Mɛɛ Gbɛ Esa akɛ Wɔtsɔ nɔ Wɔsɔle Wɔha Nyɔŋmɔ?

BENI kaselɔ ko bi gbɛtsɔɔmɔ yɛ sɔlemɔ he lɛ, Yesu etsiii enɛ ni ekɛaaha lɛ lɛ naa. Taakɛ Luka 11:2-4 tsɔɔ lɛ, eha hetoo akɛɛ “Kɛ nyɛmiisɔle lɛ, nyɛkɛa akɛ: Ataa, ogbɛi lɛ he atse. Omaŋtsɛyeli lɛ aba. Ha wɔ ŋmɛnɛ wɔ daa ŋmaa. Ni okɛ wɔtɔ̃mɔi ake wɔ, ejaakɛ wɔ hu wɔkɛkeɔ mɔ fɛɛ mɔ ni hiɛ wɔ nyɔmɔ lɛ. Ni okɛ wɔ akaya kaa mli.” (Katolik Douay Version) Ale enɛ waa akɛ Nuntsɔ lɛ Sɔlemɔ. Ekɛ shɛɛ saji babaoo haa.

Klɛŋklɛŋ lɛ, wiemɔ ni tsɔɔ hiɛ kwraa lɛ, kɛɔ wɔ mɔ ni esa akɛ wɔsɔleɔ wɔhaa—wɔkɛha wɔ-Tsɛ. Kadimɔ akɛ Yesu kɛ hegbɛ ko kwraa haaa akɛ asɔle aha mɔ kroko, amaga, “hetselɔ,” loo kɛha lɛ tete po. Yɛ fɛɛ sɛɛ lɛ, Nyɔŋmɔ jaje akɛ: “Mikɛ minunyam lɛ haŋ mɔ kroko, ni mikɛ miyijiemɔ lɛ haŋ nibii ni ashɔ̃shɔ̃i.” (Yesaia 42:8,Dy) No hewɔ lɛ, wɔ ŋwɛi Tsɛ lɛ booo sɔlemɔi ni akɛhaa nɔ kroko loo mɔ kroko fe lɛ lɛ toí, ni bɔ ni jálɔ lɛ yeɔ anɔkwa ehaa lɛ kɔɔɔ he eko. Yehowa Nyɔŋmɔ pɛ atsɛɔ lɛ yɛ Biblia lɛ mli akɛ ‘Sɔlemɔ toibolɔ.’—Lala 65:3.

Ekolɛ mɛi komɛi baakɛɛ akɛ “hetselɔi” tsuɔ nii akɛ mlidamɔlɔi kɛkɛ ni akɛ sɔlemɔ tsɔɔ amɛnɔ kɛyahaa Nyɔŋmɔ. Shi Yesu diɛŋtsɛ tsɔɔ akɛ: “Mi nɔŋŋ ji gbɛ lɛ kɛ anɔkwale lɛ kɛ wala lɛ; mɔ ko baaa tsɛ lɛ ŋɔɔ, akɛ ja etsɔ minɔ. Ni nɔ fɛɛ nɔ ni nyɛaakpa he fai yɛ migbɛi anɔ lɛ, no mafee, koni tsɛ lɛ hiɛ aba nyam yɛ bi lɛ mli.” (Yohane 14:6, 13) No hewɔ lɛ, Yesu jie jwɛŋmɔ ni ahiɛ akɛ mɔ ko ni atsɛɔ lɛ hetselɔ baanyɛ asɔmɔ akɛ mlidamɔlɔ lɛ kɛjɛ jɛmɛ. Agbɛnɛ kadimɔ nɔ ni bɔfo Paulo hu kɛɛ yɛ Kristo he lɛ: “Jeee akɛ egbo kɛha wɔ pɛ kɛkɛ—ete shi kɛjɛ gbohii ateŋ, ni edamɔ Nyɔŋmɔ ninejurɔ nɔ yɛ jɛmɛ, ni edamɔɔ mli ehaa wɔ.” “Eehi shi kɛmiiya naanɔ koni edamɔ mli eha mɛi fɛɛ ni tsɔɔ enɔ kɛbaa Nyɔŋmɔ ŋɔɔ lɛ.”—Romabii 8:34; Hebribii 7:25, Katolik Jerusalem Bible.

