Ta ni Casiodoro de Reina Wuu Kɛha Biblia yɛ Spanish Wiemɔ Mli

AFII ohai nyɔŋma kɛ ekpaa lɛ beaŋ Spain ji he ko ni Biblia kanemɔ fee oshara waa yɛ. Katolik Sɔlemɔ lɛ eha Niseniianifeemɔ lɛ hewalɛ akɛ amɛkpata nɔ fɛɛ nɔ ni amɛbaana akɛ eji odaseyeli bibioo ni teɔ shi woɔ amɛtsɔɔmɔi lɛ hiɛ. Shi obalanyo ko yɛ Spain wuoyigbɛ ni jeee Ŋmalɛi lɛ kɛkɛ ekaneɔ, shi moŋ etswa efai shi akɛ ebaatsɔɔ shishi kɛya amɛmaŋ wiemɔ mli koni Spain nyo fɛɛ Spain nyo anyɛ akane. Egbɛi ji Casiodoro de Reina.

Atee miishɛɛ ni Reina yɔɔ yɛ Biblia lɛ he lɛ shi yɛ afii abɔ ni eye yɛ San Isidro del Campo mɔ kome shihilɔi ashihilɛ he lɛ, yɛ Seville maŋ lɛ klotia, yɛ Spain lɛ mli. Yɛ 1550 afii lɛ amli lɛ, osɔfoi mɔ kome shihilɔi ni yɔɔ nɛkɛ amɛshihilɛ he krɛdɛɛ nɛɛ mli lɛ ateŋ mɛi pii kɛ ŋmɛlɛtswai babaoo kaneɔ Ŋmalɛi lɛ fe nɔ ni amɛkɛyatsuɔ amɛ nitsumɔi ni ahaa amɛ yɛ mɔ kome shihilɔi ashihilɛ he nɛɛ. Ni Biblia lɛ shɛɛ sane lɛ tsake amɛ susumɔ. Amɛkpoo Katolik tsɔɔmɔ ni kɔɔ amagai kɛ nitsumɔ he lɛ kɛ hetsuumɔ he lɛ mli hemɔkɛyeli ni amɛyɔɔ lɛ. Taakɛ akpaa gbɛ lɛ, abale amɛ susumɔi nɛɛ yɛ jɛmɛ niiaŋ fɛɛ, ni akɛni amɛmiishe gbeyei akɛ Spain Niseniianifeemɔ lɛ baaha amɔmɔ amɛ hewɔ lɛ, amɛkpɛ amɛyiŋ akɛ amɛbaajo foi kɛya maŋsɛɛ. Reina ji mɛi 12 ni nyɛ amɛjo foi kɛtee Geneva, yɛ Switzerland lɛ ateŋ mɔ kome.

Yɛ nakai foijee ni shwɛ sharao ni amɔmɔ amɛ lɛ sɛɛ lɛ, efa gbɛ kɛjɛ Europa maŋ kome mli kɛtee ekroko mli, ni be fɛɛ be lɛ, enyɛɔ ejeɔ mɛi ni taoɔ amɛmɔ lɛ ni amɛwa lɛ yi nɛɛ adɛŋ. Yɛ afi 1562 mli lɛ, niseniianifeelɔi lɛ kɛ nijiaŋwujee fee ehe amaga ni amɛshã yɛ Seville, shi nakai yiwalɛ nifeemɔ he gbeyeiwoo lɛ haaa Reina akpa nitsumɔ ni eha ehe ni ji Ŋmalɛi lɛ ashishitsɔɔmɔ lɛ. Yɛ shika ni akɛfɔ̃ shi kɛha mɔ fɛɛ mɔ ni baaye abua ni amɔ lɛ kɛ gbeyeishemɔ shihilɛ mli ni eyɔɔ be fɛɛ be lɛ fɛɛ sɛɛ lɛ, etee nɔ ekɛ ekãa tsu e-Spanish wiemɔ shishitsɔɔmɔ lɛ he nii. Etsɔɔ mli akɛ: “Kɛ jeee bei amli ni mibɛ hewalɛ aloo miifa gbɛ lɛ, . . . niŋmaa tso ejeee midɛŋ kɔkɔɔkɔ.”

