taakɛ bɔ ni kulɛ esa akɛ eje kpo, aloo mile akɛ nyɛmimɛi lɛ nuuu miwiemɔi lɛ ashishi lɛ, ehaa nijiaŋwujee faa babaoo yɛ mimli. Shi, ni amɛbale mi jogbaŋŋ lɛ, nyɛmimɛi hii kɛ yei ni yɔɔ asafo lɛ mli lɛ nuɔ miwiemɔi ashishi jogbaŋŋ agbɛnɛ. Shi kɛlɛ, gbii komɛi yɛ ni nibii hiɔ haa mi waa, ni bei komɛi hu ni nibii waa kɛhaa mi yɛ naagba nɛɛ he.

Nyɔji Ekpaa ni Hao Mi Waa

Beni miye afii kpaanyɔ lɛ, mina niiashikpamɔ ko nyɔji ekpaa sɔŋŋ ni sa mihe waa kɛbashi ŋmɛnɛ. Yɛ gbɔmɔtsoŋ, nitsumɔ, kɛ wiemɔ mli tsofafeemɔ ni akɛha mi momo lɛ fɛɛ sɛɛ lɛ, datrɛfoi lɛ kɛ mi tee helatsamɔ he ko ni akɛyeɔ abuaa mɛi yɛ West Haverstraw, yɛ New York. Mikɛ minyɛ fɛɛ tsui ekumɔ. Afii komɛi ni etsɔ hiɛ, beni datrɛfoi kɛ tɔmɔ wie akɛ mijwɛŋmɔŋ hewalɛ naa waaa lɛ, ekɛɛ amɛ akɛ eŋmɛŋ gbɛ ni atsi minaa yɛ jwɛŋmɔŋ helatsamɔ he. No hewɔ lɛ be kukuoo ni akɛaagbala mikɛ lɛ teŋ lɛ wa kɛha lɛ. Shi kɛlɛ, ena akɛ kɛji mahi shi akɛ mɔ ni kɛ ehe efɔɔɔ lɛ kɛ mitsɛ fɛɛ nɔ lɛ, no lɛ esa akɛ mana gbɔmɔtsoŋ hewalɛ jogbaŋŋ bɔ ni sa.

Helatsamɔ he lɛ yɛ fɛo, shi minu he tamɔ nɔ ni akpoo mi. Bɔ ni mifo babaoo kɛ mimlifu ni naa wa waa lɛ ha bɔ ni minuɔ jɛmɛ he mihaa lɛ je kpo faŋŋ. Mifɔlɔi nyɛɛɛ amɛfa gbɛ ŋmɛlɛtswai etɛ kɛ bɔs lɛ ni amɛbasara mi, titri lɛ akɛni Awo hiɛ ebi ni ji enumɔ lɛ musu lɛ hewɔ. Beni ebalɛ akɛ esa akɛ amɛya lɛ, egba minaa waa aahu akɛ datrɛfonyo lɛ kɛɛ amɛ akɛ amɛkabasara mi nɔtonɔto. Aha mitee shia shii enyɔ pɛ.

Tsofa-feelɔi lɛ tsɔɔ mi nyiɛmɔ kɛ nibii ni akɛbɛje mi kɛ tsei hu ni akɛ sumui etsotsoro he. Klɛŋklɛŋ lɛ, efee mi akɛ etsii tsɔ fe nine. Shi, etsiimɔ lɛ ye ebua mi ni eha minyɛ miŋmɛ pɛpɛɛpɛ, no hewɔ lɛ ehaaa magbee shi. Enɛ ji klɛŋklɛŋ nifeemɔ ni kɛ mi baayashɛ mi diɛŋtsɛ minyiɛmɔ ni nɔ ko ewajeee mi lɛ mli.

Niyenii kũu, atade naa bɔtun laa​—no ji, nɔ fɛɛ nɔ ni ehe hiaa ni akɛ waobii afee lɛ​—bawa waa kɛha mi, kɛ ejeee nɔ ni minyɛɛɛ mafee kwraa lɛ. Shi mi diɛŋtsɛ minyɛ mikase niyeli kɛ mihesaamɔ bɔ ni manyɛ. Enɛ ye ebua mi waa yɛ sɛɛ mli lɛ yɛ sɔɔmɔ ni mikɛhaa Nyɔŋmɔ lɛ mli.

