Amɛkɛ Musuŋtsɔlɛ Kwɛɔ Tooi Bibii Lɛ
YƐ SHIA kooloi fɛɛ ateŋ lɛ, eko kwraa bɛ ni tamɔ too. Kooloi pii yɛ hewalɛ kɛ henumɔ ko ni he hiaa kɛha niyenii taomɔ ni amɛnyɛ amɛtee amɛhe yɛ kooloi krokomɛi ni mɔmɔɔ amɛ lɛ ahe, shi tooi yɛ sɔrɔto. Kooloi krokomɛi nyɛɔ amɛmɔmɔɔ amɛ, ni amɛnyɛɛɛ amɛfã amɛhe. Kɛ tookwɛlɔ bɛ lɛ, tooi lɛ sheɔ gbeyei ni amɛnyɛɛɛ nɔ ko amɛfee kwraa. Kɛ ajie too ko kɛjɛ kuu lɛ he lɛ, etsɛɛɛ kɛkɛ lɛ elaaje. No hewɔ lɛ tooi ni anyɛɔ akudɔɔ amɛ lɛ yɛ nɔ ni amɛaadamɔ nɔ ni amɛkɛ amɛhe akpɛtɛ amɛ kwɛlɔ lɛ he. Kɛ tookwɛlɔ lɛ bɛ lɛ, amɛyi naŋ wala. Yɛ nɛkɛ sui nɛɛ ahewɔ lɛ, Biblia lɛ kɛ tooi tsuɔ nii yɛ okadi gbɛ nɔ ekɛtoɔ gbɔmɛi ni leee efɔŋ, ni afeɔ amɛ niseniianii, loo amɛnyɛɛɛ amɛfa amɛhe lɛ ahe.
Yɛ anɔkwale mli lɛ, tookwɛlɔi anyɔmɔwoo lɛ sa amɛ jogbaŋŋ. Eshihilɛ jeee nɔ ni yɔɔ mlɛo. Hulu shaa lɛ ni fɛi hu yeɔ lɛ, ni eshɛɔ be ni ewɔɔɔ gbɛkɛ. Esa akɛ ebu tooi lɛ ahe kɛjɛ kooloi ni mɔmɔɔ amɛ lɛ ahe, ni bei pii lɛ ewala bajeɔ oshara mli. Akɛni esa akɛ tookwɛlɔ lɛ aha tooi lɛ ahi he kome hewɔ lɛ, efiteɔ be babaoo ekɛtaoɔ tooi ni duɔ gbɛ loo amɛlaajeɔ lɛ. Esa akɛ ekwɛ nɔ ni he yeɔ kɛ nɔ ni epila lɛ. Esa akɛ etere tooi ni he waaa loo amɛgbɔjɔ lɛ. Esusuɔ niyenii kɛ nu ni fa ni eeena eha amɛ lɛ he be fɛɛ be. Ejeee nɔ ni efɔɔɔ kaa akɛ tookwɛlɔ lɛ aaawɔ ŋa nɔ gbɛkɛ koni ekɛbu tooi lɛ ahe. No hewɔ lɛ, tookwɛmɔ ji nitsumɔ ni wa, ni ebiɔ nuu ni yɔɔ ekãa, ni yɔɔ shiŋŋ, ni tsuɔ nii waa. Nɔ ni fe fɛɛ lɛ, esa akɛ efee mɔ ni jwɛŋɔ tooi ni akɛwo edɛŋ lɛ ahe diɛŋtsɛ.
Nyɔŋmɔ Asafoku lɛ Kwɛmɔ
Biblia lɛ kɛ Nyɔŋmɔ webii toɔ tooi ni amɛkudɔmɔ waaa he ni ekɛ mɛi ni kwɛɔ amɛ lɛ hu toɔ tookwɛlɔi ahe. Yehowa diɛŋtsɛ ji ‘wɔsusumai alɛlɔ kɛ nɔkwɛlɔ.’ (1 Petro 2:25) Yesu Kristo, “tookwɛlɔ kpakpa lɛ” tsɔɔ bɔ ni esumɔɔ akɛ akɛ musuŋtsɔlɛ akwɛ tooi lɛ beni ekɛɛ Petro akɛ: ‘Lɛɛ mitooi lɛ, kwɛmɔ mitooi lɛ, lɛɛ mitooi bibii lɛ.’ (Yohane 10:11; 21:15-17) Akɛ ‘Nyɔŋmɔ asafo lɛ nɔkwɛmɔ’ ewo nɔkwɛlɔi Kristofoi lɛ adɛŋ yɛ hiɛdɔɔ mli. (Bɔfoi lɛ Asaji 20:28) Ni amɛnitsumɔ akɛ mumɔŋ tookwɛlɔi lɛ biɔ hesaai ni tooi akwɛlɔ diɛŋtsɛ yɔɔ lɛ eko—ekãafeemɔ, nitsumɔ hekamɔ, mɔ ni yɔɔ nyɛmɔ, ni titri lɛ mɔ ni dɔɔ tooi lɛ ahe ni esusuɔ amɛhilɛ-kɛhamɔ he.
