Obaanyɛ Oye Odase Beni Onyiɛɛɛ Shiɛmɔ Nɔ!

1. (a) Mɛni odase ni ayeɔ beni anyiɛɛɛ shiɛmɔ nɔ lɛ tsɔɔ? (b) Mɛi enyiɛ yɔɔ kpee nɛɛ shishi ni nu anɔkwale lɛ he klɛŋklɛŋ kwraa kɛtsɔ mɔ ko ni ye amɛ odase beni mɔ lɛ enyiɛɛɛ shiɛmɔ nɔ lɛ nɔ?

¹ Mɛi enyiɛ yɔɔ osafo lɛ mli ni nu anɔkwale lɛ he klɛŋklɛŋ kwraa kɛtsɔ mɔ ko ni ye amɛ odase beni mɔ lɛ enyiɛɛɛ shiɛmɔ nɔ lɛ nɔ? Ekolɛ kɛ́ ona ole mɛi abɔ lɛ, onaa baakpɛ ohe. Odase ni ayeɔ beni anyiɛɛɛ shiɛmɔ nɔ lɛ tsɔɔ sanekpakpa lɛ ni wɔɔshiɛ wɔtsɔɔ mɛi ni wɔkɛkpeɔ yɛ wɔdaa gbi nifeemɔi amli—tamɔ beni wɔmiifã gbɛ, wɔmiisara wɔwekumɛi loo wɔkutsoŋbii, loo beni wɔmiihe nii, kɛ agbɛnɛ hu beni wɔtee skul, wɔtee nitsumɔ, kɛ ekrokomɛi. Beni abi Odasefoi ni abaptisi amɛ ni fa fe 200 saji lɛ, amɛteŋ 100 mlijaa 40 tsɔɔ akɛ amɛnu anɔkwale lɛ he klɛŋklɛŋ kwraa kɛtsɔ mɔ ko ni ye amɛ odase beni mɔ lɛ enyiɛɛɛ shiɛmɔ nɔ lɛ nɔ! Enɛ tsɔɔ akɛ, gbɛ ni tamɔ nɛkɛ ni atsɔɔ nɔ ashiɛɔ lɛ yeɔ omanye jogbaŋŋ diɛŋtsɛ.

2. Mɛɛ nɔkwɛmɔnii yɔɔ Ŋmalɛi lɛ amli ni tsɔɔ odase ni aye mɛi beni anyiɛɛɛ shiɛmɔ nɔ?

² Sanekpakpa shiɛlɔi ni hi shi yɛ klɛŋklɛŋ afii 100 lɛ mli lɛ fɔɔ mɛi odase yeli beni amɛnyiɛɛɛ shiɛmɔ nɔ. Ákɛ nɔkwɛmɔnɔ lɛ, beni Yesu fãa gbɛ kɛtsɔɔ Samaria lɛ, eye yoo ko ni miiyɛ nu yɛ Yakob nubu lɛ mli lɛ odase. (Yoh. 4:6-26) Filipo kɛ Etiopia piafonyo ni miikane Yesaia wolo lɛ je sanegbaa shishi kɛtsɔ sane ni nyiɛ sɛɛ nɛɛ ni ebi lɛ lɛ nɔ, akɛ: “Ani oonu nɔ ni okaneɔ lɛ shishi lo?” (Bɔf. 8:26-38) Beni awo Paulo tsuŋ yɛ Filipi lɛ, eye gboklɛfoi akwɛlɔ ko odase. (Bɔf. 16:23-34) Sɛɛ mli beni Paulo yahi shĩa ko mli ni aŋmɛɛɛ lɛ gbɛ ni eya he ko lɛ, “ehereɔ mɛi fɛɛ ní baa eŋɔɔ lɛ, ni eshiɛɔ Nyɔŋmɔ maŋtsɛyeli lɛ he sane lɛ, ni ekɛ ekãa fɛɛ jajeɔ Nuŋtsɔ Yesu Kristo he saji lɛ etsɔɔ amɛ.” (Bɔf. 28:30, 31) Bo hu obaanyɛ oye mɛi odase beni onyiɛɛɛ shiɛmɔ nɔ, kɛ́ ohiɛ gboɔ po. Yɛ mɛɛ gbɛ nɔ?

