Nyɔŋmɔ Maŋtsɛyeli Lɛ He Anɔkwale Lɛ
Yesu tsɔɔ esɛɛnyiɛlɔi lɛ ni amɛsɔle akɛ: “Wɔ-Tsɛ ni yɔɔ ŋwɛi, ogbɛ́i lɛ he atse. O-Maŋtsɛyeli lɛ aba. Afee nɔ ni osumɔɔ yɛ shikpɔŋ lɛ nɔ, tamɔ bɔ ni afeɔ yɛ ŋwɛi lɛ.” (Mateo 6:9, 10) Mɛni ji Nyɔŋmɔ Maŋtsɛyeli lɛ? Mɛni etsuɔ? Ni mɛni hewɔ esa akɛ wɔsɔle ni eba lɛ?
Yesu ji Nyɔŋmɔ Maŋtsɛyeli lɛ nɔ Maŋtsɛ.
Luka 1:31-33: “Obaawo lɛ gbɛ́i akɛ Yesu. Ebaatsɔ mɔ ko ni he hiaa waa, ni abaatsɛ lɛ Mɔ Ni Nɔ Kwɔ Fe Fɛɛ lɛ Bi, ni Yehowa Nyɔŋmɔ kɛ etsɛ David maŋtsɛ sɛi lɛ baahã lɛ, ni ebaaye Yakob shĩa lɛ nɔ Maŋtsɛ kɛya naanɔ, ni e-Maŋtsɛyeli lɛ baŋ naagbee.”
Maŋtsɛyeli lɛ ji sane titri ni Yesu shiɛ.
Mateo 9:35: “Yesu yakpa maji kɛ akrowai lɛ fɛɛ anɔ, ni etsɔɔ nii yɛ amɛkpeehei lɛ, ni eshiɛ Maŋtsɛyeli lɛ he sane kpakpa lɛ, ni etsa helai srɔtoi fɛɛ kɛ gbɔmɔtsoŋ gbɔjɔmɔi srɔtoi fɛɛ.”
Yesu tsɔɔ ekaselɔi lɛ okadi ko ni kɛ́ amɛna lɛ ebaatsɔɔ akɛ etsɛŋ, Maŋtsɛyeli lɛ baaba.
Mateo 24:7: “Ni jeŋmaŋ baate shi awo jeŋmaŋ, ni maŋtsɛyeli baate shi awo maŋtsɛyeli, ni hɔmɔ kɛ shikpɔŋhosomɔi baaba yɛ heihei.”
Ŋmɛnɛ lɛ, Yesu kaselɔi lɛ miishiɛ Maŋtsɛyeli lɛ he sane yɛ jeŋ fɛɛ.
Mateo 24:14: “Ni abaashiɛ Maŋtsɛyeli lɛ he sane kpakpa nɛɛ yɛ shikpɔŋ lɛ nɔ fɛɛ koni akɛye jeŋmaji lɛ fɛɛ odase, ni no sɛɛ lɛ naagbee lɛ baaba.”