Egbɔyeli Ni Bɛ Mli Piŋmɔ lɛ Naa Tsĩi

Etsɛŋ ni Bɔlɔ lɛ kɛ egbɔyeli ni adesai shweɔ waa lɛ baaba. Shi dani nakai be lɛ aaaba lɛ, wɔbaanyɛ wɔfee he nɔ ko fioo koni wɔkɛtsĩ piŋmɔ ni egbɔyeli ni bɛ kɛbaa ni saa wɔ kɛ wɔwekui ahe lɛ naa. Taakɛ South Africa tsutsu maŋ nɔyelɔ Nelson Mandela kɛɛ lɛ, “nɔ ni wɔnyɛɔ wɔkɛ nɔ ni wɔyɔɔ lɛ feɔ lɛ ji nɔ ni haa esoroɔ wɔ yɛ mɛi krokomɛi ahe, shi jeee nɔ ni akɛhaa wɔ lɛ ni.”

YINƆSANE etsɔɔ akɛ, ewiemɔi lɛ ji anɔkwale. Hii kɛ yei pii yɛ ni nii fioo pɛ amɛyɔɔ yɛ amɛgbekɛbiiashi, shi amɛkɛ nɔ ni amɛyɔɔ lɛ etsu nii ni amɛye omanye, ni eha esoro amɛ yɛ amɛnanemɛi ni ekolɛ amɛyɛ nii babaoo lɛ ahe. Nɔ ni tamɔɔɔ nakai lɛ, mɛi krokomɛi ni ajɔɔ amɛ kɛ nibii babaoo ni he yɔɔ sɛɛnamɔ kɛjɛ amɛgbekɛbiiashi lɛ efite nɔ ni amɛyɔɔ lɛ, ni amɛnyɛɛɛ amɛtsu he nii.

Okɛ Nɔ ni Oyɔɔ lɛ Atsu Nii ni Sɛɛnamɔ Aba He!

Yehowa Odasefoi miisumɔ waa ni amɛye amɛbua gbɔmɛi koni amɛná Nyɔŋmɔ yiŋtoi ahe anɔkwa nilee kɛtsɔ Biblia lɛ kasemɔ nɔ. Shi, amɛyɔse akɛ, ehe miihia ni gbɔmɛi lɛ aya skul dani amɛbaanyɛ amɛná saji ni yɔɔ Biblia lɛ mli lɛ ahe sɛɛ kɛmɔ shi. Yiŋtoo nɛɛ hewɔ lɛ, Yehowa Odasefoi etsɔɔ gbɔmɛi akpei nyɔŋmai abɔ nikanemɔ kɛ niŋmaa, ní gbɔmɛi 23,000 (yɛ afi 1990 afii lɛ teŋgbɛ) yɛ Afrika Anaigbɛ maŋ kome too pɛ mli lɛ fata he. Beni San Francisco Examiner adafitswaa wolo lɛ wieɔ Yehowa Odasefoi lɛ amaŋ sɔɔmɔ nitsumɔ ni nɔ bɛ lɛ he lɛ, eŋma akɛ: “Ekolɛ, obaabu amɛ akɛ maŋbii ni feɔ nɔkwɛmɔnɔ kpakpa. Amɛwoɔ amɛtoo jogbaŋŋ, amɛkwɛɔ helatsɛmɛi, amɛwuɔ amɛshiɔ skul ni ayaaa.”

Kɛfata he lɛ, kɛtsɔ maŋshiɛmɔ he nii ni amɛkaseɔ lɛ nɔ lɛ, Yehowa Odasefoi etsɔse gbɔmɛi akpei ohai abɔ ni amɛbatsɔmɔ wielɔi ni he esa, ni nyɛɔ amɛwieɔ kɛ naatselɛ yɛ maŋ. Mɛi ni fata gbɔmɛi akpei abɔ nɛɛ ahe lɛ ateŋ mɛi komɛi ji mɛi ni tsutsu ko lɛ, amɛyɔɔ wiemɔ he naagba. Ákɛ nɔkwɛmɔnɔ lɛ, susumɔ nuu ni yɔɔ South Africa ni ŋma enɛ lɛ he okwɛ: “Mihàa mumɔ waa aahu akɛ, mibafee tamɔ mɔ ko ni kɛ ehe fɔ̃ɔ lɛ pɛ esusumɔi anɔ, ni bei pii lɛ mihaa mɛi krokomɛi wieɔ ehaa mi. . . . Beni mikɛ mihe wo Teokrase Sɔɔmɔ Skul lɛ mli ni ehe bahia ni makane Biblia lɛ yɛ toibolɔi fioo komɛi ahiɛ lɛ . . . , mihà mumɔ waa aahu akɛ minyɛɛɛ magbe nifeemɔ lɛ naa yɛ be ni ato lɛ naa. Beni agbe kpee lɛ naa lɛ, [ŋaawolɔ] lɛ jɛ mlihilɛ mli ekɛ ŋaawoo ni anyɛɔ atsuɔ he nii ha mi. Ewo mi ŋaa koni mikane nii waa miha mi diɛŋtsɛ mihe. Mifee nakai, ni daa gbi lɛ, mikaneɔ Biblia lɛ kɛ Buu-Mɔɔ wolo tɛtrɛɛ lɛ waa.” Nɛkɛ nuu nɛɛ tee hiɛ jogbaŋŋ diɛŋtsɛ aahu akɛ, amrɔ nɛɛ ehaa maŋshiɛmɔ yɛ toibolɔi ohai abɔ, akpei abɔ po hiɛ.