Ni mitsɔsemɔ lɛ ba naagbee, ni wɔba shia ekoŋŋ. Awo ha mikɛ ŋaai heei ni atsɔɔ mi lɛ bɔi nitsumɔ amrɔ nɔŋŋ. Nakai feemɔ bafee henumɔŋ ta wulu diɛŋtsɛ, ejaakɛ eyɛ mli akɛ miisumɔ ni mafee mi diɛŋtsɛ minibii moŋ, shi efeemɔ yɛ nijiaŋwujee, ni eheɔ be babaoo, ni etɔɔ mi waa hu. No ji akɛ, mihesaamɔ kɛha kpeeiyaa feɔ ŋmɛlɛtswai enyɔ nitsumɔ!

Kɛ wɔje kpo kɛjɛ Maŋtsɛyeli Asa lɛ nɔ ni wɔfo gbɛjegbɛ lɛ mli lɛ, agbɛnɛ mi diɛŋtsɛ minyiɛɔ kɛyaa. Kunimyeli wulu diɛŋtsɛ!

Mishihilɛ Mli Miishɛɛ Be ni fe Fɛɛ

Minyɛ kwɛɔ akɛ weku lɛ naa mumɔŋ niyenii ni ŋmɛɔ pɛpɛɛpɛ be fɛɛ be. Ekɛ mi kaseɔ nii, ni ekpaa gbɛ akɛ makane wɔwoji lɛ eko fɛɛ eko, ni ji Buu-Mɔɔ kɛ Awake! lɛ. Agbɛnɛ hu esa akɛ wɔsaa wɔhe kɛha kpeei, ni wɔya hu. Eyɛ mli akɛ mijwɛŋmɔ kɛ mitsui kɛ miishɛɛ heɔ nilee nɛɛ moŋ, shi mitsi hiɛdɔɔ ni mikɛsusuɔ miwala nɔ jɔɔmɔ kɛha Yehowa kɛ ehe okadi feemɔ kɛtsɔ nu mli baptisimɔ nɔ lɛ mito sɛɛ kwraa. Awo ye ebua mi ni mina akɛ yɛ migbɔjɔmɔ lɛ fɛɛ sɛɛ lɛ, Nyɔŋmɔ baaha mi diɛŋtsɛ mabu mihe akɔntaa yɛ mumɔŋ. Minyɛŋ makpa gbɛ akɛ matsɔ lɛ emɔdɛŋbɔɔ nɔ mabote jeŋ hee lɛ mli, ni madamɔ lɛ enɔ kwraa kɛyabote mli.

Misumɔɔ Nyɔŋmɔ, shi mishihilɛ nɛɛ ha esoro mi kwraa yɛ mɛi krokomɛi ahe​—niiashikpamɔ ni yɔɔ dɔlɛ kɛha obalaŋta. Ewa akɛ makpɛlɛ migbɔjɔmɔi lɛ anɔ. Bei pii lɛ, mlifu yeɔ minɔ, ni esa akɛ maye enɛ nɔ dani abaptisi mi. (Galatabii 5: 19, 20) Ni kɛji minyɛɛɛ mahi shi yɛ mihenɔjɔɔmɔ kɛha Yehowa lɛ naa hu?

Minyɛ to gbɛjianɔ ni asafo lɛ mli onukpa ko kɛ mi bagba sane. Etsĩ sane ni gbalɔ Elia bi lsraelbii lɛ tã, akɛ: “Mɛɛ beyinɔ nɔŋŋ nyɛaadidãa yɛ saji enyɔ teŋ kɛyashi?” (1 Maŋtsɛmɛi 18:21) Eyɛ faŋŋ akɛ, Yehowa naaa miyiŋ ni mikpɛɛɛ lɛ he miishɛɛ.

Mihiɛ tsɛ̃ yɛ mumɔŋ ni mikɛ ekaa sɔle waa kɛha Yehowa yelikɛbuamɔ kɛha miyiŋ ni mikpɛɔ akɛ majɔɔ miwala nɔ maha lɛ lɛ. Nyɛmiyoo ko ni yɔɔ asafo lɛ mli kɛ mi kaseɔ nii. Miye lɛ onukpa, ni emami je mli mra beni eji gbekɛ bibioo kwraa. Shi yɛ fɛɛ sɛɛ lɛ, ejɔɔ ehe nɔ eha Nyɔŋmɔ beni eji gbekɛ bibioo, ni eefee Kristofoi anɔkwɛmɔ nɔ kpakpa.

