Maŋtsɛyeli Jajelɔi Bɔ Amaniɛ

“Ajɔɔ Gbɔmɔ ni Naa Nilee”

NƐKƐ abɛbua nɛɛ eba mli anɔkwale yɛ Korea, he ni amrɔ nɛɛ Yehowa Odasefoi ni fa fe 71,000 yɔɔ jɛmɛ lɛ. (Abɛi 3:13) Ni feemɔ he mfoniri okwɛ, nakai sɔɔlɔi lɛ amli oha mlijaa 42 yɛ be-fɛɛ sɔɔmɔ lɛ mli! Niiashikpamɔi ni nyiɛ sɛɛ lɛ baatsɔɔ akɛ miishɛɛ ji mɛi ni taoɔ anɔkwa nilee sɛɛ gbɛ lɛ anɔ.

Yoo ko ni jɛ Pusan lɛ etee Kristendom sɔlemɔi lɛ ekome afii 16 sɔŋŋ. Ena nifeemɔi babaoo ni damɔɔɔ ŋmalɛ nɔ lɛ aahu akɛ ebɔi susumɔ akɛ eeenyɛ efee akɛ Nyɔŋmɔ ko bɛ. Shi yɛ gbɛ kroko nɔ lɛ, enyɛɛɛ ekɛɛ hu akɛ Nyɔŋmɔ bɛ, no hewɔ lɛ ekɛ anɔkwayeli sɔle eha Nyɔŋmɔ koni ena anɔkwa sɔlemɔ lɛ, kɛ́ nɔ ko tamɔ nakai yɛ. Yɛ biɛ nɛɛ lɛ, esusu Yehowa Odasefoi ahe amrɔ nɔŋŋ, ni ekai akɛ esɔlemɔ lɛ egbe amɛhe guɔ aahu ni ebɔ sɔlemɔyalɔi lɛ kɔkɔ yɛ amɛhewɔ ejaakɛ Odasefoi lɛ heee Triniti, hɛl la, kɛ Kristendom tsɔɔmɔi krokomɛi lɛ amɛyeee. Ani ekolɛ amɛ ji anɔkwa sɔlemɔ lɛ? Kɛtsɔ enaanyo ko yelikɛbuamɔ nɔ lɛ, enyɛ ena he ni Maŋtsɛyeli Asa lɛ yɔɔ. Enɔ jetsɛremɔ nɔŋŋ lɛ, etee kpee.

Bɔ ni ato kpee lɛ he gbɛjianɔ jogbaŋŋ aha lɛ fee lɛ naakpɛɛ. Enuuu bolɔmɔi shɛii aloo lala kɛ henumɔi ni mli wa taakɛ afeɔ yɛ esɔlemɔ lɛ mli lɛ. Akɛ lɛ tsɔɔ Odasefonyo ko ni ena he miishɛɛ akɛ ekɛ lɛ baakase Biblia lɛ, ni klɛŋklɛŋ nikasemɔ lɛ ye ŋmɛlɛtswai babaoo yɛ esanebimɔi pii lɛ ahewɔ. Yɛ nikasemɔ ni ji enyɔ lɛ mli lɛ, ewie akɛ ebaashi esɔlemɔ lɛ kwraa koni ebatsɔ Odasefonyo. Ekɛɛ nyɛmiyoo lɛ akɛ ehe ehiaaa ni ekɛ lɛ akase nii dɔŋŋ, ejaakɛ ebaanyɛ eba kpeei lɛ kɛkɛ. Shi, atsɔɔ lɛ sɛɛnamɔ ni yɔɔ lɛ diɛŋtsɛ e-Biblia mli nikasemɔ ni akɛ lɛ aaafee lɛ he, kɛfata kpeei ni eeeya lɛ hu he. Ekpɛlɛ ŋaawoo lɛ nɔ, ni etee nɔ waa yɛ enikasemɔ lɛ mli, ni yɛ be ni sa mli lɛ abaptisi lɛ.

Amrɔ nɛɛ ena miishɛɛ waa akɛ ena anɔkwa Nyɔŋmɔ Yehowa he nilee, ni eyɛ hiɛnɔkamɔ akɛ ebaahi shi kɛya naanɔ yɛ Nyɔŋmɔ jeŋ hee lɛ mli.

Asraafonyo Nukpa ni Eba Hejɔɔmɔ Kase Anɔkwale Lɛ

Abaptisi asraafonyo nukpa ko ŋa yɛ 1962 mli. Klɛŋklɛŋ lɛ, ewu te shi ewo lɛ waa, shi sɛɛ mli Iɛ, ekpa shitee-kɛ-woo lɛ, ni afii 28 ni nyiɛ sɛɛ lɛ fɛɛ lɛ, nyɛmimɛi sɔrɔtoi abɔ kɛ lɛ kaseɔ nii aahu, kɛkɛ lɛ efo mli fioo, ni amɛmiibɔ mɔdɛŋ ni amɛtee emiishɛɛ shi yɛ anɔkwale lɛ he. Etee asafoŋ kpeei kɛ kpokpai wuji anɔ kpeei komɛi, shi eji mɛi ni tsiɔ amɛhe naa, ni amɛsumɔɔɔ ni amɛkɛ hiɛdɔɔ susuɔ anɔkwale lɛ he lɛ ateŋ mɔ ko. Yɛ 1990 mli lɛ, ekɛ eŋa tee Japan, ni amɛtee kpokpaa wulu nɔ kpee ko yɛ jɛmɛ. Yɛ kpee nɛɛ shishi lɛ, ebo wiemɔi ni aha lɛ atoi jogbaŋŋ​—nɔ ko ni efeko da. Wiemɔ ni akɛ ekaa wie kɛkpa apasa jamɔ he mama lɛ ha ehe jɔ̃ ehe waa, shi kɛlɛ wiemɔi nɛɛ gbele ehiŋmɛii ni ena Kristendom osatofeemɔ lɛ jogbaŋŋ. Bɔ ni ato Nyɔŋmɔ webii ahe gbɛjianɔ jogbaŋŋ aha yɛ Japan ni amɛhe tse hu lɛ fee lɛ fɛo waa, ni nakai pɛpɛɛpɛ enaa amɛ ehaa yɛ Korea hu. Beni eku esɛɛ kɛba Korea lɛ, ekɛ hiɛdɔɔ bɔi Biblia lɛ kasemɔ, ni yɛ naagbee lɛ abaptisi lɛ.

No hewɔ lɛ, yɛ ebaptisimɔ lɛ sɛɛ lɛ, mɛni esa akɛ efee? Eŋmɛɛ egbɛhe akɛ gbɔi atoohe ni ehe gbɛi waa lɛ nɔkwɛlɔ lɛ he ni eyafata eŋa he yɛ be-fɛɛ gbɛgbamɔ nitsumɔ lɛ mli. Enuɔ he akɛ daa gbɛgbalɔ ni eeefee lɛ ji gbɛ ni hi fe tɛɛ ni eeetsɔ nɔ eto afii 28 ni ekɛtsi ehe naa aahu lɛ najiaŋ jogbaŋŋ.

Amrɔ nɛɛ eyoo akɛ abɛbua ni kɛɔ akɛ ‘ajɔɔ gbɔmɔ ni naa nilee” lɛ kɔɔ lɛ hu ehe!