Beni shɛɔ afii nyɔŋma lɛ, Reina egbe nitsumɔ lɛ naa. Yɛ 1569 mli lɛ, akala eshishitsɔɔmɔ kɛha Biblia muu lɛ fɛɛ lɛ yɛ Basel, yɛ Switzerland. Nɛkɛ shishitsɔɔmɔ ni sa kadimɔ waa nɛɛ ji klɛŋklɛŋ shishitsɔɔmɔ muu yɛ Spanish wiemɔ mli ni afee kɛjɛ shishijee wiemɔi lɛ amli. Afii ohai abɔ ho ni nine nyɛɔ shɛɔ Latin Bibliai anɔ, shi hiɛnaanɔbii kɛ abladei pɛ nyɛɔ amɛwieɔ Latin wiemɔ lɛ. Reina he eye akɛ esa akɛ mɔ fɛɛ mɔ anyɛ anu Biblia lɛ shishi, ni ekɛ ewala wo oshara mli kɛtsu nakai oti lɛ he nii.

Etsɔɔ eyiŋtoi yɛ eshishitsɔɔmɔ lɛ hiɛkpamɔ wiemɔ lɛ mli. “Ŋmalɛ Krɔŋkrɔŋ lɛ naatsii yɛ maŋbii awiemɔ mli lɛ kɛ ahorabɔɔ kpele ko baa Nyɔŋmɔ nɔ, ni eyeɔ adesai ashihilɛ kpakpa namɔ hu awui. Eka shi faŋŋ akɛ Satan, kɛ mɛi ni ekudɔɔ amɛ lɛ anitsumɔ diɛŋtsɛ nɛ. . . . Yɛ anɔkwale ni eji akɛ Nyɔŋmɔ kɛ e-Wiemɔ lɛ ha adesai, ni eesumɔ ni amɛnu shishi ni amɛteŋ mɔ fɛɛ mɔ kɛtsu nii yɛ edaa gbi shihilɛ mli lɛ hewɔ lɛ, eka shi faŋŋ akɛ mɔ fɛɛ mɔ ni baatsi naa yɛ maŋ nɔ wiemɔ ko mli lɛ nyɛŋ afee mɔ ni hiɛ jwɛŋmɔ kpakpa yɛ nakai feemɔ he.”

Wiemɔ nɛɛ tsɔɔ ekaa diɛŋtsɛ, ejaakɛ eje kpo yɛ be mli ni Woji ni Spain Niseniianifeemɔ lɛ eje gbɛ egu lɛ je gbɛ etsĩ Biblia “ni yɔɔ Castile wiemɔ [Spanish] loo maŋbii foji awiemɔ kroko mli” lɛ tã efata he lɛ sɛɛ afii 18 pɛ. Eyɛ faŋŋ akɛ, Reina eŋmɛɛɛ gbɛ ni gbɔmɔ he gbeyeishemɔ atsĩ suɔmɔ ni eyɔɔ kɛha anɔkwale lɛ naa.

Kɛfata bɔ ni eshweɔ waa akɛ ebaaha gbɔmɛi ni wieɔ Spanish wiemɔ lɛ fɛɛ anine ashɛ Biblia lɛ nɔ lɛ he lɛ, Reina miitao hu ni efee shishitsɔɔmɔ ni ja fe fɛɛ ni eeenyɛ. Yɛ ehiɛkpamɔ wiemɔ lɛ mli lɛ, etsɔɔ sɛɛnamɔi ni yɔɔ shishitsɔɔmɔ ni afeɔ kɛjɛɔ shishijee wiemɔi lɛ amli tɛɛ lɛ he. Tɔmɔi komɛi ebote Vulgate ni aŋma yɛ Latin wiemɔ mli lɛ mli, taakɛ Reina tsɔɔ mli lɛ. Amɛteŋ ekome ni jeɔ kpo faŋŋ ni anaa jogbaŋŋ ji Nyɔŋmɔ gbɛi ni ajie kɛjɛ mli kwraa lɛ.

