Nɛgbɛ Abaanyɛ Ana Anɔkwa Miishɛɛ Yɛ?

MƐI pii nuɔ he akɛ abaanyɛ ana anɔkwa miishɛɛ kɛtsɔ heloo gbɛfaŋ nibii ni aaana nɔ. Ni bo hu? Yɛ be mli ni heloo gbɛfaŋ nibii baanyɛ aha wɔna miishɛɛ ko lɛlɛŋ lɛ, amɛhaaa ehi shi; ni asaŋ gbɔmɔtsoŋ miishɛɛnamɔi etswaaa hemɔkɛyeli emaaa shi loo ni eeeha ana mumɔŋ hiamɔ nii.

Yesu Kristo kɛɛ yɛ e-Gɔŋ nɔ Shiɛmɔ lɛ mli akɛ: “Miishɛɛ ji mɛi ni amɛhiɛ yɔɔ amɛmumɔŋ hiamɔ nii anɔ lɛ, ejaakɛ ŋwɛi maŋtsɛyeli lɛ ji amɛnɔ.” (Mateo 5:3, NW) Yesu kɛɛ hu akɛ: “Nyɛhiɛ ahia nyɛhe nɔ jogbaŋŋ yɛ hiɛjoomɔ hewɔ; ejaakɛ jeee gbɔmɔ nii ni ena ni eteke nɔ lɛ mli ewala yɔɔ.”—Luka 12:15.

Mɛi pii taoɔ miishɛɛ kɛtsɔɔ bɔlɛnamɔ ni mla eŋmɛɛɛ gbɛ kɛ “heloo lɛ nitsumɔi” krokomɛi ni amɛkɛ amɛhe woɔ mli lɛ anɔ. (Galatabii 5:19-21) Ni kɛlɛ, he ni aŋmɛɔ ahaa bɔlɛnamɔ mli ŋɔɔmɔyelii lɛ kɛ anɔkwa miishɛɛ ni hiɔ shi daa haaa mɔ ko. Yɛ anɔkwale mli lɛ, mɛi ni feɔ nɛkɛ nibii nɛɛ anine shɛŋ Nyɔŋmɔ Maŋtsɛyeli lɛ nɔ.—1 Korintobii 6:9, 10.

Mɛi krokomɛi kwɛɔ mligbɛ yɛ miishɛɛ ni amɛtaoɔ lɛ hewɔ, kɛtsɔ mɔdɛŋ ni amɛ diɛŋtsɛ amɛbɔɔ koni amɛtswa amɛ diɛŋtsɛ amɛ bulɛ amɛma shi lɛ nɔ. Woji atoohei kɛ shwapoi ni hɔ̃ɔ woji eyimɔ obɔbɔ kɛ woji ni tsɔɔ nɔ ni mɔ baanyɛ afee aha lɛ diɛŋtsɛ ehe, shi woji ni tamɔ nɛkɛ kɛ miishɛɛ ni hiɔ shi daa hako gbɔmɛi. No hewɔ lɛ, nɛgbɛ wɔbaanyɛ wɔna miishɛɛ diɛŋtsɛ lɛ yɛ?

Kɛ wɔɔna miishɛɛ diɛŋtsɛ lɛ, esa akɛ wɔyoo wɔ mumɔŋ hiamɔ nii ni akɛfɔ wɔ lɛ. Yesu kɛɛ: “Miishɛɛ ji mɛi ni amɛhiɛ yɔɔ amɛmumɔŋ hiamɔ nii anɔ lɛ.” Ni kɛlɛ, ehe baŋ sɛɛnamɔ babaoo kɛhaŋ wɔ akɛ wɔɔnu hiamɔ nɛɛ shishi, shi wɔfeee he nɔ ko. Akɛ nɔkwɛmɔ nɔ lɛ: Mɛni baaba mɔ ni joɔ foi kakadaŋŋ ni tsuuu nu ni egbɔmɔtso lɛ biɔ yɛ foidamɔ lɛ sɛɛ lɛ he nii lɛ nɔ? Ani etsɛŋ ni egbɔmɔtso lɛ mli nu baata ni nibii krokomɛi ni hiɛdɔɔ yɔɔ mli baaba enɔ? Nakai nɔŋŋ hu kɛji akɛ wɔtsuuu wɔ mumɔŋ niyenii kpakpai ni he hiaa wɔ lɛ ahe nii lɛ, yɛ naagbee lɛ wɔbaagbi yɛ mumɔŋ. Enɛ haŋ wɔna miishɛɛ.

Yesu yɔse emumɔŋ hiamɔ nii lɛ fɛɛ, ni ekaseɔ nii ni ejwɛŋɔ Nyɔŋmɔ Wiemɔ lɛ nɔ daa. Enyɛɔ eleɔ ni ekaneɔ Ŋmalɛi Krɔŋkrɔŋi lɛ fai lɛ yɛ gbɛ ni waaa kwraa nɔ, ni etsɔɔ mɛi koni amɛfee nakai nɔŋŋ. (Luka 4:16-21; okɛto Efesobii 4:20, 21 he.) Yesu kɛ eŋwɛi Tsɛ lɛ suɔmɔnaa nifeemɔ hu to niyenii he. Nyɔŋmɔ suɔmɔnaa nii ni efeɔ lɛ ha ena miishɛɛ babaoo.—Yohane 4:34.

Hɛɛ, anyɛŋ ana anɔkwa miishɛɛ kɛtsɔ heloonaa nibii anaabuamɔ nɔ; ni asaŋ miishɛɛ baaa yɛ heloo ni egbee shi lɛ akɔnɔ nii ni adiɔ sɛɛ lɛ hewɔ. Anɔkwa miishɛɛ ji tsuiŋ shihilɛ ko, ni damɔ anɔkwa hemɔkɛyeli kɛ wekukpaa kpakpa ni kã mɔ kɛ Yehowa Nyɔŋmɔ teŋ lɛ nɔ. Belɛ, bɔ ni lalatsɛ David la nɛɛ sa jogbaŋŋ: “Miishɛɛ ji gbɔmɛi ni Yehowa ji amɛ-Nyɔŋmɔ lɛ.”—Lala 144:15b, NW.

[Mfoniri ni yɔɔ baafa 23]

Hemɔkɛyeli kɛ mɔ kɛ Nyɔŋmɔ teŋ wekukpaa kpakpa baaha ona anɔkwa miishɛɛ