Yɛ naagbee, beni miye afii 17 lɛ, mikpɛ miyiŋ agbɛnɛ. Miisumɔ ni masɔmɔ Yehowa bɔ ni minyɛmɔ baaŋmɛ gbɛ. August 9, 1974​—beni abaptisi mi lɛ​—ji gbi ni mina miishɛɛ fe fɛɛ yɛ mishihilɛ mli.

Miishɛɛ yɛ Sɔɔmɔ Nitsumɔ lɛ Mli

Mihe ni mikɛaawo sɔɔmɔ nitsumɔ lɛ mli lɛ kɛ gbɛtsii nii ni nɔ kwɔlɔ tamɔ gɔji ba. Kaa wulu fe fɛɛ ji bɔ ni mafee ni anu nɔ ni miwieɔ lɛ shishi. Miwieɔ jogbaŋŋ bɔ ni manyɛ. Kɛkɛ lɛ, be fɛɛ be ni ehe miihia lɛ, mihefatalɔ yɛ shiɛmɔ nitsumɔ lɛ mli lɛ etĩ miwiemɔi lɛ amli eha shiatsɛ lɛ. Mɛi komɛi wieɔ wiemɔi gbohii, ni amɛbuɔ mi akɛ mɔ ko ni Odasefoi kɛ mi miitsu nii kɛha amɛsɛɛnamɔ. Shi miyɛ hegbɛ akɛ mishiɛɔ, ni eji nɔ ni mishweɔ yɛ mitsuiŋ hu.

Nyiɛmɔ kɛmiijɛ shinaa kome naa kɛmiiya ekroko naa, yɛ shia kome mli po lɛ nyɛɔ ehaa etɔɔ mi bliboo. Shiai ni yɔɔ wɔshiɛmɔ shikpɔŋkuku lɛ mli lɛ babaoo yɛ atrakwei, no hewɔ lɛ ehaaa manyɛ mashɛ amɛŋɔɔ. Kɛ eshɛ fɛ̃i be lɛ, ais ni jwereɔ gbɛjegbɛi lɛ anɔ lɛ haaa manyɛ maya shia-kɛ-shia kwraa. (Bɔfoi lɛ Asaji 20:20) Shi, mimumɔŋ nyɛmimɛi lɛ eye amɛbua mi waa diɛŋtsɛ, ni amrɔ nɛɛ Yehowa ejɔɔ mi kɛ shwiili ni ataa mli ni tsɔne yɔɔ he, ni haa misɔɔmɔ nitsumɔ lɛ feɔ mlɛo kwraa.

Yɛ be ko sɛɛ lɛ, mibɔi odaseyeli kɛtsɔ woloŋmaa nɔ. Minine kɛ niŋmaa ehiŋ, ejaakɛ mɛi pii nyɛɛɛ amɛkane miwaonaa niŋmaa. No hewɔ lɛ taip ni kɛ sarawa hewalɛ tsuɔ nii lɛ bafee miwoloŋmalɔ. Mitswaa taip lɛ blɛoo kwraa yɛ minine naagba ni ehiii kwraa lɛ hewɔ. Mikɛ aaafee hiŋmɛitswaa kome kwɛɔ okadi ni mitaoɔ matswa lɛ aahu shi kɛ miyatswa lɛ, kɛkɛ lɛ mitswa ekroko kwraa moŋ. Enyɛɔ eheɔ mi fe ŋmɛlɛtswaa kome ni mikɛtswaa wolo baafa kome.

Yɛ hewalɛ ni mibɛ tsɔ lɛ fɛɛ sɛɛ lɛ, yɛ be kɛ bei amli lɛ, misɔmɔɔ akɛ gbɛgbalɔi awalɔ, ni mituɔ ŋmɛlɛtswai 60 loo nɔ ni fe nakai mihaa sɔɔmɔ nitsumɔ lɛ yɛ daa nyɔŋ nɔ. Enɛ biɔ gbɛjianɔtoo kpakpa, mɔdɛŋbɔɔ babaoo, kɛ minyɛmimɛi heyelilɔi lɛ asɛɛfimɔ daa gbi. Amɛ gbɛgbamɔ mumɔ lɛ woɔ mi hewalɛ. Awo hu efee nɔkwɛmɔ nɔ fɛfɛo efɔ shi kɛtsɔ sɔɔmɔ ni esɔmɔ akɛ daa gbɛgbalɔ loo gbɛgbalɔi awalɔ, beni ekɛ jaramɔ shihilɛi, gbɔmɔtsoŋ helai, kɛ kaa ni ji bii kpawo ni eetsɔse amɛ yɛ shia ni mli egbala yɛ jamɔ gbɛfaŋ lɛ miikpe lɛ nɔ.

