Blonya yɛ Bokagbɛ

• AAAFEE AFII OHAI ENYƆ NI EHO NƐ LƐ, Koreanyo woloŋlelɔ ko ni ale lɛ waa lɛ yasara Peking, yɛ China. Beni ekwɛɔ samai ni aye yɛ sɔlemɔtsu lɛ sɛndo lɛ he lɛ, ena Maria he mfoniri ko ní ehiɛ Yesu yɛ edɛ. Ewie yɛ samai ni yɔɔ naakpɛɛ nɛɛ he akɛ:

“Oblayoo ko hiɛ gbekɛ ko ni he miiye yɛ eshwuɔ nɔ, eye aaafee afii enumɔ loo afii ekpaa. Etamɔ nɔ ni enyɛɛɛ ewo ehiɛ nɔ, yɛ bɔ ni ebi lɛ nii feɔ lɛ mɔbɔ sɔŋŋ lɛ hewɔ. Ni yɛ amɛsɛɛ shɔŋŋ lɛ, anaa susumai kɛ abifabii babaoo ni hiɛ fiji ni amɛmiifiliki kɛmiibɔle shi. Beni mikwɛɔ amɛ yɛ ŋwɛi lɛ, efee tamɔ nɔ ni amɛbaakpɔ ni amɛbagbee minɔ amrɔ nɔŋŋ. Akɛni mitsui efã hewɔ lɛ, miwo minine nɔ koni masɔo amɛ.”

MAŊ Hiɛtsakemɔ lɛ ba yɛ Europa be kpalaŋŋ sɛɛ, ni Teŋgbɛ Afii ni ehiii lɛ je shishi sɛɛ mli kwraa dani nakai nii lɛ ba mli. Shi kɛha Bokagbɛbii lɛ ateŋ mɛi babaoo lɛ, Kristojamɔ ji nɔ ko ni ale tamɔ bɔ ni samai ni aye lɛ ji lɛ nɔŋŋ. Kwɛ bɔ ni shihilɛ lɛ etsake kwraa eha! Kɛ eshɛ Blonya fɛɛ Blonya be lɛ, ajieɔ abifao Yesu he mfoniri atsɔɔ. Bokagbɛbii lɛ ebale mfoniri ni tamɔ nɛkɛ, no hewɔ lɛ, gbɛjegbɛi ni yɔɔ jɛmɛ lɛ ebafee tamɔ Europa gbɛjegbɛi lɛ pɛpɛɛpɛ.

Yɛ gbi gbɛkɛ ni ji November 25, 1998, nyɔŋ kome dani Blonya be lɛ aaashɛ lɛ, asu kanei ni kpɛɔ waa ni fa fe 100,000 awo tsei 300 ni mamɔ akutso ko ni ale waa ni ji Champs Élysées ni yɔɔ Paris lɛ mli. Taakɛ eji yɛ hei krokomɛi lɛ, shwapo nitsumɔhe wulu ko kɛ Blonya tso agbo ko yama Seoul, Korea gbɛjegbɛ ko nɔ ni amɛbɔi kanei suu kɛ enɔ maa koni ekpɛ nakai maŋtiase lɛ mli. Nɔŋŋ kɛkɛ ni akɛ Blonya nibii bɔi gbɛjegbɛi lɛ ahe wulamɔ.

Tɛlivishiŋ, redio, kɛ adafitswaa woji jie nibii ni kɔɔ Blonya lɛ he amɛtsɔɔ́​—⁠ni amɛgbaa emli nifeemɔi lɛ ahe sane daa gbi. Akɛni Blonya nifeemɔ lɛ eta amɛ mli hewɔ lɛ, maŋ muu lɛ fɛɛ kɛ miishɛɛ hereɔ afi lɛ naagbee lɛ atuu. Awula sɔlemɔtsui babaoo ni yɔɔ Seoul ni haa saralɔi anaa kpɛɔ amɛhe lɛ kɛ nibii fɛfɛji oyayaayai. No hewɔ lɛ, yɛ be mli ni Korea kɛ maji krokomɛi ni yɔɔ Bokagbɛ lɛ bɛ dekã yɛ Blonyayeli mli lɛ, belɛ United States hu bɛ dekã yɛ Shidaa Gbi gbijurɔyeli mli yɛ November nyɔŋ lɛ naagbee mli.

Abuuu maji ni yɔɔ Bokagbɛ lɛ afataaa Kristendom he. Ákɛ nɔkwɛmɔnɔ lɛ, gbɔmɛi ni yɔɔ Korea lɛ oha mlijaa 26.3 pɛ kɛɔ akɛ Kristofoi ji amɛ. Yɛ Hong Kong lɛ ayɛ mɛi oha mlijaa 7.9, yɛ Taiwan lɛ oha mlijaa 7.4, ni yɛ Japan lɛ, oha mlijaa 1.2 pɛ.[3] Eka shi faŋŋ akɛ, mɛi pii yɛ Bokagbɛ ni amɛkɛ amɛhe wooo Kristojamɔ mli, shi etamɔ nɔ ni amɛteee shi amɛwooo Blonyayeli. Yɛ anɔkwale mli lɛ, etamɔ nɔ ni bei pii lɛ amɛyɛ ekãa po fe amɛnanemɛi ni yɔɔ Anaigbɛ lɛ. Ákɛ nɔkwɛmɔnɔ lɛ, ale Hong Kong jogbaŋŋ yɛ bɔ ni amɛkɛ Blonya he nibii fɛfɛji wulaa maŋ lɛ hewɔ, eyɛ mli akɛ emli bii lɛ babaoo ji Buddhabii kɛ Taobii. Yɛ China po, he ni gbɔmɛi oha mlijaa 0.1 kɛɔ akɛ Kristofoi ji amɛ lɛ, Blonyayeli miihe gbɛi waa yɛ jɛmɛ.

Mɛni hewɔ ayeɔ Blonya waa yɛ Bokagbɛ nakai lɛ? Mɛni hewɔ gbɔmɛi ni ekpɛlɛɛɛ Yesu nɔ akɛ Mesia lɛ fataa he kɛyeɔ Blonya ní mɛi pii ni kɛɔ akɛ Kristofoi ji amɛ lɛ buɔ lɛ akɛ eji efɔmɔ gbi lɛ? Ani esa akɛ anɔkwa Kristofoi akase amɛ yɛ bɔ ni amɛsusuɔ Blonya he amɛhaa lɛ? Wɔbaana hetoo lɛ yɛ be mli ni wɔsusuɔ bɔ ni fee ni Blonya hé gbɛi waa yɛ Korea, ni ji maŋ ni etsɛ waa yɛ Bokagbɛ lɛ he lɛ.