Yɛ Nyɔŋmɔ gbalɔ Ezekiel gbii lɛ amli lɛ, nɔkwɛlɔi ni ahala amɛ ní amɛkwɛ Yehowa webii ni yɔɔ Israel lɛ ahiamɔ nii anɔ lɛ ateŋ mɛi ni fa tsuuu amɛgbɛnaa nii lɛ ahe nii. Nyɔŋmɔ tooi lɛ na amanehulu babaoo, ni amɛteŋ mɛi pii shi anɔkwa jamɔ lɛ. (Ezekiel 34:1-10) Ŋmɛnɛ, Kristendom osɔfoi lɛ kɛ amɛhe tsɔɔ akɛ mɛi ni tsɛɔ amɛhe Kristofoi lɛ asafo lɛ anɔkwɛlɔi, shi mumɔŋ hela ni emɔ lɛ lɛ yeɔ odase akɛ osɔfoi lɛ tamɔ yiwalɔi shishiulɔi ni ku amɛhiɛ amɛshwie gbɔmɛi lɛ anɔ ni ye amɛhe nii yɛ be mli ni Yesu yɔɔ shikpɔŋ nɔ lɛ. Kristendom jamɔ mli hiɛnyiɛlɔi lɛ tamɔ “apaafonyo ni ejeee tooi lɛ akwɛlɔ.” (Yohane 10:12, 13) Amɛbɛ suɔmɔ ko, nyɛmɔ ko, loo hesaa ko akɛ amɛaanyɛ amɛkwɛ Nyɔŋmɔ asafoku lɛ nɔ.
Nɔkwɛlɔi ni Jwɛŋɔ Mɔ He Diɛŋtsɛ
Yesu to okadi ni yeɔ emuu efɔ shi eha mɛi fɛɛ ni baakwɛ Yehowa asafoku lɛ nɔ lɛ. Eyɛ suɔmɔ, mlihilɛ, musuŋtsɔlɛ, ni eyeɔ ebuaa ekaselɔi lɛ yɛ gbɛ fɛɛ gbɛ nɔ. Eŋɔ hegbɛ lɛ ekɛtao mɛi ni yelikɛbuamɔ he ehia amɛ lɛ. Eyɛ mli akɛ Yesu bɛ deka kwraa ni etɔɔ lɛ yɛ bei pii amli moŋ, shi eheɔ be ekɛboɔ amɛnaagbai atoi be fɛɛ be ni ewoɔ amɛ hewalɛ. Bɔ ni esumɔɔ akɛ ekɛ ewala aaaha yɛ amɛhewɔ lɛ ji suɔmɔ kpojiemɔ ni fe fɛɛ.—Yohane 15:13.