Egbɔyeli Mli Ŋɔɔmɔyeli yɛ Nyɛmimɛi Ateŋ

Esoro shihilɛ mli ni Yehowa Odasefoi ateŋ mɔ fɛɛ mɔ yɔɔ yɛ woloŋlee, gbɔmɔtsoŋ hewalɛnamɔ, shika ni ayɔɔ kɛ shihilɛ diɛŋtsɛ mli ni ayɔɔ lɛ amli. Yɛ enɛ mli lɛ, srɔtofeemɔi nɛɛ tsɔɔ kɛkɛ akɛ, wɔyɛ jeŋ shihilɛi ni yeee emuu mli. Shi ákɛ mɛi ni tamɔɔɔ jamɔŋ kui krokomɛi lɛ, amɛjie hewolo nɔ su mli jiemɔ, shihilɛ mli ni ayɔɔ, kɛ shika ni ayɔɔ mli hetsɛ̃ kɛjɛ amɛkuu lɛ mli kwraa.

Akɛni amɛtsuɔ nibii ni amɛkaseɔ yɛ Biblia lɛ mli lɛ ahe nii bɔ ni amɛbaanyɛ hewɔ lɛ, amɛnyɛ amɛfee nakai. Amɛjɛ amɛtsui fɛɛ mli amɛkpɛlɛ Biblia shishitoo mlai ni kɛɔ akɛ: “Yehowa kwɛɛɛ nii tamɔ gbɔmɔ; ejaakɛ gbɔmɔ lɛ ekwɛɔ kponɔgbɛ nii, shi Yehowa lɛ tsui ekwɛɔ” nɔ. (1 Samuel 16:⁠7) “Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔfoi lɛ Asaji 10:34) “Nyɛkaŋɔa efɔŋ nyɛtoa mɔ ko mɔ ko efɔŋ najiaŋ; nyɛjwɛŋa nɔ ni yɔɔ fɛo nɔ nyɛtoa yɛ gbɔmɛi fɛɛ hiɛ. Kɛ aaaho lɛ nyɛgbɛfaŋ lɛ, nyɛkɛ gbɔmɛi fɛɛ ahia shi yɛ hejɔlɛ mli.”​—⁠Romabii 2:​17, 18; agbɛnɛ hu kwɛmɔ 1 Timoteo 6:​17-​19; Yakobo 2:​5, 9.

Akɛni Yehowa Odasefoi lɛ kɛ Biblia shishitoo mlai ni kɛ ekomefeemɔ baa nɛɛ tsuɔ nii waa hewɔ lɛ, amɛkpɛlɛɛɛ ni afeɔ nibii ni tsɔɔ egbɔyeli ni bɛ ni damɔ hewolo nɔ su mli jiemɔ, shihilɛ mli ni ayɔɔ, aloo shika he shihilɛi srɔtoi ni ayɔɔ lɛ nɔ. Ákɛ nɔkwɛmɔnɔ lɛ, adamɔɔɔ nɛkɛ nibii nɛɛ anɔ akpɛɛɛ yiŋ yɛ mɔ ni esa akɛ aaaha lɛ sɔɔmɔ hegbɛi yɛ Kristofoi asafo lɛ mli. Adamɔɔ mumɔŋ hesaai pɛ anɔ akɛ gbɛnaa nii tamɔ nitsɔɔmɔ kɛ nɔkwɛmɔ nitsumɔ haa.​—⁠1 Timoteo 3:​1-13; Tito 1:​5-9.

