Bɔ ni Kristofoi Tookwɛlɔi Sɔmɔɔ Bo Amɛhaa

HEI pii yɛ ni anyɛɔ anaa bɔ ni tookwɛlɔi kwɛɔ amɛ tooiku amɛhaa. Amɛnyiɛɔ tooi lɛ ahiɛ, amɛbuɔ amɛhe, ni amɛlɛɔ amɛ. Kristofoi onukpai nyãa enɛ he, ejaakɛ nɔ ni fata amɛ nitsumɔ lɛ he ji kwɛmɔ nitsumɔi. Yɛ anɔkwale mli lɛ, eji gbɛnaa nii ni ka amɛnɔ akɛ ‘amɛlɛ Nyɔŋmɔ asafo lɛ,’ ni ‘amɛgbala amɛjwɛŋmɔ kɛya asafo lɛ fɛɛ nɔ.’—Bɔfoi lɛ Asaji 20:28.

Kɛ oji Kristofoi asafo lɛ mli nyo lɛ, mɛɛ gbɛ nɔ mumɔŋ tookwɛlɔi lɛ aaatsɔ asɔmɔ bo yɛ? Ni te esa akɛ ofee onii yɛ mɔdɛŋ ni amɛbɔɔ yɛ ohe lɛ he oha tɛŋŋ? Mɛni hewɔ amɛ yelikɛbuamɔ he hiaa asafo lɛ?

Hebuu Kɛmiijɛ Mɛni He?

Yɛ blema bei amli lɛ, jatai kɛ kooloi krokomɛi ni yeɔ milɛloo kɛ tooku lɛ woɔ oshara mli ni amɛmɔmɔɔ tooi komekomei lɛ. Ehe bahia ni tookwɛlɔi abu amɛhe. (1 Samuel 17:34, 35) Shi, Satan Abonsam “nyiɛɔ tamɔ jata ni huuɔ eetao mɔ ni eeemi.” (1 Petro 5:8) Jeee akɛ ekɛ mlifu wuɔ ta eshiɔ Yehowa shikpɔŋ nɔ gbɛjianɔtoo muu lɛ fɛɛ kɛkɛ, shi ewuɔ eshiɔ Nyɔŋmɔ tsulɔ aŋkro fɛɛ aŋkro hu. Mɛni ji Satan yiŋtoo? Eesumɔ ni eje Yehowa webii anijiaŋ wui ni etsi amɛ naa po ni ‘amɛkaye Nyɔŋmɔ kitai anɔ’ ni amɛkatsu “Yesu he odaseyeli nitsumɔ lɛ.”—Kpojiemɔ 12:17, NW.

Yehowa folɔ blema Israel nɔyelɔi ni tamɔ tookwɛlɔi lɛ anaa akɛ, amɛku amɛhiɛ amɛshwie nitsumɔ nɔ ejaakɛ etooi lɛ etsɔmɔ “ŋaŋ kooloi fɛɛ aniyenii.” (Ezekiel 34:8) Shi, Kristofoi onukpai yɛ tsuiŋ suɔmɔ akɛ amɛaabu mɛi ni yɔɔ asafo lɛ mli lɛ ahe koni mɔ ko mɔ ko akalaaje kɛtsɔ hiɛ ni aku ashwie enɔ lɛ nɔ loo yɛ hewalɛ ni Satan, je lɛ, loo “klaji” hemɔkɛyeli kwalɔi ena yɛ enɔ lɛ hewɔ. (Bɔfoi lɛ Asaji 20:29, 30) Tetookwɛlɔi lɛ feɔ tɛŋŋ amɛyeɔ amɛbuaa too ku lɛ mli bii fɛɛ koni amɛhiɛ ahi amɛhe nɔ ni amɛsara? Gbɛ kome ji, kɛtsɔ Ŋmalɛ mli wiemɔi ni asaa he jogbaŋŋ yɛ mli ni ahaa kɛjɛɔ Maŋtsɛyeli Asa lɛ kpoku nɔ lɛ nɔ. Ekroko ji kɛtsɔ sanegbaa kpakpa ni tswaa mɔ maa shi ni yaa nɔ dani kpeei lɛ jeɔ shishi loo yɛ kpeei lɛ asɛɛ lɛ nɔ. Nɔ kroko ni mɔɔ shi hu ji kɛtsɔ saramɔ ni aaayasara “tooi” lɛ diɛŋtsɛ nɔ. (Okɛto Lala 95:7 he.) Shi mɛni ji nyɛmi ni ayasaraa lɛ lɛ? Te esa akɛ atsu saramɔ nɛɛ he nii aha tɛŋŋ? Ni namɔ esa akɛ asara lɛ?