Ŋmɛnɛ, asafoku lɛ ahe gbɛnaa nii ni tamɔ nɛkɛ ka asafoŋ onukpai fɛɛ ni ahala amɛ, kɛ agbɛnɛ asafoŋ sɔɔlɔi lɛ anɔ. No hewɔ lɛ, heloo gbɛfaŋ nibii babaoo ní amɛbaanyɛ amɛna yɛ maŋ kroko nɔ lɛ tsɔɔɔ hii ni gbɛnaa nii jwere amɛnɔ nɛɛ ateŋ mɛi ni fa yiŋ koni amɛshi kɛya maŋ kroko nɔ ni amɛkɛ nakai feemɔ ashi asafoi lɛ ni yelikɛbuamɔ kɛ nɔkwɛmɔ kpakpa bɛ kɛha amɛ. Akɛni asafoku lɛ yɔɔ “jaramɔ bei ni mli wa” mli hewɔ lɛ, hewalɛwoo kɛ gbɛtsɔɔmɔ he ehia amɛ. (2 Timoteo 3:1-5, NW) Oshara yɛ be fɛɛ be akɛ amɛteŋ mɛi komɛi baagbee Satan, ni “nyiɛ tamɔ jata ni huuɔ, eetao mɔ ni eeemi” lɛ tsɔne mli. (1 Petro 5:8) Amrɔ nɛɛ ji be ni he hiaa fe fɛɛ akɛ nɔkwɛlɔi Kristofoi lɛ ‘wieɔ tsɔɔ mɛi ni bɛ gbɛjianɔ lɛ, amɛshɛjeɔ mɛi ni tsui faa lɛ amii, ni amɛhereɔ mɛi ni feɔ gbedee lɛ.’ (1 Tesalonikabii 5:14) Kɛ amɛaanyɛ amɛtsi mɛi ni bɛ shiŋŋ lɛ anaa koni amɛkakpalaŋ kɛmiijɛ asafoku lɛ he lɛ, belɛ ehe miihia ni amɛhiɛ ahi amɛhe nɔ be fɛɛ be.—1 Timoteo 4:1.
Te nɔkwɛlɔ loo tookwɛlɔ lɛ aaafee tɛŋŋ ale kɛ yelikɛbuamɔ he miihia too ko lɛ? Okadii ni jeɔ kpo faŋŋ lɛ ateŋ ekome ji Kristofoi akpeei ni ebaaa, shiɛmɔ nitsumɔ lɛ ni ekɛ ehe wooo mli daa nyɔŋ nɔ, kɛ su ni ena akɛ ekɛ mɛi krokomɛi ebɔŋ gbagbalii. Abaanyɛ ayoo gbɔjɔmɔi lɛ hu kɛtsɔ tooi lɛ asubaŋ kɛ nii ni amɛgbaa he sane lɛ anɔ. Ekolɛ amɛwieɔ mɛi krokomɛi ahe nyanyaanya, ekolɛ nomɛi tsɔɔ nibii komɛi ni amɛsumɔɔɔ. Amɛgbaa heloo gbɛfaŋ nibii asɛɛdii he saji babaoo fe mumɔŋ otii. Miishɛɛ kɛ jwɛŋmɔ kpakpa ní amɛbɛ baatsɔɔ akɛ amɛhemɔkɛyeli egbɔjɔ. Hiɛ mɔbɔmɔbɔ-feemɔ baanyɛ afee okadi ni tsɔɔ akɛ wekumɛi ni teɔ shi woɔ amɛ loo je lɛŋ nanemɛi miinyɛ amɛnɔ. Kɛ nɔkwɛlɔi lɛ na nɛkɛ okadii nɛɛ pɛ lɛ amɛbaatsu he nii amrɔ nɔŋŋ ni amɛkɛle nɔ̃ yelikɛbuamɔ ni he hiaa.
Kɛ aaya ayasara naanyo heyelilɔ ko ni aye abua lɛ lɛ, esa akɛ nɔkwɛlɔi Kristofoi lɛ aha oti ni ma amɛhiɛ lɛ ahi amɛjwɛŋmɔ mli. Ejeee naanyobɔɔ saramɔ kɛkɛ koni ayagba nibii ni he ehiaaa lɛ ahe sane. Oti ni ma bɔfo Paulo hiɛ yɛ be mli ni esaraa enyɛmimɛi lɛ ji ni ‘ekɛ mumɔŋ nikeenii ko aha amɛ koni no aha amɛfi shi shiŋŋ koni amɛkɛwowoo amɛhe hewalɛ.’ (Romabii 1:11, 12) Kɛ aaanyɛ atsu enɛ lɛ, belɛ hesaamɔ ni atsɔɔ hiɛ afeɔ he miihia.