3. Mɛni baanyɛ aye abua wɔ koni wɔhiɛ akagbo akɛ wɔɔwie?

³ Bɔ ni Ooofee Oje Shishi: Ewa kɛha wɔteŋ mɛi babaoo akɛ wɔkɛ mɛi kpɔji aaaje sanegbaa shishi. Ebaanyɛ efee nɔ ni wa kɛha wɔ akɛ wɔkɛ mɛi ni wɔle amɛ lɛ po aaagba anɔkwale lɛ he sane. Kɛ́ wɔjwɛŋ nibii kpakpai ni Yehowa feɔ, anɔkwalei ni nɔ bɛ ni ekɛduro etsuji, kɛ shihilɛi ni ehiii ni mɛi ni yɔɔ je lɛ mli lɛ yɔɔ mli lɛ anɔ lɛ, no baatsirɛ wɔ ni wɔwie. (Yona 4:11; Lala 40:6; Mat. 13:52) Kɛfata he lɛ, wɔbaanyɛ wɔbi Yehowa ni eha “wɔná ekãa.” (1 Tes. 2:2) Gilead skulnyo ko kɛɛ akɛ: “Bei pii lɛ, minaa akɛ sɔlemɔ yeɔ ebuaa mi kɛji ewa kɛha mi akɛ mikɛ mɛi aaagba sane.” Kɛ́ ewa kɛha bo akɛ okɛ mɛi aaagba sane lɛ, sɔlemɔ kuku yɛ oyitsoŋ.—Neh. 2:4.

4. Mɛɛ oti wɔbaanyɛ wɔkɛ ma wɔhiɛ klɛŋklɛŋ, ni mɛni hewɔ?

⁴ Odase ni ayeɔ beni anyiɛɛɛ shiɛmɔ nɔ lɛ biii ni wɔkɛ shiɛmɔ wiemɔ ko loo ŋmalɛ ko aje sanegbaa lɛ shishi doo. Kɛji wɔkɛfee oti ni ma wɔhiɛ akɛ wɔkɛ mɛi baagba sane shi jeee kɛ jwɛŋmɔ lɛ akɛ esa akɛ wɔye amɛ odase amrɔ nɔŋŋ lɛ, ebaanyɛ eye ebua wɔ. Shiɛlɔi babaoo etsɔɔ akɛ enɛ ni amɛfeɔ lɛ haa amɛnáa ekãa, ni yɛ naagbee lɛ amɛkɛ mɛi lɛ gbaa sanekpakpa lɛ he sane. Kɛji mɔ lɛ sumɔɔɔ ni ekɛ bo gbaa sane lɛ, kaanyɛ enɔ. Jɛɛ bulɛ mli omu sanegbaa lɛ naa ni ofee nɔ kroko.

5. Mɛni yeɔ ebuaa nyɛmi yoo ko ni hiɛ gboɔ lɛ ni enyɛɔ eyeɔ mɛi odase beni enyiɛɛɛ shiɛmɔ nɔ?

⁵ Nɔ ni nyɛmi yoo ko ni hiɛ gboɔ lɛ fɔɔ feemɔ kɛji eyaahe nii yɛ jara nɔ lɛ ji, efeɔ ehiɛ ŋmɔlɔŋmɔlɔ kɛkwɛɔ mɛi ni yɔɔ jɛmɛ lɛ ateŋ mɔ ko hiɛ. Kɛ́ mɔ lɛ hu fee ehiɛ ŋmɔlɔŋmɔlɔ kɛtsɔɔ lɛ lɛ, ewieɔ sane kuku ko. Kɛ́ mɔ lɛ jie lɛ naa jogbaŋŋ lɛ, enɛ haa enáa ekãa kɛtsaa sanegbaa lɛ nɔ. Eboɔ mɔ lɛ toi jogbaŋŋ ni ebɔɔ mɔdɛŋ koni ena nɔ ni mɔ lɛ baanya he yɛ sanekpakpa lɛ he. Gbɛ nɛɛ ni ekɛtsuɔ nii lɛ eha enyɛ ekɛ woji babaoo eha mɛi, ni ekɛ mɔ ko po eje Biblia mli nikasemɔ shishi.