Mɛni Ji Nyɛmi ni Ayasaraa Lɛ Lɛ?

Nyɛmi ni asaraa lɛ lɛ jeee mɔ saramɔ kɛha hiɛtserɛjiemɔ kɛ sanegbaa yɛ nibii ni he ehiaaa he. Onukpa ko kɛɛ: “Shiɛlɔi pii nyãa ŋmalɛ kanemɔ loo Biblia mli gbɔmɔ ko he susumɔ he waa. Shi, jeee onukpa lɛ kome pɛ wieɔ. Maŋtsɛyeli shiɛlɔ ni asaraa lɛ lɛ hu nyaa esusumɔi ni ejieɔ lɛ kpo yɛ Biblia lɛ he lɛ he, ni nakai feemɔ wajeɔ lɛ diɛŋtsɛ ehemɔkɛyeli. Onukpa lɛ baanyɛ ni ekɛ Buu-Mɔɔ loo Awake! wolo tɛtrɛɛ lɛ eko aya koni amɛgba emli sane ko ni tswaa mɔ maa shi he sane. Ekolɛ nɛkɛ mumɔŋ sanegbaa nɛɛ ji nɔ ni kɛ sɔrɔto feemɔ baa nyɛmi ni asaraa lɛ lɛ kɛ saramɔ kɛha sanegbaa folo kɛkɛ lɛ teŋ.”

Onukpa kroko ni yɔɔ niiashikpamɔ wie akɛ: “Dani eeeya eyasara shiɛlɔ ko lɛ, onukpa lɛ kɛ be ko susuɔ shiɛlɔ ni ebaaya eŋɔɔ lɛ he. Mɛni baanyɛ atswa shiɛlɔ lɛ ama shi? Yijiemɔ ni sa ji saramɔ nɛɛ fa ni he hiaa, ejaakɛ ewoɔ mɔ hewalɛ koni mɔ lɛ aŋmɛ etsui shi.” Hɛɛ, onukpai ni saraa shiɛlɔi lɛ fe naanyobɔɔ saramɔ ko kɛkɛ ni mɔ fɛɛ mɔ ni yɔɔ asafo lɛ mli lɛ baanyɛ afee.

Mɛni Hewɔ Nɔkwɛlɔ Basaraa Bo Lɛ?

Kɛ onukpa ko yasara shia ko lɛ, esaa ehe akɛ eeewo enanemɛi heyelilɔi lɛ hewalɛ ni eye ebua amɛ ni amɛfi shi shiŋŋ yɛ hemɔkɛyeli lɛ mli. (Romabii 1:11) No hewɔ lɛ, kɛ onukpa kome loo mɛi enyɔ miisumɔ ni amɛbasara bo lɛ, te ofeɔ onii yɛ he ohaa tɛŋŋ? Nɔkwɛlɔ gbɛfalɔ ko kɛɛ akɛ: “Kɛ ayasara nyɛmimɛi lɛ be mli ni nɔ ko eyaaa nɔ jogbaŋŋ pɛ lɛ, shishijee nii ni afeɔ yɛ saramɔ nɛɛ he lɛ baanyɛ afee, ‘Mɛɛ efɔŋ mifee?’ ” Mumɔŋ tookwɛlɔi ni yɔɔ suɔmɔ lɛ kaseɔ Yehowa, mɔ ni kwɛ lalatsɛ lɛ nɔ, ni ehaa ‘esusuma mii shɛɔ ehe’ titri lɛ yɛ haomɔ bei kɛ beni nɔ ko krɛdɛɛ he ehia lɛ lɛ mli lɛ.—Lala 23:1-4.