Klɛŋklɛŋ lɛ, susumɔ mɔ lɛ he, ni obɔ mɔdɛŋ ole bɔ ni emumɔŋ shihilɛ yɔɔ ha. Kɛ ona ole enɛ lɛ, agbɛnɛ susumɔ nɔ̃ gbɛtsɔɔmɔ, hewalɛwoo, loo ŋaawoo ni he baaba sɛɛnamɔ babaoo aha lɛ lɛ he. Esa akɛ Nyɔŋmɔ Wiemɔ, ni ji Biblia lɛ afee saji ni okɛ lɛ baagba lɛ jɛɛhe titri, ejaakɛ “eyɛ hewalɛ.” (Hebribii 4:12) Abaanyɛ akwɛ Buu-Mɔɔ lɛ kɛ Awake! woji tɛtrɛbii lɛ amli kɛha saji ni tsuɔ tooi ni kɛ naagbai krɛdɛɛi komɛi kpeɔ lɛ ahiamɔ nii pɔtɛɛ lɛ ahe nii. Abaanyɛ ana odaseyeli mli niiashikpamɔi ni yɔɔ miishɛɛ ni shɛjeɔ mɔ mii yɛ Yearbook of Jehovah’s Witnesses lɛ mli. Oti lɛ ji ni akɛ mumɔŋ nɔ ko ni ‘hi ni baatswa gbɔmɔ lɛ ama shi yɛ mumɔŋ’ aha.—Romabii 15:2.
Saramɔ kɛ Kwɛmɔ ni Tswaa Mɔ Maa Shi
Tooi diɛŋtsɛ akwɛlɔ lɛ le akɛ amɛkɛ amɛhiɛ fɔɔ enɔ kɛha hebuu kɛ kwɛmɔ. Oshara ni baa amɛnɔ titri ji gbɛduu, hela, tɔlɛ, pilamɔ, kɛ kooloi ni mɔmɔɔ amɛ. Nakai nɔŋŋ hu esa akɛ mumɔŋ tookwɛlɔ lɛ ayoo ni etsu osharai ni tamɔ nakai ni woɔ asafoku lɛ hilɛ-kɛhamɔ he gbeyei lɛ he nii. Nɔ ni nyiɛ sɛɛ nɛɛ ji naagbai komɛi ni baa daa kɛ ŋaawoi fioo ko yɛ nɔ ni abaanyɛ awie ni kɛ saji ni tswaa mɔ maa shi yɛ mumɔŋ haa.
(1) Taakɛ tooi ni hiɛ bɛ amɛhe nɔ ji lɛ, Kristofoi komɛi duɔ gbɛ kɛjɛɔ Nyɔŋmɔ asafoku lɛ he ejaakɛ hiɛtserɛjiemɔi komɛi ni ŋɔɔ ni tamɔ nɔ ni nɔ fɔŋ ko bɛ he lakaa amɛ. Enɛ baagbala amɛjwɛŋmɔ ni amɛbaakpalaŋ kɛya po akɛni amɛmiidi otii komɛi ni kɔɔ ninámɔ, hiɛtserɛjiemɔ, loo miishɛɛnamɔ he lɛ sɛɛ hewɔ. (Hebribii 2:1) Abaanyɛ akai aŋkroaŋkroi ni tamɔ nɛkɛ akɛ be lɛ miibi oyaiyeli, ní ehe miihia ni amɛkɛ amɛhe akpɛtɛ Yehowa gbɛjianɔtoo lɛ he gbagbalii, kɛ bɔ ni ehe hiaa ni amɛkɛ Maŋtsɛyeli lɛ he nibii aye klɛŋklɛŋ gbɛhe yɛ amɛshihilɛ mli. (Mateo 6:25-33; Luka 21:84-36; 1 Timoteo 6:8-10) Anaa ŋaawoo ni he hiaa yɛ wiemɔ ‘Nyɛhiɛa Pɛpɛɛpɛ ni Nyɛŋmɛɔ lɛ Mli —Yɛ Mɛɛ Gbɛ Nɔ?’ ni je kpo yɛ May 15, 1984 The Watchtower lɛ baafai 8-11 lɛ mli.
(2) Ehe miihia ni tookwɛlɔ lɛ kɛ tsamɔ ni sa aha too ni he bayeɔ lɛ. Nakai esa akɛ mumɔŋ tookwɛlɔi lɛ aye abua Kristofoi ni he bayeɔ yɛ mumɔŋ yɛ nibii komɛi ni gbaa amɛnaa yɛ amɛshihilɛ mli hewɔ lɛ. (Yakobo 5:14, 15) Ekolɛ amɛbɛ nitsumɔ, hela ko miigba amɛnaa waa, loo amɛkɛ naagbai miikpe yɛ amɛweku shihilɛ mli. Mumɔŋ niyenii loo Nyɔŋmɔ webii ni amɛkɛ amɛ aaabɔ lɛ baŋ amɛtsine. Nɔ ni jɛɔ enɛ mli baa hu ji amɛhe ni amɛtsiɔ kɛjɛɔ asafo lɛ he kɛ amɛnijiaŋ ni jeɔ wui. Ehe miihia ni aha amɛnu shishi akɛ Yehowa kwɛɔ amɛnɔ ni ebaawaje amɛ kɛtsɔ bei ni mli wawai lɛ amli. (Lala 55:23; Mateo 18:12-14; 2 Korintobii 4:16-18; 1 Petro 1:6, 7; 5:6, 7) Ebaaye ebua hu akɛ akɛ amɛ aaati sane, ‘Nyɛkwɛa Nyɛhiɛ Tɛɛ akɛ Kristofoi,’ ni anaa yɛ June 1, 1980 Watchtower lɛ baafai 12-15 lɛ mli.