Gbɛi ni Esa akɛ Aha Ehe Atse

Yesu sɔlemɔ lɛ mli wiemɔi ni nyiɛ sɛɛ ji: “Ogbɛi lɛ he atse.” Te mɔ ko aaafee tɛŋŋ etse ’ Nyɔŋmɔ gbɛi lɛ he, ni ji akɛ, efee lɛ krɔŋkrɔŋ, loo ejie ema afã, akɛ ja mɔ lɛ le gbɛi lɛ ni ekɛtsu nii? Akɛ gbɛi Yehowa lɛ yɔseɔ Nyɔŋmɔ nɔ ni fe shii 6,000 yɛ “Kpaŋmɔ Momo” lɛ mli.

Shishigbɛ niŋmaa ko ni kɔɔ 2 Mose 6:3 he ni yɔɔ Katolik Douay Version lɛ mli lɛ wie Nyɔŋmɔ gbɛi lɛ he akɛ: “Ŋmɛnɛŋmɛnɛ-bii komɛi kɛ gbɛi Jehovah lɛ ba . . . , ejaakɛ bɔ ni atsɛɔ [Nyɔŋmɔ] gbɛi ahaa diɛŋtsɛ, ni yɔɔ Hebri ŋmalɛ lɛ mli lɛ elaaje kwraa bianɛ, akɛni akɛ tsuuu nii yɛ be kakadaŋŋ mli lɛ hewɔ.” No hewɔ lɛ, Katolik New Jerusalem Bible lɛ kɛ gbɛi Yahweh lɛ tsuɔ nii. Eyɛ mli akɛ woloŋlelɔi komɛi sumɔɔ ni amɛtsɛ gbɛi lɛ nakai moŋ, shi “Yehowa” ji gbɛ ni ato ama shi jeeŋmɔ ni ja yɛ mla naa ni atsɔɔ nɔ atsɛɔ nakai gbɛi ni jɛ ŋwɛi lɛ yɛ Ŋleshi wiemɔ mli. Wiemɔi krokomɛi yɛ gbɛi ni amɛ diɛŋtsɛ amɛtsɔɔ nɔ amɛtsɛɔ gbɛi ni jɛ ŋwɛi lɛ. Nɔ ni fe fɛɛ ji gbɛi lɛ ni wɔkɛaatsu nii ni wɔtse he. Ani osɔlemɔ lɛ etsɔɔ bo akɛ, okɛ gbɛi ni ji Yehowa lɛ atsu nii yɛ sɔlemɔ mli?

Nibii ni Sa ni Abaanyɛ Asɔle yɛ He

Sɛɛ mli lɛ Yesu tsɔɔ ekaselɔi lɛ ni amɛsɔle akɛ: “Omaŋtsɛyeli lɛ aba.” Mateo Sanekpakpa lɛ kɛ wiemɔi nɛɛ fataa he akɛ: “Afee osuɔmɔnaa nii yɛ shikpɔŋ nɔ taakɛ afeɔ yɛ ŋwɛi lɛ.” (Mateo 6:10, Dy) Nyɔŋmɔ Maŋtsɛyeli lɛ ji nɔyeli ni yɔɔ Yesu Kristo dɛŋ. (Yesaia 9:5, 6) Taakɛ Biblia gbalɛ tsɔɔ lɛ, etsɛŋ ni ebaajie adesai yɛ anɔyelii fɛɛ kɛya, ni ekɛ jeŋ fɛɛ toiŋjɔlɛ be baaba. (Lala 72:1-7; Daniel:44; Kpojiemɔ 21:3-5) No hewɔ lɛ anɔkwa Kristofoi haa Maŋtsɛyeli ni baa lɛ feɔ saneyitso ni amɛfɔɔ he wiemɔ yɛ amɛsɔlemɔi amli. Ani osɔlemɔ lɛ etsɔɔ bo akɛ ofee nakai?

