Maŋtsɛyeli Jajelɔi Bɔ Amaniɛ

“Tsu Sanekpakpa Jajelɔ Nitsumɔ Lɛ”

MƐNI sanekpakpa jajelɔ ni mɔ ko aaaji lɛ tsɔɔ? Wiemɔ lɛ ji Hela wiemɔ eu·ag·ge·li·stesʹ shishitsɔɔmɔ, ni ekɛ wiemɔ eu·ag·geʹli·on, ni shishinumɔ ji “sanekpakpa” lɛ yɛ tsakpaa ni bɛŋkɛ kpaakpa. No hewɔ lɛ, sanekpakpa jajelɔ ji sanekpakpa shiɛlɔ, loo tsulɔ.

Sanekpakpa jajelɔi ji anɔkwa Kristofoi fɛɛ, ejaakɛ amɛjajeɔ Nyɔŋmɔ Maŋtsɛyeli lɛ he sanekpakpa lɛ amɛtsɔɔ. Bɔfo Paulo wo Timoteo ŋaa yɛ gbɛ ni sa nɔ akɛ “[e]tsu sanekpakpa jajelɔ nitsumɔ lɛ.” Esa akɛ Timoteo atsu sane nɛɛ he nii kɛ hiɛdɔɔ. Paulo wo lɛ hewalɛ ni ‘ehiɛ akã shi yɛ nii fɛɛ mli,’ koni ‘egbe esɔɔmɔ lɛ naa kwraa.’—2 Timoteo 4:5.

Akɛ sanekpakpa jajelɔi lɛ, wɔ hu wɔtsuɔ wɔsɔɔmɔ lɛ he nii kɛ hiɛdɔɔ, ni ‘wɔhiɛ kãa shi,’ aloo wɔhiɛ hiɔ wɔhe nɔ daa, koni wɔkɛ mɛi awie sanekpakpa lɛ he yɛ hegbɛ fɛɛ hegbɛ ni wɔɔna mli. Mɛi pii etsɔ nɛkɛ gbɛ nɔ amɛbale Yehowa kɛ eshiwooi ahe nii, yɛ be mli ni Yehowa Odasefoi eba amɛ ŋɔɔ yɛ trukaa odaseyeli mli lɛ sɛɛ. Nɔ ni ba yɛ Seymore, ni ji nuu ko ni jɛ Barbados lɛ gbɛfaŋ nɛ.

Seymore ji tsɔɔlɔ ko yɛ maŋ nɔyeli lɛ skul ko mli. Charles, ni kɛ be fã tsɔɔ nii yɛ nakai skul lɛ, ni eji Yehowa Odasefonyo hu lɛ, ji sanekpakpa jajelɔ ni hiɛ yɔɔ ehe nɔ waa. Eji be-fɛɛ sɔɔlɔ, loo gbɛgbalɔ, ni ekɛ hegbɛ fɛɛ hegbɛ ni enaa lɛ tsuɔ nii ni ekɛ mɛi wieɔ sanekpakpa lɛ he. Charles trukaa odaseyeli nɔ Seymore tsɔ ni ebanu Maŋtsɛyeli shɛɛ sane lɛ klɛŋklɛŋ kwraa.

Etsɛɛɛ kɛkɛ ni Seymore hu kpɛ eyiŋ akɛ ekɛ mɛi babaoo baawie Biblia mli anɔkwalei lɛ ahe bɔ ni eeenyɛ. No hewɔ lɛ ekɛ mɛi ni yɔɔ he ni etsuɔ nii yɛ, titri lɛ enikaselɔi lɛ, bɔi sanegbaa trukaa. Eyɛ mli akɛ yɛ shikpɔji komɛi anɔ lɛ, atsɔɔɔ Nyɔŋmɔ jamɔ he nibii yɛ maŋ nɔyeli lɛ skul sɔrɔtoi lɛ amli moŋ, shi akɛ nitsumɔ ha nuu nɛɛ akɛ etsɔɔ jamɔ kɛ jeŋba he sui kpakpai ahe nii. Shi amrɔ nɛɛ, Seymore Biblia mli nilee hee ni ena lɛ ebaye etsutsu susumɔi ni kɔɔ saji nɛɛ ahe lɛ najiaŋ. Kɛ aha klas hejɔɔmɔ fioo lɛ, ekɛ eskul gbekɛbii lɛ wieɔ Nyɔŋmɔ shiwoo ni kɔɔ jeŋ hee kɛ naanɔ wala he gbɛkpamɔ he lɛ he.

Te gbekɛbii lɛ fee amɛnii yɛ he amɛha tɛŋŋ? Amɛteŋ mɛi pii jie anɔkwa miishɛɛ kpo yɛ Yehowa Maŋtsɛyeli lɛ he sanekpakpa lɛ he. Yɛ be ko sɛɛ lɛ, Seymore kɛ enikaselɔi lɛ ateŋ mɛi 13 bɔi Biblia mli nikasemɔ feemɔ. Amɛ miishɛɛ lɛ da aahu akɛ amɛto gbɛjianɔ akɛ amɛbaakase Biblia lɛ shii enyɔ yɛ otsi mli. Yɛ naagbee lɛ, amɛteŋ mɛi pii bɔi Kristofoi akpeei yaa yɛ Yehowa Odasefoi a-Maŋtsɛyeli Asa ni yɔɔ jɛmɛ lɛ nɔ. Kɛbashi amrɔ nɛɛ, amɛteŋ mɛi nɛɛhu ebatsɔmɔ Yehowa Odasefoi ni ejɔɔ amɛhe nɔ ni abaptisi amɛ. Ni yɛ Seymore gbɛfaŋ lɛ, amrɔ nɛɛ etsuɔ esɔɔmɔ nitsumɔ lɛ kɛmɔɔ shi kɛtsɔɔ sɔɔmɔ ni esɔmɔɔ akɛ daa gbɛgbalɔ kɛ onukpa yɛ Yehowa Odasefoi asafoi ni yɔɔ Barbados lɛ ekome mli lɛ nɔ.

Bɔ ni Yehowa Odasefoi ni yɔɔ je lɛŋ fɛɛ lɛ ‘tsuɔ sanekpakpa jajelɔi anitsumɔ lɛ’ amɛhaa, kɛtsɔ amɛhe ni amɛkɛwoɔ trukaa odaseyeli mli, yɛ gbɛ ko nɔ lɛ, he nɔkwɛmɔ nɔ kome pɛ nɛ. Amɛnyiɛɔ Biblia ŋaawoo ni wɔnaa yɛ Kolosebii 4:5, 6 lɛ sɛɛ, he ni kɛɔ akɛ: “Nyɛnyiɛa yɛ nilee mli, yɛ mɛi ni yɔɔ sɛɛ lɛ ahiɛ, ni nyɛtsu nyɛdeka lɛ he nii. Nyɛhaa nyɛwiemɔ he abaa nyam daa, ni ŋoo ahi mli, ni nyɛle bɔ ni sa akɛ nyɛhaa mɔ fɛɛ mɔ hetoo.”