Yiŋtoo ni yɔɔ nyɛmimɛi asaramɔ nɛɛ sɛɛ ji ‘ni atswa mɔ ama shi, jeee ni akumɔ ashwie shi.’ (2 Korintobii 13:10) Nɔ ni woɔ mɔ hewalɛ lɛlɛŋ ji, hiɛsɔɔ wiemɔi kɛha mɔ ni ayasara lɛ lɛ tsuishiŋmɛɛ, ekãa ni eyɔɔ, kɛ enitsumɔ yɛ anɔkwayeli mli lɛ. Onukpa ko kɛɛ: “Kɛ oosara nyɛmimɛi lɛ, ehiii akɛ aaaha anu he akɛ aba kɛ yiŋtoo akɛ abaatao naagba ni atsu he nii. Ekolɛ shiɛlɔ lɛ diɛŋtsɛ baasumɔ ni ewie naagba pɔtɛɛ ko he. Ni kɛji akɛ too ko miitsutsɔ loo eetse ehe kɛmiijɛ tooi ni eshwɛ lɛ ahe lɛ, ehe hiaa ni onukpa lɛ afee nɔ̃ ko yɛ he ni ekɛye ebua.”

Ŋwanejee ko bɛ he akɛ tookwɛlɔi Kristofoi baaje gbɛ amɛkwɛ mɔ ni tamɔ mɛi ni atsɔɔ bɔ ni amɛji yɛ nɛkɛ wiemɔi nɛɛ amli lɛ jogbaŋŋ: “Nɔ ni elaaje lɛ, [mi Yehowa] matao; ni nɔ ni edu gbɛ lɛ, mayakpala lɛ; ni nɔ ni epila lɛ, mafi maha lɛ; helatsɛ lɛ, mawaje lɛ.” (Ezekiel 34:16) Hɛɛ, ehe baahia ni atao tooi lɛ, akpala amɛ kɛba, afimɔ amɛpilamɔi anɔ, ni awaje amɛ. Israel tookwɛlɔi lɛ ku amɛhiɛ amɛshwie gbɛnaa nii nɛɛ anɔ. Nitsumɔ ni tamɔ nɛkɛ tsumɔ biɔ ni tookwɛlɔ lɛ abɛŋkɛ too ko he kpaakpa ni etsu ehiamɔ nii ahe nii. Titri lɛ, enɛ ji sɔrɔto feemɔ ni esa akɛ eje kpo yɛ nyɛmimɛi asaramɔ fɛɛ saramɔ ni afeɔ ŋmɛnɛ lɛ he.

Kwɛmɔ He Miihia Tooi ni Yɔɔ Hewalɛ Lɛ

Ani esa akɛ wɔmu sane naa akɛ ehe ehiaaa ni ŋmɛnɛŋmɛnɛ beaŋ mumɔŋ tookwɛlɔi lɛ gbalaa amɛjwɛŋmɔ tuutu kɛyaa tooi ni yɔɔ hewalɛ lɛ anɔ? Ojogbaŋŋ, kɛ too diɛŋtsɛ yagbee haomɔ mli lɛ, yelikɛbuamɔ ni akɛaaha lɛ waaa kɛ eyɛ tookwɛlɔ lɛ mli hekɛnɔfɔɔ. Wolo ko kɛɛ akɛ, “yɛ adebɔɔ naa lɛ, tooi tsiɔ amɛhe kɛjɛɔ gbɔmɛi ahe, ni hekɛnɔfɔɔ ni oooha amɛna yɛ omli lɛ bɛ mlɛo yɛ be fɛɛ mli.” Nakai wolo lɛ nɔŋŋ kɛ shishijee gbɛtsɔɔmɔ kɛha omli hekɛnɔfɔɔ ni amɛaana lɛ fata ekrokomɛi ahe eha: “Okɛ kooloi lɛ awie daa. Amɛleɔ ogbee, ni no haa amɛnaa nɔmimaa. Saramɔ tooi lɛ yɛ amɛ lɛɛhei lɛ shii abɔ.”—Alles für das Schaf. Handbuch für die artgerechte Haltung. (Nɔ Fɛɛ Nɔ Kɛha Too Lɛ. Wolo ni Tsɔɔ Bɔ ni Esa akɛ Akwɛ Amɛ Jogbaŋŋ).

