Yehowa Odasefoi ni Yɔɔ Jeŋ Fɛɛ—The Philippine Republic

ŊSHƆKPƆI 7,083 ni nugbɔ nɛɔ jɛmɛ ni hulu tsoɔ yɛ nɔ waa ni etsɔ shihilɛ ni mli wawai amli ni feɔ Republic of the Philippines lɛ gɔji komɛi ni tsara nɔ tamɔ kɔsɔŋkɔsɔ ni fã emii lɛ yiteŋ gbɛ nɔ̃.a Ni Philippines bii 62,000,000 lɛ sumɔɔ ni amɛwie sane fɛɛ sane he. Nɔ ni jɛɔ nɛkɛ naanyobɔɔ su nɛɛ mli baa ji shikpɔŋ ni woɔ yibii kɛha Maŋtsɛyeli lɛ he odaseyeli.

Odase ni Ayeɔ yɛ Skul

Obalayoo ko ni yaa high skul yɛ Masbate ŋshɔkpɔ lɛ nɔ lɛ nyɛ eye etsɔɔlɔ kɛ klasbii lɛ odase yɛ kaa ko ni ahaa hetoo akɛ anɔkwale loo amale mli. Ebɔ amaniɛ akɛ:

“Sane lɛ ji, ‘Kɛ Nyɔŋmɔ sumɔɔ mi lɛ, ekɛ naagbai baŋ minɔ loo ni eeeha mapiŋ.’ Beni wɔtsɔɔlɔ lɛ kwɛ wɔ kaa woji lɛ amli lɛ, ena akɛ miklasbii lɛ fɛɛ ha sanebimɔ lɛ hetoo akɛ, hɛɛ, ja mi. Mitsɔɔlɔ lɛ ŋmɛ mi gbɛ koni mitsɔɔ nɔ hewɔ ni miha hetoo akɛ, amale, lɛ mitsɔɔ klasbii lɛ. Mitsɔɔ mli akɛ jeee Nyɔŋmɔ ji mɔ ni kɛ haomɔi baa wɔnɔ, eyɛ mli akɛ eŋmɛɔ piŋmɔi agbɛ ni eŋmɛɔ gbɛ koni aka wɔ akwɛ. Mikɛ mi-Biblia ni mikɛyaa skul daa lɛ tsɔɔ wiemɔi ni yɔɔ 1 Yohane 4:8, ‘Nyɔŋmɔ lɛ, suɔmɔ ji lɛ’ lɛ mli. Beni mitsɔɔ mli migbe naa lɛ, mitsɔɔlɔ lɛ he eye loo eyiŋ tsɔ, etswa ekpɔlɔ lɛ nɔ ni ekɛɛ: ‘Marilou hetoo lɛ ja.’ Mi pɛ ji mɔ ni na sanebimɔ lɛ hetoo ni ja, ni minine shɛ mak ni fa fe fɛɛ nɔ.”

Maŋtsɛyeli Shɛɛ Sane lɛ Yɛ He Fɛɛ He

Yɛ be mli ni daa gbɛgbalɔ (be-fɛɛ sanekpakpa jajelɔ) ko kɛ ehe woɔ shia kɛ shia sɔɔmɔ lɛ mli yɛ Philippines maŋ lɛ fa ko mli lɛ, ekɛ gbekɛbii bibii etɛ komɛi anyɛ kpe. Yoo lɛ na Maŋtsɛyeli shɛɛ sane lɛ he miishɛɛ waa, ni enɛ ha efee mlɛo akɛ akɛ lɛ aaaje Biblia kasemɔ shishi. Eyɛ mli akɛ eŋɔɔɔ ewu lɛ naa akɛ eekase Biblia lɛ, titri lɛ kɛmiijɛ Yehowa Odasefoi aŋɔɔ moŋ, shi kɛlɛ nikasemɔ lɛ tee nɔ.

Nuu lɛ kɛ eweku lɛ fa kɛtee maŋ kroko nɔ, ni esusumɔ ji enɛ baaha Odasefoi lɛ ni eŋa kɛ amɛ bɔɔ lɛ aba naagbee. Shi etsɛɛɛ ni amɛyana nɛkɛ yoo nɛɛ ni eje e-Biblia kasemɔ lɛ shishi. Enɛ gba ewu lɛ naa waa. Ekɛ emli ni efu lɛ tee nitsumɔ, ni eyajie emlifu lɛ kpo eshwie mɔ ni esaa etsɔne ehaa lɛ lɛ nɔ. Nuu ni asaa etsɔne nɛɛ leee akɛ mɔ ni asaa etsɔne nɛɛ ji Yehowa Odasefoi lɛ ateŋ mɔ ko.

Odasefonyo nɛɛ tsɔɔ mli akɛ eeefee nɔ ni sɛɛnamɔ aaaba he aha eweku muu lɛ fɛɛ kɛ eŋa lɛ tee nɔ ekase Biblia lɛ. Ebaaje shishi ni ekɛ Biblia mli shishitoo mlai atsu nii yɛ eshia lɛ mli diɛŋtsɛ. Awo ŋaa hu akɛ eeefee sɛɛnamɔ kɛha wu lɛ kɛ ekase Nyɔŋmɔ Maŋtsɛyeli lɛ he nii.

Mɛni jɛ nɛkɛ sanegbaa nɛɛ mli ba? Nuu lɛ ŋa lɛ na hegbɛ babaoo ekɛkase Biblia lɛ, kɛkɛ ni nuu lɛ kpɛ eyiŋ akɛ ebaaha eweku lɛ aku amɛsɛɛ kɛya amɛ tsutsu shia lɛ mli. Yoo lɛ shwere yɛ mumɔŋ oyayaayai yɛ jɛmɛ ni ebatsɔ Maŋtsɛyeli shiɛlɔ ni abaptisiko lɛ. Ewu lɛ hu kpɛlɛ shia Biblia mli nikasemɔ nɔ, kɛkɛ ni weku muu lɛ fɛɛ je Kristofoi akpeei ni amɛaaya lɛ shishi.

[Shishigbɛ niŋmai]

[Akrabatsa ni yɔɔ baafa 8]

MAŊ LƐ HE SANE

1993 Sɔɔmɔ Afi

YIFALƐ NI FE FƐƐ NI YAA SHIƐMƆ: 116,576

EMLIJAA: Odasefonyo 1 kɛha: 549

MƐI Ni BA KAIMƆ LƐ: 357,388

GBƐGBALƆI AMLIJAA: 22,705

BIBLIA KASEMƆI AMLIJAA: 94,370

MƐI Ni ABAPTISI: 7,559

ASAFOI SƆRƆTOI AYIBƆ: 3,332

NITSUMƆ He NINE: MANILA

[Mfoniri ni yɔɔ baafa 9]

Odase ni ayeɔ yɛ nihɔɔmɔ hei woɔ yibii kpakpai

[Mfoniri ni yɔɔ baafa 9]

Buu-Mɔɔ Asafo lɛ nitsumɔ he nine ni yɔɔ Manila