Miihi Shi ni Mi Diɛŋtsɛ Makwɛ Mihe Nɔ

Beni miye afii 24 lɛ, mikpɛ miyiŋ akɛ mashi amɛ ni mi diɛŋtsɛ mahi shi. Fã ni mifã kɛtee Bensonhurst afã ni yɔɔ Brooklyn lɛ bafee jɔɔmɔ diɛŋtsɛ kɛha mi. Marlboro Asafo lɛ bafee tamɔ weku ko ni bɛŋkɛ ehe kpaakpa. Kwɛ bɔ ni ewaje mihemɔkɛyeli waa akɛ miyafata amɛhe! Yɛ kar sɔrɔtoi enyɔ loo etɛ pɛ ni yɔɔ asafo lɛ mli lɛ fɛɛ sɛɛ lɛ, mimumɔŋ nyɛmimɛi lɛ woɔ mi kɛyaa kpeei lɛ eko fɛɛ eko. Shi kɛlɛ, mihiii jɛmɛ be babaoo.

Bɔ ni minu he akɛ miyeee omanye hewɔ lɛ, miku misɛɛ kɛtee shia ni miyafata miweku lɛ he, ni mibote jwɛŋmɔŋ nɔnyɛɛ shihilɛ ko mli afii etɛ sɔŋŋ. Mlifu ni naa wa waa baa. Kɛkɛ ni mi diɛŋtsɛ mihe gbee susumɔi ba miyiŋ, ni mika shii abɔ hu akɛ matsu he nii. Gbele bafee gbɛkpamɔ ni yɔɔ gbeyei kɛha mi. Shi mibɔi mihe kɛ Nyɔŋmɔ kpasamɔ waa ekoŋŋ, ni miwo shi akɛ majie hiɛsɔɔ kpo yɛ enikeenii ni ji wala lɛ he. Miishɛjemɔ kɛ ŋaawoo jɛ onukpai lɛ aŋɔɔ kɛba. Enɛ, kɛ sɔlemɔ, teemɔŋ nikasemɔ, kɛ tsuishitoo ni miweku lɛ na amɛha mi, kɛ mɛi ni kwɛɔ wɔ lɛ ayelikɛbuamɔ jaje misusumɔ.

Yehowa kɛ mlihilɛ ha mina sɛɛyoomɔ yɛ nɛkɛ jwɛŋmɔŋ nɔnyɛɛ ni naa wa nɛɛ he kɛtsɔ Buu-Mɔɔ lɛ nɔ. Hɛɛ, esusuɔ ewebii ahe, ni enuɔ bɔ ni wɔnuɔ nii ahe wɔhaa lɛ shishi (1 Petro 5:​6, 7) Yɛ be ni sa mli lɛ, jwɛŋmɔŋ nɔnyɛɛ lɛ ba shi kwraa. Afii nyɔŋma sɛɛ lɛ, Yehowa yaa nɔ eyeɔ ebuaa mi lolo ni mikɛtsuɔ nijiaŋwujee kɛ jwɛŋmɔŋ nɔnyɛɛ he nii. Bei komɛi lɛ, bɔ ni minuɔ he mihaa akɛ sɛɛnamɔ ko bɛ mihe lɛ heɔ aye minɔ kwraa. Shi yɛ fɛɛ sɛɛ lɛ, sɔlemɔ, Biblia kasemɔ, kɛ mimumɔŋ weku ni yɔɔ miishɛɛ lɛ ji yelikɛbuamɔ nii ni bɛŋkɛ mi kpaakpa.

Beni miyatao he ko ni miyeee omanye sɛɛ lɛ, mikɛ shishashaomɔ kpɛ miyiŋ akɛ mikɛ miweku lɛ baahi shi miwala be ni eshwɛ lɛ fɛɛ. Kɛkɛ ni Yehowa ha misɔlemɔi ahetoo. Mina he ko yɛ Bedford-Stuyvesant fã lɛ yɛ Brooklyn. Beni 1984 latsaa be lɛ shɛɔ naagbee pɛ kɛkɛ ni mifã kɛtee jɛmɛ, ni jɛmɛ nɔŋŋ miyɔɔ kɛbashi ŋmɛnɛ.