No hewɔ lɛ, sharamɔ ni akɛ he aaaye diɛŋtsɛ he miihia kɛ́ wekukpaa ni hekɛnɔfɔɔ yɔɔ mli aaahi tookwɛlɔ lɛ kɛ too lɛ teŋ. Nakai nɔŋŋ eji anɔkwale yɛ Kristofoi asafo lɛ mli. Onukpa ko wie akɛ: “Le ni aleɔ bo yɛ asafo lɛ mli akɛ onukpa ni yasaraa tooi lɛ daa lɛ haa efeɔ mlɛo akɛ oooya mɔ ni kɛ naagbai miikpe lɛ ŋɔɔ.” No hewɔ lɛ, esaaa akɛ mumɔŋ tookwɛlɔi lɛ bɔɔ mɔdɛŋ akɛ amɛaalɛ ni amɛkwɛ tooi lɛ yɛ Maŋtsɛyeli Asa lɛ nɔ pɛ. Esa akɛ onukpai lɛ abɔ mɔdɛŋ ni amɛle tooi lɛ kɛtsɔ amɛsaramɔ yɛ amɛshiai amli lɛ nɔ kɛyashɛ he ni shihilɛi baaŋmɛ gbɛ. Kristofonyo ko kaiɔ akɛ beni eji onukpa ni ahala lɛ ehee lɛ, onukpai asɛinɔtalɔ lɛ tswa lɛ tɛlifon akɛ eya ni eyasara ni eyashɛje nyɛmi nuu ko ni ebiyoo egbo yɛ gbɛjegbɛ nɔ oshara ko ni yɔɔ gbeyei mli lɛ mii. Onukpa lɛ kpɛlɛ nɔ akɛ: “Kwɛ bɔ ni sane lɛ dɔ mi eha, ejaakɛ miyako nyɛmi nuu nɛɛ ŋɔɔ dã, ni mileee he ni eyɔɔ po! Mimu waa beni onukpa ko ni eda yɛ mumɔŋ kɛɛ ebaafata mihe kɛya lɛ.” Hɛɛ, onukpai yeɔ buaa amɛhe yɛ nyɛmimɛi asaramɔ lɛ mli.

Beni asaa he ni afeɔ nɛkɛ saramɔ nɛɛ, ekolɛ asafoŋ sɔɔlɔ ko ni miitao “nitsumɔ kpakpa” akɛ nɔkwɛlɔ kɛ ehe baabɔ onukpa lɛ he. (1 Timoteo 3:1, 13) Kwɛ bɔ ni asafoŋ sɔɔlɔ hiɛ sɔɔ akɛ eeena bɔ ni onukpa lɛ sɔmɔɔ tooi lɛ yɛ be mli ni esaraa tooi lɛ! No hewɔ lɛ, onukpai kɛ asafoŋ sɔɔlɔi fɛɛ bɛŋkɛɔ mɛi fɛɛ ni yɔɔ asafo lɛ mli lɛ, ni ewoɔ Kristofoi asuɔmɔ kɛ ekomefeemɔ kpãa lɛ mli hewalɛ.—Kolosebii 3:14.