(3) Esa akɛ tookwɛlɔ lɛ akwɛ akɛ eeena tooi komɛi ni etɔ amɛ lo. Amɛteŋ mɛi pii eŋmɛ amɛtsui shi yɛ Yehowa sɔɔmɔ mli yɛ anɔkwayeli mli afii pii. Amɛpele kɛtsɔ kaai sɔrɔtoi pii amli. Agbɛnɛ aana okadii ni tsɔɔ akɛ eetɔ amɛ yɛ ekpakpafeemɔ mli ni ekolɛ amɛyiŋ baafee amɛ kɔshikɔshi po yɛ bɔ ni shiɛmɔ nitsumɔ lɛ he hiaa babaoo lɛ he. Ehe miihia ni atee amɛmiishɛɛ shi ekoŋŋ, akanya amɛhiɛsɔɔ kɛha miishɛɛ kɛ jɔɔmɔi ni jɛɔ tsui muu fɛɛ mli sɔɔmɔ ni akɛhaa Yehowa yɛ Yesu Kristo kasemɔ mli lɛ mli. (Galatabii 6:9, 10; Hebribii 12:1-3) Ekolɛ abaanyɛ aye abua amɛ ni amɛna akɛ Yehowa hiɛ sɔɔ amɛ anɔkwa sɔɔmɔ lɛ ni ebaanyɛ ewo amɛ hewalɛ kɛha wɔsɛɛ be nitsumɔi kɛha eyijiemɔ. (Yesaia 40:29, 80; Hebribii 6:10-12) Kɛ akɛ amɛ susu September 1, 1988 Buu-Mɔɔ lɛ mli sane ni ji “Kaaha Ekpakpafeemɔ Miitɔ Bo” ni yɔɔ baafai 7-12 lɛ he lɛ, ehe baaba sɛɛnamɔ aha amɛ.
(4) Taakɛ tooi ni pilaa lɛ ji lɛ, subaŋi komɛi ni Kristofoi komɛi naa akɛ ehiii lɛ eye amɛ awuí. Ni kɛlɛ, kɛ wɔkɛ sane keɔ mɛi krokomɛi lɛ, wɔ-ŋwɛi Tsɛ lɛ kɛ eshaifaa ni he hiaa lɛ baaha wɔ. (Kolosebii 3:12-14; 1 Petro 4:8) Ekolɛ akɛ kãmɔ loo tsɔsemɔ ko ha nyɛmimɛi hii loo yei komɛi ni amɛnuɔ he akɛ ejaaa. Shi, mumɔŋ ŋaawoo kɛ tsɔsemɔ he baanyɛ aba sɛɛnamɔ aha wɔ fɛɛ, ni eji miishɛɛ sane akɛ wɔɔle akɛ Yehowa tsɔseɔ mɛi ni esumɔɔ amɛ lɛ. (Hebribii 12:4-11) Akɛni akɛ sɔɔmɔ hegbɛi ni amɛnuɔ he akɛ amɛsa kɛha no lɛ hako amɛ hewɔ lɛ, mɛi ni tamɔ nakai lɛ eha mlifu egbála amɛ kɛ asafo lɛ teŋ. Shi kɛ wɔgbala wɔhe shi kɛjɛ Yehowa gbɛjianɔtoo lɛ he lɛ, he ko he ko kwraa bɛ ni wɔɔya kɛha yiwalaheremɔ kɛ anɔkwa miishɛɛnamɔ (Okɛto Yohane 6:66-69 he.) Abaana saji ni yeɔ buaa ni kɔɔ enɛɛmɛi ahe lɛ yɛ August 15, 1988, Watchtower lɛ baafai 28-30.
