Maŋtsɛyeli Jajelɔi Bɔ Amaniɛ

Aha Mɛi ni Mumɔŋ Hɔmɔ Yeɔ Amɛ lɛ Tɔrɔ​—Yɛ Skul

YESU wie yɛ e-Gɔŋ nɔ Shiɛmɔ lɛ mli akɛ: “Miishɛɛ ji mɛi ni hiɛ yɔɔ amɛmumɔŋ hiamɔ nii anɔ lɛ.” (Mateo 5:​3, New World Translation) Skulbii pii yɛ ni Nyɔŋmɔ kɛ eyiŋtoi ni yɔɔ nyam lɛ he kumai miiye amɛ waa. Amɛmiitao hetooi amɛha saji ni amɛbiɔ yɛ wala he lɛ, kɛ bɔ ni esa akɛ amɛhi shi amɛha koni amɛna Nyɔŋmɔ nɔkpɛlɛmɔ, ni amɛna miishɛɛ. Enɛ je kpo faŋŋ yɛ skul ko mli yɛ British Virgin lslands. Yehowa Odasefoi ni yɔɔ jɛmɛ lɛ ateŋ mɔ kome gba akɛ:

◻ “Mitee fɔlɔi-kɛ-tsɔɔlɔi akpee ni afee yɛ maŋ lɛŋ skul lɛ eko, ni awie tsofai kɛ nitsumɔ, daanumɔ, yoo kɛ nuu nyiɛmɔ, TV kwɛmɔ, skulbii amɔdɛŋbɔɔ yɛ nikasemɔ mli, kɛ saji krokomɛi ahe babaoo, no hewɔ lɛ mikpɛ miyiŋ akɛ makɔ Questions Young People Ask​—Answers That Work wolo lɛ kɛya ni mikɛyaha skul tsɔɔlɔ nukpa lɛ. Beni yoo lɛ kwɛ wolo lɛ jogbaŋŋ sɛɛ lɛ, ewie akɛ no ji nɔ pɛpɛɛpɛ ni amɛtaoɔ lɛ, ni ebi mi akɛ ani skul lɛ nine baanyɛ ashɛ eko nɔ kɛha nikaselɔi 120 lɛ ateŋ mɔ fɛɛ mɔ lo. Mikɛ asafo lɛ mli onukpai lɛ susu sane lɛ he, ni amɛkpɛ amɛyiŋ akɛ amɛkɛ woji lɛ baake skul lɛ. Beni wɔtsi enɛ ta wɔtsɔɔ amɛ lɛ, tsɔɔlɔi lɛ ha wɔ hegbɛ akɛ wɔkɛ woji lɛ ayaha skulbii lɛ fɛɛ. Odasefoi enyɔ tee, ni tsu lɛ yi obɔ kɛ skulbii ni amɛmiimɛ ni wɔha amɛ woji lɛ. Nyɛmimɛi lɛ kɛ amɛ wie ŋmɛlɛtswaa fa, ni akane niiashikpamɔi ni tsɔɔ bɔ ni wolo lɛ eye ebua obalaŋtai kɛ onukpai fɛɛ, kɛjɛ Buu Mɔɔ Asafo lɛ woji tɛtrɛbii lɛ amli. Kɛkɛ ni akɛ woji lɛ ha skulbii ni he miitswa shi ni amɛnine ashɛ nɔ nɛɛ.”

Eji miishɛɛ sane akɛ aaale akɛ skul lɛ ekpɛ yiŋ akɛ amɛkɛ wolo lɛ baatsu nii akɛ nii ni atsɔɔ mɛi ni yɔɔ sɛii-ejwɛ kɛ enumɔ nɔ lɛ fã. Ebaaha saji babaoo ni nɛkɛ skulbii nɛɛ biɔ yɛ wala kɛ wɔsɛɛ be he lɛ fɛɛ hetoo yɛ anɔkwale mli.