Be He Gbɛjianɔtoo Kɛha Nyɛmimɛi Asaramɔ

Beni onukpai akuu ko shi nyɛmimɛi asaramɔ he hegbɛ lɛ amɛha Asafo Woloŋ Nikasemɔ nɔkwɛlɔi lɛ, amɛsara shiɛlɔi ni yɔɔ kui lɛ ekomɛi amli lɛ fɛɛ yɛ nyɔji ekpaa mli, yɛ be mli ni asaraaa mɔ ko yɛ kui krokomɛi lɛ amli. Enɛ ha onukpa ko kɛɛ akɛ: “Etamɔ nɔ ni onukpai lɛ ekomɛi ŋɔɔ hegbɛ lɛ ni amɛkɛ amɛhe woɔ nyɛmimɛi asaramɔ nitsumɔ lɛ mli babaoo, shi nanemɛi onukpai krokomɛi ahewalɛwoo he hiaa onukpai nɛɛ ateŋ mɛi komɛi dani amɛfee nakai.” No hewɔ lɛ, onukpai akui komɛi toɔ gbɛjianɔ koni nɔkwɛlɔi lɛ ayasara shiɛlɔi fɛɛ yɛ be pɔtɛɛ ko ni ato mli.

Shi onukpa loo shiɛlɔ kroko baanyɛ ayasara mɔ ko yɛ asafo lɛ mli ni emɛɛɛ ni ato gbɛjianɔ krɛdɛɛ ko dã. Dani onukpa ko aaayasara nyɛmimɛi lɛ, etswaa tɛlifon ni ekɛɔ akɛ, “Miyasaraa weku kome daa nyɔŋ nɔ. Ani manyɛ mabasara bo ŋmɛlɛtswaa kome loo nɔ̃ yɛ be ko mli yɛ nyɔŋ ni baa lɛ mli? Mɛɛ be enɛ baahi aha bo?”

Nyɛmimɛi Asaramɔ Mli Jɔɔmɔi

Yɛ be mli ni nɔnyɛɛi ni jɛ yiwalɛ gbɛjianɔtoo nɛɛ mli lɛ yaa nɔ efaa lɛ, saramɔi ni woɔ mɔ hewalɛ ni nɔkwɛlɔi ni yɔɔ shishinumɔ lɛ feɔ lɛ bafeɔ nɔ ni he yɔɔ sɛɛnamɔ babaoo. Kɛ atsɔ nyɛmimɛi lɛ asaramɔi anɔ awo mɛi fɛɛ ni yɔɔ asafoku lɛ mli lɛ hewalɛ lɛ, too fɛɛ too nuɔ he akɛ eyɛ shweshweeshwe.

Abɔ amaniɛ yɛ asafo ko ni nɔkwɛlɔi lɛ saraa Maŋtsɛyeli shiɛlɔi lɛ fɛɛ be fɛɛ be lɛ he akɛ: “Shiɛlɔi lɛ na onukpai asaramɔ lɛ he jwɛŋmɔ kpakpa. Ewaaa akɛ shiɛlɔ ko aaaya onukpai lɛ ateŋ mɔ kome ŋɔɔ ni ebi lɛ be ni ebaaba ebasara lɛ ekoŋŋ, akɛni mɔ ni biɔ sane nɛɛ na sanegbaa ni tswaa mɔ maa shi yɛ tsutsu saramɔ lɛ mli lɛ he miishɛɛ hewɔ. Nyɛmimɛi lɛ asaramɔ nɛɛ ji nɔ kome ni ye bua mumɔ ni yɔɔ asafo lɛ mli lɛ.” Amaniɛbɔi krokomɛi tsɔɔ akɛ, kɛ nɔkwɛlɔi lɛ jɛ suɔmɔ mli amɛsɔmɔ yɛ nɛkɛ gbɛ nɔ lɛ, asafo lɛ baanyɛ ada yɛ suɔmɔ, ekomefeemɔ, kɛ miishɛɛ mli. Mɛɛ jɔɔmɔ po nɛ!