Nɔ ni yɔɔ miishɛɛ ji akɛ, Yesu tsɔɔ hu akɛ, nɔ ni baanyɛ afata wɔ sɔlemɔi ahe ji saji ni kɔɔ wɔhe. Ekɛɛ: “Ha wɔ ŋmɛnɛ wɔ daa ŋmaa. Ni okɛ wɔtɔ̃mɔi ake wɔ, ejaakɛ wɔ hu wɔkɛkeɔ mɔ fɛɛ mɔ ni hiɛ wɔ nyɔmɔ lɛ. Ni okɛ wɔ akaya kaa mli.” (Luka 11:3, 4, Dy) Yesu wiemɔi lɛ tsɔɔ akɛ wɔbaanyɛ wɔtao nɔ ni ji Nyɔŋmɔ suɔmɔnaa nii yɛ daa gbi saji amli, ni wɔbaanyɛ wɔbɛŋkɛ Yehowa yɛ nɔ fɛɛ nɔ ni baanyɛ ahao wɔ, loo ni baanyɛ agba wɔjwɛŋmɔŋ toiŋjɔlɛ naa lɛ mli. Nyɔŋmɔ ni wɔɔbi lɛ nii daa yɛ nɛkɛ gbɛ nɔ lɛ yeɔ ebuaa wɔ koni wɔhiɛ asɔ wɔhe ni wɔkɛfɔɔ enɔ lɛ. Enɛ haa wɔhiɛ hiɔ hewalɛ ni enaa yɛ wɔ shihilɛi anɔ lɛ nɔ babaoo. Nyɔŋmɔ ni wɔɔbi lɛ gbi fɛɛ gbi ni ekɛ wɔ tɔ̃mɔi ake wɔ lɛ he miihia nakai nɔŋŋ. Yɛ nakai feemɔ mli lɛ wɔhiɛ bahiɔ wɔ gbɔjɔmɔi anɔ babaoo—ni wɔŋmɛɔ wɔtsui shi babaoo yɛ mɛi krokomɛi afatɔɔi ahewɔ. Ŋaawoo ni Yesu kɛha akɛ wɔsɔle koni ajie wɔ kɛjɛ kaa mli lɛ hu sa jogbaŋŋ, titri lɛ, yɛ bɔ ni je nɛŋ jeŋbai fiteɔ lɛ hewɔ. Yɛ nakai sɔlemɔ lɛ kɛ gbeekpamɔ naa lɛ, wɔkwɛɔ wɔhe nɔ jogbaŋŋ, koni wɔkwa nifeemɔi kɛ shihilɛi ni baanyɛ ekɛ wɔ abote nɔ fɔŋ feemɔ mli lɛ.

Belɛ, sanebimɔ ko kwraa bɛ he akɛ, Nuntsɔ lɛ Sɔlemɔ lɛ tsɔɔ wɔ sɔlemɔi ni saa Nyɔŋmɔ hiɛ ni wɔɔsɔle lɛ he nii babaoo. Shi ani Yesu jwɛŋmɔ ji ni wɔŋɔ sɔlemɔ nɛɛ ni wɔtĩ mli wɔkɛɛ daa kɛkɛ?

Sɔlemɔ he Ŋaawoo ni Akɛhaa Lolo

Yesu kɛ sɔlemɔ he gbɛtsɔɔmɔi ha lolo. Wɔkaneɔ yɛ Mateo 6:5, 6 akɛ: “Kɛ oosɔle lɛ, kaatamɔ osatofoi lɛ; shi amɛsumɔɔ akɛ amɛdamɔ kpeehei lɛ kɛ gbɛjegbɛi akoji lɛ anaa amɛsɔle, koni mɛi ana amɛ. . . . Shi bo lɛ, kɛ oosɔle lɛ, botemɔ opia mli, ni oŋa oshinaa lɛ, ni osɔle oha otsɛ yɛ teemɔ mli, ni otsɛ ni naa teemɔ mli nii lɛ aaawoo nyɔmɔ yɛ faŋŋ.” Nɔ ni wiemɔi nɛɛ tsɔɔ wɔ ji akɛ, esaaa akɛ asɔleɔ yɛ gbɛ ni afeɔ akɛtsɔɔ mɛi lɛ nɔ, kɛ henɔwomɔ, bɔni afee ni akɛsa mɔ ko hiɛ. Ani ofɔseɔ otsui eshwieɔ Yehowa nɔ yɛ teemɔŋ, taakɛ Biblia lɛ woɔ he hewalɛ lɛ?—Lala 62:9.

Yesu kɛ ŋaawoo nɛɛ ha: “Kɛ nyɛmiisɔle lɛ, nyɛkatĩa nɔ kome mli nyɛkɛɔ shii abɔ tamɔ wɔŋjalɔi lɛ feɔ lɛ, ejaakɛ amɛsusuɔ akɛ amɛ wiemɔi babaoo lɛ nɔ amɛbaatsɔ koni abo amɛ toi.” (Mateo 6:7, JB) Yɛ faŋŋ mli lɛ, Yesu ekpɛlɛɛɛ sɔlemɔi ni akaseɔ awoɔ yitsoŋ lɛ nɔ aahu ni eeekpɛlɛ nɔ ni akaneɔ kɛjɛɔ wolo mli lɛ nɔ. Ewiemɔi lɛ jieɔ rosary ni akɛtsuɔ nii lɛ hu kɛjɛɔ mli.

