‘Be Ni Ato Lɛ’ Eshɛ Etã
TAAKƐ eji yɛ gbalɔ Habakuk gbɛfaŋ lɛ, Yesu kaselɔi lɛ hu shwe ni amɛle be ni nɔnaa sɛɛ baafo. Beni amɛbale nɔ ni Nyɔŋmɔ Maŋtsɛyeli lɛ baafee kɛjaje nibii yɛ shikpɔŋ lɛ nɔ lɛ, amɛbi Yesu akɛ: “Tsɔɔmɔ wɔ beyinɔ ní aaafee nii nɛɛ, ni mɛni ji obaa [beni aŋɔ Maŋtsɛyeli aha bo] lɛ kɛ je nɛŋ naagbee lɛ he okadi?” (Mateo 24:3) Yesu ha amɛ hetoo akɛ Yehowa Nyɔŋmɔ pɛ le be tuuntu ni Maŋtsɛyeli lɛ baaye shikpɔŋ muu lɛ fɛɛ nɔ. (Mateo 24:36; Marko 13:32) Shi Yesu kɛ mɛi krokomɛi gba nibii komɛi ni baatsɔɔ akɛ be lɛ eshɛ etã lɛ amɛfɔ̃ shi.—Kwɛmɔ akrabatsa ni yɔɔ ninejurɔgbɛ lɛ.
Ani okpɛlɛɛɛ nɔ akɛ nibii nɛɛ miiya nɔ ŋmɛnɛ? Yesu kɛɛ hu akɛ abaatsu tsɔsemɔ nitsumɔ ko yɛ je lɛŋ fɛɛ. Ekɛɛ akɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ní akɛye jeŋmaji lɛ fɛɛ odase; ni no dani naagbee lɛ aaaba.”—Mateo 24:14.
No pɛpɛɛpɛ ji nɔ ni yaa nɔ ŋmɛnɛ. Yehowa Odasefoi miitsu nitsumɔ nɛɛ. Yɛ shikpɔji aaafee 236 anɔ lɛ, Odasefoi ni fa fe akpekpei kpawo miiha mɛi miile nɔ ni Maŋtsɛyeli lɛ baafee. Amɛmiiye amɛmiibua mɛi nɛɛ koni amɛba amɛjeŋ yɛ Nyɔŋmɔ, ní miisumɔ ni efo nɔnai kɛ piŋmɔi asɛɛ lɛ jalɛ shishitoo mlai lɛ kɛ gbeekpamɔ naa. Yaa nɔ okase Nyɔŋmɔ Maŋtsɛyeli lɛ he nii, ni no baaha oná gbɛkpamɔ akɛ obaahi shi yɛ jeŋ ni nɔnaa bɛ mli lɛ mli kɛya naanɔ.—w09-E 12/1.
[Akrabatsa ni yɔɔ baafa 15]
Ŋmalɛi ni Wieɔ Naagbee Gbii lɛ Ahe
• Tai ni anako nɔ dã
• Shikpɔŋhosomɔi ni naa wawai
• Hɔ̃ji
• Tsɛŋemɔ helai
• Mlakwamɔ baafá
• Suɔmɔ he baajɔ
• Abaafite shikpɔŋ lɛ
• Shika suɔmɔ babaoo
• Fɔlɔi anɔ toigbolɔi
• Mɛi aaasumɔ amɛ diɛŋtsɛ amɛhe fe nine
• Mɛi edɔŋ mɛi ahe
• Mɛi baatsɔmɔ kpaŋmɔ mlikulɔi
• Henɔyeli ni abɛ baabu yɛ he fɛɛ he
• Mɛi ni sumɔɔɔ ekpakpa ayi baafa
• Mɛi baasumɔ shwɛmɔ kɛ ŋɔɔmɔ fe Nyɔŋmɔ
• Osatofeelɔi ni tsɛɔ amɛhe Kristofoi ayi baafa
• Amale gbalɔi pii aaate shi
• Abaawa anɔkwa Kristofoi ayi
• Gbɔmɛi haŋ amɛhiɛ ahi Bliblia mli kɔkɔbɔi anɔ
[Mfoniri ni yɔɔ baafa 15]
Yehowa Odasefoi shiɛɔ Nyɔŋmɔ Maŋtsɛyeli lɛ he sane amɛtsɔɔ mɛi yɛ jeŋ fɛɛ