Saji ni Mɛi ni Kaneɔ lɛ Biɔ
Ani Adebɔɔ Naa Osharai Ji Toigbalamɔ Ni Jɛ Nyɔŋmɔ Ŋɔɔ?
Nyɔŋmɔ kɛ adebɔɔ naa osharai tsuuu nii koni ekɛgbala mɛi atoi. Efeko nakai pɛŋ, ni efeŋ nakai hu. Mɛni hewɔ? Ejaakɛ Biblia lɛ wieɔ yɛ 1 Yohane 4:8 lɛ akɛ: “Nyɔŋmɔ lɛ, suɔmɔ ji lɛ.”
Suɔmɔ ji nɔ titri ni kanyaa Nyɔŋmɔ nifeemɔi fɛɛ. Suɔmɔ efeee nii ni baaye mɛi awui, ejaakɛ Biblia lɛ wieɔ akɛ, “suɔmɔ efeee enaanyo efɔŋ ko.” (Romabii 13:10) Biblia lɛ wieɔ yɛ Hiob 34:12 lɛ akɛ: “Asanɔkwa, Mawu yeŋ sane ní ejaaa.”
Eji anɔkwale akɛ, Biblia lɛ egba efɔ̃ shi akɛ osharai srɔtoi tamɔ “shikpɔŋ hosomɔi” baaba yɛ wɔgbii nɛɛ amli. (Luka 21:11) Shi kɛ́ kɔɔyɔŋ tsakemɔ he nilelɔ ko tswa adafi akɛ lasuogbele ko baatswa, ni lasuogbele lɛ tswa ni efite nii lɛ, ashwaaa lɛ akɛ lɛ ji mɔ ni ha nibii lɛ ahiɛ kpata. Nakai nɔŋŋ hu esaaa akɛ ashwaa Yehowa yɛ nifitemɔi ni jɛɔ osharai ni egba akɛ amɛbaaba lɛ mli kɛbaa lɛ ahe. Ojogbaŋŋ, kɛ́ adebɔɔ naa osharai ni haa adesai piŋɔ lɛ jɛɛɛ Nyɔŋmɔ ŋɔɔ lɛ, namɔ ji mɔ ni kɛbaa mɔ?
Biblia lɛ haa aleɔ akɛ, “jeŋ muu lɛ fɛɛ kã mɔ fɔŋ lɛ,” ni ji Satan Abonsam hewalɛ mli. (1 Yohane 5:19) Kɛjɛ beni etse atua yɛ adesai ashishijee mli lɛ, etee nɔ efee gbɔmɔgbelɔ aahu kɛbashi wɔbei nɛɛ amli. (Yohane 8:44) Satan naa adesai awala akɛ eji nɔ ko ni jara waaa ní esa akɛ ashɛ afɔ̃. Ŋkomeŋfa nibii asɛɛtiumɔ ji nɔ ni kudɔɔ enifeemɔi fɛɛ, ni no hewɔ lɛ ebɛ naakpɛɛ akɛ eha ŋkomeŋfa su nɛɛ ekpele je lɛŋ fɛɛ. Je lɛŋ gbɛjianɔtoi ni yɔɔ ŋmɛnɛ lɛ kpɛlɛɔ shishiumɔ nifeemɔi ni yaa nɔ lɛ anɔ aahu akɛ, amɛnyɛɔ mɛi ni bɛ hefamɔ ko lɛ nɔ ni amɛyahiɔ hei ni adebɔɔ naa osharai loo osharai ni adesai anifeemɔ kɛbaa lɛ baanyɛ anina amɛ. (Efesobii 2:2; 1 Yohane 2:16) No hewɔ lɛ, esa akɛ ashwa adesai hiɛjoolɔi lɛ yɛ amanehului ni adesai kɛkpeɔ lɛ ekomɛi ahe. (Jajelɔ 8:9) Mɛni hewɔ?