Aha Mɛi ni Mumɔŋ Hɔmɔ Yeɔ Amɛ lɛ Tɔrɔ​—Yɛ Papua New Guinea

Nine shɛ niiashikpamɔ ni nyiɛ sɛɛ lɛ nɔ kɛjɛ nɔkwɛlɔ gbɛfalɔ ko dɛŋ. Efeɔ bɔ ni mumɔŋ hɔmɔ yeɔ gbɔmɛi lɛ waa yɛ nakai maŋ lɛ mli, kɛ bɔ ni wɔ-Biblia kasemɔ he woji lɛ hi jogbaŋŋ kɛmɔ shi yɛ amɛ hɔmɔ lɛ gbee mli lɛ he mfoniri.

Nɔkwɛlɔ lɛ kɛɛ: “Akɛni minyɛɛɛ mayasara akrowa ni atsɛɔ lɛ Kamberatoro lɛ hewɔ lɛ, mikɛ mibe lɛ tsu nii yɛ asafo bibioo ni atsɛɔ lɛ Vanimo lɛ mli. Mɛi pii yɛ wiemɔ lɛ he miishɛɛ yɛ jɛmɛ. Bewani maŋ lɛ mli bii lɛ ateŋ mɛi pii he woji. Nuu ko kɛɛ mi akɛ miba ni mibasara amɛ yɛ akrowa lɛ, ni lɛ diɛŋtsɛ ebaaha mi he ko ni mahi. Mɛi pii le wɔwoji lɛ waa diɛŋtsɛ. Be fɛɛ be ni wɔɔya Vanimo lɛ, eyɛ mli akɛ wɔkɛ woji adekai etɛ yaa moŋ, shi woji nɛɛ fɛɛ taa kwraa. Amɛbuɔ My Book of Bible Stories wolo lɛ akɛ ehe yɛ sɛɛnamɔ waa kɛha amɛ tamɔ shika tsuru. Mɛi pii miitao nakai wolo lɛ waa. Mikɛ woji ni mikɛtee jɛmɛ lɛ fɛɛ ha oya nɔŋŋ. Kɛ wɔkɛ wɔwoji lɛ tsɔɔ gbɔmɛi lɛ, amɛteŋ mɛi komɛi biɔ akɛ: ‘Nɛgbɛ wolo kɛ esɛɛ wuɔfɔ lɛ yɔɔ?’ Nuu ko shɛ ekpaa sɔŋŋ. Ekɛ egbɛi kɛ edrɛs ha mi ni ekɛɛ mi akɛ kɛji minine shɛ nɔ lɛ, miha atswa adafi yɛ redio lɛ nɔ. Kɛkɛ lɛ ebaajɛ ekrowa lɛ tɔŋŋ eba ni ebahe.” Nɔkwɛlɔ gbɛfalɔ lɛ kɛfata he akɛ: “Mibana akɛ gbɔmɛi ni yɔɔ Vanimo lɛ ateŋ mɛi pii heɔ Mankind’s Search for God kɛ Questions Young People Ask​—Answers That Work woji lɛ.”

Enɛ feɔ bɔ ni mumɔŋ niyenii ni yɔɔ Biblia lɛ kɛ woji ni Yehowa kɛha kɛtsɔ “tsulɔ anɔkwafo kɛ nilelɔ” lɛ nɔ lɛ mli lɛ he hɔmɔ yeɔ gbɔmɛi ni yɔɔ jalɛ tsuii lɛ ha lɛ he mfoniri. (Mateo 24:​45-47) Kwɛ bɔ ni Yehowa Odasefoi yɔɔ miishɛɛ ha akɛ amɛnyɛɔ amɛyeɔ amɛbuaa nɛkɛ gbɔmɛi ni anɔkwale lɛ he hɔmɔ yeɔ amɛ nɛɛ!

[Mfoniri ni yɔɔ baafa 19]

Odaseyeli yɛ Papua New Guinea