Katolik (missal) wolo ko ni aŋmala sɔlemɔ awo mli kpɛlɛ sane nɛɛ nɔ akɛ: “Wɔ sɔlemɔ ni hi fe fɛɛ baanyɛ afee wɔsusumɔi ni wɔjieɔ lɛ kpo trukaa, beni wɔyaa eŋɔɔ kɛ shidaa loo beni nɔ ko he miihia wɔ, bei komɛi lɛ yɛ awerɛhoyeli bei amli, loo yɛ jamɔ ni wɔkɛhaa lɛ daa gbi lɛ mli.” Yesu diɛŋtsɛ sɔle trukaa, jeee nɔ ni ekase ewo eyitsoŋ. Akɛ nɔkwɛmɔ nɔ lɛ, kanemɔ Yesu sɔlemɔ ni aŋma yɛ Yohane yitso 17 lɛ. Ekɛ ehe kpɛtɛɔ sɔlemɔ he nɔkwɛmɔ nɔ lɛ he, ni emaa bɔ ni Yesu sumɔɔ ni ena ni atse Yehowa gbɛi ahe lɛ nɔ mi. Yesu sɔleɔ trukaa, ni eji sɔlemɔ ni mli wa ni jɛ tsuiŋ tɔ̃ɔ.

Sɔlemɔi ni Nyɔŋmɔ Boɔ Toi

Kɛ atsɔɔ bo akɛ osɔle sɔlemɔi ni akaseɔ awoɔ yitsoŋ, koni osɔle oha “hetselɔi” loo amagai, loo okɛ jamɔ mli nibii tamɔ rosary atsu nii lɛ, klɛŋklɛŋ lɛ, jwɛŋmɔ ni tsɔɔ akɛ asɔle yɛ gbɛ ni Yesu etsɔɔ lɛ nɔ lɛ baaha otsui afa. Shi kɛlɛ, oti lɛ ji, ni ale Nyɔŋmɔ—egbɛi, eyiŋtoi, esui. Obaanyɛ ofee enɛ kɛtsɔ Biblia lɛ kasemɔ fitsofitso nɔ. (Yohane 17:3) Yehowa Odasefoi efee klalo ni amɛmiisumɔ ni amɛye amɛbua bo yɛ enɛ gbɛfaŋ. Ejaakɛ amɛye amɛbua mɛi akpekpei abɔ yɛ je lɛŋ fɛɛ, koni ‘amɛsa amɛnaa amɛkwɛ, ni amɛna akɛ Yehowa hi’! (Lala 34:9) Babaoo ni oleɔ Nyɔŋmɔ lɛ, babaoo no baatsirɛ bo koni ojie eyi yɛ sɔlemɔ mli. Shii abɔ ni otsiɔ obɛŋkɛɔ Yehowa yɛ sɔlemɔ ni woo yɔɔ mli lɛ mli lɛ, shiiabɔ ni wekukpaa ni kã okɛ lɛ teŋ lɛ mli baawa babaoo ji no.

No hewɔ lɛ aawo Nyɔŋmɔ anɔkwa jálɔi fɛɛ hewalɛ akɛ, “nyɛsɔlea ni nyɛkafɔ̃ɔa.” (1 Tesalonikabii 5:17) Kwɛmɔ ni osɔlemɔi lɛ kɛ Biblia lɛ akpa gbee jogbaŋŋ kɛmɔ shi yɛ anɔkwale mli, yɛ be mli ni ŋaawoi ni Yesu Kristo kɛha lɛ fata he. Yɛ nɛkɛ gbɛ nɔ lɛ, obaanyɛ ona nɔmimaa akɛ Nyɔŋmɔ baakpɛlɛ osɔlemɔi anɔ.

[Mfonirii ni yɔɔ baafa 7]

Babaoo ni wɔkaseɔ Yehowa he nii lɛ, babaoo no tsirɛɔ wɔ koni wɔjɛ wɔtsuiŋ wɔsɔle wɔha lɛ