Ani Okaiɔ?

Ani onaa akɛ Buu-Mɔɔ ni baa nyɛsɛɛ nɛɛ lɛ ahe yɛ sɛɛnamɔ kɛha bo? Belɛ mɛni hewɔ okɛ sanebimɔi ni nyiɛ sɛɛ nɛɛ ekaaa ojwɛŋmɔ okwɛɛɛ?

◻ Te Harmagedon baatamɔ aha tɛŋŋ? (Kpojiemɔ 16:14, 16)

Efeŋ nuklea hiɛkpatamɔ loo amanehulu ko ni gbɔmɛi kɛbaaba. Dabi, eji Nyɔŋmɔ ta ni ekɛbaafo adesai atai fɛɛ sɛɛ, koni agbɛnɛ ekɛ anɔkwa toiŋjɔlɛ abaha mɛi ni sumɔɔ toiŋjɔlɛ. Eshashaoŋ shi. (Habakuk 2:3)—4/15, baafa 17.

◻ Mɛɛ yookpeemɔ nɛkɛ woɔ Yehowa hiɛ nyam?

Yookpeemɔ ni mumɔŋ nibii feɔ nibii titrii yɛ shishi fe je lɛŋ nibii woɔ Yehowa hiɛ nyam diɛŋtsɛ. Kristofoi baaná be lɛ he miishɛɛ waa kɛ́ amɛkwa je lɛŋ kusumii ni ehiii, apasa hemɔkɛyelii, kɛ nibii ni afeɔ kɛtekeɔ nɔ; kɛ́ amɛhaaa egba teokrase nitsumɔi ni yaa nɔ be fɛɛ be lɛ anaa; kɛ agbɛnɛ kɛ́ amɛjie hiɛshikamɔ moŋ kpo fe nibii ni afeɔ atsɔɔ.—4/15, baafa 26.

◻ Mɛni kadiɔ nuu ni hiɛɔ emuuyeli mli lɛ?

Abaanyɛ ahe nuu ni hiɛɔ emuuyeli mli lɛ aye, ni jeee enaanyo gbɔmɔ pɛ baanyɛ afee nakai, shi nɔ ni he hiaa titri lɛ, Nyɔŋmɔ. Anaa gbɔmɔ ni tamɔ nɛkɛ lɛ tsui krɔŋŋ lɛ yɛ enifeemɔi amli. Efeee osato. Ejeee mɔ ni esane bɛ tɛ̃ɛ loo mɔ ni ekpɔtɔ. (2 Korintobii 4:2)—5/1, baafa 6.

◻ Mɛni hewɔ Yeremia kɛɛ akɛ: “Ehi ha nuu akɛ etereɔ ekɔŋtso yɛ ebalahiiaŋ” lɛ? (Yaafo 3:27)

Ni aaakase bɔ ni aaafee adamɔ kaai anaa beni mɔ ko ji obalanyo lɛ yeɔ ebuaa lɛ ni esaa lɛ koni ekpee kaai anaa beni eda. (2 Timoteo 3:12) Anɔkwayeli mli sɛɛnamɔi lɛ fa kwraa fe sane he ni aŋmɛɛɔ koni akɛsaa, ni haa mɔ he jɔɔ lɛ yɛ be fioo ko mli lɛ.—5/1, baafa 32.

◻ Mose kɛ Elia ni pue yɛ tsakemɔ lɛ he ninaa lɛ mli lɛ feɔ mɛni he mfoniri?

Yɛ tsakemɔ lɛ he sane lɛ mli lɛ, Mose kɛ Elia feɔ Yesu nyɛmimɛi ni afɔ amɛ mu lɛ ahe mfoniri ni sa. Akɛ, amɛkɛ Yesu fɛɛ ni ‘pue yɛ anunyam mli’ lɛ feɔ mfoniri ko ni tsɔɔ akɛ abaawo Kristofoi anɔkwafoi ni afɔ amɛ mu lɛ ‘fɛɛ hiɛ nyam’ kɛ Yesu yɛ ŋwɛi Maŋtsɛyeli gbɛjianɔtoo lɛ mli. (Luka 9:30, 31; Romabii 8:17; 2 Tesalonikabii 1:10)—5/15, baafai 12, 14.

◻ Mɛni ji Nyɔŋmɔ ‘teemɔŋ sane krɔŋkrɔŋ’ lɛ? (1 Korintobii 2:7)

Nyɔŋmɔ ‘teemɔŋ sane krɔŋkrɔŋ’ lɛ kɔɔ Yesu Kristo he. (Efesobii 1:9, 10) Shi, ejeee Yesu akɛ Mesia ni awo shi yɛ ehe lɛ yɔsemɔ kɛkɛ. Ekɔɔ ŋwɛi nɔyeli, Nyɔŋmɔ Mesia Maŋtsɛyeli lɛ, kɛ nitsumɔ ni akɛwo Yesu dɛŋ akɛ etsu yɛ Nyɔŋmɔ yiŋtoo mli lɛ he.—6/1, baafa 13.

◻ Te esa akɛ Kristofonyo asusu gbɔlɛ loo hela ni yaa hiɛ lɛ he eha tɛŋŋ?