6. Te wɔɔfee tɛŋŋ wɔje sanegbaa shishi beni wɔnyiɛɛɛ shiɛmɔ nɔ?

⁶ Bo Tsutsu Jee Sanegbaa Shishi: Mɛni wɔbaanyɛ wɔkɛɛ kɛje sanegbaa shishi? Beni Yesu kɛ yoo lɛ gba sane yɛ nubu lɛ he lɛ, nɔ ni ekɛje shishi ji akɛ, ebi yoo lɛ ni eha lɛ nu lɛ eko. (Yoh. 4:7) No hewɔ lɛ, ekolɛ wɔ hu wɔbaanyɛ wɔkɛ miishɛɛ aŋa mɔ ko loo wɔbi lɛ sane kɛje sanegbaa shishi. Beni nyɛgbaa sane lɛ, ekolɛ obaaná hegbɛ ni okɛwie Ŋmalɛ mli sane ko he otsɔɔ lɛ loo ekolɛ okɛdu anɔkwale wu ko yɛ etsui mli. (Jaj. 11:6) Mɛi babaoo ena akɛ kɛ́ amɛtee sane ko ni gbalaa mɔ jwɛŋmɔ ni haa mɔ taoɔ akɛ ele nɔ ko yɛ sane lɛ he lɛ shi lɛ, eyeɔ omanye jogbaŋŋ. Ákɛ nɔkwɛmɔnɔ lɛ, kɛ́ oomɛ ni ona datrɛfonyo lɛ, obaanyɛ okɛɛ nɔ ko tamɔ nɛkɛ kɛje sanegbaa shishi akɛ, “Ebaaŋɔɔ minaa waa kɛji be ko shɛ ni hela mɔŋ mi dɔŋŋ.”

7. Kɛ́ wɔkɛ wɔhiɛ fɔ̃ɔ shi jogbaŋŋ lɛ, mɛɛ gbɛ nɔ ebaaye ebua wɔ ni wɔye odase beni wɔnyiɛɛɛ shiɛmɔ nɔ?

⁷ Agbɛnɛ hu, kɛ́ wɔkɛ wɔhiɛ fɔ̃ɔ shi jogbaŋŋ lɛ, ebaaye ebua wɔ ni wɔnyɛ wɔje sanegbaa shishi. Kɛ́ wɔna fɔlɔ ko kɛ ebii ni ebii lɛ miifee amɛnii jogbaŋŋ lɛ, wɔbaanyɛ wɔjie fɔlɔ lɛ yi ni wɔbi lɛ akɛ, “Mɛni eye ebua bo ni onyɛ otsɔse obii lɛ jogbaŋŋ lɛ?” Nyɛmi yoo ko kadiɔ saji ni mɛi krokomɛi ni yɔɔ enitsumɔhe lɛ fɔɔ he wiemɔ lɛ, ni no sɛɛ lɛ ekɛ enanemɛi nitsulɔi lɛ gbaa nibii pɔtɛɛ komɛi ni amɛbaanya he lɛ he sane. Beni ená ele akɛ yoo ko ni yɔɔ enitsumɔhe lɛ miito gbɛjianɔ ni ebote gbalashihilɛ mli lɛ, eha lɛ Awake! ko ni wieɔ bɔ ni aaafee ato yookpeemɔ he gbɛjianɔ lɛ he. Enɛ gbele gbɛ kɛha Biblia mli sanegbai.

8. Te wɔɔfee tɛŋŋ wɔkɛ wɔwoji lɛ atsu nii kɛje sanegbaa shishi lɛ?

⁸ Gbɛ kroko ni wɔbaanyɛ wɔtsɔ nɔ wɔje sanegbaa shishi ji, wɔwoji lɛ ni wɔɔkane yɛ hei ni mɛi baana wɔ. Nɔ ni nyɛmi nuu ko fɔɔ feemɔ ji akɛ, egbeleɔ Buu-Mɔɔ loo Awake! lɛ mli sane ko ni gbalaa mɔ jwɛŋmɔ waa ni ekaneɔ yɛ eyitsoŋ. Kɛ́ ena akɛ mɔ ko ni yɔɔ emasɛi lɛ miikwɛ wolo tɛtrɛɛ lɛ, ebiɔ mɔ lɛ sane loo ewieɔ nɔ ni ekaneɔ lɛ he nɔ ko kuku etsɔɔ mɔ lɛ. Bei pii lɛ, enɛ haa enyɛɔ ekɛ mɛi gbaa sane ni eyeɔ amɛ odase. Kɛ́ wɔkɛ wɔwoji lɛ shwie hei ni mɛi baana lɛ, ebaanyɛ egbala wɔnanemɛi nitsulɔi loo wɔklasbii lɛ ajwɛŋmɔ, ni no baaha amɛsumɔ akɛ amɛle ehe sane.

