Ani Ofee Klalo Akɛ Obaaye Trukaa Odase?
1. Mɛɛ nɔkwɛmɔnɔ tsɔɔ akɛ trukaa odaseyeli baanyɛ awo yibii kpakpai?
1 Trukaa odaseyeli baanyɛ awo yibii babaoo. Yibii kpakpai ni ejɛ trukaa odaseyeli mli kɛba lɛ he nɔkwɛmɔnii babaoo yɛ Biblia lɛ mli. (Yoh. 4:7-15) Mɛni wɔbaanyɛ wɔfee kɛsaa wɔhe kɛye trukaa odase?
2. Mɛɛ gbɛ nɔ wɔtadewoo kɛ wɔhesaamɔ baanyɛ aye abua wɔ ni wɔye odase?
2 Atadewoo kɛ Hesaamɔ: Kɛ́ wɔtadewoo kɛ wɔhesaamɔ yɛ hiŋmɛi nɔ be fɛɛ be lɛ, ebaaha wɔnyɛ wɔkɛ mɛi agba wɔhemɔkɛyeli lɛ he sane ni wɔsheee gbeyei. (1 Tim. 2:9, 10) Kɛ́ wɔnuɔ he akɛ wɔhesaamɔ ehiii lɛ, ekolɛ wɔbaashashao shi akɛ wɔɔye odase. Shi kɛ́ wɔhesaamɔ lɛ he tse ni esa lɛ, ebaaha mɛi abi nɔ hewɔ ni wɔsaa wɔhe jogbaŋŋ nakai lɛ. Ákɛ nɔkwɛmɔnɔ lɛ, beni gbalashihilɛ mli hefatalɔi ni ji Odasefoi ni esaa amɛhe jogbaŋŋ lɛ fãa gbɛ lɛ, amɛyata Muslimnyo ko masɛi. Beni nuu lɛ na bɔ ni amɛsaa amɛhe lɛ, ebi amɛ kɛji akɛ amɛ ji Kristofoi. Enɛ ha amɛ kɛ lɛ gba Biblia mli saji ŋmɛlɛtswai etɛ sɔŋŋ.
3. Mɛɛ gbɛ nɔ okɛ Yesu nɔkwɛmɔnɔ lɛ etsu nii kɛje sanegbaa shishi?
3 Bɔ ni Ooofee Oje Sanegbaa Shishi: Beni Yesu kɛ Samariayoo lɛ kpe yɛ Yakob nu bu lɛ he lɛ, etsɔ nu ni ebi yoo lɛ nɔ eje sanegbaa shishi. Nakai nɔŋŋ wɔbaanyɛ wɔje sanegbaa shishi kɛtsɔ sane kuku ko ni wɔɔwie aloo sane ko ni waaa ni wɔɔbi lɛ nɔ. Eyɛ mli akɛ bei komɛi lɛ wɔbaashashao shi moŋ, shi kɛ́ wɔkɛ wɔhe fɔ̃ Yehowa nɔ kɛha yelikɛbuamɔ lɛ, wɔbaanyɛ “wɔná ekãa” kɛje sanegbaa shishi.—1 Tes. 2:2.
4. Mɛɛ gbɛ nɔ wɔbaanyɛ wɔtsɔ kɛye trukaa odase?
4 Taomɔ Gbɛ̀i Anɔ ni Oootsɔ Kɛye Trukaa Odase: Shiɛlɔi babaoo etsɔ gbɛ̀i srɔtoi anɔ kɛye trukaa odase. Kwɛmɔ akɛ namɛi obaanyɛ okɛkpe yɛ gbi lɛ mli. Ha asafo lɛ wolo ko ni sa kɛ Biblia bibioo ko ahi ohe. Okɛ sɛɛyoomɔ atsu nii, ni ojie miishɛɛ kpo otsɔɔ mɛi ni bɛŋkɛ bo lɛ. Kɛ́ osusu hegbɛi ní obaanyɛ oná yɛ gbi lɛ mli lɛ he lɛ, ebaaha ofee klalo kɛye odase jogbaŋŋ.—Fil. 1:12-14; 1 Pet. 3:15.
5. Mɛni hewɔ esa akɛ wɔto gbɛjianɔ kɛye trukaa odase?
5 Suɔmɔ ni wɔyɔɔ kɛha Nyɔŋmɔ kɛ suɔmɔ ni wɔyɔɔ kɛha wɔnaanyo gbɔmɔ lɛ ji yiŋtoi enyɔ hewɔ ni esa akɛ wɔŋɔ hegbɛi fɛɛ ni wɔbaaná lɛ kɛye trukaa odase lɛ. (Mat. 22:37-39) Yɛ bɔ ni shiɛmɔ nitsumɔ lɛ he hiaa waa ha lɛ hewɔ lɛ, esa akɛ wɔto gbɛjianɔ kɛha trukaa odaseyeli. Esa akɛ wɔfee klalo akɛ wɔbaaŋɔ hegbɛi fɛɛ ni wɔɔná lɛ kɛshiɛ Maŋtsɛyeli lɛ he sanekpakpa lɛ wɔtsɔɔ mɛi krokomɛi beni be yɔɔ lolo nɛɛ.—Rom. 10:13, 14; 2 Tim. 4:2.