Nyɔŋmɔ Gbɛi yɛ Spanish Shishitsɔɔmɔi Amli

Reina yɔse akɛ esa akɛ Nyɔŋmɔ gbɛi, Yehowa, aje kpo yɛ Biblia shishitsɔɔmɔ fɛɛ shishitsɔɔmɔ ni afee lɛ jogbaŋŋ lɛ mli, tamɔ bɔ ni eyɔɔ shishijee niŋmaai lɛ amli lɛ. Efeee nɔ ni mɛi fɛɛ feɔ, ni ji sabalai tamɔ “Nyɔŋmɔ” kɛ “Nuntsɔ” ni akɛyeɔ Nyɔŋmɔ gbɛi diɛŋtsɛ lɛ najiaŋ lɛ. Ni etsɔɔ yiŋtoo hewɔ ni efeee enɛ lɛ kɛ wiemɔ ni mli kã shi faŋŋ diɛŋtsɛ, yɛ eshishitsɔɔmɔ lɛ mlibotemɔ wiemɔ lɛ mli.

“Wɔbaa gbɛi (Iehoua) lɛ yi, ejaakɛ wɔhiɛ yiŋtoi ni mli wa waa diɛŋtsɛ yɛ enɛ he. Klɛŋklɛŋ lɛ, ejaakɛ, he fɛɛ he ni abaana gbɛi lɛ yɛ, yɛ wɔ shishitsɔɔmɔ lɛ mli lɛ, nakai nɔŋŋ anaa yɛ Hebri niŋmaa lɛ hu mli, ni wɔsusuɔ akɛ wɔnyɛŋ wɔshi aloo wɔtsake lɛ, ni wɔkɛɛ akɛ wɔyeko anɔkwa ni wɔyeee loo musu ni wɔbɔ wɔshi Nyɔŋmɔ mla, ni ewo akpɔ akɛ akajie nɔ ko nɔ ko kɛmiijɛ mli loo akɛ nɔ ko hu akafata he lɛ he fɔ. . . . Nifeemɔ [ni ji gbɛi lɛ ni ashĩɔ], ni Abonsam woɔ he hewalɛ nɛɛ, je shishi kɛjɛ ŋmɛnɛŋmɛnɛ beaŋ rabifoi ahemɔkɛyeli fɔŋ ko mli, mɛi ni eyɛ mli akɛ amɛkɛɔ akɛ amɛbuɔ gbɛi lɛ moŋ, shi yɛ anɔkwale mli lɛ, amɛtsimɔ E-gbɛi krɔŋkrɔŋ lɛ nɔ, ni amɛha Nyɔŋmɔ webii ahiɛ ekpa nakai gbɛi ni esumɔɔ ni akɛha esoro lɛ kwraa kɛjɛ nyɔŋmɔi krokomɛi . . . fɛɛ he lɛ nɔ.”

Nibii babaoo diɛŋtsɛ jɛ nɔ ni Reina shweɔ yɛ gbɛ kpakpa nɔ akɛ ebaawó Nyɔŋmɔ gbɛi nɔ gojoo nɛɛ mli kɛba. Kɛbashi ŋmɛnɛ, shishitsɔɔmɔi pii ni yɔɔ Spanish wiemɔ mli—ni ji Katolik kɛ Protestant nɔ fɛɛ—enyiɛ nɛkɛ nɔkwɛmɔ nɔ nɛɛ sɛɛ, ni amɛkɛ Nyɔŋmɔ gbɛi ewo shishitsɔɔmɔi lɛ fɛɛ mli. Kɛtsɔ Reina nɔ titri lɛ, mɛi fɛɛ ni kaneɔ Biblia shishitsɔɔmɔ fɛɛ shishitsɔɔmɔ ni yɔɔ Spanish wiemɔ mli lɛ baanyɛ ayoo amrɔ nɔŋŋ akɛ Nyɔŋmɔ yɛ lɛ diɛŋtsɛ egbɛi ni haa esoroɔ lɛ kɛjɛɔ nyɔŋmɔi krokomɛi fɛɛ he.

Nɔ ni sa kadimɔ waa ji anɔkwale ni eji akɛ, anaa Yehowa gbɛi yɛ Hebri wiemɔ mli lɛ faŋŋ yɛ Reina Biblia lɛ baafa ni wolo lɛ gbɛi yɔɔ lɛ. Reina tuu ewala eha nitsumɔ kpakpa ni ji Nyɔŋmɔ Wiemɔ lɛ yibaamɔ, koni nine anyɛ ashɛ nɔ yɛ wiemɔ ni mɛi akpekpei abɔ baanyɛ akane mli.