9, 10. (a) Mɛɛ gbɛ nɔ wɔɔtsɔ wɔfee nɔ ko kɛgbele gbɛ ni baaha wɔye odase beni wɔnyiɛɛɛ shiɛmɔ nɔ? (b) Mɛɛ gbɛ onyɛ otsɔ nɔ ofee enɛ?

⁹ Feemɔ Nɔ ko Kɛgbele Gbɛ: Yɛ bɔ ni shiɛmɔ nitsumɔ lɛ he hiaa ha lɛ hewɔ lɛ, esaaa akɛ wɔnaa odase ni ayeɔ beni anyiɛɛɛ shiɛmɔ nɔ lɛ akɛ nɔ ko ni afeɔ beni hegbɛ ko kɛ ehe eba pɛ. Yɛ no najiaŋ lɛ, esa akɛ wɔfee nɔ ko kɛgbele gbɛ ni baaha wɔye odase yɛ wɔdaa gbi nifeemɔi amli. Tsɔ hiɛ ni osusu mɛi ni obaanyɛ okɛkpe lɛ ahe, ni osusu bɔ ni obaafee okɛ amɛ aje sanegbaa ni yɔɔ miishɛɛ shishi lɛ he. Be fɛɛ be lɛ, hiɛmɔ Biblia kɛ woji ni obaanyɛ okɛtsu nii kɛ́ mɔ ko jie miishɛɛ kpo lɛ yɛ ohe.—1 Pet. 3:15.

¹⁰ Akɛni shiɛlɔi babaoo kɛ hiɛshikamɔ tsuɔ nii hewɔ lɛ, amɛnyɛ amɛtsɔ gbɛi srɔtoi anɔ amɛye mɛi odase beni amɛnyiɛɛɛ shiɛmɔ nɔ. Nyɛmi yoo ko ni yɔɔ shĩa ko ni aŋmɛɛɛ mɛi agbɛ kɛkɛ ni amɛya jɛmɛ lɛ mli lɛ yaa shwɛmɔhe ni yɔɔ shĩa lɛ mli lɛ ni eyatsaraa adebɔɔ he mfonirii fɛfɛji ni afolɔ mli bibii koni mɛi ana nɔ ni mfonirii lɛ ji. Kɛ́ mɛi wie bɔ ni mfonirii lɛ yɔɔ fɛo lɛ he lɛ, eŋɔɔ nakai hegbɛ lɛ kɛjeɔ sanegbaa shishi ni egbaa amɛ Biblia mli shiwoo ni kɔɔ “ŋwɛi hee kɛ shikpɔŋ hee” lɛ he sane. (Kpoj. 21:1-4) Ani obaanyɛ osusu gbɛi komɛi ni obaanyɛ otsɔ nɔ oye mɛi odase beni onyiɛɛɛ shiɛmɔ nɔ lɛ he?

11. Kɛ́ wɔye mɛi odase beni wɔnyiɛɛɛ shiɛmɔ nɔ ni amɛjie miishɛɛ kpo lɛ, te wɔɔfee tɛŋŋ wɔyasara amɛ lɛ?

¹¹ Kuu Osɛɛ Oyasara Mɛi ni Jie Miishɛɛ Kpo Lɛ: Kɛ́ mɔ ko jie miishɛɛ kpo lɛ, bɔɔ mɔdɛŋ akɛ obaaku osɛɛ oyasara mɔ lɛ. Kɛ́ ebaahi lɛ, obaanyɛ okɛɛ mɔ lɛ akɛ: “Minya wɔsanegbaa lɛ he waa. Nɛgbɛ mana bo yɛ koni wɔtsa wɔsanegbaa lɛ nɔ?” Shiɛlɔi komɛi kɛ amɛtɛlifoŋ nɔmba kɛ adrɛs haa mɔ lɛ ni amɛkɛɔ akɛ: “Minya wɔsanegbaa lɛ he waa. Kɛji obaasumɔ ni ole babaoo yɛ nɔ ni wɔsusu he nɛɛ he lɛ, naa mitɛlifoŋ nɔmba loo midrɛs.” Kɛ́ bo diɛŋtsɛ onyɛŋ oyasara mɔ ni jie miishɛɛ kpo lɛ, ŋmalamɔ Please Follow Up (S-43) wolo lɛ nɔ nii amrɔ nɔŋŋ ni okɛha osafo lɛ mli woloŋmalɔ lɛ koni ato gbɛjianɔ ni asafo ko ni sa ayasara lɛ.