Yɛ nɔ najiaŋ ni eeesusu kaai nɛɛ ahe akɛ etsiɔ sɔɔmɔ ni ekɛhaa Yehowa lɛ naa lɛ, esa akɛ esusu enɛɛmɛi ahe akɛ hegbɛ ni ekɛaaha ehe ni ekɛfɔ̃ɔ enɔ lɛ aya hiɛ. Esa akɛ ekai hu akɛ, jeee Kristofonyo lɛ nitsumɔ pɛ nɔ adamɔɔ anaa bɔ ni eji, shi moŋ anaa kɛtsɔɔ ehemɔkɛyeli kɛ esuɔmɔ ni eyɔɔ lɛ falɛ hu nɔ. (Marko 12:41-44)—6/1, baafa 26.

◻ Yɛ mɛɛ gbɛ nɔ gbɔmɛi ni Yehowa kɛ amɛ tsu nii koni amɛŋma Biblia lɛ tsɔ̃ɔ enilee ni fa babaoo?

Eji adesa he nɔ̃ ko bɛ mli kwraa kulɛ, ebaawa akɛ wɔɔnu Biblia mli shɛɛ sane lɛ shishi. Agbɛnɛ hu miishɛɛ, sɔrɔtofeemɔ, kɛ henumɔ ni adesa he nii kɛhaa lɛ yɛ Biblia lɛ mli.—6/15, baafa 8.

◻ Mɛni ji nɔ̃ diɛŋtsɛ ni kɛ weku miishɛɛnamɔ baa?

Nɔ̃ diɛŋtsɛ lɛ yɛ Nyɔŋmɔ Wiemɔ ni ji Biblia lɛ baafai lɛ amli, kɛ eshishitoo mlai, tamɔ henɔyeli, yitsoyeli yɔsemɔ, sanegbaa kpakpa, kɛ suɔmɔ hu.—6/15, baafai 23, 24.

◻ Yɛ mɛɛ gbɛ nɔ helatsamɔ ni Yesu fee lɛ yɔɔ sɔrɔto kwraa yɛ mɛi ni ŋmɛnɛ amɛkɛɔ akɛ amɛyɛ hewalɛi ni amɛkɛtsaa mɛi lɛ anɔ̃ lɛ he?

Gbɔmɛi asafokui lɛ ejieee henumɔ ni naa wa ko kpo, ni Yesu bolɔɔɔ kɛ hekpokpomɔ ko hu. Kɛfata he lɛ, be ko baaa ni Yesu nyɛɛɛ atsa helatsɛ ko koni ekɛɛ akɛ amɛ afɔleshãa nii lɛ faaa loo amɛbɛ hemɔkɛyeli hewɔ.—7/1, baafa 5.

◻ Yɛ mɛɛ gbɛ nɔ Yehowa eye ebua ewebii lɛ koni amɛná gbɛhe ko yɛ eŋwɛi yiŋtoo ni kɔɔ egbɛi lɛ kɛ e-Maŋtsɛyeli lɛ he lɛ mli?

Klɛŋklɛŋ lɛ, Yehowa kɛ anɔkwale lɛ ha ewebii lɛ. Nɔ ni ji enyɔ lɛ, ekɛ emumɔ krɔŋkrɔŋ lɛ ha amɛ. Ni nɔ ni ji etɛ̃ lɛ, wɔyɛ wɔ jeŋ muu fɛɛ nyɛmifeemɔ lɛ kɛ Yehowa asafo lɛ gbɛjianɔtoo kɛha jamɔ lɛ.—7/1, baafai 19, 20.

◻ Mɛni ji jeŋba kpakpa?

Jeŋba kpakpa ji subaŋ kpakpa ni nɔ bɛ, ejurɔfeemɔ, nifeemɔ kɛ susumɔ ni ja. Ejeee su ko ni nyɛɛɛ akanya mɔ, shi nɔ ni yɔɔ kamkam, ni tsuɔ nɔ ni ja. Jeŋba kpakpa tsɔɔ babaoo fe esha ni aaakwa; etsɔɔ ekpakpa sɛɛ ni adiɔ. (1 Timoteo 6:11)—7/15, baafa 14.

◻ Mɛni ji gboshinii ni hi fe fɛɛ ni fɔlɔi baanyɛ amɛkɛha amɛbii?

Gboshinii ni hi fe fɛɛ lɛ ji amɛ diɛŋtsɛ amɛ nɔkwɛmɔ nɔ yɛ suɔmɔ ni amɛjieɔ lɛ kpo amɛtsɔɔ mɛi krokomɛi lɛ mli. Nɔ ni he hiaa fe fɛɛ lɛ, ehe miihia ni gbekɛbii ana ni amɛnu ni amɛfɔlɔi miiwie ni amɛmiijie suɔmɔ diɛŋtsɛ kɛha Nyɔŋmɔ lɛ kpo, ni eeje kpo hu yɛ nibii fɛɛ ni amɛfeɔ lɛ mli.—7/15, baafa 21.

◻ Mɛni ji nibii komɛi ni he hiaa kɛha weku nikasemɔ ni mɔɔ shi?

Esa akɛ weku nikasemɔ lɛ aya nɔ daa. Esa akɛ ‘ohe be’ kɛha nikasemɔ lɛ. (Efesobii 5:15-17) Ha nikasemɔ bei lɛ afee nɔ ni miishɛɛ yɔɔ mli kɛha gbekɛbii lɛ kɛtsɔ Biblia lɛ ni oooha eba shihilɛ mli diɛŋtsɛ lɛ nɔ. Kɛ gbekɛbii aaana he miishɛɛ lɛ, belɛ esa akɛ amɛnu he akɛ amɛfata he.—8/1, baafai 26, 28.