Mɛni Hewɔ Esa akɛ Ohe Yesu Kristo Nɔ Oye?

“GBƆMƐI babaoo ni amɛjeee Kristofoi lɛ po heɔ yeɔ akɛ tsɔɔlɔ kpele ni le nii ji Lɛ. Eka shi faŋŋ akɛ gbɔmɛi ni ehi shi pɛŋ ni ná mɛi anɔ hewalɛ fe fɛɛ lɛ ateŋ mɔ kome ji lɛ.” (The World Book Encyclopedia) Namɔ ji “Lɛ”? Yesu Kristo, Kristojamɔ shishitolɔ lɛ.

Shi yɛ nɔ ni ensaiklopedia lɛ kɛɔ lɛ fɛɛ sɛɛ lɛ, kɛha gbɔmɛi akpekpei ohai abɔ ni yɔɔ Bokagbɛ kɛ hei krokomɛi lɛ, Yesu Kristo ji mɔ ko ni aleee lɛ, gbɛi ko kɛkɛ ni amɛbaanyɛ amɛkai yɛ nɔtsamɔ skul nikasemɔ woji amli. Yɛ Kristendom sɔlemɔi lɛ amli po lɛ, Nyɔŋmɔ jamɔ he nikaselɔi kɛ osɔfoi yɛ ni kɛɔ akɛ wɔleee Yesu jogbaŋŋ ni amɛhaa eshihilɛ mli anɔkwa saji ejwɛ (Sanekpakpai lɛ) ni yɔɔ bianɛ lɛ ni anaa yɛ Biblia mli lɛ feɔ mɛi ayiŋ kɔshikɔshi.

Ani ekolɛ mɛi ni ŋmala Sanekpakpa lɛ male yɛ be mli ni amɛŋmalaa Yesu shihilɛ he saji lɛ? Dabi kwraa! Beni yinɔsaneŋmalɔ Will Durant ni ale lɛ waa lɛ pɛi nakai Sanekpakpa lɛ mli saji lɛ amli lɛ, eŋma akɛ: “Ákɛ gbɔmɛi foji fioo ko ni hi shi yɛ yinɔ kome mli lɛ kɛ gbɔmɔ ko ni náa mɛi anɔ hewalɛ ni abuɔ lɛ waa aaaba shihilɛ mli, mɔ ni jeŋba nɔ kwɔ kɛ mɔ ni kanyaa adesai anyɛmifeemɔ he ninaa lɛ baafee naakpɛɛ nɔ ko ni anyɛŋ ahe aye fe ekrokomɛi fɛɛ ni aŋmala yɛ Sanekpakpai lɛ amli. Yɛ afii ohai enyɔ Saji Amlipɛimɔ Jogbaŋŋ lɛ sɛɛ lɛ, Kristo shihilɛ, esubaŋ, kɛ nitsɔɔmɔ mli saji kukuji lɛ kã he eyɛ faŋŋ lolo bɔ ni sa, ni nomɛi ji nifeemɔ ko ni anáa he miishɛɛ fe fɛɛ eko yɛ Anaigbɛ gbɔmɔ lɛ yinɔsane mli.”

Ni kɛlɛ, mɛi krokomɛi yɛ ni jieɔ Yesu Kristo kɛjɛɔ amɛjwɛŋmɔ mli akɛ mɔ ni esaaa akɛ asusuɔ ehe yɛ nɔ ni mɛi ni kɛɔ akɛ amɛji esɛɛnyiɛlɔi lɛ efee hewɔ. Ekolɛ mɛi komɛi ni yɔɔ Japan lɛ baakɛɛ akɛ, ‘Amɛŋmɛɛ atɔmik okplɛm he amɛfɔ̃ Nagasaki. Ni Kristofoi pii yɛ Nagasaki fe Japan maŋtiasei krokomɛi babaoo amli.’ Shi ani obaanyɛ oshwa tsofafeelɔ ko yɛ hela ni helatsɛ ko yeɔ hewɔ, kɛ́ helatsɛ lɛ kɛ datrɛfonyo lɛ gbɛtsɔɔmɔ tsuuu nii? Gbɔmɛi babaoo ni kɛɔ akɛ Kristofoi ji amɛ lɛ eku amɛhiɛ amɛshwie gbɛtsɔɔmɔi ni Yesu kɛha koni amɛkɛye adesai anaagbai anɔ kunim lɛ nɔ kɛjɛ jeeŋmɔ beebe. Ni kɛlɛ, Yesu kɛ wɔ daa gbi shihilɛ mli naagbai anaa tsabaa kɛ adesai ni yɔɔ jeŋ fɛɛ lɛ apiŋmɔi anaa tsabaa hu ha. No hewɔ ni wɔfɔ̃ɔ bo nine koni okane sane ni nyiɛ sɛɛ nɛɛ koni bo diɛŋtsɛ ona nɔ̃ gbɔmɔ ni eji lɛ.