Yɛ aŋkroaŋkroi ni ena nɔ yɛ egbɔyeli ni bɛ ni yaa nɔ yɛ jeŋ ni egba afã nɛɛ mli lɛ, kwɛ hejɔlɛ ni amɛaaná akɛ mɔ ko kɛ amɛ aaaye akɛ nyɛmimɛi hii kɛ yei yɛ gbɛ kome nɔ yɛ amɛ-Bɔlɔ lɛ hiɛ! Martina baanyɛ aye enɛ he odase. Sɛɛ mli beni etsɛ jo foi eshi weku lɛ, alɛ lɛ yɛ fɔlɔ kome ohiafo shia. Bei pii lɛ akɛ lɛ yeɔ tamɔ mɔ ko ni maŋbii ekpoo lɛ, enyɛɛɛ ekɛ ehe afɔ̃ mɛi anɔ tsɔ̃, ni mɛi krokomɛi kɛ shihilɛ wa ha lɛ. Efee ehe mɔ ko ni jeee ehe sane ji nɔ ko. Shi nibii tsake sɛɛ mli beni eje Biblia lɛ kasemɔ shishi ni ebatsɔ Yehowa Odasefoi lɛ ateŋ mɔ kome lɛ. Yoo nɛɛ kɛɛ akɛ: “Ehe bahia ni mawuu mashi jwɛŋmɔ fɔŋ ni mináa lɛ, shi amrɔ nɛɛ miinyɛ miikpee naagba lɛ naa jogbaŋŋ. Bulɛ ni miyɔɔ kɛha mihe lɛ etee hiɛ, ni minyɛɔ mikɛ ekãa babaoo wieɔ. Anɔkwale lɛ eha minu he akɛ miyɛ gbɛnaa nii ko he nitsumɔ. Amrɔ nɛɛ, miná mile akɛ Yehowa sumɔɔ mi, ni akɛ wala ŋɔɔ.”

Ákɛ majimaji ateŋ Kristofoi akuu lɛ, Yehowa Odasefoi ni yɔɔ maji fe 230 mli lɛ náa egbɔyeli mli ŋɔɔmɔ kɛyashɛɔ he ko, ni eyɛ srɔto lɛɛlɛŋ yɛ ŋmɛnɛ jeŋ ni wɔyɔɔ mli nɛɛ he. Ani jamɔŋ gbɛjianɔtoo kroko ko yɛ ni baanyɛ ekɛɛ nakai nɔŋŋ, ni ekɛ saji ni eba mli yɛ anɔkwale mli afi sɛɛ?

Yɛ anɔkwale mli lɛ, nɔ ni Yehowa Odasefoi lɛ kɛɔ lɛ ji nɔ ni amɛtsuɔ he nii. Amɛkpɛlɛɔ nɔ oya akɛ, ákɛ shihilɛ ni yeee emuu nɛɛ mli bii lɛ, amɛnyɛŋ amɛjie egbɔyeli ni bɛ adesai ateŋ lɛ kɛya kwraa, taakɛ mɛi krokomɛi eka amɛkwɛ yɛ afii ohai abɔ ni eho lɛ mli​—⁠ni amɛnine enyɛ shi lɛ. Shi kɛlɛ, amɛyɛ miishɛɛ akɛ, yɛ amɛ diɛŋtsɛ amɛkui lɛ amli lɛ, amɛtsu nii waa kɛtsĩ bɔ ni eyaa nɔ waa lɛ naa. Ni amɛkɛ hemɔkɛyeli ni mli wa yɛ Nyɔŋmɔ shiwoo lɛ mli lɛ miikpa jeŋ hee ni jalɛ hiɔ mli, ni egbɔyeli ni bɛ lɛ baafee tsutsu nii ni eho etee kɛmiyaa naanɔ lɛ gbɛ.

Hɛɛ, adesai fɛɛ ni feɔ toiboo baaku sɛɛ ahi shi yɛ “bulɛ kɛ hegbɛ mli” egbɔyeli ni amɛ-Bɔlɔ lɛ to eyiŋ yɛ he koni amɛná mli ŋɔɔmɔ kɛjɛ shishijee lɛ. Mɛɛ susumɔ ni hi po nɛ! Shi agbɛnɛ lɛ ebaafee nɔ ni baaba mli diɛŋtsɛ!

[Mfoniri ni yɔɔ baafa 7]

Yehowa Odasefoi teɔ shi amɛshiɔ skul ni ayaaa kɛtsɔ mɛi akpei nyɔŋmai abɔ ni amɛtsɔɔ amɛ nii koni amɛle nikanemɔ kɛ niŋmaa lɛ nɔ

[Mfoniri ni yɔɔ baafa 8]

Biblia mli anɔkwalei lɛ yeɔ ebuaa ni ajieɔ hewolo nɔ su mli jiemɔ, shihilɛ mli ni mɔ ko yɔɔ, kɛ shika ni mɔ ko yɔɔ lɛ he hetsɛ̃ kɛyaa