Lafayette Asafo lɛ mlibii ni yɔɔ suɔmɔ lɛ kɛ mlihilɛ wóɔ mi kɛ tsɔne kɛyaa kpeei daa. Nɔ ni mikaiɔ waa lolo ji klɛŋklɛŋ Asafo Woloŋ Nikasemɔ ni mitee yɛ jɛmɛ lɛ. Afee yɛ ŋsɔɔdo ni ji ejwɛ lɛ nɔ​—ni tsɔne bɛ ni woɔ mɔ kɛyaa ŋwɛii. Yehowa yelikɛbuamɔ naa pɛ mikɛkwɔ kɛtee ni mikɛkpleke nakai atrakwei lɛ. Yɛ be ko sɛɛ lɛ, ana he kroko ni hi saŋŋ kɛha mi. Ni amrɔ nɛɛ Yehowa ejɔɔ mi kɛ hegbɛ akɛ afeɔ Asafo Woloŋ Nikasemɔ yɛ mishia lɛ mli tuuŋtu.

Gbɛgbamɔ mumɔ ni yɔɔ naakpɛɛ yɛ asafo nɛɛ mli fɛɛ. Beni miba lɛ, no mli lɛ ayɛ gbɛgbalɔi aaafee 30, ni amɛteŋ mɛi komɛi kwɛɔ mi yɛ gbɛi krɛdɛɛ nɔ. Ekaa ni yɔɔ asafo lɛ mli lɛ kanyaa mi ni mifeɔ gbɛgbalɔi awalɔ yɛ be kɛ bei amli

Yɛ April 1989 lɛ, Lafayette kɛ Pratt Asafoi lɛ ma Maŋtsɛyeli Asa yɛ nakai gbɛjegbɛ lɛ nɔ nɔŋŋ yɛ shia ni miyɔɔ mli lɛ masɛi. Ama yɛ ebe naa pɛpɛɛpɛ hu, ejaakɛ yɛ bɔ ni migbɔmɔtso gbɔjɔɔ waa lɛ hewɔ lɛ, nyiɛmɔ ebafee naagba kɛha mi ekoŋŋ. Shi, kɛtsɔ mishwiili ni tsɔne yɔɔ he lɛ kɛ minyɛmimɛi hii kɛ yei lɛ ayelikɛbuamɔ nɔ lɛ, kpeei yaa kɛ baa bafeɔ miishɛɛ kɛhaa mi. Kwɛ bɔ ni mihiɛ sɔɔ yelikɛbuamɔ ni misuɔlɔi nanemɛi heyelilɔi lɛ kɛhaa mi lɛ waa!

Miida Nyɔŋmɔ Shi yɛ Eyelikɛbuamɔ lɛ Hewɔ

Eyɛ mli akɛ minajiaŋ waaa moŋ, shi mitsui yɛ shiŋŋ. Woloŋlee kpakpa haa shihilɛ ŋɔɔ fioo ko, ni kɛlɛ Nyɔŋmɔ ewaje mi waa. Bei komɛi lɛ, mileee he ni mana niyenii yɛ maye, shi Yehowa eye ebua mi ni efee Nihalɔ anɔkwafo kɛha mi. Lɛlɛŋ, David wiemɔi nɛɛ kã mitsui nɔ waa, akɛ: “Sá lɛ gbekɛ ji mi ni agbɛnɛ mitsɔ nuumo, shi minako jalɔ ko ni akwa lɛ loo ni eseshibii miisisɛ̃ aboloo pɛŋ.”​—Lala 37:​23-25.

Yehowa eye ebua mi shii abɔ ni mihiɛ Ŋmalɛ naa shidaamɔ mli kɛtsɔ la ni miheee beni afeɔ mi opreshin lɛ nɔ. (Bɔfoi lɛ Asaji 15:​28, 29) Nyɛsɛɛ nɛɛ nɔŋŋ mitsɛ gbo. Mɔ ko ni bɛŋkɛ mi nɛkɛ ni milaaje lɛ lɛ wa waa diɛŋtsɛ kɛha mi. Hewalɛ ni jɛ Yehowa ŋɔɔ pɛ enyɛ egbala mi kɛtsɔ enɛ kɛ kaai krokomɛi amli.

Migbɔmɔtsoŋ hewalɛ nɔgbɔmɔ baaya nɔ moŋ, shi hekɛnɔfɔɔ ni miyɔɔ yɛ Yehowa mli kɛ wekukpaa ni kã mikɛ lɛ teŋ lɛ ji miwala kpaai. Kwɛ bɔ ni miyɔɔ miishɛɛ waa akɛ mifata Yehowa webii ahe, ni minaa eyelikɛbuamɔ ni sɛɛ efooo kɔkɔɔkɔ!