Saramɔi ni nɔkwɛlɔi Kristofoi feɔ lɛ haa tooi lɛ yaa amɛhiɛ yɛ mumɔŋ. Onukpai miisumɔ ni amɛwo amɛnanemɛi heyelilɔi lɛ hewalɛ ni amɛwaje amɛ. Kɛ naagba ko ni hiɛdɔɔ yɔɔ mli, ni hiaa ŋaawoo je kpo yɛ saramɔ lɛ mli lɛ, ebaahi jogbaŋŋ akɛ aaato gbɛjianɔ koni awie he yɛ be kroko mli, titri lɛ kɛ asafoŋ sɔɔlɔ ko fata onukpa lɛ he. Bɔ fɛɛ bɔ ni eji lɛ, sɔlemɔ ni akɛgbeɔ nyɛmimɛi asaramɔ lɛ naa lɛ sa.

Ani mumɔŋ tookwɛlɔ ko miisumɔ ni ebasara bo yɛ shia yɛ wɔsɛɛ be ko mli? Kɛ nakai eji lɛ, okɛ miishɛɛ akpa hewalɛwoo ni mɛɔ bo lɛ gbɛ. Eeba ni ebasɔmɔ bo ni ewo bo hewalɛ yɛ ofai shi ni otswa akɛ ooohi gbɛ ni kɛ mɔ yaa naanɔ wala mli lɛ nɔ lɛ mli.—Mateo 7:13, 14.

[Akrabatsa ni yɔɔ baafa 26]

Nyɛmimɛi Asaramɔi Ahe Ŋaawoi

◻ Ato be he gbɛjianɔ aha enɛ: Bei pii lɛ, ehi akɛ aaato be he gbɛjianɔ kpakpa. Kɛ onukpa lɛ eto gbɛjianɔ akɛ ebaatsu naagba ko ni hiɛdɔɔ yɔɔ mli he nii lɛ, ebaahi akɛ eeetsɔ hiɛ ebɔ shiɛlɔ lɛ amaniɛ.

◻ Hesaamɔ: Susumɔ gbɔmɔ lɛ su kɛ baŋ kɛ shihilɛ lɛ he. Jɛɛ otsuiŋ ojie eyi. Ha efee oti ni ma ohiɛ akɛ okɛ “mumɔŋ duromɔ kee nii” ni woɔ mɔ hewalɛ, ni wajeɔ mɔ hemɔkɛyeli aaaha lɛ. —Romabii 1:11, 12.

◻ Mɔ ni baafata ohe kɛya: Onukpa kroko loo asafoŋ sɔɔlɔ ni sa.

◻ Yɛ saramɔ lɛ mli lɛ: Esa akɛ onukpa lɛ agbɔjɔ ehe, etsɔɔ suɔmɔ, ehiɛ jwɛŋmɔ kpakpa, ni efee tswãa. Bi weku lɛ he sane, bɔ ni amɛyaa nɔ amɛhaa, kɛ ekrokomɛi. Bo sane toi jogbaŋŋ. Kɛ naagba ni hiɛdɔɔ yɔɔ mli je kpo lɛ, ebaahi akɛ aaato saramɔ krɛdɛɛ he gbɛjianɔ.

◻ Be ni esa akɛ saramɔ lɛ aye: Ye be ni nyɛto lɛ nɔ, ni oshi yɛ be mli ni mɔ ni osaraa lɛ lɛ nyãa osaramɔ lɛ he lolo lɛ.

◻ Beni agbeɔ saramɔ lɛ naa lɛ: Sɔlemɔ sa, ni hiɛ sɔɔ enɛ waa.—Filipibii 4:6, 7.

[Mfoniri ni yɔɔ baafa 24]

Kristofoi tookwɛlɔi kɛ mumɔŋ hebuu haa

[Mfonirii ni yɔɔ baafa 26]

Nyɛmimɛi asaramɔ haa anaa hegbɛi kpakpai koni akɛ mumɔŋ hewalɛwoo aha