Okɛ Hegbɛ Fɛɛ Hegbɛ Ni Onaa Lɛ Aye Odase—Fa 2
1 Gbɔmɛi akpei ohai abɔ ebale anɔkwale lɛ kɛtsɔ trukaa odaseyeli nɔ. Kɛ akɛ gbɛ ni atsɔɔ nɔ ayeɔ odase nɛɛ tsu nii jogbaŋŋ lɛ, abaaha gbɔmɛi akpekpei abɔ babaoo nine ashɛ sanekpakpa lɛ nɔ. Akɛ Yehowa tsuji lɛ, esa akɛ wɔha wɔla lɛ aya nɔ akpɛ daa. Mɛɛ gbɛ nɔ wɔɔtsɔ ni wɔ diɛŋtsɛ lɛ wɔfee enɛ babaoo?—Mat. 5:15, 16; Fil. 2:15.
2 Gbɛi sɔrɔtoi yɛ ni wɔbaanyɛ wɔtsɔ nɔ ni wɔkɛtao hegbɛi ni wɔye odase trukaa. Yɛ be mli ni akpa shwane kɛha niyeli, beni amɛɔ yɛ nitsumɔ he tsu ko mli, aloo beni ata bɔs loo tsɔne mli, kɛ nyɛmimɛi to gbɛjianɔ akɛ amɛbaakane Biblia lɛ loo Asafo lɛ woji tɛtrɛbii lɛ loo woji lɛ ekomɛi. Kɛ wɔha wɔhiɛ hi nifeemɔ ko ni tsɔɔ miishɛɛ ni mɛi ni bɛŋkɛ wɔ lɛ yɔɔ lɛ nɔ lɛ, sanegbaa baanyɛ aje shishi kɛ wɔgba amɛ nɔ ko ni jɛ nɔ ni wɔkaneɔ lɛ mli lɛ.
3 Yɛ be babaoo mli lɛ ewaaa akɛ akɛ mɔ ko aaaje sanegbaa shishi yɛ nibii ni mɛi pii nyaa he lɛ nɔ. Kɛ wɔsɔle wɔbi Yehowa yelikɛbuamɔ ni wɔbɔ he mɔdɛŋ lɛ, nɔ kpakpa baanyɛ ajɛ mli aba. Gbɛ ni waaa kwraa nɔ ni yɔɔ kuku hu ni wɔɔtsɔ nɔ wɔye trukaa odase ji ni wɔkɛ wɔdɛhiɛmɔ woji bibii lɛ ekomɛi aha. Enɛ hi jogbaŋŋ yɛ he ni be bɛ tsɔ kɛha sanegbaa lɛ. Dɛhiɛmɔ woji nɛɛ daraa ni abaanyɛ akɛya he fɛɛ he, shi saji wuji yɔɔ mli. Wɔteŋ mɛi pii baanyɛ ni wɔkɛtsu nii kpitiokpitio.
REASONING WOLO LƐ KƐ NITSUMƆ
4 Nɔ ko ni yeɔ buaa yɛ Maŋtsɛyeli shiɛmɔ nitsumɔ Iɛ fɛɛ mli ji Reasoning wolo lɛ. Hiɛkpamɔ wiemɔi ni yɔɔ baafai 9-15 lɛ babaoo kɛ agbɛnɛ saji ni yɔɔ “Conversation Stoppers” Iɛ shishi yɛ baafai 15-24 lɛji saji ni abaanyɛ akɛtsu nii yɛ trukaa odaseyeli mli ni akɛjɛ sanegbaa shishi. Akɛ nɔkwɛmɔ nɔ lɛ, hiɛkpamɔ wiemɔ kome ni yɔɔ baafa 11 lɛ kɛɔ akɛ: “Ani okane enɛ yɛ adafitswaa wolo lɛ mli ŋmɛnɛ? (Tsɔɔmɔ lɛ adafitswaa wolo ko mli sane ni ofo.) Te osusuɔ tɛŋŋ . . .?” Enɛ waaa kwraa, shi kwɛ bɔ ni ehi jogbaŋŋ kɛha sanegbaa shishijee! Aloo wɔbaanyɛ wɔbi kɛji akɛ mɔ lɛ ekadi bɔ ni adafitswaa woji loo redio lɛ tsiɔ gbɔmɛi ni ehe gbɛi ni kɛ wiemɔ “Harmagedon” tsuɔ nii amɛkɛtoɔ jeŋ muu fɛɛ nuklea tawuu he lɛ. Wɔbaanyɛ wɔbi akɛ belɛ mɛni ji nɔ ni esusuɔ akɛ Harmagedon baaji aha adesai. Abaanyɛ akɛ sane ni yɔɔ baafa 9 lɛ ato nɛkɛ sanegbaa nɛɛ he.
5 Be fɛɛ be ni wɔkɛ wɔhe aaawo trukaa odaseyeli mli lɛ, ehi akɛ wɔɔŋmɛ mɔ kroko lɛ gbɛ koni etsɔɔ ejwɛŋmɔ. Esa akɛ wɔkɛ woo kɛ bulɛ atsu nii yɛ be fɛɛ mli. Kɛ wɔbo nɔ ni mɔ kroko lɛ yɔɔ kɛɛmɔ toi jogbaŋŋ lɛ, wɔbaanyɛ wɔyoo nɔ he miishɛɛ ni enaa kɛkɛ lɛ ebaanyɛ eha wɔnyɛ wɔwie wiemɔi ni baatee emumɔŋ akɔnɔ shi. (Abɛi 25:11) Kɛ aaahi lɛ, esa akɛ wɔŋmala mɛi ni tsɔɔ wiemɔ lɛ he miishɛɛ lɛ agbɛii kɛ adrɛs bɔni afee ni wɔya amɛŋɔɔ ni wɔtsa miishɛɛ ni amɛna lɛ nɔ. Nakai nɔŋŋ esa akɛ wɔbu be ni wɔfite yɛ trukaa odaseyeli mli lɛ he akɔntaa pɛpɛɛpɛ koni wɔŋmala enɛ wɔshwie shi yɛ sɛɛ mli.
6 Kɛji akɛ onuɔ he akɛ oyeko omanye yɛ trukaa odaseyeli mli lɛ, kaaha onijiaŋ miije wui. Mɔdɛŋ ni obɔɔ koni otɛo Maŋtsɛyeli anɔkwale dumɔ wui lɛ kɛtsɔ trukaa odaseyeli nɔ lɛ baawo yibii yɛ sɛɛ mli. Yɛ bei babaoo mli lɛ, anɔkwale ni adu lɛ babaoo kɛtsɔ trukaa odaseyeli nɔ lɛji nɔ ni woɔ yibii kpakpai. Kɛji akɛ wɔbɛ Biblia mli woji ni wɔkɛaaha mɛi krokomɛi po lɛ, naabu kɛkɛ ni wɔkɛyeɔ odase lɛ baanyɛ atsu nɔ kpakpa babaoo. Gbɔmɛi akpekpei abɔ ni wɔnine baanyɛ ashɛ amɛnɔ yɛ kɛji akɛ wɔkɛ hegbɛ fɛɛ hegbɛ ni wɔɔna lɛ tsu nii ni wɔkɛye odase trukaa lɛ.