12. (a) Mɛni hewɔ esa akɛ oŋmala bei abɔ ni okɛyeɔ mɛi odase beni onyiɛɛɛ shiɛmɔ nɔ lɛ oshwie shi ni obu he akɔntaa lɛ? (b) Mɛɛ yibiiwoi ejɛ odase ni ayeɔ beni anyiɛɛɛ shiɛmɔ nɔ lɛ mli kɛba? (Kwɛmɔ akrabatsa ni ji “Odase ni Ayeɔ Beni Anyiɛɛɛ Shiɛmɔ nɔ lɛ Woɔ Yibii!”)

¹² Esa akɛ wɔbu be ni wɔkɛyeɔ mɛi odase beni wɔnyiɛɛɛ shiɛmɔ nɔ lɛ he akɔntaa. No hewɔ lɛ, kɛ́ oná minitii fioo po yɛ gbi kome mli lɛ, bɔɔ mɔdɛŋ akɛ obaaŋma ofɔ̃ shi. Susumɔ enɛ he okwɛ: Kɛji daa gbi lɛ, shiɛlɔ fɛɛ shiɛlɔ kɛ minitii enumɔ yeɔ odase beni enyiɛɛɛ shiɛmɔ nɔ lɛ, kɛ́ abu naa lɛ abaaná ŋmɛlɛtswai akpekpei 17 kɛ sɛɛ daa nyɔɔŋ nɔ!

13. Mɛni esa akɛ etsirɛ wɔ koni wɔye odase beni wɔnyiɛɛɛ shiɛmɔ nɔ?

¹³ Wɔyɛ yiŋtoo kpakpa hewɔ ni wɔyeɔ odase beni wɔnyiɛɛɛ shiɛmɔ nɔ lɛ—no ji suɔmɔ ni wɔyɔɔ kɛha Nyɔŋmɔ kɛ wɔnaanyo gbɔmɔ. (Mat. 22:37-39) Hiɛsɔɔ babaoo ni wɔyɔɔ kɛha Yehowa sui kɛ eyiŋtoi lɛ nyɛɔ wɔnɔ koni wɔwie “emaŋtsɛyeli lɛ nyam kɛ agbojee lɛ” he. (Lala 145:7, 10-12) Anɔkwa suɔmɔ ni wɔyɔɔ kɛha wɔnaanyo gbɔmɔ lɛ tsirɛɔ wɔ koni wɔŋɔ hegbɛ fɛɛ hegbɛ kɛshiɛ sanekpakpa lɛ beni be yɔɔ lolo nɛɛ. (Rom. 10:13, 14) Kɛ́ wɔsusu nii ahe jogbaŋŋ kɛtsɔ hiɛ ni wɔsaa wɔhe jogbaŋŋ lɛ, wɔteŋ mɔ fɛɛ mɔ baanyɛ aye odase beni enyiɛɛɛ shiɛmɔ nɔ, ni ekolɛ wɔbaaná miishɛɛ akɛ wɔha mɔ ko ni hiɛ tsui kpakpa lɛ ebale anɔkwale lɛ.

[Wiemɔ ni akɔ ni akɛmiitsu nii ni yɔɔ baafa 4]

Kɛji okɛfee oti ni ma ohiɛ akɛ kɛ́ okɛ mɛi kpe lɛ okɛ amɛ baaje sanegbaa shishi lɛ, ebaanyɛ eye ebua bo ni oye odase

[Wiemɔ ni akɔ ni akɛmiitsu nii ni yɔɔ baafa 5]

Akɛni shiɛlɔi babaoo kɛ hiɛshikamɔ tsuɔ nii hewɔ lɛ, amɛnyɛ amɛtsɔ gbɛi srɔtoi anɔ amɛye mɛi odase beni amɛnyiɛɛɛ shiɛmɔ nɔ

[Akrabatsa ni yɔɔ baafa 5]

Bɔ ni Aaafee Aje Sanegbaa Shishi He Ŋaawoi

◼ Sɔlemɔ kɛbi yelikɛbuamɔ ni onyɛ oje shishi

◼ Okɛ mɛi ni miisumɔ ni amɛkɛ bo agba sane ni amɛyeee oyai tsɔ lɛ agba sane

◼ Feemɔ ohiɛ ŋmɔlɔŋmɔlɔ kɛkwɛ mɔ lɛ hiɛ, ni owie sane ko ni nyɛyi enyɔ lɛ fɛɛ baaná he miishɛɛ

◼ Bo sane toi jogbaŋŋ

[Akrabatsa ni yɔɔ baafa 6]

Odase ni Ayeɔ Beni Anyiɛɛɛ Shiɛmɔ nɔ lɛ Woɔ Yibii!

