Ani Okɛ Sane Keɔ?

BILL kɛ ebiyoo Lisa ni eye afii 16 lɛ nyɛɛɛ ahi shi yɛ toiŋjɔlɛ mli. Etsɛɛɛ ni saji bibii ni amɛkpaaa gbee yɛ he lɛ tsɔɔ bolɔmɔi ni naa wa. Yɛ naagbee lɛ, bei lɛ yashɛ he ni akɛɛ Lisa akɛ eshi shia lɛ mli ni eya.a

Yɛ be ko sɛɛ lɛ, Lisa bayoo akɛ etɔ̃, ni eyatao etsɛ lɛ dɛŋ eshaifaa. Shi ni eeeku ehiɛ eshwie Lisa tsutsu tɔmɔi lɛ anɔ moŋ lɛ, etsɛ ni sane edɔ lɛ lɛ kpoo mɔdɛŋ ni ebiyoo lɛ bɔ koni toiŋjɔlɛ aba amɛteŋ lɛ. Mɛɛ naakpɛɛ sane nɛ! Esumɔɔɔ ni enaa lɛ diɛŋtsɛ ebiyoo mɔbɔ!

Afii ohai abɔ ni eho nɛ lɛ, abu nuu ko ni nɔ fɔŋ ko bɛ ehe lɛ gbele fɔ yɛ efɔŋ ko ni efeko lɛ he. Odasefoi baye amale odase, ni maŋkwramɔŋ onukpai je gbɛ amɛku amɛhiɛ amɛshwie jalɛ saneyeli nɔ. Nakai nuu ni efɔŋ ko bɛ ehe lɛ ji Yesu Kristo. Beni eshwɛ be fioo ni ebaagbo lɛ, ekɛɛ Nyɔŋmɔ yɛ sɔlemɔ mli akɛ: “Ataa, ŋɔɔ fa amɛ; shi amɛleee nɔ ni amɛfeɔ.”—Luka 23:34.

Yesu jɛ etsui mli ekɛke amɛ yaka, ni awo ekaselɔi lɛ hewalɛ ni amɛkase lɛ yɛ enɛ mli. (Efesobii 4:32) Shi mɛi pii yɛ ni tamɔ Bill ni amɛsumɔɔɔ ni amɛjɛɔ amɛtsui mli amɛkɛkeɔ. Nɛgbɛ ji he ni anaa bo yɛ? Ani oosumɔ ni okɛ mɛi ni feɔ esha amɛshiɔ bo lɛ ahe eshai ake amɛ? Ni eshai ni hiɛdɔɔ yɔɔ mli lɛ hu? Ani esa ákɛ akɛ enɛɛmɛi hu ake?

Eshaifaa Biɔ Hiɛmiamɔ

Jeee be fɛɛ be eshai ni akɛfaa loo akɛkeɔ lɛ yɔɔ mlɛo. Ni yɛ nɛkɛ jaramɔ bei nɛɛ amli lɛ, adesai ateŋ wekukpaa bafeɔ naagba babaoo. Bei pii lɛ shihilɛ bafeɔ nɔ ni nɔnyɛɛi kɛ naagbai babaoo yɔɔ mli kɛha weku lɛ. Kristofonyo bɔfo Paulo wie yɛ jeeŋmɔ akɛ shihilɛi ni tamɔ nɛkɛ baahi shi yɛ “naagbee gbii lɛ” amli. Ekɛɛ: “Gbɔmɛi aaatsɔmɔ hesuɔlɔi, shikasuɔlɔi, shwalɔi, hewolɔi, . . . mɛi ni sumɔɔɔ ekpakpa, sɛɛgbɛtsɔɔlɔi, yiwalɔi, henɔwolɔi.”—2 Timoteo 3:1-4.

Belɛ, wɔ fɛɛ wɔkɛ nɔnyɛɛi ni jɛ je lɛŋ ni kaa wɔnyɛmɔ ni aaaha wɔkɛ sane ake lɛ kpeɔ ni wɔnyɛŋ wɔjo enɛ naa foi. Nɔ ni fata he lɛ, wɔkɛ wɔmligbɛ hewalɛi hu shiɔ mple. Paulo ye awerɛho akɛ: “Ekpakpa ni misumɔɔ lɛ, mifeee; shi efɔŋ ni misumɔɔɔ lɛ, no moŋ mifeɔ. Shi kɛ nɔ ni misumɔɔɔ lɛ kɛ̃ mifeɔ lɛ, belɛ jeee mi mitsuɔ no dɔŋŋ, shi moŋ esha ni yɔɔ mimli lɛ tsuɔ.” (Romabii 7:19, 20) Yɛ enɛ hewɔ lɛ, wɔteŋ mɛi pii kɛ sane ekeee taakɛ wɔsumɔɔ ni wɔfee lɛ. Fɛɛ sɛɛ lɛ, emuu ni ayeee kɛ esha ni ana kɛjɛ fɔmɔ mli lɛ naa wɔ fɛɛ nɔ hewalɛ waa, ni yɛ bei komɛi amli lɛ ehaaa wɔna musuŋtsɔlɛ wɔha nanemɛi adesai.

Beni awo yoo ko hewalɛ ni ekɛ efɔŋ fioo ko ni afee lɛ lɛ ake lɛ, eha hetoo akɛ: “Mɔ ko mɔ ko bɛ ni sa mɔdɛŋ ni abɔɔ koni akɛ eshai ake lɛ lɛ.” Kɛ akwɛ hetoo lɛ yɛ hiɛaŋhiɛaŋ lɛ, etsɔɔ bɔ ni anuuu nii ahe ahaaa mɔ, mɛi ahe jwɛŋmɔ fɔŋ ni ayɔɔ. Shi kɛ wɔkwɛ sane lɛ mli kɛtee shɔŋŋ lɛ, ejieɔ nijiaŋwujee ni mɛi pii nuɔ he beni amɛkɛ je ni amɛbuɔ akɛ eji pɛsɛmkunya, ni susuuu mɔ he, ni nyɛɔ mɔ kpeɔ lɛ. Nuu ko kɛɛ akɛ: “Kɛ okɛ sane ke lɛ, atsɔɔ nɔ ashishiuɔ bo. Abuɔ bo tamɔ mamashwɛ ni anaanaa nɔ.”

Belɛ ebɛ naakpɛɛ akɛ eshaifaa su ni aaana lɛ wa nakai yɛ nɛkɛ naagbee gbii nɛɛ amli lɛ. Ni kɛlɛ, Biblia lɛ woɔ wɔ hewalɛ koni wɔjɛ mlihilɛ mli wɔkɛ sane ake. (Okɛto 2 Korintobii 2:7 he.) Mɛni hewɔ esa akɛ wɔkɛ sane ake?

[Shishigbɛ niŋmai]