SANEBIMƆI NI BIBLIA LƐ EHÃ HETOO
Mɛni hewɔ gbalɛi yɔɔ Biblia lɛ mli lɛ?
Mɛni hewɔ biblia lɛ wie nibii ni yaa nɔ yɛ wɔgbii nɛɛ mli lɛ he lɛ?—Luka 21:10, 11.
Gbalɛi ni yɔɔ fitsofitso babaoo yɛ Biblia lɛ mli fɛɛ. Adesa ko nyɛŋ atsɔɔ nibii fɛɛ ni baaba wɔsɛɛ lɛ mli fitsofitso. No hewɔ lɛ, Biblia mli gbalɛi ni baa mli lɛ hãa wɔnáa nɔmimaa akɛ Biblia lɛ ji Nyɔŋmɔ Wiemɔ.—Kanemɔ Yoshua 23:14; 2 Petro 1:20, 21.
Biblia mli gbalɛi ni eba mli momo lɛ hãa wɔnáa hemɔkɛyeli yɛ Nyɔŋmɔ mli. (Hebribii 11:1) Amɛhãa wɔnáa nɔmimaa hu akɛ, shi ni Nyɔŋmɔ ewo akɛ wɔbaaná shihilɛ kpakpa wɔsɛɛ lɛ baaba mli. No hewɔ lɛ, Biblia mli gbalɛi hãa wɔnáa hiɛnɔkamɔ ni mli wa.—Kanemɔ Lala 37:29; Romabii 15:4.
Mɛɛ gbɛ nɔ Biblia mli gbalɛi yeɔ ebuaa wɔ?
Gbalɛi komɛi bɔɔ Nyɔŋmɔ tsuji kɔkɔ ní amɛtsu saji komɛi ahe nii. Akɛ nɔkwɛmɔnɔ lɛ, be ni Kristofoi ni hi shi yɛ klɛŋklɛŋ afii 100 lɛ mli lɛ na akɛ gbalɛi komɛi eba mli lɛ, amɛshi Yerusalem. Sɛɛ mli be ni akpãtã maŋtiase lɛ hiɛ akɛni amɛteŋ mɛi babaoo kpoo Yesu hewɔ lɛ, no mli lɛ, Kristofoi lɛ eshi kɛyahi he ko shɔŋŋ ní yɔɔ shweshweeshwe.—Kanemɔ Luka 21:20-22.
Ŋmɛnɛ lɛ, gbalɛi ni eba mli lɛ tsɔɔ akɛ, etsɛŋ, Nyɔŋmɔ Maŋtsɛyeli lɛ baakpata adesai amaŋtsɛyelii kɛ nɔyelii fɛɛ hiɛ. (Daniel 2:44; Luka 21:31) No hewɔ lɛ, ehe miihia ni mɔ fɛɛ mɔ afee nibii ni baahã Yesu Kristo, ni ji Maŋtsɛ ni Nyɔŋmɔ ehala lɛ lɛ akpɛlɛ enɔ.—Kanemɔ Luka 21:34-36.