• Beni nyɛmi nuu ko miimɛ yɛ tsɔji asaamɔhe ko koni asaa etsɔne aha lɛ lɛ, eye mɛi ni yɔɔ jɛmɛ lɛ odase ni eha amɛ ninefɔ̃ɔ woji koni amɛyabo maŋshiɛmɔ ko ni abaaha yɛ kpee ko ni afeɔ yɛ nakai beaŋ lɛ toi. Enɔ afi beni afeɔ kpee ko lɛ, nyɛmi nuu ko ni eyooo lɛ lɛ ŋa lɛ kɛ miishɛɛ. Hii ni eha amɛ ninefɔ̃ɔ woji yɛ tsɔji asaamɔhe yɛ afi ni tsɔ hiɛ lɛ mli lɛ ateŋ mɔ kome ni ŋa lɛ lɛ! Asomoaŋ, nuu lɛ tee eyabo maŋshiɛmɔ lɛ toi ni ekɛ egbɛi ha koni akɛ lɛ akase Biblia lɛ. Ekɛ eŋa fɛɛ ená baptisimɔ.

• Nyɛmi yoo ko ni bale anɔkwale lɛ kɛtsɔ odase ni aye lɛ beni anyiɛɛɛ shiɛmɔ nɔ lɛ nɔ lɛ ŋɔɔ mɛi ni ebii etɛ lɛ ahewɔ lɛ ekɛ amɛ kpeɔ lɛ akɛ eshikpɔŋkuku krɛdɛɛ. Eshikpɔŋkuku nɛɛ mlibii lɛ ateŋ mɛi komɛi ji ekutsoŋbii kɛ fɔlɔi ni ekɛkpeɔ yɛ ebii lɛ askul kɛ kpee ni tsɔɔlɔi kɛ fɔlɔi feɔ yɛ skulbii ahewɔ lɛ ashishi. Kɛ́ ejie ehe shi etsɔɔ mɔ ko lɛ, ewieɔ nɔ ko kuku ni taa mɔ tsuiŋ waa akɛ Biblia lɛ ji nɔ ni yeɔ ebuaa lɛ yɛ ebii lɛ atsɔsemɔ mli, kɛkɛ lɛ no sɛɛ lɛ, ewo sane kroko nɔ. Shi akɛni eje sanegbaa shishi momo hewɔ lɛ, efeɔ mlɛo kɛhaa lɛ akɛ ebaawie Biblia lɛ he beni sanegbaa lɛ yaa nɔ lɛ. Gbɛ nɛɛ ni ekɛtsuɔ nii lɛ eha enyɛ eye ebua mɛi 12 ni abaptisi amɛ.

• Beni nuu ko ni ji ŋshuɔrans nitsulɔ lɛ ba nyɛmi yoo ko ŋɔɔ lɛ, nyɛmi yoo lɛ ŋɔ hegbɛ lɛ kɛye lɛ odase. Nyɛmi yoo lɛ bi lɛ kɛji ebaasumɔ ni ená ŋshuɔrans ko ni baaha ená gbɔmɔtsoŋ hewalɛ kpakpa, miishɛɛ, kɛ naanɔ wala. Ekɛɛ hɛɛ, ni ebi nyɛmi yoo lɛ akɛ mɛɛ ŋshuɔrans he ewieɔ lɛ? Etsɔɔ lɛ Biblia lɛ mli shiwoi lɛ, ni eha lɛ wɔwoji lɛ ateŋ ekome, ni nuu lɛ kɛ gbɛkɛ kome kane fɛɛ. Akɛ lɛ bɔi Biblia lɛ kasemɔ. Ebɔi kpee yaa ni sɛɛ mli lɛ abaptisi lɛ.

