Maŋtsɛyeli Jajelɔi Bɔ Amaniɛ
Ní Aaaye Kaai Amli Kunim yɛ “Shikpɔŋ ni Akpaaa Gbɛ” Nɔ
BƆFO Paulo bi klɛŋklɛŋ afii oha lɛ mli Kristofoi ni yɔɔ Korinto lɛ akɛ: “Ejaakɛ kɛji tɛtɛrɛmantɛrɛ egbɛɛɛ gbɛɛmɔ ni yɔɔ faŋŋ lɛ, namɔ aaasaa ehe ato ta? Nakai nɔŋŋ kɛ̃ ji nyɛ hu yɛ lilɛi gbɛfaŋ: kɛji nyɛwieee wiemɔ ni shishi yɔɔ faŋŋ lɛ, te aaafee tɛŋŋ ni aaale nɔ ni akɛɔ lɛ?”—1 Korintobii 14:8, 9.
Yɛ Papua New Guinea, ní afɔɔ lɛ tsɛmɔ bei komɛi akɛ Shikpɔŋ ni Akpaaa Gbɛ lɛ mli lɛ, Yehowa Odasefoi kɛ gbɛtsĩi nii ni yɔɔ gbeyei kpeɔ yɛ Biblia mli shɛɛ sane ni yɔɔ faŋŋ ni amɛshiɛɔ lɛ hewɔ. Amɛshiɛɔ amɛtsɔɔ gbɔmɛi ni wieɔ wiemɔi sɔrɔtoi ni fa fe 700, ní yɔɔ kusum sɔrɔtoi babaoo. Odasefoi lɛ hu kɛ shikpɔŋ kukuji ni gɔji yɔɔ nɔ, gbɛjegbɛi ni bɛ, kɛ awuiyeli babaoo he naagba kpeɔ. Yɛ fimɔi nɛɛ fɛɛ sɛɛ lɛ, amɛnáa shitee-kɛ-woo kɛjɛɔ sɔlemɔi akui komɛi adɛŋ, ni bei komɛi lɛ, kɛjɛɔ skul tsɔɔlɔi po adɛŋ.
Shi kɛlɛ, mumɔŋ tsɔsemɔ kpakpa kɛ Biblia kasemɔ he yelikɛbuamɔ woji ni fa ni yɔɔ amɛmaŋ wiemɔ mli lɛ miisaa Odasefoi lɛ bɔni afee ni amɛkɛ sanekpakpa lɛ aha akɛ tɛtɛrɛmantɛrɛ ni gbɛɛɔ faŋŋ. Bei komɛi lɛ, nɔheremɔ lɛ hi, taakɛ amaniɛbɔi ni nyiɛ sɛɛ nɛɛ tsɔɔ lɛ:
• Yɛ skul afi hee ko shishijee mli lɛ, tsɔɔlɔ ko tao koni ele nɔ hewɔ ni Yehowa Odasefoi abii ŋaaa aflaŋaa ni amɛlaaa jakumaŋ lala lɛ. Etsɔ esanebimɔ lɛ eha Maiola, ni ji skulnyo ko ni eye afii 13, ni ji Odasefonyo ni abaptisi lɛ lɛ. Maiola kɛ nii amlitsɔɔmɔ ni yɔɔ faŋŋ ni damɔ Ŋmalɛ nɔ ha. Tsɔɔlɔ lɛ kpɛlɛ esusumɔi lɛ anɔ akɛni ejɛ Biblia lɛ mli lɛ hewɔ. Agba tsɔɔlɔi krokomɛi ni eshwɛ lɛ hu enii amlitsɔɔmɔ lɛ.
Beni yɛ sɛɛ mli lɛ, akɛ nifeemɔ hã skulbii lɛ koni amɛŋma sane ko he wiemɔi lɛ, Maiola hala akɛ ebaaŋma Triniti lɛ he sane. Nɔ ni eŋma lɛ ná mɔdɛŋ ni abɔ lɛ he yibɔ ni fe fɛɛ yɛ klas lɛ, ni tsɔɔlɔ lɛ bi lɛ he ni ená adafitswaa lɛ kɛjɛ. Ekɛ Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo ni ji Blɔfo nɔ lɛ hã lɛ. Tsɔɔlɔ lɛ tee nɔ ekɛ wolo lɛ tsɔɔ klasbii lɛ fɛɛ, ni mɛi pii tao koni amɛná amɛ diɛŋtsɛ amɛnɔ. Enɔ jetsɛremɔ lɛ, Maiola hã eskulbii lɛ woji wuji 14, kɛ woji tɛtɛrɛbii 7, ni ekɛ mɛi etɛ bɔi Biblia mli nikasemɔ feemɔ. Oti ni ma Maiola hiɛ ji koni ebatsɔ be-fɛɛ sɔɔlɔ.
• Yehowa Odasefoi akuu ko ni etse ehe ni yɔɔ ŋshɔ naa akrowa ko mli yɛ Port Moresby lɛ kɛ shitee-kɛ-woo kpe kɛjɛ 1970 mra be mli afii lɛ amli. Shi kɛlɛ, nyɛsɛɛ nɛɛ, amɛná yelikɛbuamɔ kɛjɛ jɛɛhe ko ni amɛkpaaa gbɛ. United Church osɔfonukpa ni yɔɔ jɛmɛ, ni ji Papua New Guinea fɔmɔ bi, ni atsɔse lɛ yɛ maŋsɛɛ lɛ, fɔ̃ nine gbi ko ebi koni toibolɔi lɛ abi sane yɛ sɔlemɔ lɛ. Nuu ko bi akɛ: “Jamɔi enyɔ yɔɔ wɔ akrowa nɛɛ—United Church kɛ Yehowa Odasefoi. Mɛni esa akɛ wɔfee Odasefoi lɛ kɛji akɛ amɛba wɔshinaa lɛ naa?” Beni emɛ yɛ be kakadaŋŋ ko sɛɛ lɛ, osɔfonukpa lɛ hã hetoo akɛ: “Nyɛle, mileee nɔ̃ pɔtɛɛ ni esa akɛ makɛɛ nyɛ. Nyɛsɛɛ nɛɛ, Odasefoi enyɔ ni darako ba mishinaa lɛ naa. Amɛbi mi sane ko, ni yɛ mi-univɛsiti tsɔsemɔ lɛ fɛɛ sɛɛ lɛ, mileee hetoo lɛ. Shi amɛha mi hetoo kɛjɛ Biblia lɛ mli yɛ gbɛ ni waaa nɔ. No hewɔ lɛ mikɛŋ nyɛ nɔ ni esa akɛ nyɛfee—mashi maha nyɛ. Ehe ehiaaa ni nyɛbo amɛtoi kɛji akɛ nyɛsumɔɔɔ, shi nyɛkafea amɛ basabasa.”
Buu Mɔɔ Asafo lɛ najiaŋdamɔlɔ gbɛfalɔ ko ni yasara Odasefoi akuu nɛɛ yɛ sɛɛ mli lɛ bɔ amaniɛ akɛ: “Etamɔ nɔ ni mɛi fɛɛ ni yɔɔ akrowa lɛ mli lɛ boɔ Odasefoi lɛ atoi kɛji akɛ amɛtee shiɛmɔ. Mɛi komɛi po fɔ̃ɔ amɛ nine kɛbaa amɛshiai amli. Eyɛ miishɛɛ akɛ aaashiɛ amrɔ nɛɛ.”