(5) Esa akɛ abu tooi ahe kɛjɛ kooloi ni kpataa amɛhiɛ lɛ he. Kɛ akɛaato he lɛ, mɛi komɛi yɛ ni amɛwekumɛi kɛ nanemɛi nitsulɔi ni heee yeee baate shi awo amɛ ni amɛgba amɛnaa. Emuuyeli mli ni amɛhiɛ lɛ baaba tutuamɔ shishi beni anyɛɔ amɛnɔ koni amɛfo sɔɔmɔ ni amɛkɛhaa Nyɔŋmɔ lɛ nɔ loo amɛkpa Kristofoi asɔɔmɔ nitsumɔ lɛ mli ni amɛkɛ amɛhe woɔ lɛ. Shi kɛ aye abua amɛ ni amɛyoo akɛ abaakpa shitee-kɛ-woo gbɛ ni ákɛ eji odaseyelii ni tsɔɔ akɛ Yesu Kristo anɔkwa kaselɔi lɛ ji wɔ lɛ, ewoɔ amɛ hewalɛ waa. (Mateo 5:11, 12; 10:32-39; 24:9; 2 Timoteo 3:12) Eeefee sɛɛnamɔ kɛha amɛ akɛ oootsɔɔ amɛ akɛ kɛ amɛye anɔkwa lɛ, Yehowa shiŋ amɛ kɔkɔɔkɔ ni ebaawo amɛ tsuishiŋmɛɛ lɛ he nyɔmɔ. (2 Korintobii 4:7-9; Yakobo 1:2-4, 12; 1 Petro 5:8-10) Nikasemɔ ni ji ‘Tsuishiŋmɛɛ yɛ Miishɛɛ Mli yɛ Yiwaa Fɛɛ Sɛɛ’ ni yɔɔ April 15, 1982 Watchtower lɛ baafai 21-7 lɛ kɛ hewalɛwoo kroko haa.
Nɔkwɛlɔi—Nyɛtsua Nyɛ Gbɛnaa Nii Ahe Nii
Nyɔŋmɔ asafoku lɛ hiamɔ nii fa, ni amɛ nɔkwɛmɔ jogbaŋŋ ji nitsumɔ ni wa. No hewɔ lɛ esa akɛ nɔkwɛlɔi Kristofoi lɛ afee mɛi ni yɔɔ musuŋtsɔlɛ, ní susuɔ amɛhe diɛŋtsɛ, ni yɔɔ amɛ yelikɛbuamɔ he miishɛɛ. Tsuishitoo kɛ sɛɛyoomɔ he miihia. Yɛ be mli ní ŋaawoo kɛ kɔkɔbɔɔ he hiaa aŋkroaŋkroi komɛi lɛ, hewalɛwoo he baa sɛɛnamɔ babaoo kɛhaa mɛi krokomɛi. Ekolɛ saramɔi fioo ko baahi yɛ bei komɛi amli, yɛ be mli ni yɛ mɛi krokomɛi agbɛfaŋ lɛ, daa Biblia kasemɔ he baahia. Yɛ fɛɛ mli lɛ, shishijee oti lɛ ji ni akɛ mumɔŋ gbɛtsɔɔmɔ ni tswaa mɔ maa shi loo ŋaawoo ni suɔmɔ yɔɔ mli ni baakanya mɔ lɛ ni eto nikasemɔ sui kpakpai ahe gbɛjianɔ, etsɔ loo efee mɔ ni yaa asafoŋ kpeei daa, ni ekɛ ehe awo Kristofoi asɔɔmɔ nitsumɔ lɛ mli be fɛɛ be yɛ miishɛɛ mli aha. Enɛɛmɛi ji gbɛi titrii ni atsɔɔ nɔ ayeɔ abuaa nanemɛi heyelilɔi koni awa amɛ ni amɛgbele gbɛ koni Yehowa mumɔ krɔŋkrɔŋ lɛ atsɔ nɔ ni nɔ ko etsiii lɛ gbɛ.
