Sanebimɔi ni Jɛ Kanelɔi Adɛŋ

Ani abaanyɛ akɛɛ akɛ shishinumɔ hee ni wɔna nyɛsɛɛ nɛɛ, yɛ wiemɔ “yinɔ” ni yɔɔ Mateo 24:34 lɛ he lɛ ŋmɛɔ gbɛ ni wɔsusu akɛ nibii agbɛjianɔtoo lɛ naagbee lɛ sɛɛ baanyɛ atsɛ kɛya wɔsɛɛ be mli shɔŋŋ?

Eka shi faŋŋ akɛ jeee nakai kwraa sane lɛ ji. Nɔ ni tamɔɔɔ nakai lɛ, esa akɛ shishinumɔ hee ni etee hiɛ yɛ sane nɛɛ he lɛ aye abua wɔ koni wɔkpa naagbee lɛ gbɛ be fɛɛ be. Yɛ mɛɛ gbɛ nɔ?

Ojogbaŋŋ, taakɛ November 1, 1995, Buu-Mɔɔ lɛ tsɔɔ mli lɛ, Yesu kɛ wiemɔ kuku ni ji “yinɔ nɛɛ” tsu nii kɛkɔ gbɔmɛi fɔji ni yɔɔ nakai be lɛ mli lɛ ahe. (Mateo 11:7, 16-19; 12:39, 45; 17:14-17; Bɔfoi lɛ Asaji 2:5, 6, 14, 40) Ejeee wiemɔ ni kɛ́ aaakɛɛ lɛ, etsɔɔ be sɛɛkɛlɛ pɔtɛɛ ko ni jeɔ shishi yɛ gbi pɔtɛɛ ko nɔ.

Yɛ anɔkwale mli lɛ, “Sanebimɔi ni Jɛ Kanelɔi Adɛŋ” ni yɔɔ nakai Buu-Mɔɔ lɛ nɔŋŋ mli lɛ gbala jwɛŋmɔ kɛtee nibii titrii enyɔ nɔ: “Anyɛŋ asusu gbɔmɛi ayinɔ ko he akɛ be kpalaŋŋ ko ni hiɛ afii pɔtɛɛ komɛi ni ato ama shi” kɛ, “Kɛ́ akɛaato he lɛ, yinɔ kome mli gbɔmɛi hiɔ shi yɛ be kuku mli.”

Wɔfɔɔ “yinɔ” kɛ nitsumɔ yɛ gbɛ ni tamɔ nɛkɛ nɔ. Akɛ nɔkwɛmɔ nɔ lɛ, wɔbaanyɛ wɔkɛɛ akɛ, ‘Asraafoi ni hi shi yɛ Napoléon yinɔ lɛ leee kɔɔyɔŋ lɛji kɛ atɔmik okpɛlɛmii ahe nɔ ko.’ Ani asraafoi ni afɔ́ amɛ yɛ afi nɔ ni afɔ́ Napoléon lɛ pɛ ahe sane wɔwieɔ lɛ? Ani wɔmiitsɔɔ nakai French asraafoi ni gboi dani Napoléon gbo lɛ pɛ kɛkɛ? Dabi kwraa; ni asaŋ wɔkɛ wiemɔ “yinɔ” ni akɛtsu nii nɛɛ etsɔɔɔ akɛ wɔmiibɔ mɔdɛŋ ni wɔto afii komɛi wɔma shi. Shi moŋ wɔmiitsɔɔ be fioo ko, kɛ́ akɛto he, jeee afii ohai abɔ kɛjɛ Napoléon be lɛ mli kɛmiiya wɔsɛɛ be mli.

Etamɔ shishinumɔ ni wɔhiɛ yɛ nɔ ni Yesu wie yɛ egbalɛ ni ekɛha yɛ Mu Gɔŋ lɛ nɔ lɛ mli lɛ he lɛ. Nakai gbalɛ lɛ mli okadii sɔrɔtoi lɛ amlibaa mãa nɔ mi akɛ nibii agbɛjianɔtoo nɛɛ naagbee ebɛŋkɛ. (Mateo 24:32, 33) Kaimɔ akɛ taakɛ Kpojiemɔ 12:9, 10 tsɔɔ lɛ, beni ato Nyɔŋmɔ ŋwɛi Maŋtsɛyeli lɛ shishi yɛ 1914 lɛ, ashɛ Satan afɔ̃ shikpɔŋ nɛɛ nɔ. Kpojiemɔ kɛfataa he akɛ amrɔ nɛɛ Satan mli efu naakpa. Mɛni hewɔ? Ejaakɛ ele akɛ “be fioo kɛkɛ eyɔɔ.” (Wɔma efã ko nɔ mi.)—Kpojiemɔ 12:12.

Belɛ eja jogbaŋŋ akɛ November 1, Buu-Mɔɔ lɛ hiɛ yitso bibioo ko akɛ: “ ‘Nyɛsaraa’!” Kuku ni nyiɛ sɛɛ lɛ tee nɔ ewie yɛ gbɛ ni sa jogbaŋŋ nɔ akɛ: “Ehe ehiaaa ni wɔle be pɔtɛɛ ni ato ni nibii baaba. Shi moŋ, esa akɛ wɔjwɛŋmɔ ahi saramɔ ni wɔɔsara, ni wɔna hemɔkɛyeli ni mli wa, ni wɔkɛ wɔ dekã fɛɛ atsu nii yɛ Yehowa sɔɔmɔ mli lɛ nɔ—jeee be he akɔntaa ni wɔɔbu.” Kɛkɛ ni etsɛ Yesu wiemɔi lɛ asɛɛ akɛ: “Nyɛkwɛa jogbaŋŋ, nyɛshia kpe ni nyɛsɔlea; ejaakɛ nyɛleee beyinɔ ni be lɛ shɛɔ. Shi nɔ ni mikɛɛɔ nyɛ nɛɛ, mɛi fɛɛ mikɛɛɔ: Nyɛsaraa!”—Marko 13:33, 37.