• Beni nyɛmi yoo ko kɛ kɔɔyɔŋ lɛlɛ fãa gbɛ lɛ, ekɛ yoo ko ni ta emasɛi lɛ bɔi sanegbaa ni eye lɛ odase. Beni amɛyashɛ lɛ, nyɛmi yoo lɛ kɛ edrɛs kɛ etɛlifoŋ nɔmba ha yoo lɛ ni ewo lɛ hewalɛ ni eha Yehowa Odasefoi kɛ lɛ abɔi Biblia lɛ kasemɔ kɛ́ amɛba eŋɔɔ. Enɔ jetsɛremɔ nɔŋŋ lɛ, Odasefoi enyɔ batswa yoo lɛ shinaa lɛ. Yoo lɛ bɔi Biblia lɛ kasemɔ, etee ehiɛ oyayaayai, abaptisi lɛ ni no sɛɛ etsɛɛɛ lɛ, ekɛ mɛi etɛ bɔi Biblia lɛ kasemɔ.

• Nyɛmi nuu ko ni eye afii 100 ni eshwila ni yɔɔ he ni akwɛɔ mɛi ni egbɔlɔ yɛ lɛ fɔɔ kɛɛmɔ akɛ, “Maŋtsɛyeli lɛ he miihia wɔ.” Enɛ haa helatsɛmɛi akwɛlɔi kɛ helatsɛmɛi ni yɔɔ jɛmɛ lɛ biɔ lɛ saji, ni etsɔɔ no nɔ egbalaa nɔ ni Maŋtsɛyeli lɛ ji lɛ mli etsɔɔ amɛ. Yei ni tsuɔ nii yɛ jɛmɛ lɛ ateŋ mɔ kome bi nyɛmi nuu lɛ nɔ ni ebaafee kɛji Paradeiso lɛ ba. Ekɛɛ lɛ akɛ, “Mana nii ni manyiɛ ekoŋŋ ni mashã helatsɛmɛi ashwiili ni mitaa mli lɛ.” Akɛni enaaa nii hewɔ lɛ ehaa yoo lɛ kaneɔ woji tɛtrɛbii lɛ ehaa lɛ. Beni nyɛmi nuu lɛ biyoo basara lɛ lɛ, yoo nɛɛ bi kɛji ebaanyɛ ekɛ woji tɛtrɛbii lɛ aya shĩa. Helatsɛmɛi akwɛlɔ ko kɛɛ nyɛmi nuu lɛ biyoo lɛ akɛ, “Wiemɔ ni wɔkɛyeɔ fɛo yɛ mɛi ni egbɔlɔ akwɛmɔhe nɛɛ ji: ‘Maŋtsɛyeli lɛ he miihia wɔ.’”

• Nyɛmi yoo ko ni eto laiŋ kɛmiimɛ yɛ niyelihe ko lɛ nu ni hii onukpai komɛi ni tara jɛi lɛ miisusu maŋkwramɔŋ saji ahe. Hii lɛ ateŋ mɔ kome wie akɛ nɔyeli lɛ nyɛŋ etsu amɛnaagbai ahe nii eha amɛ. Nyɛmi yoo lɛ kɛɛ yɛ eyitsoŋ akɛ, ‘Miná hegbɛ lɛ.’ Esɔle kuku ni etsi ebɛŋkɛ amɛ. Beni ejie ehe shi etsɔɔ amɛ etã lɛ, ekɛ amɛwie nɔyeli ko, Nyɔŋmɔ Maŋtsɛyeli lɛ, ni baatsu adesai anaagbai ahe nii lɛ he sane, ni ekɛ wolo bibioo ko ni ehiɛ yɛ ehe lɛ ha amɛ. Nɔŋŋ kɛkɛ ni niyelihe lɛ nɔkwɛlɔ lɛ banina lɛ. Nyɛmi yoo lɛ susu akɛ eeba ni ebashwie lɛ. Yɛ no najiaŋ lɛ, ekɛɛ nyɛmi yoo lɛ akɛ, no mli lɛ eebo toi ni ebaasumɔ ni lɛ hu ená wolo bibioo lɛ eko. Yoo ko ni tsuɔ nii yɛ jɛmɛ ni lɛ hu eebo toi lɛ ba nyɛmi yoo lɛ ŋɔɔ kɛ yaafo. Tsutsu ko lɛ, akɛ yoo nɛɛ kaseɔ Biblia lɛ ni amrɔ nɛɛ eetao ni eje shishi ekoŋŋ.