Nɔkwɛlɔi ni kɛ sɛɛfimɔ ni tamɔ nɛkɛ haa lɛ tsuɔ nitsumɔ ni sɛɛnamɔ yɔɔ he waa amɛhaa Nyɔŋmɔ asafoku lɛ. (Kwɛmɔ June 1, 1986 Buu-Mɔɔ lɛ baafai 26-30.) Asafoku lɛ hiɛ sɔɔ nɔ ni mumɔŋ tookwɛlɔi lɛ feɔ lɛ waa. Yɛ be mli ni weku yitso ko nine eshɛ yelikɛbuamɔ ni tamɔ nɛkɛ nɔ lɛ, ekɛɛ: ‘Beni wɔhi anɔkwale lɛ mli afii 22 sɛɛ lɛ, ninamɔ gbala wɔ kɛtee je lɛ mli. Wɔsumɔɔ shii abɔ ni kulɛ wɔya asafoŋ kpeei, shi wɔnyɛɛɛ wɔfee nakai. Wɔsaaa Satan gbɛjianɔtoo lɛ kwraa, no hewɔ lɛ wɔfee mɛi ni etse amɛhe banee kwraa. Enɛ ha wɔnijiaŋ je wui ni wɔhao. Hewalɛwoo wiemɔi ahe miihia wɔ. Beni onukpa ko basara wɔ lɛ, wɔkɛ miishɛɛ kpɛlɛ Biblia kasemɔ he gbɛjianɔtoo yɛ wɔshia lɛ mli lɛ nɔ. Amrɔ nɛɛ wɔ fɛɛ wɔku wɔsɛɛ wɔba Yehowa gbɛjianɔtoo ni yɔɔ shweshweeshwe lɛ mli ekoŋŋ. Minyɛŋ matsɔɔ bɔ ni minuɔ miishɛɛ he mihaa lɛ mli!’
Kɛ akanya wɔnyɛmimɛi hii kɛ yei ni laajeɔ loo amɛnijiaŋ jeɔ wui lɛ yɛ mumɔŋ ekoŋŋ lɛ, ehaa wɔmli filiɔ wɔ babaoo. (Luka 15:4-7) Yehowa yiŋtoo kɛha ewebii lɛ baa mli kɛ amɛfee ekome “tamɔ tooi ni yɔɔ tsu mli” lɛ. (Mika 2:12) ‘Amɛnaa hejɔɔmɔ amɛhaa amɛsusumai’ yɛ he ni yɔɔ shweshweeshwe nɛɛ yɛ Tookwɛlɔ Kpakpa, Yesu Kristo yelikɛbuamɔ naa. (Mateo 11:28-30) Je muu fɛɛ asafoku ni efee ekome lɛ nine shɛɔ gbɛtsɔɔmɔ, miishɛjemɔ, kɛ hebuu kɛ mumɔŋ niyenii babaoo nɔ.
Ŋmɛnɛ, yɛ nɛkɛ nɔkwɛmɔ nitsumɔ nɛɛ hewɔ lɛ, Yehowa miiha aatsu suɔmɔ nitsumɔ ko ni kɛ eblema shiwoo nɛɛ kpaa gbee: “Mi diɛŋtsɛ madi mitooi lɛ asɛɛ, ni matao amɛ sɛɛgbɛ . . . majie amɛ kɛaajɛ he fɛɛ he ni amɛgbɛ amɛshwa kɛtee . . . Lɛɛhe kpakpa malɛ amɛ yɛ . . . Nɔ ni elaaje lɛ matao; . . . Nɔ ni epila lɛ, mafi maha lɛ, helatsɛ lɛ, mawaje lɛ.” (Ezekiel 34:11-16) Mɛɛ miishɛɛ ji enɛ akɛ wɔɔle akɛ Yehowa ji wɔ-Kwɛlɔ!—Lala 23:1-4.
Yɛ ŋwɛi gbɛjianɔtoi kɛha Nyɔŋmɔ asafoku lɛ kwɛmɔ hewɔ lɛ, akɛ Yehowa tsuji lɛ, wɔbaanyɛ wɔna henumɔ ni David, ni wie nɛkɛ wiemɔi nɛɛ na lɛ nɔŋŋ eko: “Hejɔlɛ mli kwraa po ni maka shi mawɔ yɛ; ejaakɛ bo, Yehowa, okome ohaa mihiɔ shi shweshweeshwe.” (Lala 4:9) Hɛɛ, Yehowa webii nuɔ he akɛ amɛyɛ shweshweeshwe yɛ esuɔmɔ kwɛmɔ mli ni amɛdaa shi akɛ Kristofoi onukpai kɛ musuŋtsɔlɛ kwɛɔ tooi bibii lɛ.
[He ni Mfoniri ni yɔɔ baafa 20, 21 lɛ Jɛ]
Potter’s Complete Bible Encyclopedia