Kɛ́ hooo kwraa lɛ, osharai ni baa lɛ ateŋ babaoo jɛ adesai yɛ gbɛ ko nɔ. Ákɛ nɔkwɛmɔnɔ lɛ, susumɔ haomɔ kpele ni ahum ko ni naa wa lɛ kɛba mɛi ni yɔɔ New Orleans, U.S.A. lɛ anɔ, aloo tsũi ni kumɔ yɛ ŋmɔtɔ ni Venezuela ŋshɔnaa gɔji ni fɛ́ lɛ loo eshwie amɛnɔ lɛ hewɔ lɛ he okwɛ. Yɛ shihilɛi nɛɛ kɛ ekrokomɛi amli lɛ, nilee ni adesai bɛ yɛ kɔɔyɔŋ tsakemɔ he, tsũi ni adesai emaaa lɛ jogbaŋŋ, nibii ahe gbɛjianɔ ni adesai etooo jogbaŋŋ, kɔkɔbɔi atoi ni mɛi booo, kɛ nɔyelɔi ni tsuuu amɛgbɛnaa nii ahe nii jogbaŋŋ ji nibii titrii ni ha adebɔɔ naa nibii tamɔ kɔɔyɔɔ kɛ nugbɔ batsɔ nibii ni kpataa nibii ahiɛ waa nakai lɛ.
Susumɔ oshara ko ni ba yɛ Biblia beaŋ lɛ he okwɛ. Yɛ Yesu gbii lɛ amli lɛ, mɔɔ ko ni kumɔ trukaa lɛ gbe mɛi 18. (Luka 13:4) Ekolɛ oshara nɛɛ ba yɛ adesai atɔmɔ, loo “be kɛ nibii ni aleee ni baa trukaa,” loo yɛ nibii enyɔ nɛɛ fɛɛ hewɔ—shi ekã shi faŋŋ akɛ nakai oshara lɛ jeee nɔ ko ni Nyɔŋmɔ kɛba koni ekɛgbala mɛi atoi.—Jajelɔ 9:11, NW.
Ani Nyɔŋmɔ eha osharai komɛi eba pɛŋ? Hɛɛ, shi akɛ nɔ ni tamɔɔɔ adebɔɔ naa osharai loo osharai ni adesai haa ebaa lɛ, Yehowa haaa amɛsa mɔ fɛɛ mɔ he kɛkɛ, amɛtsuɔ yiŋtoo pɔtɛɛ ko he nii, ni amɛfɔɔɔ kaa. Nu Afua ni ba yɛ shikpɔŋ lɛ nɔ fɛɛ yɛ blematsɛ Noa gbii lɛ amli kɛ Sodom kɛ Gomora maji lɛ ahiɛ kpatamɔ ni ba yɛ Lot gbii lɛ amli lɛ ji nɔkwɛmɔnii enyɔ ni tsɔɔ nakai. (1 Mose 6:7-9, 13; 18:20-32; 19:24) Nakai fɔbuu kojomɔi ni jɛ Nyɔŋmɔ ŋɔɔ lɛ kpata efɔŋfeelɔi ni tsakeee amɛtsuii lɛ ahiɛ, shi ebaa mɛi ni ji jalɔi yɛ Nyɔŋmɔ hiɛ lɛ ayi.
Yɛ anɔkwale mli lɛ, Yehowa Nyɔŋmɔ yɛ nyɛmɔ, shwelɛ kɛ hewalɛ ni ekɛaafo nɔnaai fɛɛ sɛɛ ni eha adesai aye amɛhe kɛjɛ adebɔɔ naa osharai ahe. Lala 72:12 lɛ wieɔ yɛ Maŋtsɛ ni Nyɔŋmɔ ehala lɛ ni ji Yesu Kristo lɛ he akɛ: “Eeejie ohiafoi ni bolɔɔ lɛ, kɛ nɔnalɔ ni bɛ bualɔ lɛ.”